1-2. (a) Lele oborẹ ọ ha uvuẹn Ephesians 6:16, mesoriẹ a guọlọ “ikpọfia ọduado ọrẹ esegburhomẹmro”? (b) Enọ ego ya na kpahenrhọ?

WU VWO “ikpọfia ọduado ọrẹ esegburhomẹmro”? (Se Ephesians 6:16.) O vwo ẹfro-o, wu vwori. Jerẹ oborẹ ikpọfia o simi ugboma na, omaran esegburhomẹmro ọnọ o simuo nẹ irueruo akpọ na, jerẹ ọfanrhiẹn, ozighi ọrhẹ kemru kemru ri vwe serhọ rhẹ ọhọre Osolobrugwẹ.

² Fọkime ọwan e nyerẹn uvuẹn “ẹdẹ ri koba na,” ọwan ina rha dẹrughwaroghwẹ ẹkparehaso. (2 Tim. 3:1) Marhẹ wu ne ru dabu ni ikpọfia ọrẹ esegburhomẹmro ọnọ sẹ ọgbanhonron? Marhẹ wu ne ru dabu tanbọmwu ikpọfia ọnọ? Jene yono kpahen enọ erana.

3. Marhẹ yẹ isodja a sẹrorẹ ikpọfia aye lele, mesoriẹ?

³ Uvuẹn ọke i Baibol na, isodja i vwo ikpọfia ra ha ophianron aranmo rhurhu. Isodja na a ha ọfugbo hionron ikpọfia na neneyo ọ sabu sẹrorẹ ophianron aranmo na jeghwai hẹrote eghọn ra ha iteru ru nẹ aye i je mwu akogba. Isodja na ọrhọ mẹrẹnvwrurhe taghene ekete o biomurun uvuẹn ikpọfia ye, nọ kwaphiẹ ye ogege neneyo ọ sabu mwuegbe hẹrhẹ uvweri ro no fi ọke rọ sa. Marhẹ yẹ udje ọnana o ru surhobọmwu esegburhomẹmro ọwan?

4. Mesoriẹ o fo ne wu rha hẹrote ikpọfia esegburhomẹmro ọnọ, marhẹ wu ne ruie lele?

⁴ Jerẹ isodja ọke ahwanren, o fori ne wu rhe ni ikpọfia esegburhomẹmro ọnọ sua jeghwai rha hẹrote yi, neneyo wu sabu mwuegbe hẹrhẹ ẹkparehaso ephian ra sa. Re rhiẹ Ilele  Kristi na, ọwan e fiuvweri ẹhẹn, a wọnrọn haso evwreghrẹn ọwan ri rhiẹ ikpodje na. (Eph. 6:10-12) Ohworho ọrọrọ ọ sabu sẹrorẹ ikpọfia ọrẹ esegburhomẹmro ọnọ wẹ-ẹn. Marhẹ ono ru mwuo ẹro taghene esegburhomẹmro ọnọ ọ gbanhon te ne, ọke edamuni i rha rhe? Ọrukaro, wu na vi nekpẹn userhumu mie Osolobrugwẹ nyoma ẹrhomo. Orho ru, gba lẹrhẹ i Baibol na kpọvi neneyo wu sabu vwo aruẹ ikẹro ri Jehova ọ ha nuo. (Heb. 4:12) Baibol na ọrhọ ta: “Hẹroso i Jehova rhẹ ọsoso ọmudu ọnọ, wu na hẹroso irherhe omobọ ọnọ-ọ.” (Prov. 3:5, 6) Vwana, gbe roro kpahen erhirhiẹ owu rọ phiare ro vwo jijiri na uvuẹn akpenyerẹn ọnọ, ọrhẹ oborẹ wu ru kpahiẹn. Jerẹ udje, wu vwo ebẹnbẹn igho dẹ ne? Wu karorhọ ive i Jehova rọ ha uvuẹn Hebrews 13:5, rọ tare: “O vwo ọke owuorowu mi na nyajẹ owẹwẹ vwo-o, mi jeghwai zẹ jẹ owẹwẹ vwo-o”? Ive ọrana ọ yẹruọ imwẹro taghene Jehova ọnọ ha userhumu wẹn? Orho rhiomaran, ọrana o djephia taghene wa dabu hẹrote ikpọfia ọrẹ esegburhomẹmro ọnọ.

