1. Orhienbro ọghoghanren ọgo yẹ ihworho ephian ine bru?

 IHWORHO inyenana i vwo orhienbro ọghoghanren aye ine bru. Aye ina hobọtua i Jehova ro rhiẹ Osun otọrakpọ ọrhẹ idjuwu na, gbinẹ aye ina hobọtua ọvwreghrẹn i Jehova, Echu ro rhiẹ Dẹbolo? Odjẹ owu yọ havwiẹ. Orhienbro aye i bruru ephian, ọnọ hobọte arhọ i bẹmẹdẹ aye obaro na. (Matt. 25:31-33, 46) Uvwre “ukpokpogho rode na,” aye ine simirhọ yanghene aye ina ghwọghọ.—Rev. 7:14; 14:9-11; Ezek. 9:4, 6.

2. (a) Me yẹ Hebrews 10:35-39 ọ ha urhebro rẹn ọwan ne ru? (b) Marhẹ ọbe i Revelation ono ru ha userhumu rẹn ọwan?

² Se Hebrews 10:35-39. Orhianẹ wu brorhiẹn wu na hobọtua usuon i Jehova, wu brorhiẹn rọ gbare. Vwana, wu vwo omwemẹ wu na ha userhumu rẹn awọrọ djẹ odjẹ rọ gbare. Omarana, wu na sabu ha iyẹnrẹn rọ ha ọbe i Revelation ha userhumu rẹn aye. Ọbe ọrana, o dje rẹn ọwan oborẹ ọnọ phia rẹn eri kparehaso i Jehova, ọ ji hunute ebrurhọ ihworho ri vwo atamwu kpahen usun i Jehova ina riamerhiẹn. O fori ne yono kpahen irhomẹmro eghoghanren enana. We rhe ruẹ omaran, ọnọ lẹrhuọ vwo omwemẹ ọgbogbanhon wu na ga i Jehova rhọ. Habaye, ana sabu ha oborẹ e yonorin ha userhumu rẹn awọrọ brorhiẹn rọ gbare ji nyamwuie.

3. Me ye ne yono kpahen uvuẹn urhomu-ẹmro ọnana?

³ Uvuẹn urhomu-ẹmro ọnana, ene yono kpahen enọ enana: Me yọ nọ phia rẹn eri hobọtua usun i Jehova? Habaye, me yọ nọ phia rẹn eri djẹ odjẹ aye ina hobọtua aranmo rọ djoma ọbobare na, ra ta kpahen uvuẹn ọbe i Revelation?

4. Ẹko ọgo yẹ ọnyikọ John ọ mẹrẹnren rhẹ Jesu obẹ odjuwu?

⁴ Uvuẹn emena arudo, ọnyikọ John nọ mẹrẹn ẹko eva ra hobọtua usun i Jehova, ri na ji riamerhen ebrurhọ arhọ i bẹmẹdẹ. Ẹko ọrukaro na o vwo uchunu ihworho 144,000. (Rev. 7:4) A hare aye nẹ otọrakpọ na, nẹ aye i rhiẹ usuẹn igọmẹti yanghene Uvie rhẹ Jesu obẹ odjuwu. Jesu ọrhẹ aye yi ne sun otọrakpọ na. (Rev. 5:9, 10; 14:3, 4) Uvuẹn emena arudo na, John ọ mẹrenrẹn aye ri mevi kẹrẹ i Jesu uvuẹn oberun Ugbenu Zion rọ ha odjuwu.—Rev. 14:1.

5. Me yọ nọ phia phẹrẹkpẹ rẹn awan 144,000 ri hẹrhẹre?

⁵ Nẹ ọke inyikọ na rhe, a sanọ ihworho buebun nẹ aye i rhiẹ usuẹn 144,000 na. (Luke 12:32; Rom. 8:17) Ọrẹn, a ta rẹn John taghene uchunu ihworho krẹn ra djẹha, yi ne rhirhiẹ ye uvuẹn otọrakpọ na uvwre ẹdẹ oba na. Enana ri rhiẹ “eri hẹrhẹre” na, ina mẹrẹn “oka” ekwerhọ rọ kẹta mie i Jehova, bọmọke ukpokpogho rode na ọnọ tonrhọ. (Rev. 7:2, 3; 12:17) Orho ru, uvuẹn ukpokpogho rode na, era djẹha ri hẹrhẹre ni ne riẹ odjuwu ya homaba usuẹn 144,000 ri fuevwan te ẹdẹ uhwu ri ha odjuwu ne. Oboran yẹ aye ine lele i Jesu sun uvuẹn Uvie Osolobrugwẹ.—Matt. 24:31; Rev. 5:9, 10.

