1. Me yẹ Ilele Kristi ri bromarhame ne ine rhe ruẹ?

WU BROMARHAME ne? Orhiomaran, wu dje esegburhomẹmro ọnọ phia ọrẹ afiede rẹn Jehova ne, ọrhẹ omwemẹ wu na ga ye uvuẹn ukoko yi. * Itiọrurhomẹmro, wu ne rhe ruẹ esegburhomẹmro ọnọ kpahen Jehova gbanhanrhọ. O ji fo ne wu ruẹ imwẹro wu vwori taghene Jehova ọ ha ukoko yi ruiruo inyenana gbanhonrhọ.

2-3. Marhẹ i Jehova o ru suẹn ukoko yi inyenana? Dje idje yi.

² Inyenana, Jehova o suẹn ukoko yi izede ro dje uruemruien, egbemwuo ọrhẹ irhi enẹyen phia. Jene yono kpahen iruemru i Jehova esa re djephia uvuẹn ukoko yi.

³ Ọrukaro, “Osolobrugwẹ o vwo ni ohworho ruẹ-ẹ.” (Acts 10:34) Ẹguọlọ o mwu i Jehova tiobọnu Ọmọyen ha ruẹ ‘otan rẹn ihworho ephian.’ (1 Tim. 2:6; John 3:16) Jehova ọ ha idibo yi ghwoghwo iyẹnrẹn esiri rẹn ihworho ri guọlọ rhon, neneyo aye i sabu mẹrẹn erere nẹ izobo otan na. Ọreva, Jehova o rhiẹ Osolobrugwẹ ro ruẹ yanghan yangha-an, ọrẹn Osolobrugwẹ ufuoma. (1 Cor. 14:33, 40) Omarana, o fori ne fiẹrorhọ taghene ihworho ra ga ye, a ga ye izede dẹndẹn ọrhẹ ufuoma. Ọresa, Jehova yẹ ‘Oyono Rode.’ (Isa. 30:20, 21) Omarana, ukoko yi ọ tẹnroviẹ oborẹ ono ru yono ihworho i Baibol na uvuẹn ukoko ọrhẹ owian aghwoghwo na. Marhẹ ukoko Ilele Kristi erukaro na i ru dje eghọn esa ọrẹ uruemru i Jehova phia? Marhẹ e ru dje yi phia inyenana? Marhẹ ẹhẹn ọfuanfon ono ru ha  userhumu wẹn ga i Jehova uvuẹn ukoko yi inyenana?

4. Jerẹ oborẹ ọ ha Acts 1:8, me yi Jesu ọ ta rẹn idibo yi nẹ aye i ru, userhumu ọgo yẹ aye ina mẹrẹn?

⁴ Uvwre ọke Ilele Kristi erukaro na. Aghwoghwo i Jesu ọ yẹ ituakpọ ephian ifiẹrorhọ. (Luke 4:43) Ọ ta rẹn idibo yi nẹ aye i rha wian owian aghwoghwo na, no rhiẹ oseri uvuẹn “ekete ri mai seri uvuẹn akpọ na.” (Se Acts 1:8.) Itiọrurhomẹmro, aye i sabu wian owian ọnana rhẹ omẹgbanhon aye ọvo-o. Aye i guọlọ userhumu ẹhẹn ọfuanfon na ri Jesu o vive rẹn aye.—John 14:26; Zech. 4:6.

5-6. Izede ego yẹ ẹhẹn ọfuanfon na o ru ha userhumu rẹn idibo i Jesu?

⁵ E tiobọnu ẹhẹn ọfuanfon na rẹn idibo i Jesu uvuẹn Pentecost 33 C.E. Nyoma userhumu ẹhẹn ọfuanfon na aye ni tuẹn owian aghwoghwo rhọ, o jiri-i uriusionrin ihworho buebun ni rhiabọ dede iyẹnrẹn esiri na. (Acts 2:41; 4:4) Ọke ẹkparehaso ọ homaphia, idibo na e fiobọrhotọre fọkiẹ ofẹ-ẹn, ukpomaran aye ni nekpẹn userhumu mie Osolobrugwẹ. Aye ni nẹrhomo: “Yẹ evrẹn enọ uduefigbere nẹ aye i sabu rha tẹmro ọnọ.” Aye ni vwo ẹhẹn ọfuanfon na, ji rha “tẹmro Osolobrugwẹ rhẹ uduefigbere.”—Acts 4:18-20, 29, 31.

