1-2. (a) Me yẹ ihworho re suẹn akpọ na ine ghwoghwo phẹrẹkpẹ? (b) Enọ ego ya na kpahenrhọ?

HA ẸHẸN rorie taghene ihworho re suẹn egbamwa na ni ghwoghwori taghene e vwo “ufuoma ọrhẹ omefuon” ne. Aye ina sabu rha kparoma taghene akpọ na o vwo ufuoma ne. Egbamwa na ina rha guọlọ ne roro taghene aye ina sabu kwaphiẹ ebẹnbẹn ituakpọ rhọ. Ọrẹn, aye i sabu suẹn oborẹ ọnọ homaphia-a! Mesoriẹ? Lele aruẹmẹrẹn rọ ha uvuẹn i Baibol na, “oghwọghọ kpregede nọ samọ rhirhiẹ ye rẹn aye, . . . aye i sabu vabọ ye-e.”—1 Thess. 5:3.

² O vwo enọ eghoghanren ri guọlọ ẹkpahenrhọ: Me yọ nọ phia uvwre “ukpokpogho rode” na? Me yi Jehova o fiẹrorhọ taghene ene ruo ọke ọrana? Ọrhẹ, marhẹ ọwan ine ru mwuegbe vwana na sabu sẹrorẹ atamwu ọwan uvuẹn ọke ukpokpogho rode na?—Matt. 24:21.

3. Lele oborẹ ọ ha uvuẹn Revelation 17:5, 15-18, marhẹ Osolobrugwẹ ọnọ ghwọghọ i “Babylon Rode” lele?

³ Se Revelation 17:5, 15-18. Ana ghwọghọ i “Babylon Rode!” Jerẹ oborẹ e yono vrẹn ne, egbamwa na i sabu suẹn oborẹ ọnọ phia ọke ọrana-a. Mesoriẹ? Fọkime “Osolobrugwẹ [ono fie] rhẹ ọmudu aye nẹ aye ru oborẹ ọ ha ẹhẹn yen.” Me yọ ha ẹhẹn yen? Ọrẹ ọnọ ghwọghọ okugbe ẹga efian ọrẹ akpọ na, tobọ te ẹga ra gemai ruẹ taghene aye a  ga Osolobrugwẹ. * Osolobrugwẹ ono fiẹ oborẹ ọ ha ẹhẹn yen rhẹ ọmudu “ighoro ikpe” ọrẹ “aramo rọ djoma na.” Ighoro ikpe na i mevirhọ omẹgbanhon usun oseghe ra hobọtua “aranmo rọ djoma” na, ro rhiẹ Ukoko Okugbe Egbamwa Akpọ na. (Rev. 17:3, 11-13; 18:8) Omẹgbanhon usun oseghe i rha kparehasuẹ ẹga efian ne, ọnana yo no rhiẹ ọtonrhọ ukpokpogho rode na. Ono ghini rhiẹ emru ofẹn rọ nọ hobọte ituakpọ ephian.

4. (a) Me yẹ egbamwa na ina sabu ta taghene yọ soriẹ aye a kparehaso ẹga efian? (b) Me yẹ ihworho re riẹ ẹga enana bi ine ruo?

⁴ Ọwan e rhe oborẹ ọsoriẹ egbamwa na ina kparehaso Babylon Rode-e. Aye ina sabu ta taghene ẹga akpọ na i vwa lẹrhẹ ituakpọ vwo ufuoma-a, habaye aye e ji vwobọrhọ irueruo usun oseghe. Yanghene aye ina sabu ta taghene ẹga efian i koko efe ọrhẹ ekwakwa bun phan ne. (Rev. 18:3, 7) Egbamwa na i rha kparehaso ẹga efian, orhiẹ ọsoso ihworho re riẹ ẹga efian yẹ aye ina ghwọghọ-ọ. Ukpomaran, ọ họhọre taghene egbamwa na ine tiẹ ikoko ẹga efian nie. Arha ghwọghọ ikoko erana ne, awọrọ ra hobọtua aye bi ni na mẹrẹnvwrurhe taghene ilori ẹga rẹ aye i hẹroso i phiẹrẹ aye rhọ ne, ọnana nọ nọ lẹrhẹ aye tioma nẹ ẹga efian erana.

