“Ohworho ro Tiobọnẹ Ghwologhwolo ọnọ Mẹrẹn Ebrurhọ”
IZOBO e ze emru kirighwo uvuẹn ogame urhomẹmro. Emọ Israel i ha eranmo ze izobo, a jeghwai rhe Ilele Kristi rhiẹ ihworho re “ze izobo ujiri.” Ọrẹn, o vwo aruo izobo erọrọ ri Jehova o vwo omamerhomẹ kpahen. (Heb. 13:15, 16) Uvuẹn idje ra samọ yono kpahen na, ana mẹrẹnvwrurhe taghene aruo izobo enana a rhua ebrurhọ ọrhẹ omamerhomẹ sa.
Hannah ọ fuevwan ga i Jehova, ọrẹn, ọ ji sabu vwiẹ ọmọ-ọ. Hannah no vive uvuẹn ẹrhomo taghene ọrhọ sabu vwiẹ ọmọ, ọnọ “haye rẹn i Jehova ọsoso enyerakpọ ọnẹyen.” (1 Sam. 1:10, 11) Ọke oru, Hannah nọ mẹrevwan, no vwiẹ ọmọ, odẹ ọmọ na i Samuel. Ọke i Hannah o le i Samuel enye hin, nọ kpareriẹ riẹ i tabernacle na jerẹ oborẹ o veri. Jehova nọ ha ebrurhọ rẹn Hannah fọkiẹ uruemru ro vwori rọ ha edamẹ i Jehova karọ. Jehova nọ ha ebrurhọ rẹn Hannah, nyoma ro vwiẹ emọ isionrin erọrọ, habaye, Samuel no ji rhiẹ ọmẹraro ọrhẹ ohworho rọ ya ekete i Baibol ezẹko.—1 Sam. 2:21.
Jerẹ Hannah ọrhẹ i Samuel, Ilele Kristi buebun i vwo uphẹn rẹ aye ina homakpahontọre ha ẹga riẹn. Jesu o vive taghene ana ha ebrurhọ rẹn ọwan fọkiẹ izobo re zeri uvuẹn ogame ọnẹyen.—Mark 10:28-30.
O vwo ọmase owu ọke inyikọ na rẹ odẹ ye o rhiẹ i Dorcas, ra dabu rhe fọkiẹ orhorhomu ọrhẹ uruemru re tiobọnẹ rẹn awọrọ. Ọrẹn, Dorcas “no kpomurun jeghwai hwu.” Ọnana nọ lẹrhẹ ọsoso ukoko na mwuomarhọ. Ọke idibo na e rhon taghene i Peter ọ ha uvwre avwaye, aye ni rẹ i Peter nọ rhe phẹphẹrẹ. Itiọrurhomẹmro, oma ọ ghini merhen ihworho na ọke i Peter ọ rhọmọ i Dorcas nẹ uhwu—ro ji rhiẹ iyẹnrẹn ẹrhọmọnuhwu ọrukaro rẹ ọnyikọ o ruru! (Acts 9:36-41) Itiọrurhomẹmro, izobo ri Dorcas o zeri ọ ji sẹrẹ i Jehova ẹro-o. (Heb. 6:10) A sẹrorẹ uruemru ghwologhwolo ri Dorcas o djephia rhẹ i Baibol na, nọ sabu rhiẹ omamọ udje ra na hẹrokele inyenana.
Ọnyikọ Paul o ji dje omamọ udje phia, nime ọ dabu ha ọke ọrhẹ oborẹ o vwori ruiruo ghwologhwolo. Uvuẹn ọbe rọ ya vwe imizu ri ha uvuẹn i Corinth, Paul nọ tare: “Harẹn omẹmẹ, mi ghwọghọ i kemru kemru mi vwori fọkiẹ are.” (2 Cor. 12:15) Paul ọ tare taghene arha homakpahontọre wian rẹn awọrọ ọ rhua evwan ẹvuọn, ebrurhọ ọrhẹ ekwerhọ i Jehovah sa, enana yẹ ekwakwa ri mai ghanren.—Acts 20:24, 35.
Itiọrurhomẹmro, oma ọnọ merhen i Jehova orhianẹ a ha ọke ọrhẹ omẹgbanhon ọwan ha userhumu rẹn awọrọ jeghwai kpare ogame ọnẹyen rierun. Ọrẹn, o ji vwo izede erọrọ ra na sabu hobọtua owian aghwoghwo Uvie na? Ee! Erhe ti ẹguọlọ edjephia nie, ana ji sabu họghọ rẹn i Jehova nyoma re ne toro itetoro ro nẹ ẹhẹn rhe. Itetoro enana ya hobọtua oghọn sansan uvuẹn owian aghwoghwo na, jerẹ, userhumu ra harẹn imishọnari, ọrhẹ awọrọ ri homakpahontọre ra wian uvuẹn oghọn sansan. Habaye, nyoma itetoro ro nẹ ẹhẹn rhe, ya sabu hẹrote awuiruo erhianrhian, ẹbe kugbe ividio sansan, userhumu edjephia ọke ukpokpogho ọrhẹ Aghwẹlẹ Uvie ọrhẹ Aghwẹlẹ emẹvwa ẹ bọn. Itiọrurhomẹmro, e vwo imwẹro taghene “Ohworho ro tiobọnẹ ghwologhwolo ọnọ mẹrẹn ebrurhọ.” Itiọrurhomẹrmo, ọwan a họghọ rẹn i Jehova orhianẹ e tiobọnu ekwakwa eghoghanren re vwori riẹn.—Prov. 3:9; 22:9