⁶ Idibo i Jesu i dẹrughwaroghwu ebẹnbẹn erọrọ. Jerẹ udje, Eyaya Ọfuanfon na o ji bu-un. O vwo ekwakwa ra ha yono awan jerẹ oborẹ e vwori inyenana-a. Aye ine ji ghwoghwo rẹn ihworho ra djẹ edjadjẹ sansan. Udabọ ebẹnbẹn enana ephian, idibo enana ri vwo oruru na i ruẹ oborẹ e vwe fiẹrorhọ—uvwre ẹgbukpe ezẹko ọvo, aye i ghwoghwo iyẹnrẹn esiri na “lele akpọ na ephian.”—Col. 1:6, 23.

7. Emrẹ ẹgbukpe 100 ri vrẹn ne na, marhẹ idibo i Jehova i ru rhe oborẹ Osolobrugwẹ ọ guọlọ mie aye, marhẹ aye i kpahenrhọ ye lele?

⁷ Uvuẹn ọke ọwan na. Jehova ọ yẹ ihworho yi omẹgbanhon ji kpọ aye viẹ. Itiọrurhomẹmro, a yẹ ọwan ọkpọvi ọnana nyoma i Baibol na. Uvuẹn i Baibol na ya mẹrẹn ikuegbe kpahen owian aghwoghwo i Jesu ọrhẹ akama rọ ha rẹn idibo yi nẹ aye i wian owian rọ tonrhọ na. (Matt. 28:19, 20) Oghwa Odẹrẹ ọrẹ July 1881, ọrhọ ta: “E se owan, yanghene djẹ ọwan ha neneyo a họghọ yanghene koko efe rẹn oma ọwa-an, ọrẹn ọrẹ ana wian jeghwai ghwọghọ ọke ghwoghwo iyẹnrẹn esiri na.” Ọbe na To Whom the Work Is Entrusted, re fomu phia uvuẹn ẹgbukpe 1919, ọrhọ ta: “Ọ họhọre taghene owian na ọgbanhonron, ọrẹn fọkime owian Ọrovwori na, ana sabu wian yen nyoma omẹgbanhon ọnẹyen.” Itiọrurhomẹmro, jerẹ Ilele Kristi erukaro na, imizu enana i fiudugbere homakpahontọre wian owian na, aye i ji vwo imwẹro taghene ẹhẹn ọfuanfon na ọnọ ha userhumu rẹn aye ghwoghwo rẹn kohworho kohworho. Aruẹ imwẹro ọnana ye ji vwo inyenana.

8-9. Ena ego ye ukoko i Jehova i ha ruiruo na sabu ghwoghwo iyẹnrẹn esiri na?

⁸ Ukoko i Jehova ọ ha ekwakwa ri mai rhomu ri havwiẹ, e kerabọ iyẹnrẹn esiri na. Usuẹn ekwakwa enana yẹ ẹbe re fomu phia, ughe “Photo-Drama of Creation,” ifonografu, imoto agboro, ekpeti agboro, ro vwo jijiri na ekwakwa itẹknọlọji. Ukoko i Jehova o ji vwobọrhọ erhianrhian rọ mai do kparobọ uvuẹn ikuegbe ituakpọ! Mesoriẹ? Neneyo aruẹ ihworho ephian i sabu rhon iyẹnrẹn esiri na uvuẹn edjadjẹ aye. Jehova o vwo nẹ ihworho ruẹ-ẹ; ọ tare taghene ene ghwoghwo iyẹnrẹn esiri na rẹn “egbamwa na, ọrhẹ uvwiẹ, edjadjẹ, kugbe ihworho ephian.” (Rev. 14:6, 7)  Jehova ọ guọlọre ne ghwoghwo iyẹnrẹn esiri na rẹn ihworho ephian.