5. Wu rhe ni esegburhomẹmro ọnọ so, me wu na sabu mẹrẹnvwrurhe?

⁵ Ọnọ sabu gbo unu oborẹ wu na mẹrẹn wu rha dabu ni esegburhomẹmro ọnọ so. Wu na sabu mẹrẹn ekete we seriotọre wu wa ji djokarhọ bi. Jerẹ udje, wu na sabu mẹrẹnvwrurhe taghene ọfiamu ọgbogbanhon, efian ọrhẹ ẹhẹn ro seriotọre ọ ghwọghọ esegburhomẹmro ọnọ ne. Ọnana ọrhọ phia wẹn ne, marhẹ wu ne ru sẹrorẹ esegburhomẹmro ọnọ nẹ ẹkuọn erọrọ?

6. Aruẹ ọfiamu ego ya na sabu dje taghene i serhọ?

⁶ Aruẹ ọfiamu ezẹko i serhọ. Jerẹ udje, o fori ne roro kpahen oborẹ ene ru lẹrhẹ oma merhen i Jehova ọrhẹ Jesu. (1 Cor. 7:32) Erhe ruẹ ọdandan ọghwaghwa, ne roro kpahen oborẹ ene ru kwaphiẹ onyerẹnkugbe ọwan rhẹ Osolobrugwẹ rhọ. (Ps. 38:18) Ọwan i vwo ọfiamu re ne ruẹ oborẹ ọnọ lẹrhẹ oma merhen esa yanghene ane ọwan, jeghwai hẹrote edamẹ ekrun ọwan ọrhẹ imizu ukoko na.—1 Cor. 7:33; 2 Cor. 11:28.

7. Lele oborẹ ọ ha uvuẹn Proverbs 29:25, mesoriẹ o vwo fo na zofẹn ituakpọ?

⁷ Obọreva ye, ọfiamu ọgbogbanhon ọnọ sabu ghwọghọ esegburhomẹmro ọwan. Jerẹ udje, ana sabu rhe brudu kpahen oborẹ ene ru vwo emaren ọrhẹ iwun. (Matt. 6:31, 32) Omarana, ana sabu tẹnrovi oborẹ ene ru vwo ekwakwa ugboma rhọ. Ana sabu vwo ẹguọlọ kpahen igho. Arha ha uphẹn rẹn ọrana nọ phia, esegburhomẹmro re vwo kpahen Jehova no no seriotọre, onyerẹnkugbe ọwan nọ nọ ghwọghọ. (Mark 4:19; 1 Tim. 6:10) Ana sabu serhọ ufi ọfiamu ọgbogbanhon ọrọrọ, nọyẹ ọrẹ ene vwo ekwerhọ awọrọ. Ana sabu rha zofẹn ra na kparehaso ọwan yanghene ha ọwan djechẹẹ, ghwẹ ọrẹ ene ruẹ oborẹ i Jehova o vwo utuoma kpahen. Na sabu sẹrorẹ oma ọwan nẹ imwofẹn ọrana, ana vi rẹ i Jehova nọ yẹ ọwan esegburhomẹmro ọrhẹ uduefigbere ra guọlọre na ha din ebẹnbẹn.—Se Proverbs 29:25; Luke 17:5.

