1. Ewene ego ye ruru uvuẹn ẹghware re ruẹ kukpe kukpe ọrẹ 2023?

 UVUẸN ẹghware re ruẹ kukpe kukpe ọrẹ 2023, a ne ruẹ ewene ezẹko rhẹ oborẹ ọwan i vwo imwẹro kpahen bi, ne ji ruẹ aghwoghwo ezẹko ri merhoma kpahen owian aghwoghwo ọwan. Jerẹ udje, e yonorin taghene ihworho ezẹko ine ji vwo uphẹn aye ina hobọtua ihworho i Jehova arha ghwọghọ Babylon Rode hin ne. E ji yono taghene ghwai nẹ ubiamo i November 2023 nyarhẹn, ighwoghwẹmro i rha nẹ iyẹnrẹn inọke, ẹrharhumu bru, ividio, ọrhẹ ẹbe aye i tiobọnu uvuẹn owian aghwoghwo-o. Aruẹ ewene enana no mevirhọ taghene owian aghwoghwo na ọrhọ ghanren yanghene rhiẹ emru okpakpa te oborẹ ọ havwọ bi-i? Ẹjo!

2. Mesoriẹ owian aghwoghwo na o rhiẹ emru okpakpa, rẹ ẹdẹ oba na o tiẹkẹrẹ ne na? (Mark 13:10)

² Rẹ ẹdẹ oba na o tiẹkẹrẹ ne na, okpakpa rọ ha owian aghwoghwo na nọ gbanhanrhọ. Mesoriẹ? Fọkime ọke rọ hẹrhẹre orho bu-un. Roro kpahen oborẹ i Jesu ọ ta kpahen owian aghwoghwo na uvuẹn ẹdẹ ri koba na. (Se Mark 13:10.) Lele oborẹ ọ ha uvuẹn ọbe i Matthew, Jesu ọ tare taghene ene ghwoghwo iyẹnrẹn esiri Uvie na lele ọsoso ekete re rhirhiẹ uvuẹn otọrakpọ na, bọmọke “oba na” ọnọ ki rhe. (Matt. 24:14) Ẹmro ọrana ọ rionbọrhọ oghwọghọ akpọ ọkon ọnana rẹ Echu o suẹn. Jehova o bru “ẹdẹ ọrhẹ unọke” rẹ ekwakwa enana ina homaphia ne. (Matt. 24:36; 25:13; Acts 1:7) Ẹdẹ owuowu re nyerẹn  vrẹn, o tiẹ ọwan kẹrẹ ẹdẹ ọrana. (Rom. 13:11) Omarana, ene rhe ghwoghwo bọmọke ẹdẹ oba na ọnọ ki rhe.

3. Me yo mwu ọwan ghwoghwo?

³ Erhe roro kpahen owian aghwoghwo na, no mwu ọwan roro kpahen onọ ọghoghanren ọnana: Mesoriẹ ọwan e ghwoghwo iyẹnrẹn esiri na? Ẹguọlọ yo mwu ọwan ghwoghwo. Oborẹ ọwan e vwobọrhọ owian aghwoghwo na lele, o djephia sẹ e vwo ẹguọlọ kpahen iyẹnrẹn esiri na, ihworho, ọrọ mai ghanren ẹguọlọ kpahen Jehova ọrhẹ odẹ ye. Jena ta kpahen aye owuowu.

ẸGUỌLỌ RE VWO KPAHEN IYẸNRẸN ESIRI NA YO MWU ỌWAN GHWOGHWO

4. Marhẹ oma o ruẹ ọwan erhe rhon omamọ iyẹnrẹn?

⁴ Wu karorhọ oborẹ oma o ruruo ọke we rhon omamọ iyẹnrẹn—jerẹ uvwiẹ ohworho ekruon, yanghene owian ra yẹruọ? Itiọrurhomẹmro, oma ọ merhenruọn wu na ta rẹn ihworho ekruon ọrhẹ igbehian kpahiẹn. Omaran oma o ji ruo ọke we rhon iyẹnrẹn esiri Uvie Osolobrugwẹ—ro rhiẹ iyẹnrẹn rọ mai merhoma kparobọ?

