1-2. Mesoriẹ ana sabu roro taghene Jehova ọ vwọ kpahanrhọ ẹrhomo ọwa-an?

 “JENẸ oma ọ dabu merhuọn fọkiẹ i Jehova, ọye no no ruẹ edamẹ ọmuduo ha wẹn.” (Ps. 37:4) Ọrana obọdẹn ive! Ọrẹn, o fori ne fiẹrorhọ taghene Jehova ọnọ yẹ ọwan kemru kemru ra nekpẹn yen mie yi ogege? Mesoriẹ ana sabu nọ aruẹ onọ ọrana? Jene roro kpahen erhirhiẹ enana. Omizu ọmase rọ vwọ ji rọnmọ, ọ nẹrhomo kpahen Isukuru Ighwoghwẹmro Uvie na rọ guọlọ nya. Ọrẹn, ẹgbukpe buebun i nyavrẹn ne, a ha use riẹ-ẹn. Idama rọ nẹrhomo vwe i Jehova no simie nẹ emiamo ọgbogbanhon owu, neneyo ọ sabu ga rhọ uvuẹn ukoko na. Ọrẹn, emiamo na o vwo rhomẹ-ẹ. Emiemọ ri rhiẹ Ilele Kristi a nẹrhomo nẹ ọmọ aye ọ daji uvuẹn urhomẹmro na. Ọrẹn, ọmọ aye no brorhiẹn rọ nọ dobọ ogame i Jehova ji.

² Ọkezẹko, wu ji vwo oborẹ wa nekpẹn yen mie i Jehova, ọrẹn ọ ji yọ-ọ. Fọkiẹ ọrana, wu na sabu brorhiẹn taghene Jehova ọ kpahanrhọ ẹrhomo ezẹko, ọrẹn ọ vwọ kpahanrhọ enọ-ọ. Yanghene wu na sabu roro taghene wu ruẹ oborẹ ọsọre. Omizu ọmase owu re se Janice b o vwo iroro ọrana. Ọye ọrhẹ esa ye i nẹrhomo kpahen omwemẹ aye ina ga uvuẹn Oghọn Ukoko. Nọ tare: “O mwurun mẹ ẹro taghene ana ha use rẹn ame riẹ Oghọn Ukoko phẹrẹkpẹ.” Ọrẹn, ibiamo ni dẹrẹrhiẹ ẹgbukpe ezẹko, ẹgbukpe buebun i vrẹn ne a ji ha use rẹn aye-e. Janice nọ tare: “Ne mi mwuomarhọ, ẹhẹn mẹ nọ ji tagha. Ni mie roro sẹ mi ruẹ oborẹ o biomu i Jehova evwan. Mi nẹrhomo omamọ ni Jehova ọ yẹ mẹ ọkpọvi. Mesoriẹ ọ vwọ ji kpahenrhọ ẹrhomo mẹ?”

3. Me ye ne yono kpahen uvuẹn urhomu-ẹmro ọnana?

³ Ọkezẹko, ana sabu rhe roro sẹ Jehova ọ kerhọ ẹrhomo  ọwan. Idibo i Jehova ọke ahwanren i vwo aruẹ iroro ọrana dede. (Job 30:20; Ps. 22:2; Hab. 1:2) Me yọ nọ sabu yọ imwẹro taghene Jehova ọnọ kpahenrhọ ẹrhomo enọ? (Ps. 65:2) Na sabu kpahenrhọ onọ ọrana, jena kpahenrhọ enọ enana vwẹre: (1) Me yi Jehova ọnọ sabu ru rẹn ọwan? (2) Me yi Jehova ọ guọlọ mie ọwan? (3) Mesoriẹ o fo ne wene ekwakwa ezẹko ra nẹrhomo kpahan?

4. Lele oborẹ ọ ha Jeremiah 29:​12, me yi Jehova o veri ro no ruo?

⁴ Jehova o veri taghene ọnọ kerhọ ẹrhomo ọwan. (Se Jeremiah 29:12.) Jehova o vwo ẹguọlọ kpahen idibo yi ra fuevwan, omarana ọnọ kerhọ ẹrhomo aye. (Ps. 10:17; 37:28) Ọrẹn, ọnana o mevirhọ taghene ono ruẹ kemru kemru ọwan i nekpẹn ye-en. Ana hẹrhẹ te akpọ ọkpokpọ na vwẹre, na ki sabu mẹrẹn ẹkpahenrhọ rẹn ekwakwa ezẹko ra nekpẹn yen.