⁹ Marhẹ ene ru ghwoghwo rẹn ihworho re rhirhiẹ ekete ra gba ogba kinhariẹ ra dẹrẹ? Na sabu ghwoghwo rẹn aruẹ ihworho enana, ukoko i Jehova ni ruẹ ẹkwaphiẹrhotọre sansan ra na ha wian owian aghwoghwo na. Jerẹ udje, uvuẹn ẹgbukpe 2001, Ugboma Usuon na ni vwo ekwerhọ ra na ophanphan re jẹ ẹbe rhọ, e ghwoghwo iyẹnrẹn esiri na uvuẹn i France, ọke oru ne kerabọ ye riẹ ẹkwotọre erọrọ. Ọnana ọ ha ebrurhọ buebun rhe. Uvuẹn ẹgbukpe 2011 na ha ẹkwaphiẹrhotọre ọkpokpọ mwu uvuẹn ekete ra sueyi uvuẹn New York City obẹ United States. Uvwre ẹgbukpe ọrukaro, ẹbe eduado ri te 102,129 ọrhẹ imagazini ri te 68,911 ọye a harẹn ihworho. Ihworho ri te 4,701 yi nekpẹn uyono i Baibol! Itiọrurhomẹmro, ẹhẹn ọfuanfon i Jehova yọ hobọtua owian ọnana. Omarana, Ugboma Usuon na no vwo ekwerhọ ona aghwoghwo ra ha ophanphan re jẹ ẹbe rhọ ruiruo uvuẹn ọsoso akpọ na.

10. Marhẹ ene ru ruẹ owian aghwoghwo na mwidjẹn?

¹⁰ Oborẹ wu na sabu ru. Ha uyono i Jehova ọ yọ nyoma uyono ukoko yi ruiruo. Lele ẹko aghwoghwo wu havwọ wian kugbe ọke ephian. Avwaye wu na mẹrẹn userhumu wu guọlọre, ọrhẹ urhebro nẹ udje awọrọ. Vwo edirin uvuẹn aghwoghwo na. Jerẹ oborẹ urhomu-ẹmro uyono na ọ karorhọ ọwan, ana sabu ruẹ ọhọre i Jehova nyoma userhumu ẹhẹn ọfuanfon na, orhiẹ nyoma omẹgbanhon ọwa-an. (Zech. 4:6) Habaye, ọwan a wian owian i Jehova.

11. Marhẹ ugboma usuon ọrẹ Ilele Kristi erukaro na i ru wian kugbe sẹrorẹ okugbe uvwre ihworho i Jehova?

¹¹ Uvwre ọke Ilele Kristi erukaro na. Ugboma usuon rọ ha i Jerusalem ọke ọrana, ọ wian kugbe sẹrorẹ okugbe ọrhẹ ufuoma uvwre ihworho i Jehova. (Acts 2:42) Jerẹ udje, ọke ẹmro ro sekpahen osamo ọ homaphia uvwre ẹgbukpe 49 C.E.,  ugboma usuon na ni kwaphiẹ ẹmro na rhọ nyoma userhumu ẹhẹn ọfuanfon na. Orhianẹ ukoko na nọ ghalẹre fọkiẹ ẹmro ọrana, manẹ aye i vwa sabu wian owian aghwoghwo na-a. Dedevwo aye itu i Jew, inyikọ na ọrhẹ ekpako na a lẹrhẹ irueruo itu i Jew hobọte aye yanghene ha uphẹn rẹn ihworho re jiri irueruo na riẹriẹ aye-e. Ukpomaran, aye i guọlọ ọkpọvi nẹ uvuẹn Ẹmro Osolobrugwẹ ọrhẹ nyoma ẹhẹn ọfuanfon na. (Acts 15:1, 2, 5-20, 28) Me yo nerhumie rhe? Jehova nọ ha ebrurhọ rẹn orhienbro aye, ufuoma ọrhẹ okugbe no rhirhiẹ uvwre aye, owian aghwoghwo na no ji riarorhọ.—Acts 15:30, 31; 16:4, 5.