5. Marhẹ oma o ruruo ọke we tu yono urhomẹmro rọ ha uvuẹn i Baibol na? (Ni ifoto na.)

⁵ Roro kpahen oborẹ oma o ruruo ọke we tu yono urhomẹmro rọ ha uvuẹn i Baibol na. Wu yonorin taghene Ọsọ obẹ odjuwu o vwo ẹguọlọ kpahuọn, ọ ji guọlọ ne wu rhiẹ usuẹn ekrun ọnẹyen ra ga ye, wu yonorin taghene ono fiobarhọ omiamiamo ọrhẹ ojẹriọ, ji rhọmọ ihworho wu vwo ẹguọlọ kpahen ri hwuru rhiẹ akpọ ọkpokpọ—ọrhẹ erọrọ. (Mark 10:​29, 30; John 5:​28, 29; Rom. 8:​38, 39; Rev. 21:​3, 4) Irhomẹmro erana i lẹrhẹ oma merhuọn omamọ. (Luke 24:32) Wu vwo ẹguọlọ kpahen oborẹ we yono, omarana no mwuruon ta rẹn awọrọ kpahiẹn!—Haye vwanvwọn Jeremiah 20:9.

6. Me wu yono nẹ udje Ernest ọrhẹ Rose?

⁶ Roro kpahen udje ọnana. Omizu  ọhworhare owu re se Ernest b ọ ha ẹgbukpe ikpe ọke ọsẹ ye o hwu. Ernest nọ tare: “Ni mie roro: ‘O riẹ odjuwu ne? Gbinẹ o vwo rho nyerẹn ghwomara-an?’ Ni mia rioma kpahen emọ erọrọ ri ji vwo ọsẹ.” Ernest no riẹ usin ọsẹ ye kẹdẹkẹdẹ, ji sighwẹ nẹrhomo: “Osolobrugwẹ biko, mi guọlọ rhe ekete ọsẹ mẹ ọ havwọ.” Ẹgbukpe 17 a vrẹn, na ha uyono i Baibol mwu rẹn Ernest, no ji rhiabọ dedie. Oma ọ merhenriẹn omamọ ọke ro yono taghene eri hwuru e rhe emru owuorowu-u, aye i họhọ ohworho rọ merhẹn omerhẹn okokokodo, o ji yono kpahen ive ẹrhọmọnuhwu obaro na. (Eccl. 9:​5, 10; Acts 24:15) Nọ mẹrẹn ẹkpahenrhọ rẹn enọ re kpokpie ẹhẹn ẹgbukpe buebun ne! Oma ọ merhẹn Ernest kpahen oborẹ o yonorin uvuẹn i Baibol na. Aniẹ re se Rose, nọ homaba ye uvuẹn uyono na, no ji vwo ẹguọlọ kpahen oborẹ o yono na. Aye ni bromarhame uvuẹn ẹgbukpe 1978. Aye ne ghwoghwo rhẹ oruru rẹn ihworho ekrun aye, igbehian aye ọrhẹ awọrọ ri guọlọ kerhọ. Ernest ọrhẹ Rose ni ha userhumu rẹn ihworho ri vrẹn 70 bromarhame ji rhiẹ idibo Jehova.

7. Me yọ phia orhianẹ ẹguọlọ re vwo kpahen urhomẹmro i Baibol na ọ gbanhonron omamọ? (Luke 6:45)

⁷ Itiọrurhomẹmro, ẹguọlọ wu vwo kpahen urhomẹmro i Baibol na ọrhọ gbanhon ne, no no mwuo ta rẹn awọrọ kpahiẹn. (Se Luke 6:45.) Ọwan ni na họhọ idibo i Jesu erukaro na ọke aye a ta: “Ame i sabu dobọjẹ rẹ ame ina ta kpahen ekwakwa rẹ ame i mẹrẹnren ji rho-on.” (Acts 4:20) Ẹguọlọ re vwo kpahen urhomẹmro na, no no mwu ọwan ghwoghwo rẹn ihworho buebun uvuẹn ekete sansan.