8. Me yo fori ne ru kpahen efian re rhonrin?

⁸ Echu ro rhiẹ “ọsẹ efian” na, ọ ha ihworho ro suẹn mọrenfian banren i Jehova ọrhẹ imizu uvuẹn ukoko na. (John 8:44) Jerẹ udje, inyikọ efian e fomu ẹbe efian phia, jeghwai mọrenfian kpahen ukoko i Jehova uvuẹn itanẹti yanghene nyoma ekpetughe ọrhẹ izede erọrọ. Efian erana i ha usuẹn “ibigẹn” rẹ Echu  ọ ha ruiruo. (Eph. 6:16) Me yo fori ne ru orhianẹ ohworho ọ ta rẹn ọwan kpahen aruẹ efian enana? Ọwan i kerhọ aye-e! Mesoriẹ? Fọkime ọwan i vwo esegburhomẹmro kpahen i Jehova jeghwai hẹroso imizu ukoko na. Itiọrurhomẹmro, ọwan i vwa kerhọ inyikọ efia-an. O fo nẹ emru owuorowu, tobọ te oruru ọgbogbanhon nọ lẹrhẹ ọwan lele aye frẹfro-o.

9. Marhẹ ẹhẹn ro seriotọre ono ru hobọte ọwan?

⁹ Ẹhẹn ro seriotọre ọnọ sabu lẹrhẹ esegburhomẹmro ọwan seriotọre. A sabu kpariroro vrẹn ebẹnbẹn omobọ re vwori-i. O dje ọhọ phia erhe ruẹ omara-an. Ọkezẹko ẹhẹn ọwan ọnọ sabu seriotọre. Ọrẹn, o fo na lẹrhẹ ebẹnbẹn re vwori no suẹn iroro ọwa-an. Erhe rue omaran, ekwakwa irhorhomu ri Jehova o ve rẹn ọwan ọnọ sabu sẹrẹ ọwan ẹro. (Rev. 21:3, 4) Ọke ọrana, ẹhẹn ro seriotọre no no kpe oruru ọwan jeghwai lẹrhẹ ọwan fiobọrhotọre. (Prov. 24:10) Ọrẹn, e vwe jenẹ ọnana ọ phia rẹn ọwa-an.

10. Me wu yono nẹ ileta ro imizu ọmase owu ọ yare?

¹⁰ Roro kpahen oborẹ omizu ọmase owu obẹ United States o ru sẹrorẹ esegburhomẹmro ọnẹyen, ọke esa ye o kpomu emiamo ọgbogbanhon. Uvuẹn ileta rọ ya vwe Esiri Ukoko, ọrhọ ta: “Erhirhiẹ ame ọ vuọn rhẹ ukpokpogho ọrhẹ ẹhẹn ro seriotọre, ọrẹn ifiẹrorhọ ame ọgbanhonron. Oma ọ merhenren mẹ omamọ kpahen iyẹnrẹn ame e se rọ bọn esegburhomẹmro ọrhẹ ẹhẹn ame gbanhan. Itiọrurhomẹmro, ame i ghini guọlọ ọkpọvi ọrhẹ urhebro enana. Ọ ha userhumu rẹn ame sabu ruẹ riarorhọ, jeghwai ha userhumu rẹn ame vwe edirin edamuni rẹ Echu ọ ha vwe ame.” Ẹmro omizu ọnana o yonirin ọwan taghene ana sabu fi ẹhẹn ro seriotọre kparobọ! Izede ọgo? Ni edamuni enọ taghene aye e nẹ obẹ Echu sa. Mẹrẹnvwrurhe taghene Jehova yẹ Esiri urhebro. Omarana, vwo ọdaremẹro kpahen ẹkwaphiẹrhotọre i Jehova ọ haphia.

11. Na sabu rhe sẹ esegburhomẹmro ọwan ọ gbanhonron, enọ ego yo fori na nọ oma ọwan?

 ¹¹ Wu mẹrẹn ekete owuorowu uvuẹn ikpọfia esegburhomẹmro ọnọ rọ guọlọ ẹruete ne? Wu sabu kẹnoma rẹn ọfiamu ọgbogbanhon uvwre ibiamo ezẹko ne? Wu tiẹn oruru wu na kerhọ jeghwai lele inyikọ efian frẹfro kpahen efian aye e kerabọ ye? Wu sabu nyerẹn ghele ẹhẹn ro seriotọre ne? Orho rhiomaran, wa dabu hẹrote esegburhomẹmro ọnọ. Ọrẹn, o fori na dabu rhe kpahen ena erọrọ rẹ Echu ọ ha ruiruo. Jene yono kpahen owu usuẹn aye.