5. Ive ọgo yi Jehova o ve kpahen ukpokpogho rode na, mesoriẹ?

⁵ Baibol na ọ ta rẹn ọwan oborẹ oghwọghọ i Babylon Rode ono jiri te-e, ọrẹn ọwan i rheri taghene ọnọ phia uvwre ibiọke. (Rev. 18:10, 21) Jehova o veri taghene ọye ono bru ‘ẹdẹ ukpokpogho na kpẹtẹ,’ neneyo “otu ra djẹha” ọrhẹ ẹga urhomẹmro i sabu simirhọ. (Mark 13:19, 20) Ọrẹn, me yi Jehova ọ guọlọre ne ru bọmọke ukpokpogho rode na ọnọ tonrhọ, ọrhẹ uvwre uvweri Armageddon?

6. Na sabu tioma nẹ Babylon Rode, me ye ne ji ru?

⁶ Jerẹ oborẹ e yono kpahen uvuẹn urhomu-ẹmro rọ vrẹnren na, Jehova ọ  guọlọre nẹ idibo yi i tioma nẹ Babylon Rode. Ọrẹn, ọnana ọ vrẹn ọrẹ ana ghwai tioma nẹ ẹga efian. Ene vi brorhiẹn taghene ana hobọtua ẹga urhomẹmro na, jeghwai ha ẹga ro fiotọre rẹn i Jehova. Jene yono kpahen izede eva ra na sabu ruẹ ọnana.

7. (a) Marhẹ ọwan ine ru mevigbanhon nyalele iruemru-urhi egbagba Osolobrugwẹ? (b) Marhẹ Hebrews 10:24, 25, o ru kanrunumwu ọghanromẹ uyono ẹnya maido ọke ọnana?

⁷ Ọrukaro, ene vi mevigbanhon nyalele iruemru-urhi egbagba i Jehova. O fori na kẹnoma rẹn uruemru ọfanrhiẹn rọ ha uvuẹn akpọ na. Jerẹ udje, ọwan i vwe fiomarhọ aruẹ irueruo ọfanrhiẹn owuorowu-u, tobọ te orọnmo ehworhare ọrhẹ ehworhare yanghene emẹse ọrhẹ emẹse-e. (Matt. 19:4, 5; Rom. 1:26, 27) Ọreva, ene vi rhe lele imizu ọwan ha ẹga rẹn i Jehova kugbe. Ọwan e ruẹ ọnana uvuẹn ekete ephian, sẹ a ha uvuẹn Aghwẹlẹ Uvie, uvuẹn oghwa yanghene uvuẹn odjahen. O toro oborẹ ọ phiare-e, ene rhe riẹ uyono ọke ephian. O fori ne rhe kwomakugbe imizu ọwan ruẹ ogame, “maido rẹ ẹdẹ na o tiẹ kẹrẹ ne na.”—Se Hebrews 10:24, 25.

8. Marhẹ iyẹnrẹn esiri re ghwoghwo ono ru sabu wene obaro na?

⁸ Uvwre ọke ukpokpogho rode na, iyẹnrẹn re ne ghwoghwo ọnọ sabu wene. Ọke ọnana, ọwan e ghwoghwo kpahen iyẹnrẹn esiri Uvie na jeghwai damoma ruẹ idibo. Ọrẹn, ọke ọrana ọwan ine ghwoghwo iyẹnrẹn rọ gbanhonron omamọ. (Rev. 16:21) Ọwan ina sabu ghwoghwo kpahen oghwọghọ rọ nọ phia rẹn akpọ Echu phẹrẹkpẹ. Ọrẹn ọke na orho te, ene rhe aruẹ iyẹnrẹn re ne ghwoghwo ọrhẹ oborẹ ene ghwoghwie lele. Ena ra ha ruiruo emrẹ ẹgbukpe uzusionrin ri vrẹnren ya na ji ha ruiruo? Gbinẹ ọwan ina ha ena erọrọ ruiruo? Ọwan e rhe-e. Oborẹ erhirhiẹ na ọ havwọ ephian, ọwan ine vwo uphẹn re ne fiudugbere ghwoghwo ẹzenguon i Jehova!—Ezek. 2:3-5.