ẸGUỌLỌ RE VWO KPAHEN IHWORHO YO MWU ỌWAN GHWOGHWO

8. Mesoriẹ ọwan e ghwoghwo iyẹnrẹn esiri na rẹn awọrọ? (Se ekpeti na “ Ẹguọlọ wu Vwo Kpahen Ihworho—Ono Mwuo Ruẹ Idibo.”) (Ni ifoto na.)

⁸ Ọwan i vwo ẹguọlọ kpahen ihworho jerẹ i Jehova ọrhẹ Ọmọyen. (Prov. 8:31; John 3:16) Ọwan e ji dje arodọmẹ rẹn ihworho ri vwe “rhe Osolobrugwẹ“ ọrhẹ eri vwe vwo “ifiẹrorhọ.” (Eph. 2:12) Aye i vwo ebẹnbẹn buebun, ọwan ni rhe vwo oborẹ ọnọ ha userhumu rẹn aye—nọyẹ, iyẹnrẹn esiri Uvie Osolobrugwẹ. Ẹguọlọ ọrhẹ arodọmẹ re vwo kpahen aye, yo mwu ọwan ghwoghwo iyẹnrẹn esiri na rẹn aye. Ọnana nọ nọ lẹrhẹ aye vwo omamerhomẹ, ifiẹrorhọ, ọrhẹ uphẹn aye ine vwo “obọdẹn akpọ” obaro  na—nọyẹ arhọ i bẹmẹdẹ uvuẹn akpọ ọkpokpọ na.—1 Tim. 6:19.

9. Orhetio ọgo yẹ ọwan a haphia kpahen obaro na, mesoriẹ? (Ezekiel 33:​7, 8)

⁹ Ẹguọlọ re vwo kpahen ihworho yo ji mwu ọwan tiẹ aye orhọ kpahen oghwọghọ akpọ ọkon ọnana. (Se Ezekiel 33:​7, 8.) Aro ihworho ephian ọ dọn ọwan, omaran ji te ihworho ekrun ọwan ri vwa ga i Jehova. Oborẹ ihworho buebun e nyerakpọ aye lele vwana, o djephia taghene aye e rhe oborẹ ọ sa obaro na-a—nọyẹ, “ukpokpogho rode ra vwa ji mẹrẹn aruiẹ dẹ nẹ ọtonrhọ akpọ na me te ọke ọnana, ẹjo, ọrhọ phia ghwomara-an.” (Matt. 24:21) Ọwan i guọlọre nẹ aye i rhe kpahen oborẹ ọnọ phia uvwrọke ẹzenguon ọrana—nọyẹ oghwọghọ ẹga efian ọrhẹ akpọ ọkon ọnana uvuẹn uvweri Armageddon. (Rev. 16:​14, 16; 17:​16, 17; 19:​11, 19, 20) Oma ọnọ merhẹn ọwan orhianẹ ihworho i kpahenrhọ owian aghwoghwo na, ji brorhiẹn aye ina ga Jehova vwana. Me yọ nọ phia rẹn ihworho ri vwa kerhọ ọke ọnana, tobọ te ihworho ekrun ọwan re vwo ẹguọlọ kpahen?