12. Me yo djephia taghene okugbe ọrhẹ ufuoma i ha uvuẹn ukoko i Jehova inyenana?

¹² Uvuẹn ọke ọwan na. Ukoko i Jehova ọ wian gbanhan nọ sabu sẹrorẹ okugbe ọrhẹ ufuoma uvwre ihworho i Jehova. Uvwre ẹgbukpe 1895, Zion’s Watch Tower and Herald of Christ’s Presence ọrẹ November 15, o vwo urhomu-ẹmro na “Decently and in Order,” ra bọn kpahen ẹmro rọ ha 1 Corinthians 14:40. Oghwa Odẹrẹ na ọrhọ ta: “Inyikọ na i ya ekwakwa buebun vwe Ukoko erukaro na sekpahen okugbe . . . Omarana o fori na ji nyalele ‘ekwakwa ra ya rhotọre fọkiẹ ọkpọvi ọwan.’” (Rom. 15:4) Omaran ọ ji havwọ, aruẹ oruru ọrana sekpahen okugbe ọrhẹ ufuoma rẹ Ilele Kristi erukaro i vwori, yẹ ukoko i Jehova o ji vwo inyenana. Jerẹ udje: Orhianẹ wu ruẹ uyono Oghwa Odẹrẹ na uvuẹn ukoko ọrọrọ—tobọ te uvuẹn ẹkwotọre ọrọrọ—wu na mẹriẹn taghene uyono na owu. Ogege, ẹhọn ono te otọre! Ẹhẹn ọfuanfon i Jehova ọvo yọ nọ sabu lẹrhẹ aruẹ okugbe ọnana rhirhiẹ ye!—Zeph. 3:9.

13. Lele oborẹ ọ ha uvuẹn James 3:17, enọ ego yo fori na nọ oma ọwan?

¹³ Oborẹ wu na sabu ru. Jehova ọ guọlọre nẹ ihworho yi “sẹrorẹ okugbe owu ọrẹ ẹhẹn na, uvuẹn erhirhiẹ ufuoma.” (Eph. 4:1-3) Omarana, nọ oma: ‘Mie toroba okugbe ọrhẹ ufuoma uvuẹn ukoko na? Mia huvwele imizu ra kobaro uvuẹn ukoko na? Awọrọ ina sabu hẹroso mẹ, maido sekpahen ewian uvuẹn ukoko na? Mia nyamwu ọke, ji vwo omwemẹ mi na ha userhumu  rẹn awọrọ?’ (Se James 3:17.) Orhianẹ o vwo ekete wu na sabu ru rhomurhọ, nekpẹn userhumu ẹhẹn ọfuanfon na. Wu rha ha uphẹn riẹn no sun iruemru ọrhẹ irueruo enọ, imizu ukoko na ni ne vwo ẹguọlọ kpahuọn rhọ, aye ni na ji ha ukẹro ọghoghanren nuo.

14. Lele oborẹ ọ ha Colossians 1:9, 10, marhẹ i Jehova o ru yono Ilele Kristi erukaro na kpahen ọhọre ọnẹyen?

¹⁴ Uvwre ọke Ilele Kristi erukaro na. Oma ọ merhen i Jehova ro no yono ihworho yi. (Ps. 32:8) Ọ guọlọre nẹ aye i rhe yi, vwo ẹguọlọ kpahiẹn jeghwai nyerẹn bẹmẹdẹ jerẹ emọ ọye o vwo ẹguọlọ kpahen. A sabu ruẹ ekwakwa enana orhianẹ Jehova o vwo yono ọwa-an. (John 17:3) Jehova ọ ha ukoko Ilele Kristi erukaro yono ihworho yi. (Se Colossians 1:9, 10.) Ẹhẹn ọfuanfon na, nọyẹ “userhumu” ri Jesu o ve kpahen na, ọ ha userhumu rẹn aye. (John 14:16) Ọ yẹ idibo na ọmẹrẹnvwrurhe kpahen Ẹmro Osolobrugwẹ, jeghwai ha userhumu rẹn aye karorhọ ekwakwa buebun ri Jesu ọ tare jeghwai ru, ro rhiẹ oborẹ a ya rhẹ Matthew riẹ John. Irherhe ọnana ọ bọn esegburhomẹmro ọrhẹ ẹguọlọ Ilele Kristi erukaro na i vwo kpahen Jehova, Jesu ọrhẹ owuowọnwan gbanhonrhọ.