9. Ukẹro ọgo yẹ egbamwa na ina ha ni iyẹnrẹn re ghwoghwo, imwẹro ọgo ye ne vwo?

⁹ Ọkezẹko, iyẹnrẹn re ne ghwoghwo ọnọ lẹrhẹ egbamwa na damoma aye ina ghwọghọ ọwan phẹlẹphẹlẹ. Jerẹ oborẹ ọwan a hẹrosuẹ i Jehova uvuẹn owian aghwoghwo ọwan vwana, ana ji hẹrosuiẹ ọke ọrana. Ana sabu vwo imwẹro taghene Osolobrugwẹ ọnọ yẹ ọwan omẹgbanhon re ne ruẹ ọhọriẹ.—Mic. 3:8.

10. Jerẹ oborẹ Luke 21:25-28 ọ tare, marhẹ ihworho buebun ine ru lele uvwre ọke ukpokpogho rode na?

¹⁰ Se Luke 21:25-28. Uvwre ọke ukpokpogho rode na, ono gbe ihworho unu ọke aye ina mẹrẹnvwrurhe taghene akpọ aye i hẹroso, ọ ghwọghọ bibiesuọn ne. Aye ina dẹrughwaroghwu “omiamiamo” fọkime arhọ aye ọnọ va aye obọ phẹrẹkpẹ. (Zeph. 1:14, 15) Ọke ọrana, akpenyerẹn ọnọ gbanhonrhọ tobọ harẹn ihworho Osolobrugwẹ. Ọwan ina sabu rioja ibiesuọn fọkime ọwan a ha usuẹn akpọ na-a. Ekwakwa ezẹko ina ji sabu kanren ọwan.

11. (a) Arha ghwọghọ ẹga efian ne, mesoriẹ ihworho ephian ina tẹnrovi Iseri Jehova? (b) Mesoriẹ o vwo fo na zofẹn ukpokpogho rode na?

¹¹ Ọkezẹko, ihworho ra ghwọghọ ẹga aye ne, ine vwo utuoma kpahen Iseri Jehova fọkime aye ọvo ya ji ga ogame aye. Ọwan ina sabu ha ẹhẹn roro aruẹ ọyanghan  rẹ ọnana ọnọ suọ, tobọ te uvuẹn itanẹti. Egbamwa na ọrhẹ ohworho ro suẹn aye ro rhiẹ Echu, ine vwo utuoma kpahen ọwan fọkiẹ ọnana. Aye ina mẹrẹnvwrurhe taghene aye a ji sabu ti ẹga ephian nẹ otọrakpọ na-a. Omarana, aye ephian ni na dẹrughwaroghwu ọwan. Ọke ọrana, egbamwa na ni ne rhiẹ Gog ọrẹ Magog. * Aye ephian ni ne koko kparehaso ihworho Osolobrugwẹ ukwọgbọ. (Ezek. 38:2, 14-16) O fo ne roro kpahen ekwakwa enana pha-an, fọkime oborẹ aye ina phia lele ọ ji dabu mwu ọwan ẹro-o. Ọrẹn, emru owu o mwuẹro: O fo na zofẹn ukpokpogho rode na-a. Jehova ọnọ yẹ ọwan ọkpọvi ri ne simi ọwan rhọ. (Ps. 34:19) Ọwan ina sabu “kpomavi, [jeghwai] kpare ughwaro [ọwan] rierun,” fọkime ọwan i rheri taghene “usimi ọwan o ti kẹrẹ ne.” *

12. Marhẹ ọvrẹn ra hẹrosua ro ji vwo ẹghwanren na o ru mwuegbe ọwan hẹrhẹ ekwakwa ri na phia obaro na?

¹² “Ọvrẹn ra hẹrosua ro ji vwo ẹghwanren” na, o mwuegbe ọwan na sabu sẹrorẹ atamwu ọwan uvwre ọke ukpokpogho rode na. (Matt. 24:45) Aye ruẹ ọnana nyoma izede buebun, ọrẹn roro kpahen udje owu: ẹkwaphiẹrhotọre emẹvwa eduado re ruru ẹgbukpe 2016 ye tẹ 2018. Nyoma ẹmro ra haphia uvuẹn emẹvwa enana, aye i sabu ru ọwan gbanhon ne mwuegbe hẹrhẹ ẹdẹ i Jehova. Jene yono kpahen ezẹko usuẹn iruemru erana.