6-7. (a) Ẹko ọrọrọ ọgo yi John ọ ji mẹrẹn, me ye yono kpahen aye? (b) Mesoriẹ oborẹ ọ ha i Revelation urhomu-ẹmriẹn 7 ono rhiẹ emru ọdamẹ rẹn era djẹha ri hẹrhẹre ọrhẹ “otu gbidigbidi na”?

⁶ Ọke ri John ọ mẹrẹn ẹko ri ne riẹ odjuwu hin, nọ ji mẹrẹn “otu gbidigbidi.” Ọrẹ ovẹnẹ rhẹ awan 144,000 na, a vwa sabu kele uchunu ẹko ọnana-a. (Rev. 7:9, 10) Me ye yono kpahen aye? Na ta rẹn John: “Enana yẹ ihworho ri nyavrẹn ukpokpogho rode na, aye i fọnrhọn iwun aye jeghwai ruẹ aye fon uvuẹn ọbara Ọmogegede na ne.” (Rev. 7:14) Ọke aye i rhe vwo usimirhọ nẹ ukpokpogho rode na ne, “otu gbidigbidi” enana, ni ne nyerien bẹmẹdẹ uvuẹn otọrakpọ na ji riamerhen obọdẹn ebrurhọ buebun.—Ps. 37:9-11, 27-29; Prov. 2:21, 22; Rev. 7:16, 17.

⁷ Sẹ a djẹre ọwan ne riẹ odjuwu yanghene ana daji otọrakpọ na, ana sabu mẹrẹn oma ọwan uvuẹn idjedje rọ ha ọbe i Revelation urhomu-ẹmriẹn 7? O fori ne ru te omaran. Ọrana ghini ọke omamerhomẹ rẹn ẹko eva ri rhiẹ idibo i Jehova! Oma ọnọ dabu merhen ọwan taghene a djẹ odjẹ ra na hobọtua usuon i Jehova. Me yẹ emru ọrọrọ kpahen ukpokpogho rode na, yẹ ọbe i Revelation ọ ta rẹn ọwan?—Matt. 24:21.

8. Marhẹ ukpokpogho rode na ono ru tonrhọ, marhẹ ọnọ hobọte ihworho buebun lele?

⁸ Jerẹ oborẹ e yonorin uvuẹn urhomu-ẹmro rọ vrẹnren na, igọmẹti akpọ na ina kparehaso Babylon Ọrode na phẹrẹkpẹ, ro rhiẹ okugbe ẹga efian ọrẹ akpọ na. (Rev. 17:16, 17) Irueruo ọnana yo no rhiẹ ọtonrhọ ukpokpogho rode na. Ọrẹn, ọnana ọnọ lẹrhẹ ihworho buebun brorhiẹn aye ina ga i Jehova? Ẹjo. Ukpomaran, Revelation urhomu-ẹmriẹn 6 ọ tare taghene uvwre ọke ọgbogbanhon ọrana, eri vwa ga i Jehova, ina ya guọlọ usimi nẹ abọ igọmẹti re suẹn ọrhẹ ileyi erẹ akpọ na, ra ha dje igbenu. Ra mẹriẹn taghene aye i hobọtua Uvie Osolobrugwẹ-ẹ, Jehova ono ni aye taghene aye evwreghrẹn yen.—Luke 11:23; Rev. 6:15-17.