5. Me yi Jehova o roro kpahan ọke rọ kerhọ ẹrhomo ọwan? Dje yi fiotọre.

⁵ Jehova o roro kpahen oborẹ ẹrhomo ọwan i ru surhobọmwu ọhọriẹ. (Isa. 55:​8, 9) Owu usuẹn ekwakwa ri Jehova ọ guọlọ ru, yẹ ọrẹ ituakpọ ine vwo okugbe hobọtua usun ọnẹyen. Ọrẹn, Echu ọ tare taghene ituakpọ ine vwo omamerhomẹ aye ọvo i rhe sun oma aye. (Gen. 3:​1-5) No djephia taghene Dẹbolo yọ mọrenfian, Jehova nọ ha uphẹn rẹn ituakpọ nẹ aye i sun oma aye. Ọrẹn, usuon ituakpọ yọ suẹ ebẹnbẹn buebun re rhiẹromẹrẹn inyenana. (Eccl. 8:9) E vwẹruọ ye ne taghene Jehova o tiẹ ọsoso ebẹnbẹn enana nie vwana-a. Orho ti aye nie, ezẹko ina sabu roro taghene usuon ituakpọ ghini omamiẹ, taghene ọ sabu kwaphiẹ ebẹnbẹn ituakpọ rhọ.

6. Mesoriẹ ono mwu ọwan ẹro taghene Jehova ono ruẹ oborẹ ọgbare ro ji serhọ ọke ephian?

⁶ Jehova ọnọ sabu kpahenrhọ aruẹ ẹrhomo owu izede sansan. Jerẹ udje, ọke Orodje Hezekiah o kpomẹ gbangbanhon, nọ nẹrhomo vwe i Jehova nọ ha userhumu riẹn no simirhọ. Ọrẹ ẹkpahenrhọ, Jehova no simirien. (2 Ki. 20:​1-6) Ọrẹn, ọke ọnyikọ Paul ọ nẹrhomo vwe i Jehova no tiẹ ‘uvwẹn rọ ha ugboma yen’ nie, ọkezẹko aruẹ emiamo owu, Jehova o tiẹ obẹnbẹn na nie-e. (2 Cor. 12:​7-9) Habaye, ji roro kpahen udje ọnyikọ James ọrhẹ Peter. Orodje Herod ọ guọlọ kpe aye awanva hwuẹ. Ukoko na ni nẹrhomo fọkiẹ Peter ọrhẹ James. Ọrẹn, e kpe i James hwu, Peter no simirhọ izede igbevwunu. (Acts 12:​1-11) Ana sabu roro, ‘Mesoriẹ i Jehova o simi Peter, ọrẹn James o hwuru?’ Baibol na ọ ta kpahiẹ-ẹn. c Ọrẹn, e vwo imwẹro taghene izede i Jehova ephian “egbare.” (Deut. 32:4) Habaye, e rheri taghene Peter ọrhẹ James i vwo ekwerhọ i Jehova. (Rev. 21:14) Ọkezẹko, Jehova ọnọ sabu kpahenrhọ ẹrhomo ọwan izede re vwe fiẹrorhọ. Ọrẹn, fọkime ọwan i hẹroso izede ẹguọlọ ri Jehova ọ kpahanrhọ ẹrhomo ọwan lele, e vwe brenu kpahen oborẹ ọ guọlọ kpahenrhọ ye lele-e.—Job 33:13.

7. Me ya na damoma kẹnoma riẹn, mesoriẹ?

⁷ O fo na ha erhirhiẹ ọwan vwanvwọn erẹ awọrọ-ọ. Jerẹ udje, ana sabu nẹrhomo vwe i Jehova nọ ha userhumu rẹn ọwan uvuẹn erhirhiẹ owu kirighwo, ọrẹn Jehova ọ kpahenrhọ ye-e. Ọke oru, ne wu mẹrẹnvwrurhe taghene ọwọrọ ọ nekpẹn userhumu owu ọvo na, ọrẹn Jehova nọ kpahenrhọ ye. Omizu ọmase owu re se  Anna o rhiẹromẹrẹn erhirhiẹ ọrana. Ọ nẹrhomo nẹ oma esa ye re se Matthew ro kpomu emiamo ikansa nọ gbanhon. Uvwrọke owu na, imizu emẹse awanva ri kpako ne, e ji kpomu emiamo ikansa. Anna nọ nẹrhomo omamọ rẹn Matthew ọrhẹ imizu emẹse na. Oma imizu emẹse na nọ gbanhonron, ọrẹn Matthew no hwuru. Ọke ukaro, Anna no roro sẹ Jehova yo simi imizu emẹse na. Orho rhiomaran, mesoriẹ ọ vwọ kpahenrhọ ẹrhomo ọnẹyen nẹ oma esa ye ọ gbanhon? Itiọrurhomẹmro, ọwan e rhe oborẹ oma imizu emẹse na o ru gbanho-on. Oborẹ ọwan i rheri yẹ, Jehova ọvo yọ nọ sabu kwaphiẹ ọsoso ojẹriọ ọwan rhọ, o ji fiẹrorhọ ọke rọ nọ rhọmọ igbehian yen ri hwuru.—Job 14:15.