10. Mesoriẹ o rhiẹ emru okpakpa ne rhe ghwoghwo kpahen oborẹ ọnọ phia phẹrẹkpẹ?

¹⁰ Jerẹ oborẹ e yonorin uvuẹn urhomu-ẹmro rọ vrẹnren, Jehova yo no brorhiẹn sẹ ono simi ihworho ri ghwẹriẹre, ọke aye i rha mẹrẹn oghwọghọ i Babylon Rode. Omarana, no fori ne rhe ghwoghwo rhẹ okpakpa. Roro kpahen ọnana: Oborẹ ọwan i ghwoghwo rẹn aye vwana, yẹ aye ina karorhọ ọke ọrana. (Haye vwanvwọn Ezekiel 33:33.) Ọkezẹko, aye i rha karorhọ oborẹ ọwan i ghwoghwo rẹn aye, yo no mwu aye homaba ọwan ga i Jehova. Jerẹ oborẹ ọhworhare onyẹ Philippi rọ hẹrote ekanron na ọ ghwẹriẹre ọke rọ mẹrẹn ‘otọre na ro kpoghori gbangbanhon,’ ọkezẹko ihworho ri vwe kwe ghwẹriẹ vwana, ine ji wene ẹhẹn, aye i rha mẹrẹn oghwọghọ i Babylon Rode.—Acts 16:​25-34.

ẸGUỌLỌ RE VWO KPAHEN JEHOVA ỌRHẸ ODẸ YE YO MWU ỌWAN GHWOGHWO

11. Marhẹ e ru yẹ Jehova ujiri, ọghọ, kugbe omẹgbanhon? (Revelation 4:11) (Ni ifoto na.)

¹¹ Oborẹ ọ mai ghanren ro mwu ọwan ghwoghwo iyẹnrẹn esiri na, yẹ ẹguọlọ re vwo kpahen Jehova ọrhẹ odẹ ye. Owian aghwoghwo na izede owu rẹ ọwan e jiri Jehova. (Se Revelation 4:11.) Ọwan i kwerhọ ye taghene Jehova o mwuovwan rọ nọ ha ujiri, ọghọ, kugbe omẹgbanhon na. A ha ujiri ọrhẹ ọghọ vwe Jehova, ọke erhe ghwoghwo rẹn ihworho taghene ọye yọ “ma ekwakwa ephian”  ji fọkiẹ ọhọre ọnẹyen yẹ ọwan e nyerẹn. Ọwan a yẹ ye omẹgbanhon ọwan—nyoma ra ha ọke, iriẹn oma, ọrhẹ oborẹ e vwori ghwoghwo iyẹnrẹn esiri na. (Matt. 6:33; Luke 13:24; Col. 3:23) Ẹguọlọ yo mwu ọwan ta rẹn awọrọ kpahen Osolobrugwẹ. Ọnana no ji mwu ọwan ta rẹn aye kpahen odẹ ye ọrhẹ oborẹ o mevirhọ. Mesoriẹ?

12. Marhẹ ene ru ruẹ odẹ i Jehova fon uvuẹn owian aghwoghwo na?

¹² Ẹguọlọ re vwo kpahen Jehova yo mwu ọwan ruẹ odẹ ye fuan. (Matt. 6:9) Ọnana no mevirhọ taghene, ene je ihworho rhe kpahen efian rẹ Echu ọ mọren banren odẹ i Jehova. (Gen. 3:​1-5; Job 2:4; John 8:44) Arha ha uvuẹn aghwoghwo, o fori ne vwo omwemẹ ra na chochọn odẹ i Jehova, ji lẹrhẹ ihworho rhe urhomẹmro na. Ọwan i guọlọre nẹ ihworho ephian i rhe taghene Jehova yẹ ẹguọlọ, isuensuon ọnẹyen yọ mai gba ji rhiẹ ọsoso, habaye, Uvie yi ono ji fiobarhọ ojẹriọ ephian, ji rhua ufuoma ọrhẹ omamerhomẹ vwe ituakpọ. (Ps. 37:​10, 11, 29; 1 John 4:8) Izede owu re ne ruẹ odẹ i Jehova fon, yẹ ọrẹ ana chochọn odẹ ye uvuẹn owian aghwoghwo. Oma ọnọ ji merhen ọwan fọkime ọwan e nyerẹnmwu odẹ ra ha se ọwan. Izede ọgo?