12. Me yẹ ufiuvwele ekwakwa ugboma ọnọ sabu lẹrhẹ ọwan ru?

¹² Ufiuvwele ekwakwa ugboma ọnọ sabu lẹrhẹ esegburhomẹmro ọwan seriotọre, jeghwai lẹrhẹ ọwan ja wian ekete omẹgbanhon ọwan o teri rẹn i Jehova. Ọnyikọ Paul ọrhọ ta: “O vwo ohworho owuorowu rọ wian owian isodja ro fiomarhọ eyẹsuọ ọrẹ akpọ ọnana-a, neneyo ọ sabu vwo ekwerhọ ohworho ro firie rhẹ owian isodja na.” (2 Tim. 2:4) Itiọrurhomẹmro, a vwa ha uphẹn rẹn isodja i Rome nẹ aye i wian owian ọrọrọ-ọ. Me yọ nọ sabu phia orhianẹ isodja ọ nyalele ẹkwaphiẹrhotọre ọrana-a?

13. Mesoriẹ isodja o vwo fiomarhọ eyẹsuọ akpọ na?

¹³ Roro kpahen erhirhiẹ ọnana. Ẹko isodja owu ni ha ọsoso urhiọke na yono oborẹ a ha odan ọlọkọ wọnrọn lele, ọrẹn isodja owu ọ ha avwaye-e. Isodja ọrana o sere emaren rhẹ obẹ eyi. Uvuẹn owuọwọn, isodja na na dabu ni ewun owọnren aye sua jeghwai lọ odan ọlọkọ aye. Ọrẹn ọrọ rhẹ emaran na, nọ dabu mwuegbe emaren rọ nọ rhẹ ẹdẹ ọreva ye. Urhiọke ẹdẹ ọreva ye, evwreghrẹn aye ni kparehaso aye kpregede. Isodja ọgo yo no mwuegbe hẹrhẹ uvweri na jeghwai lẹrhẹ oma merhen olori ọnẹyen? Ọrọmo usuẹn isodja na wu guọlọre no mevi kẹruọ ọke uvweri na, ọro mwuegbe gbinẹ ọrọ rhẹ emaren na?

14. Re rhiẹ isodja Kristi na, me yẹ ọwan e nẹ ghanghanren?

 ¹⁴ Jerẹ omamọ isodja, oborẹ ọ mai ghanren rẹn ọwan yẹ ọrẹ ana lẹrhẹ oma merhen i Jehova ọrhẹ Kristi. Ọnana ọ ghanren ghwẹ kemru kemru akpọ Echu ọnọ sabu yẹ ọwan. Ọwan a damoma ha ọsoso ọke ọrhẹ omẹgbanhon ọwan ga i Jehova, jeghwai rha sẹrorẹ ikpọfia esegburhomẹmro ọwan ọrhẹ ekwakwa owọnren erọrọ ri nẹ obẹ Osolobrugwẹ rhe.

15. Orhetio ọgo yi Paul ọ yẹrẹ ọwan, mesoriẹ?

¹⁵ O fori na rha dẹrẹ ọke ephian! Mesoriẹ? Ọnyikọ Paul ọ ha orhetio phia taghene “otu ri guọlọ fe,” ine “beghe nẹ esegburhomẹmro na.” (1 Tim. 6:9, 10) Ẹmro na “beghe,” o mevirhọ taghene ana sabu rha tẹnrovi ekwakwa erọrọ ri vwe fiemru rẹn ọwan. Ọke ọrana, na na sabu vwo “ojemẹ akpa rọ suẹ ẹkuọn.” Ukperẹ ana ha uphẹn rẹn ojemẹ erana nẹ aye i ruẹ ọmudu ọwan, ana vi karorhọ taghene Echu yọ ha aye ruiruo nọ lẹrhẹ esegburhomẹmro ọwan seriotọre.