8. (a) Lele oborẹ ọ ha Isaiah 43:​2, marhẹ i Jehova o ru hobọtua ọwan? (b) Marhẹ ẹrhomo ono ru ha userhumu rẹn ọwan ọke re rhiẹromẹrẹn erhirhiẹ egbogbanhon? (Ni ividio na Ẹrhomo ọ ha Userhumu Rẹn Ọwan Din Ebẹnbẹn.)

⁸ Jehova ọnọ hobọtua ọwan ọke ephian. Fọkime Jehova Ọsẹ ro vwo ẹguọlọ, oma ọ vwọ merhiẹn ọke ra rioja-a. (Isa. 63:9) Ọrẹn, ọ vwọ dobọ edamuni ọwan ephian jẹ-ẹ, ra na sabu ha dje urhie yanghene erhanren. (Se Isaiah 43:2.) Udabọ ọrana, o veri taghene ọnọ ha userhumu rẹn ọwan “nya” aye vrẹn. Habaye, ọ ji ha uphẹn rẹn edamuni rọ nọ ghwọghọ onyerẹnkugbe ọwan rhẹ ọye-e. Jehova ọ ji yẹ ọwan ẹhẹn ọfuanfon ọnẹyen nọ ha userhumu rẹn ọwan vwo edirin. (Luke 11:13; Phil. 4:13) Omarana, ana sabu fiudugbere taghene Jehova ọnọ yẹ ọwan oborẹ a guọlọre ọke ephian, na sabu vwo edirin ji fuevwan ga ye. d

9. Lele oborẹ ọ ha James 1:​6, 7, mesoriẹ o fo na hẹroso i Jehova taghene ọnọ ha userhumu rẹn ọwan?

⁹ Jehova ọ guọlọre na hẹrosuiẹ. (Heb. 11:6) Ọkezẹko, ọnọ sabu họhọ taghene a sabu fiẹ edamuni ọwan kparobọ-ọ. Ana ji sabu vwo ẹhẹn eveva sẹ Jehova ọnọ ha userhumu rẹn ọwan. Ọrẹn, Baibol na ọ yẹre ọwan imwẹro taghene nyoma omẹgbanhon i Jehova, ana sabu “pho ugbomoghwa vrẹn.” (Ps. 18:29) Omarana, ukperẹ ene vwo ẹhẹn eveva, jena nẹrhomo ọrẹ esegburhomẹmro, ji hẹroso i Jehova taghene ọnọ kpahenrhọ ẹrhomo ọwan.—Se James 1:​6, 7.

10. Dje kpahen oborẹ ene ru wian kpahen ẹrhomo ọwan.

¹⁰ Jehova ọ guọlọre ne ru lele oborẹ a nẹrhomo kpahan. Jerẹ udje, omizu ọhworhare owu ọnọ sabu nẹrhomo ni Jehova ọ ha userhumu riẹn mẹrẹn ibiọke nẹ iruo yi, nọ sabu vwo ọke riẹ omẹvwa ẹkwotọre. Marhẹ i Jehova ọnọ kpahenrhọ ẹrhomo ọrana lele? Ọnọ yẹ omizu na uduefigbere ọ guọlọre nọ tẹmro rẹn ohworho rọ wian riẹn. Ọrẹn, ofori nẹ omizu na o ru lele oborẹ ọ nekpẹn yen nyoma ro no bru ohworho rọ wian riẹn na. Ọnọ sabu nekpẹn yen ọgbọ buebun. Ọnọ ji sabu lele ohworho ọrọrọ ro lele wian ta oborẹ aye ine ru wene ẹdẹ aye ina wian. Orho serhọ, ọnọ sabu brorhiẹn taghene a vwa kwosa riẹn uvuẹn ẹdẹ rọ nọ jọ wian na-a.