13. Mesoriẹ o rhiẹ emru ọghọ re ne se ọwan Iseri Jehova? (Isaiah 43:​10-12)

¹³ Jehova o seri ọwan ne, ne rhiẹ “iserie.” (Se Isaiah 43:​10-12.) Ẹgbukpe ezẹko ri vrẹnren, ileta owu ro nẹ obẹ Ugboma Usuon na rhe nọ tare: “Ọghọ rọ maido ra na sabu yẹ ohworho, yẹ ọrẹ ene se yi Oseri Jehova.” c Mesoriẹ a ta omaran? Roro kpahen udje ọnana. Wu rha guọlọ nẹ ohworho o mevi wẹn sẹ  oseri uvuẹn oghwa ẹghware, wu na vi djẹ ohworho wu rheri ji hẹroso, rọ ji ta urhomẹmro, neneyo awọrọ i sabu kwerhọ oborẹ ọ tare. Omaran ọ ji havwọ, fọkime Jehova ọ hẹroso ọwan, nọ djẹrẹ ọwan ne rhiẹ Iserie ri ne mevi chochọn yen, taghene ọye yẹ Osolobrugwẹ urhomẹmro na. Fọkiẹ odẹ ọnana ra ha se ọwan, na damoma ha uphẹn ephian ta rẹn awọrọ kpahen odẹ ye, ji dje rẹn ihworho taghene oborẹ Echu ọ ta kpahen Jehova efian. Nyoma ọnana, ọwan ne nyerẹnmwu odẹ ra ha se ọwan, ro rhiẹ Iseri Jehova!—Ps. 83:18; Rom. 10:​13-15.

ỌWAN INE RHE GHWOGHWO BỌMỌKE OBA NA ỌNỌ KI RHE

14. Ekwakwa omamerhomẹ ego yi na phia obaro na?

¹⁴ Oma ọ jẹnjẹn ọwan re ne rhe kpahen oborẹ ọnọ phia obaro na! Nyoma userhumu i Jehova, ọwan i fiẹrorhọ taghene ihworho buebun ina homaba ọwan ga i Jehova, bọmọke ukpokpogho rode na ọnọ ki tonrhọ. Habaye, o ji rhiẹ emru omamerhomẹ taghene uvwrọke ukpokpogho rode na—ihworho buebun ine vwo uphẹn rẹ aye ine nẹ uvuẹn akpọ Echu ọnana rhe, ji homaba ọwan jiri Jehova!—Acts 13:48.

15-16. Me ye ne rhe ruẹ, marhẹ ene ruie jiri te?

¹⁵ Ọrẹn, owian buebun ọ ha otọre vwana. Ọwan i vwo uphẹn re ne ghwoghwo iyẹnrẹn esiri Uvie na lele otọrakpọ na—ro rhiẹ owian ra na ja vwanriẹn. Ọke owu ọvo na, ana ji rha ha orhetio rẹn ihworho. O fori nẹ ihworho i rhe taghene oba akpọ ọkon ọnana o tiẹkẹrẹ phẹphẹrẹ. Ọke ẹzeguon na orho te ne, aye ni ne rhe taghene urhomedje rẹ ọwan i ghwoghwo vrẹn ne, o nẹ obẹ i Jehova rhe.—Ezek. 38:23.

¹⁶ Vwana, orhienbro ọgo yo fori ne bru? O fori ne rhe dje ẹguọlọ phia—omarana, jenẹ ẹguọlọ re vwo kpahen iyẹnrẹn esiri na, ihworho, ọrhẹ ọrọ mai ghanren, ẹguọlọ re vwo kpahen Jehova ọrhẹ odẹ ye—no mwu ọwan rhe vwobọrhọ owian aghwoghwo na rhẹ okpakpa, oruru, ọrhẹ omwemẹ, bọmọke i Jehova ọnọ ki ta taghene, “O te ne!”