9. Marhẹ idibo i Jehova ine ru vẹnẹ awọrọ uvwre ukpokpogho rode na, me yo no nerhumie rhe?

 ⁹ Itiọrurhomẹmro, idibo i Jehova ri fuevwan ina vẹnẹ awọrọ uvwre ọke ọgbogbanhon ọrana uvuẹn ukpokpogho rode na. Aye yi ne rhiẹ ẹko ihworho ri hẹrhẹre ra ga i Jehova, ri ji ten aye ina hobọtua “aranmo rọ djoma na.” (Rev. 13:14-17) Emevigbanhon aye ọnọ lẹrhẹ evwan biomu evwreghrẹn i Jehova omamọ. Omarana, okugbe egbamwa sansan ni na kparehaso ihworho i Jehova uvuẹn akpọ na ephian. Baibol o se ekwẹre ọgbogbanhon ọnana ẹkparehaso Gog ọrẹ Magog.—Ezek. 38:14-16.

10. Jerẹ oborẹ e dje rhẹ Revelation 19:19-21, marhẹ i Jehova ọnọ kpahenrhọ ẹkparehaso ihworho yi lele?

¹⁰ Marhẹ i Jehova ọnọ kpahenrhọ ẹkparehaso ọvwiavwia ọnana lele? Jehova ọrhọ ta: “Ekwẹre ọgbogbanhon mẹ ono rierun.” (Ezek. 38:18, 21-23) Revelation urhomu-ẹmriẹn 19 o dje kpahen oborẹ ọnọ phia. Jehova ono dje Ọmọyen nọ yọ chochọn ihworho Enẹyen, ji ghwọghọ evwreghrẹn aye. Jesu ọrhẹ “isodja ri ha odjuwu”—emakashe ri fuevwan ọrhẹ awan 144,000 yi na wian kugbe wọnrọn haso i Gog ọrẹ Magog. (Rev. 17:14; 19:11-15) Me yo no nerhumie rhe? Oghwọghọ phẹlẹphẹlẹ ọrẹ ituakpọ ọrhẹ ikoko ephian ri kparehaso i Jehova!—Se Revelation 19:19-21.

11. Me yẹ irueruo rọmai ghanren rọ nọ phia uvuẹn ọbe i Revelation?

¹¹ Ha ẹhẹn roro oborẹ oma ono ru ituakpọ ri fuevwan ri vabọ oghwọghọ evwreghrẹn i Jehova! Uvwre ọke ọrana, ituakpọ ine vwo obọdẹn aghọghọ! Dedevwo, aghọghọ ono rhirhiẹ odjuwu ọke arha ghwọghọ Babylon Ọrode na hin, ọrẹn o vwo emru ọrọrọ rọ nọ yẹ ọwan aghọghọ ọduado. (Rev. 19:1-3) Itiọrurhomẹmrọ, ọrana yẹ irueruo rọmai ghanren uvuẹn ọbe i Revelation—“orọnmo ọrẹ Ọmogegede na.”—Rev. 19:6-9.

12. Jerẹ oborẹ ọ ha Revelation 21:1, 2, ọkiọgo ye ne ruẹ orọnmo Ọmogegede na?

¹² Ọkiọgo ye ne ruẹ orọnmo na? Ọsoso awan 144,000 ine riẹ odjuwu vwẹre bọmọke ene ki fiuvweri Armageddon na. Ọrẹn, orhiẹ ọke ọrana ye ne ruẹ orọnmo Ọmogegede na-a. (Se Revelation 21:1, 2.) Ene ruẹ orọnmo Ọmogegede na ọke erhe fiuvweri Armageddon hin, habaye, evwreghrẹn i Jehova ephian i nirien ne.—Ps. 45:3, 4, 13-17.

13. Me yọ nọ phia ọke re ruẹ orọnmo Ọmogegede na?

¹³ Me yọ nọ phia ọke re ruẹ orọnmo Ọmogegede na? Jerẹ oborẹ orọnmo o kuẹ ọhworhare ọrhẹ ọmase kugbe, omaran orọnmo ọnana ra ha dje udje, ono ku Orodje na ro rhiẹ Jesu Kristi kugbe “aniẹ,” ro rhiẹ awan 144,000 na. Irueruo ọghoghanren ọrana, yo no rhiẹ ọtonrhọ igọmẹti ọkpokpọ ro no sun otọrakpọ na ẹgbukpe 1,000.—Rev. 20:6.

