UVUẸN ọke ahwanren, idibo ya hẹrọte oghwa yanghene enyerẹn oghwa ọwọrọ. Ọkezẹko ẹmro i Hebrew ọrhẹ Greek ra rhian rhẹ “odibo” ọnọ sabu mevirhọ oniruo yanghene ọrọ hẹrote enyerẹn oghwa.

Ọke i Joseph ro rhiẹ ọmọ i Jacob, ọ ha erhirhiẹ ọvrẹn uvuẹn Egypt, Joseph no rhiẹ oniruo rọ hẹrote oghwa oninie. Itiọrurhomẹmro, oninie ro rhiẹ onyẹ Egypt “nọ nyaji kemru kemru ro vwori rẹn i Joseph.” (Gen. 39:2-6) Ọke oru, ri Joseph o vwo omẹgbanhon usun uvuẹn Egypt ne, nọ ji ha ohworho mwu nọ hẹrote oghwa ye.—Gen. 44:4.

Uvuẹn ọke i Jesu, ihworho ri vwo etọre e rhirhiẹ emwa eduado ri seri nẹ ekete aye i ruẹ ikebi rhọ. Omarana, ihworho ri vwo etọre na, na ha iniruo mwuẹ neneyo aye i hẹrote ihworho ra wian kẹdẹkẹdẹ uvuẹn ikebi enana.

Ayọmo yi mwuovwan ri na hẹrote eghwa awọrọ? Columella ro rhiẹ ọyẹbe uvuẹn i Rome ọke ahwanren, nọ ha urhebro phia taghene o fori nẹ ọvrẹn ra ha mwu no rhiẹ oniruo yanghene ọrọ nọ hẹrote oghwa, o rhiẹ “ohworho rọ dabu gbromarhọ owian, rọ ji dabu rhe kpahiẹn.” Ono ji rhiẹ ohworho “ro roro rẹn awọrọ, ro ji gbẹro rhotọre wian owian yen vabọ ọkon.” Nọ habaye: “Ọnana jẹ oborẹ a ji mai guọlọ mie yi, o vwo roro taghene ọye o rhe i kemru kemru-u, o fori no ji vwo ẹhẹn ro no yono rhọ.”

Baibol na ọ ha ẹmro na odibo, dje irueruo ezẹko ra homaphia uvuẹn ukoko Ilele Kristi na. Jerẹ udje, ọnyikọ Peter ọ ha urhebro rẹn Ilele Kristi nẹ aye i ha ena rẹ Osolobrugwẹ ọ yẹrẹ aye “gbodibo harẹn owuowọnwan, jerẹ emamọ idibo ọrẹ ẹghẹlẹ ọphẹ Osolobrugwẹ.”—1 Pet. 4:10.

Jesu ọ tobọ ha udje odibo na ruiruo uvuẹn udje rọ ha uvuẹn Luke 16:1-8. Habaye, uvuẹn aruẹmẹrẹn kpahen oka ro djephia taghene Jesu o rhiẹ orodje ne, ọye nọ yẹ idibo yi imwẹro taghene ọnọ ha “ọvrẹn ra hẹrosua ro ji vwo ẹghwanren na,” yanghene “odibo ra hẹrosua” mwu. Owian kirighwo rẹ oniruo ọnana ono wian, yẹ ọrẹ ono tiobọnu emaren ẹhẹn rẹn idibo i Kristi uvwre ọke oba na. (Matt. 24:45-47; Luke 12:42) Oma ọ merhenren ọwan taghene a ha usuẹn ihworho ra mẹrẹn erere nẹ ẹbe ukoko na sansan rẹ ọvrẹn ra hẹrosua na o tiobọnẹ uvuẹn ọsoso akpọ na.