Ọ BẸN wẹn wu ne ruẹ uyono omobọ ọnọ ọke ephian ji riamerhiẹn? Ọ phia rẹn ọwan ephian ọkezẹko. Ọrẹn, roro kpahen ekwakwa erọrọ re ruẹ ọke ephian, jerẹ ẹwọ. Arha wọ, na mẹrẹn omẹrhuọnrhuọn, ọrẹn ọ ha ọke ọrhẹ omẹdamu! Ana sabu ha uyono i Baibol dje “ame ọrẹ ẹmro na” rọ rhuọnrhuọn oma ọwan. (Eph. 5:26) Roro kpahen irorẹdjẹ ezẹko ri na ha userhumu wẹn:

• Vwo ẹkwaphiẹrhotọre. Uyono i Baibol omobọ ọ ha usuẹn “ekwakwa ri mai ghanren” ro fori nẹ Olele Kristi o ru. (Phil. 1:10) Ne wu sabu nyamwu ọbe ẹkwaphiẹrhotọre ọnọ, haye tamwu ugbomoghwa ọnọ, yanghene ekete ọrọrọ wu ne kiki mẹriẹn. Yanghene wu na sabu fiẹ okarorhọ rhẹ ifonuo rọ nọ karorhọ bọmọke wu na ki tonrhọ.

• Sanọ ọke ọrhẹ ekete rọ mai serhọ wẹn. Wa riamerhen uyono na wu rhe ruie jiri, gbinẹ ọke wu rhe ruie kpeke? Wẹwẹ ọvo yi rhe erhirhiẹ ọnọ. Omarana, gbe ruẹ ẹkwaphiẹrhotọre na lele erhirhiẹ ọnọ. Orhianẹ oma ọ ghwọgheruọ uvwrọke wa guọlọ ruẹ uyono na, wu na sabu ha iminiti ikpe ruẹ uyono na. Wu rha tobọ ha ibiọke ọrana ruẹ uyono na, wu na ji riamerhiẹn. Wu rha tuiẹnrhọ ne, ono mwuo ruie riarorhọ.—Phil. 2:13.

• Sanọ irhomu-ẹmro wu ne yono rhotọre. Wu rha hẹrhẹ te ọke wu ne ruẹ uyono bọmọke wa ki sanọ oborẹ wu ne yono kpahen, nọyẹ wu vwa ‘ha ọke ọnọ ruiruo izede ro serhọ-ọ.’ (Eph. 5:16) Damoma vwo ọbe ro vwo irhomu-ẹmro sansan ri na ha userhumu wẹn. Wu rhe vwo onọ ọke we ruẹ uyono na, gba ya ye rhotọre. Uvuẹn obẹta uyono owuowu, wu na sabu ya ẹmro erọrọ ba erẹ wu ya rhotọre bi ne, re wu guọlọ yono kpahen.

• Wene lele erhirhiẹ ọnọ. Damoma wene lele erhirhiẹ ọnọ, jerẹ uchunu ọke wa ha ruẹ uyono na ọrhẹ irhomu-ẹmro wu guọlọ yono kpahen. Oborẹ ọ mai ghanren yẹ ọrẹ wu ne ruẹ uyono na ọke ephian—orhiẹ ọke we ruie, oborẹ o jiri te, yanghene oborẹ wu yono kpahe-en.

Erhe vwo ẹkwaphiẹrhotọre uyono omobọ ọwan, ana ghini mẹrẹn erere. Habaye, ọwan ne tiẹkẹrẹ i Jehova, ruẹ ekwakwa izede ẹghwanren, ji vwo omẹrhuọnrhuọn.—Josh. 1:8.