UVUẸN urhi Moses, o vwo ọkezẹko ro fo nẹ itu i Jew na i dumirhonrin. Ọrẹn, uvwre ọke i Jesu, ihworho buebun na ha joma kemru kemru aye a ta dumirhonrin. Aye e dumirhonrin ọke ephian neneyo ihworho i vwo ekwerhọ kpahen oborẹ aye a ta; ọrẹn, Jesu ọ tiẹn uruemru ọnana ọgbọ eva. Omarana, Jesu nọ tare: “Jenẹ ẹmro ọnọ ‘Ee’ o mevirhọ ee, ‘Ẹjo’ o mevirhọ ẹjo.”​—⁠Matt. 5:​33-37; 23:​16-22.

Ọbe na Theological Dictionary of the New Testament, ọ tare taghene ọbe re se Talmud ọ dabu hunute irhonrin re ne ni ghanghanren ọrhẹ ọrẹ ene ni phapharhe. Ọnana nọ lẹrherẹ ọwan rhe oborẹ ọsoriẹ itu i Jew buebun, a ha joma kemru kemru aye a ta dumirhonrin.

Orhiẹ i Jesu ọvo yọ tiẹn uruemru re dumirhonrin izede ro vwo fo-o. Jerẹ udje, ọgba irherhe owu re se Flavius Josephus ro rhiẹ onyẹ i Jew, nọ ta kpahen ẹko itu Jew ezẹko: “Aye a kẹnoma rẹn uruemru re dumirhonrin, nime aye e nie taghene o biomu ghwẹ efian ẹmọren, aye e ji nie taghene orhianẹ ohworho o dumirhonrin vwẹre nẹ ihworho i ki kwe rhẹ oborẹ ọ ta, nọyẹ ohworho na, ọmọrenfian.” Ọbe itu i Jew re se Ẹghwanren ọrẹ Sirach, yanghene Ecclesiasticus, (23:11) nọ ji ta: “Ohworho ro dumirhonrin ọke ephian, ọ vwọ nyalele urhi na kakaka-a.” Omarana, Jesu nọ tiẹn uruemru re nẹ irhonrin phapharhe. Arha ta urhomẹmro ọke ephian, orho vwo oborẹ ọsoriẹ ene dumirhonrin neneyo ihworho i kwerhọ oborẹ ọwan a ta-a.