15. Izede ego wu ru mẹrẹn orugba ive i Jehova ra ya rhẹ Isaiah 2:2, 3 ne?

¹⁵ Uvuẹn ọke ọwan na. Jehova ọ tare taghene “uvuẹn ẹdẹ eri koba na,” ihworho egbamwa na ephian ina ghwiẹ riẹ ugbenu ra ha dje udje, na sabu yono aye kpahen izede enẹyen. (Se Isaiah 2:2, 3.) Ọwan a mẹrẹn orugba aruẹmẹrẹn ọrana. Ẹga urhomẹmro o rierun vrẹn aruẹ ẹga efian ephian ne. Jehova ọ yẹ ihworho yi iyono buebun nẹ uvuẹn i Baibol na! (Isa. 25:6) Nyoma “ọvrẹn ra hẹrosua ro ji vwo ẹghwanren na,” Jehova ọ yẹ ọwan aruẹ  iyono sansan buebun, nẹ irhomu-ẹmro ọrhẹ ẹmro ra haphia ye fiẹ ekwakwa ri ha itanẹti ọrhẹ ividio sansan. (Matt. 24:45) Ọwan i vwo aruẹ ẹhẹn ro gberẹ ugbehian i Job re se Elihu, rọ tare: ‘Oyono ọgo yọ họhọ [Osolobrugwẹ]?’—Job 36:22.

16. Me wu na sabu ru ne wu mẹrẹn erere nẹ ọkpọvi Jehova?

¹⁶ Oborẹ wu na sabu ru. Ẹhẹn ọfuanfon i Jehova ọnọ ha userhumu wẹn ha oborẹ we se, jeghwai yono nẹ i Baibol na ruiruo. Nẹrhomo jerẹ ọbo ijoro na rọ tare: “O Jehova, yoni mẹ kpahen izede ọnọ. Mi na nya uvuẹn urhomẹmro ọnọ. Ru ọsoso ọmudu mẹ nọ zofẹn odẹ ọnọ.” (Ps. 86:11) Omarana, rhe se jeghwai yono i Baibol na ọrhẹ ẹbe ukoko na erọrọ, ri Jehova o tiobọnẹ nyoma ukoko yi. Itiọrurhomẹmro, ẹkẹ ọnọ o rhiẹ ọrẹ wu ne vwo irherhe ọvo-o. Wu guọlọ vwo imwẹro kpahen urhomẹmro na, ji haye ruiruo uvuẹn akpenyerẹn ọnọ. Ẹhẹn ọfuanfon na ọnọ sabu ha userhumu wẹn ruie. Wu ji guọlọ ha udu rhẹ imizu ukoko na aghwẹ. (Heb. 10:24, 25) Mesoriẹ? Fọkime aye ekrun ọnọ. Nekpẹn userhumu ẹhẹn ọfuanfon na ne wu sabu ha ẹkpahenrhọ ri mwidjẹn phia uvuẹn uyono ukoko, ji dabu ha ẹmro ra yẹruọ phia fiotọre. Nyoma izede enana vwe djephia rẹn Jehova ọrhẹ Jesu taghene wu vwo ẹguọlọ kpahen “igegede” aye.—John 21:15-17.

17. Izede ego wu ne ru djephia taghene wa fuevwan hobọtua ukoko i Jehova?

¹⁷ Phẹrẹkpẹ, ukoko rẹ ẹhẹn ọfuanfon i Jehova o suẹn ọvo yọ nọ hẹrhẹ uvuẹn akpọ na. Omarana, vwo oruru hobọtua ukoko i Jehova. Djephia taghene wu vwo ẹguọlọ kpahen aruẹ ihworho ephian jerẹ i Jehova, nyoma wu ne ghwoghwo rẹn ihworho wu vware. Hẹrokele ẹguọlọ ro vwo kpahen okugbe ọrhẹ ufuoma nyoma wu ne toroba okugbe uvuẹn ukoko na. Kerhọ i Jehova nyoma wu ne rhiabọ dede ọsoso iyono rọ haphia. Omarana, ọke akpọ Echu ono toba, ofẹn orho mwuo-o. Ukpomaran, wu ne fiudugbere mevi uvwre imizu ri vwo atamwu ga uvuẹn ukoko i Jehova.