13. Marhẹ ene ru ruẹ atamwu ọwan kpahen i Jehova gbanhonrhọ, mesoriẹ o fo ne ruie ọke ọnana?

¹³ Atamwu: Urhomu-ẹmro omẹvwa re ruru uvuẹn ẹgbukpe 2016 yẹ “Sẹrorẹ Atamwu Ọnọ Kpahen I Jehova!” Omẹvwa ọrana o yonirin ọwan taghene erhe vwo omamọ onyerẹnkugbe rhẹ Jehova, ene vwo atamwu kpahiẹn. A ji karorhọ ọwan taghene ana sabu tikẹrẹ i Jehova nyoma ẹrhomo ọrhẹ uyono i Baibol ro mwidjẹn. Erhe ruẹ ọnana, ana sabu vwo omẹgbanhon re ne fi ebẹnbẹn egbogbanhon kparobọ. Rẹ akpọ Echu ọ joma toba ne na, ọwan i fiẹrorhọ taghene ana rha damu atamwu ọwan kpahen Osolobrugwẹ ọrhẹ Uvie yi nẹ ọke ephian. Ihworho ina rha ha ọwan djechẹẹ. (2 Pet. 3:3, 4) Ọnana ọnọ sabu gbanhonrhọ fọkime ọwan i vwa hobọtua akpọ Echu-u. O fori ne ruẹ atamwu ọwan gbanhon ọke ọnana neneyo a sabu sẹroriẹ uvwre ọke ukpokpogho rode na.

14. (a) Ewene ọgo yọ nọ phia kpahen imizu ehworhare ra kobaro uvwre ọwan uvuẹn otọrakpọ na? (b) Mesoriẹ a guọlọ ne dje atamwu phia ọke ọrana?

¹⁴ Uvwre ọke ukpokpogho rode na, ene ruẹ ewene sekpahen imizu ri na kobaro uvuẹn otọrakpọ na. Uvwre ọke owu, ene koko ọsoso era djẹha ri ji ha otọrakpọ na riẹ odjuwu nẹ aye i ye fiuvweri Armageddon. (Matt. 24:31; Rev. 2:26, 27) Ọnana no mevirhọ taghene Ugboma Usuon na orho rhirhiẹ ye-e. Ọrẹn, otu gbidigbidi na ine ji vwo okugbe. Imizu ri mwuovwan ri rhiẹ igegede ereva yi na kobaro ọke ọrana. O fori ne dje atamwu phia nyoma ana hobọtua imizu enana jeghwai nyalele  ọkpọvi Osolobrugwẹ aye i haphia. Arha nyalele aye ene vwo esimirhọ!

15. Marhẹ ene ru sabu ruẹ edirin ọwan gbanhonrhọ, mesoriẹ ọ ghanren ne ruie ọke ọnana?

¹⁵ Edirin: Urhomu-ẹmro omẹvwa re ruru uvuẹn ẹgbukpe 2017 yẹ “Wu Vwe Fiobọrhotọre-e!” Omẹvwa ọnana ọ ha userhumu rẹn ọwan ruẹ edirin ọwan gbanhonrhọ, neneyo a sabu din ebẹnbẹn. E yonorin taghene edirin ọwan, o sekpahen erhirhiẹ ri rhomuru-un. Ana sabu ru edirin ọwan gbanhonrhọ, arha hẹroso i Jehova. (Rom. 12:12) O fori na rha karorhọ ive i Jesu: “Ọro vwo edirin ye toba ọyẹ ono simirhọ.” (Matt. 24:13) Ive ọnana o mevirhọ taghene ana vi sẹrorẹ atamwu udabọ ebẹnbẹn ra dẹrughwaroghwu. Erhe vwo edirin udabọ ebẹnbẹn re rhiẹromẹrẹn ọke ọnana, ana sabu vwo esegburhomẹmro ọgbogbanhon bọmọke ukpokpogho rode na ọnọ ki tonrhọ.