14-15. Me yẹ Revelation urhomu-ẹmro 21 ọ ha awan 144,000 na dje? (Ni ifoto obaro ọbe na.)

¹⁴ Ọrọ ha kpahiẹn, Revelation irhomu-ẹmriẹn 21 ọ ha awan 144,000 na dje amwa ro vwo erhumu omamọ re se “Jerusalem Ọkpokpọ.” (Rev. 21:2, 9) Amwa ọnana o vwo usimo atita 12 ri vwo “odẹ inyikọ awan 12 ọrẹ Ọmogegede na.” Mesoriẹ ọrana o rhiẹ emru omamerhomẹ rẹn John? Fọkime ọ mẹrẹn odẹ ye ra ya rhẹ  owu usuẹn atita erana. Ọrana ghini uphẹn ọduado!—Rev. 21:10-14; Eph. 2:20.

¹⁵ O vwo amwa ọrọrọ ra na sabu ha dje amwa ọnana-a. O vwo udumu ọduado ra ha obọdẹn oro ru, anurẹsẹ 12 ra ha obọdẹn itama ru, ugbomoghwa ọrhẹ isimo ra ha itita eghoghanren ru, ọrhẹ ovwanvwọn sansan ri dabu serhọ ovwan. (Rev. 21:15-21) Ọrẹn, ọ họhọre taghene emru o vrẹ! Djokarhọ oborẹ i John ọ ta rẹn ọwan: “Mia mẹrẹn oghwa ẹga vwọye-e, fọkime Jehova Osolobrugwẹ, ro rhiẹ Ọrọmaigbanhon na, yẹ oghwa ẹga ye, omaran ji te Ọmogegede na. Amwa na, ọ guọlọ uvo yanghene ubiamo ro no lo mwuie-en, fọkime odidi Osolobrugwẹ yo lo mwuien, Ọmogegede na yẹ ukpẹ ye.” (Rev. 21:22, 23) Eri rhiẹ Jerusalem Ọkpokpọ na ine leli Jehova rhirhiẹ ye. (Heb. 7:27; Rev. 22:3, 4) Omarana, Jehova ọrhẹ Jesu yẹ oghwa ẹga amwa ọrana.

16. Me yẹ ituakpọ ine rhiẹromẹrẹn uvwre Isuensun Ẹgbukpe Uriusionrin ọrẹ Uvie Osolobrugwẹ?

¹⁶ Orhiẹ emru omamerhomẹ rẹ era djẹha na ine roro kpahen amwa ọrana. Ọrẹn, eri vwo ifiẹrorhọ aye ine rhirhiẹ otọrakpọ na, i ji vwo oborẹ ọsoriẹ aye ine roro kpahiẹn. Uvwre Isuensun Ẹgbukpe Uriusionrin ọrẹ Uvie Osolobrugwẹ, Jerusalem Ọkpokpọ na ọnọ rhua ebrurhọ buebun rhiẹ otọrakpọ na. John ọ mẹrẹn ebrurhọ erana ra zẹ phia jerẹ “urhie ro vwo ame arhọ.” Obonẹ ọrhẹ obonẹ urhie na i vwo “erhan arhọ” ri vwo ẹbe ra na “ha simi ihworho egbamwa na.” (Rev. 22:1, 2) Ituakpọ ephian re nyerẹn ọke ọrana, ine vwo uphẹn aye ina mẹrẹn erere nẹ ekwakwa irhorhomu erana. Bibiesuọn bibiesuọn, ituakpọ ephian ri huvwele i Jehova ni ne rhiẹ ihworho ri gbare. O rho vwo emiamo, yanghene omiamiamo ọrhẹ amioviẹ ojẹriọ ghwomara-an.—Rev. 21:3-5.