11. Mesoriẹ o fo na nẹrhomo ọgbọ buebun kpahen edamẹ ọwan?

¹¹ Jehova ọ guọlọre na nẹrhomo ọgbọ buebun kpahen edamẹ ọwan. (1 Thess. 5:17) Ẹmro i Jesu o djerie fiotọre taghene a kpahanrhọ ẹrhomo ọwan ezẹko ogege-e. (Luke 11:9) Omarana, e vwe  fiobọrhotọre-e! Dabu fiomarhọ ẹrhomo ẹnẹ ọgbọ buebun. (Luke 18:​1-7) Arha nẹrhomo kpahen ọdamẹ re vwori ọgbọ buebun, ne djephia rẹn Jehova taghene ọdamẹ na ọ ghini ghanren rẹn ọwan. Ne ji djephia taghene e vwo esegburhomẹmro kpahen omẹgbanhon ọnẹyen rọ nọ ha userhumu rẹn ọwan.

12. (a) Me yẹ onọ owu ana sabu nọ oma ọwan kpahen ekwakwa ra nẹrhomo kpahan, mesoriẹ? (b) Marhẹ ene ru djephia taghene ẹrhomo ọwan o dje ọghọ phia rẹn Jehova? (Se ekpeti na “ Ẹrhomo mẹ e Dje Ọghọ Phia Rẹn Jehova?”)

¹² Orhianẹ a mẹrẹn ẹkpahenrhọ rẹn oborẹ a nẹrhomo kpahan na-a, ana sabu nọ oma ọwan enọ esa enana. Ọrukaro yẹ, ‘Mia nẹrhomo kpahen oborẹ oserhọ?’ Ọgbọ buebun, ọwan e roro taghene e rhe oborẹ o rhomu rẹn ọwan. Ọrẹn, ọnọ sabu rhirhiẹ taghene ekwakwa ra nẹrhomo kpahan, i yẹ ọwan erere orho ru-u. Orhianẹ ọwan a nẹrhomo kpahen obẹnbẹn owu, ọnọ sabu vwo izede orhorhomu ra na kwaphiẹ ye rhọ ghwẹ oborẹ a nẹrhomo kpahan na. Habaye, ekwakwa ezẹko ra nẹrhomo kpahan, e serhọ ọhọre i Jehova-a. (1 John 5:14) Jerẹ udje, roro kpahen udje emiemọ ra hunute vrẹn ne na. Aye i nẹrhomo ni Jehova ọ lẹrhẹ ọmọ aye daji urhomẹmro na. Ọrana ọnọ sabu rhiẹ ẹrhomo ro serhọ. Ọrẹn, Jehova ọ vwọ gba ọwan na ga ye-e. Ọ guọlọre nẹ ọwan ephian ji tobọ te emọ ọwan, i djẹ odjẹ ra na ga ye. (Deut. 10:​12, 13; 30:​19, 20) Omarana, emiemọ na ina sabu nẹrhomo vwe i Jehova nọ ha userhumu rẹn aye te ọmudu ọmọ aye, neneyo ọ sabu vwo ẹguọlọ kpahen Jehova ji rhiẹ ugbehian yen.—Prov. 22:6; Eph. 6:4.

13. Lele oborẹ ọ ha Hebrews 4:​16, ọkiọgo yi Jehova ọnọ ha userhumu rẹn ọwan? Dje yi fiotọre.

 ¹³ Onọ ọreva ra na nọ yẹ, ‘Ọnana yẹ ọke ro serhọ ri Jehova ọnọ kpahenrhọ ẹrhomo mẹ?’ Ana sabu roro taghene a guọlọ ẹkpahenrhọ na ogege. Itiọrurhomẹmro, Jehova o rhe ọke ro serhọ rọ nọ ha userhumu phia. (Se Hebrews 4:16.) Orhianẹ a mẹrẹn ẹkpahenrhọ rẹn ẹrhomo ọwan ogege-e, ana sabu roro taghene ẹkpahenrhọ i Jehova yẹ ‘Ẹjo.’ Ọrẹn, ọnọ sabu rhirhiẹ taghene ẹkpahenrhọ yẹ, ‘O ji te-e.’ Jerẹ udje, roro kpahen omizu ọhworhare rọ nẹrhomo ni Jehova o simi emiamiẹ na. Orhianẹ i Jehova ọ nyoma izede igbevwunu simi emiamo na, Echu ọnọ sabu ta taghene omizu na ọ ji ga i Jehova fọkime e simirien ne. (Job 1:​9-11; 2:4) Habaye, Jehova o bru ọke rhotọre ro no tiẹ aruẹ emiamo ephian nie ne. (Isa. 33:24; Rev. 21:​3, 4) Bọmọke ọke ọrana ono te, e vwe fiẹrorhọ taghene ene simi ọwan izede igbevwunu-u. Omarana, omizu na ọnọ sabu nẹrhomo vwe i Jehova nọ yẹ ye omẹgbanhon ọrhẹ ẹhẹn ro totọre ro no diẹn emiamo na, nọ ji rha fuevwan ga ye.—Ps. 29:11.