16. Enọ ego yẹ iyẹnrẹn rọ ha uvuẹn Mark 10:17-22 ono mwu ọwan roro kpahen?

¹⁶ Gba haye taghene wu vwo igho wu na sabu ha dẹ ekwakwa ugboma buebun. Ọ sọre na dẹ ekwakwa ephian ra guọlọre ri vwe ghini fiemru rẹn ọwan? Ẹjo.  Ọrẹn, roro kpahen enọ enana: Ọrhọ tobọ rhianẹ e vwo igho ra na dẹ emru, e vwo ọke ọrhẹ omẹgbanhon ra na haye ruiruo jeghwai hẹrote aye? Ọwan i vwo ẹguọlọ ọgbogbanhon kpahen ekwakwa ugboma re vwori? Ẹguọlọ re vwo kpahen ekwakwa ugboma ọnọ sabu lẹrhẹ ọwan vwo uruemru idama rọ tiẹn use i Jesu, no ru riarorhọ uvuẹn ogame Osolobrugwẹ? (Se Mark 10:17-22.) Itiọrurhomẹmro, oma ọnọ merhen ọwan erhe nyerẹn akpọ rọ lọhọre jeghwai ha ọke ọrhẹ omẹgbanhon ọwan ruẹ ọhọre i Jehova!

17. Me yọ nọ jọ sẹrẹ ọwan ẹro?

¹⁷ O fo nọ sẹrẹ ọwan ẹro taghene ọwan e fiuvweri-i, o ji fo na dabu rhe mwuegbe kẹdẹkẹdẹ. (Rev. 12:17) Imizu ọwan uvuẹn ukoko na i sabu lele ọwan kpare ikpọfia esegburhomẹmro ọwa-an. Ọwan yi ne vi ru esegburhomẹmro ọwan gbanhonrhọ.

18. Mesoriẹ isodja ọke ahwanren a dabu tanbọmwuẹ ikpọfia aye?

¹⁸ Ọke ahwanren isodja orho fiudugbere fiuvweri, ne brọghọ rhọye oma. Ọrẹn, ofa ọnọ ruiẹ orhianẹ ọ sabu kpare ikpọfia ye te oghwa-a. Ọgba irherhe i Rome owu re se Tacitus nọ yare: “Emru ofa rẹn isodja orhianẹ ọ zẹ jẹ ikpọfia ye vwo.” Ọnana yọ lẹrhẹ isodja damoma sẹrorẹ ikpọfia aye.

19. Marhẹ ene ru tanbọmwu ikpọfia esegburhomẹmro ọwan?

¹⁹ Ọwan ina sabu tanbọmwu ikpọfia esegburhomẹmro ọwan nyoma re riẹ uyono ukoko kẹdẹkẹdẹ, ọrhẹ ọrẹ ene ghwoghwo kpahen odẹ i Jehova ọrhẹ Uvie yi rẹn awọrọ. (Heb. 10:23-25) Habaye, ọwan a nẹrhomo, se i Baibol na kẹdẹkẹdẹ, jeghwai ha ọkpọvi ọrhẹ urhebro rọ ha uvuien ruiruo. (2 Tim. 3:16, 17) Ọke ọrana, orho vwo ekwakwa owọnren owuorowu rẹ Echu ọ hasuẹ ọwan rọ nọ sabu ha ẹkuọn vwe ọwan bẹmẹdẹ-ẹ. (Isa. 54:17) “Ikpọfia ọduado ọrẹ esegburhomẹmro” ọwan ọnọ sẹrorẹ ọwan. Ọwan ine fiudugbere mevigbanhon rhẹ imizu ọwan. Ọwan ni na sabu sẹrorẹ esegburhomẹmro ọwan kẹdẹkẹdẹ, ọrọ mai ghanren ene vwo uphẹn re ne rhirhiẹ obọrẹ i Jesu ọke ro no fi Echu ọrhẹ ihworho re lelie kparobọ.—Rev. 17:14; 20:10.