17. Jerẹ oborẹ Revelation 20:11-13 o djephia, ayọmo yi na mẹrẹn erere nẹ Isuensun Ẹgbukpe Uriusionrin na?

¹⁷ Ayọmo yi na mẹrẹn erere nẹ ekwakwa irhorhomu erana? Ọrukaro, otu gbidigbidi ri simirhọ nẹ Armageddon, kugbe emọ re ne vwiẹ uvuẹn akpọ ọkpokpọ na. Ọrẹn, Revelation urhomu-ẹmriẹn 20 o ji ve taghene ana rhomu eri hwuru na. (Se Revelation 20:11-13.) “Evwata” ri hwu vrẹn ne ọrhẹ “eri vwe rhiẹ evwata,” ri vwe vwo  uphẹn aye ina dabu yono kpahen Jehova, ina rharhumu rhiẹ akpọ. (Acts 24:15; John 5:28, 29) Ọnana no mevirhọ taghene ana rhọmọ i kohworho kohworho rhiẹ akpọ uvwre Isuensun Ẹgbukpe Uriusionrin na? Ẹjo. A rhọmọ ihworho ri dumu ọkon tiẹn uphẹn aye ina ga i Jehova bọmọke aye i ki hwu rhiẹ akpọ-ọ. Aye a ha uphẹn na djephia taghene aye i mwuovwan aye ine nyerẹn bẹmẹdẹ uvuẹn akpọ i Paradaisi-i.—Matt. 25:46; 2 Thess. 1:9; Rev. 17:8; 20:15.

18. Marhẹ otọrakpọ na ono rhirhiẹ uvuẹn obẹta ẹgbukpe 1,000 na?

¹⁸ Uvwre obẹta ẹgbukpe 1,000 na, ihworho ephian re nyerẹn uvuẹn otọrakpọ na, i rhiẹ ihworho ri gbare ne. Orho vwo ohworho ro nyerẹn rọ nọ rioja ọdandan rọ ha riuku mie Adam ghwomara-an. (Rom. 5:12) Ọke ọrana ephien ọdandan Adam o nirien phẹlẹphẹlẹ ne. Nyoma izede ọnana, ere rhirhiẹ otọrakpọ na ni na ‘rhiẹ akpọ,’ fọkime aye i rhiẹ ihworho ri gbare uvuẹn obẹta ẹgbukpe 1,000 na ne.—Rev. 20:5.

19. Mesoriẹ o fo ne vwo ọdamuni rọ kẹta?

¹⁹ Ọwan i rheri taghene Jesu ọ tiẹn omẹdamu Echu rọ nọ lẹrhiẹ tiẹn emevigbanhon ọnẹyen. Ọ sẹrorẹ atamwuiẹn udabọ ọdamuni. Ọrẹn, ituakpọ ephian ri gbare i mwuegbe aye ine ruẹ omaran ọke Echu ọrhọ damu aye ni? Owuowọnwan ọnọ sabu kpahenrhọ onọ ọrana rẹn omayen ọke erhe tiobọnu Echu nẹ ukpotọ ro vwo vwoba na uvuẹn ehion ẹgbukpe 1,000 na ne. (Rev. 20:7) Ihworho ri fuevwan uvwre ọdamuni rọ kẹta ọnana yi ne vwo arhọ i bẹmẹdẹ, ji riamerhen obọdẹn ugbomọphẹ. (Rom. 8:21) Eri homaba ẹkparehaso Echu ina ghwọghọ bẹmẹdẹ, omaran ji te Dẹbolo ọrhẹ ikpodje yi.—Rev. 20:8-10.

20. Marhẹ oma o ruo kpahen aruẹmẹrẹn irhorhomu enana ri ha ọbe i Revelation?

²⁰ Marhẹ oma o ruruo ọke we yono kpahen eghwẹmro ezẹko uvuẹn ọbe i Revelation na? Oma ọ vwọ merhuọn taghene we nyerẹn uvwre ọke aruẹmẹrẹn enana e ruẹgba? Ọnana ọ vwọ lẹrhuọ guọlọ ha use rẹn awọrọ nẹ aye i homaba ọwan ha ogame rọ fonron rẹn Jehova? (Rev. 22:17) Ọke ra dabu roro kpahen ekwakwa irhorhomu ri na phia obaro na, ne vwo omwemẹ re ne koro ẹmro ọnyikọ John, rọ tare: “Isẹ! Rhe, Ọrovwori Jesu.”—Rev. 22:20.