14. Me wu yono nẹ udje i Janice?

¹⁴ Karorhọ udje i Janice, rọ nẹrhomo kpahen uphẹn rọ nọ ga obẹ Oghọn Ukoko. Ẹgbukpe isionrin i nyavrẹn vwẹre o ki vwẹruọ oborẹ i Jehova o ru kpahenrhọ ẹrhomo rọ nẹren. Nọ tare: “Jehova ọ ha ọke ọrana yoni mẹ ji ru mẹ rhiẹ omamọ Olele Kristi. Ofori mi hẹrosuiẹ rhọ. Ofori nẹ ẹkwaphiẹrhotọre uyono omobọ mẹ o rhomurhọ. O ji fo ne mi vwo obọdẹn aghọghọ, ro vwo sekpahen erhirhiẹ mi havwọ.” Ọke oru, na ha use rẹn Janice ọrhẹ esa ye nẹ aye i ewian owian oniruo okinhariẹ. Janice nọ tare: “Jehova ọ kpahenrhọ  ẹrhomo mẹ, dedevwo o rhiẹ izede mi guọleriẹ rhọ-ọ. Ọ hare mẹ ibiọke mi ki mẹrẹn orhorhomu rọ ha uvuẹn ẹkpahenrhọ ro tiobọnu na, ọrẹn oma ọ merhen mẹ taghene mi sabu riamerhen ẹguọlọ ọrhẹ uruemru esiri ọnẹyen.”

15. Mesoriẹ o fo na nẹrhomo kpahen ekwakwa erọrọ? (Ni ifoto na.)

¹⁵ Onọ ọresa yẹ, ‘Ofori ne mi nẹrhomo kpahen emru ọrọrọ?’ Dedevwo orhomurun na hunute emru kirighwo ro rhiẹ ọdamẹ rẹn ọwan uvuẹn ẹrhomo, ọrẹn ana sabu djokarhọ oborẹ ọhọre i Jehova o mevirhọ nyoma ra na nẹrhomo kpahen ekwakwa erọrọ. Roro kpahen udje omizu ọmase rọ vwọ ji rọnmọ, rọ nẹrhomo kpahen Isukuru Ighwoghwẹmro Uvie na rọ guọlọ nya. Ọ guọlọ riẹ isukuru ọrana nọ sabu ga ekete ra mai guọlọ userhumu. Omarana, dedevwo ọ nẹrhomo no riẹ isukuru na, ọnọ ji sabu nekpẹn userhumu mie i Jehova nọ djokarhọ uphẹn erọrọ ro no kerabọ owian Uvie na. (Acts 16:​9, 10) Orho ru, ọnọ sabu wian kpahen ẹrhomo na nyoma rọ nọ nọ oniruo okinhariẹ ye kpahen ukoko rọ kẹrerẹ aye rọ guọlọ userhumu ekobaro. Yanghene ọnọ sabu ya vwe Oghọn Ukoko, nọ nekpẹn ekete ra guọlọ userhumu ighwoghwẹmro Uvie na. e

16. Imwẹro ọgo ya na sabu vwo?

¹⁶ Jerẹ oborẹ e yono ne, ana sabu vwo imwẹro taghene Jehova ọnọ kpahenrhọ ẹrhomo ọwan izede ẹguọlọ ro ji serhọ. (Ps. 4:3; Isa. 30:18) Ọkezẹko, ana sabu mẹrẹn ẹkpahenrhọ re vwe fiẹrorhọ. Ọrẹn, Jehova ọnọ kpahenrhọ ẹrhomo ọwan. O vwo ẹguọlọ kpahen ọwan omamọ. Habaye, ọ ji sẹrerhumuji ọwan vwo-o. (Ps. 9:10) Omarana, rha “hẹrosuiẹ ọke ephian,” ji ta ọsoso ẹhọn riẹn.—Ps. 62:8.