16. Me yo no djephia taghene ọwan i vwo uduefigbere, marhẹ ene ru ruẹ uduefigbere ọwan gbanhon vwana?

¹⁶ Uduefigbere: Urhomu-ẹmro omẹvwa re ruru uvuẹn ẹgbukpe 2018 yẹ “Fiudugbere!” Omẹvwa ọnana ọ karorhọ ọwan taghene orhiẹ omẹgbanhon ọwan yọ lẹrhẹ ọwan fiudugbere-e. Jerẹ oborẹ i Jehova ọ yẹ ọwan edirin, omaran ọ ji yẹ ọwan uduefigbere. Me yọ nọ ha userhumu rẹn ọwan na sabu rha hẹrosuẹ i Jehova ọke ephian? Nyoma isese i Baibol kẹdẹkẹdẹ, ọrhẹ eroro kodo kpahen oborẹ i Jehova o simi ihworho yi lele ọke ahwanren. (Ps. 68:20; 2 Pet. 2:9) Egbamwa na i rha kparehaso ọwan uvuẹn ukpokpogho rode na, o fori ne fiudugbere jeghwai hẹroso i Jehova vrẹn oborẹ e ruẹ bi. (Ps. 112:7, 8; Heb. 13:6) Arha hẹroso i Jehova vwana, ene vwo uduefigbere rọ nọ ha userhumu rẹn ọwan dẹrughwaroghwu ẹkparehaso i Gog. *

17. Mesoriẹ ọwan ina ja zofẹn Armageddon? (Ni ifoto obaro ọbe na.)

¹⁷ Jerẹ oborẹ e yonorin uvuẹn urhomu-ẹmro rọ vrẹnren na, e vwiẹ ihworho  buebun uvwre ẹdẹ ri koba na. Ọrẹn, e ji vwo ifiẹrorhọ ra na vabọ ukpokpogho rode na. Uvweri Armageddon yo no rhiẹ oborẹ ọnọ ha enyerakpọ ọnana toba. Ọrẹn, ọwan i zofẹn emru owuorowu-u. Mesoriẹ? Fọkime ọnana ono rhiẹ uvweri Osolobrugwẹ. (Prov. 1:33; Ezek. 38:18-20; Zech. 14:3) Ọke na orho te ne, Jehova ọnọ ta rẹn i Jesu no suẹn egba owọnren enẹyen ye fiuvweri na. Jesu, era djẹha ra rhọmọ nẹ uhwu ọrhẹ iduduru emakashe buebun, yi ne fiuvweri na. Aye ephian ina wọnrọn haso Echu, ikpodje yi ọrhẹ ihworho re lelie.—Dan. 12:1; Rev. 6:2; 17:14.

18. (a) Imwẹro ọgo yi Jehova ọ yẹrẹ ọwan? (b) Marhẹ oborẹ ọ ha uvuẹn Revelation 7:9, 13-17 o ru yọ imwẹro kpahen obaro na?

¹⁸ Jehova o veri: “O vwo ekwakwa owọnren re ruru ra na ha kparehaso are ro no vwo efikparobọ owuorowu-u.” (Isa. 54:17) “Otu gbidigbidi” ra ga i Jehova ina vabọ ukpokpogho rode na! Aye ina rha ha ẹga ro fiotọre riẹn. (Se Revelation 7:9, 13-17.) Itiọrurhomẹmro, Baibol na ọ yẹrẹ ọwan imwẹro ọgbogbanhon kpahen obaro na! Ọwan i rheri taghene “Jehova ọ sẹrorẹ ihworho ri fuevwan.” (Ps. 31:23) Oma ọnọ merhen ọsoso ihworho ri vwo ẹguọlọ kpahen Jehova ra jeghwai jirie, ọke rọ nọ kpare usuon ọnẹyen rierun.—Ezek. 38:23.

19. Obọdẹn ifiẹrorhọ ọgo yọ hẹrhẹ ọwan obaro na?

¹⁹ Roro kpahen oborẹ ene se ẹmro ri ha uvuẹn 2 Timothy 3:2-5 lele, ọke re dje kpahen ihworho ri ha akpọ ọkpokpọ na rọ vabọ iroro Echu. (Se ekpeti na “ Iruemru rẹ Ihworho Ine Vwo Ọke Ọrana.”) Omizu George Gangas, * rọ gare usuẹn Ugboma Usuon na, no djerie omana: “Akpọ na ono ghini rhiẹ ekete rọ merhoma, fọkime ihworho ephian ine rhiẹ imizu! Phẹrẹkpẹ, wu ne vwo uphẹn wu ne rhirhiẹ uvuẹn akpọ ọkpokpọ. Wu ne nyerẹn jiri te ọke i Jehova o nyerẹn te. Ene nyerẹn bẹmẹdẹ.” Itiọrurhomẹmro, ọnana ghini omamọ ifiẹrorhọ!