Nẹ aye i sabu wian owian aghwoghwo na, o fori nẹ Emọ Uyono i Baibol na i fiudugbere. Aye ine ghwoghwo “omamọ iyẹnrẹn” rẹn ihworho dẹndẹn, ji ghwoghwo “ẹdẹ ẹzenguon” rẹn evwọkon na.

Omizu J. H. Hoskin, ro rhirhiẹ i Canada, ọ dabu fiudugbere ghwoghwo udabọ ẹkparehaso. Uvwre ọke ọkaka ọrẹ ẹgbukpe 1921, nọ nya vwa owuọwan rọ ha ogame i Methodist. Omizu Hoskin nọ tuẹn aghwoghwo rhọ nyoma rọ ta: “O fori na tẹmro kpahen oborẹ i Baibol na o kwerhọ, orhianẹ iroro ọwan ọ vẹnẹren uvuẹn ekwakwa ezẹko, ana sabu fuen ẹmro na ọrẹ ufuoma ji sẹrorẹ erhirhiẹ ugbehian ọwan.” Ọrẹn, ọrana ọ phia-a. Omizu Hoskin nọ tare: “Iminiti ezẹko ọvo yẹ ame i tẹmro ne, rẹ ọhworhare na o ki kurhu ighwe na gbangbanhon, ni mi tobọ roro taghene ijegbe ivakpọ na ine se ghwọghọ.”

Ọhworhare na nọ tare, “Mesoriẹ wu vwe bru ihworho ri vwe rhiẹ Ilele Kristi ye ghwoghwo riẹn?” Omizu Hoskin ọ kpahe-en, ọrẹn ọke rọ nyarẹn, no roro, ‘Mi rorori taghene ọye owuọwan ro vwo rhiẹ Olele Kristi yi mie ghwoghwo riẹn!’

Ọke ọhworhare na o ghwoghwo uvuẹn ẹga ye uvuẹn ẹdẹ rọ ha kpahiẹn, nọ ji ta erharhere ẹmro kpahen Omizu Hoskin. Omizu Hoskin nọ tare, “Nọ ha orhetio rẹn ere riẹ ẹga ye, nọ ta rẹn aye taghene mẹmẹ ohworho rọ phiẹ awan rhọ, rọ mai biomu kparobọ rọ rhiẹ amwa na dẹ ne, nọ ji ta taghene mi fo ohworho re ne kpe hwu.” Omizu Hoskin o fiudugbere ji ghwoghwo iyẹnrẹn esiri na ọrẹ efikparobọ. Nọ tare: “Oma ọ merheren mẹ omamọ ọke mie ghwoghwo uvuẹn ẹkwotọre na. Ihworho ezẹko na tobọ ta, ‘Mi rheri taghene wẹwẹ odibo Osolobrugwẹ!’ aye na guọlọ izede aye ine ru ha userhumu mẹ.”

Na sabu ha userhumu rẹn ihworho ru riaro, Emọ Uyono i Baibol ni ruẹ ẹkwaphiẹrhotọre uyono i Baibol rhẹ uvuẹn imagazini na The Golden Age. * O vwo ẹkwaphiẹrhotọre enọ sansan harẹn iphuphẹn, rẹ emiemọ ina sabu lele emọ aye yono kugbe. Emiemọ i ha “enọ na nọ emọ aye, ji ha userhumu rẹn aye guọlọ ẹkpahenrhọ na uvuẹn i Baibol.” Enọ ezẹko jerẹ, “Ẹbe emwa yi ha i Baibol na?,” ọ dabu ha iyono eghoghanren ezẹko phia. Erọrọ jerẹ, “O fori ne Ilele Kristi ephian i fiẹrorhọ taghene ana kparehaso aye?,” o  mwuegbe iphuphẹn nẹ aye i rhiẹ ighwoghwẹmro re fiudugbere.

Ẹkwaphiẹrhotọre ọrẹ Advanced Studies in the Divine Plan of the Ages, ọ ha userhumu rẹn Emọ Uyono i Baibol na ri te edje ne rhẹ enọ re mwu ohworho roro, ra bọn kpahen ẹrhiọ ọrukaro ọrẹ Studies in the Scriptures. Ihworho buebun re se ọbe ọwan i mẹrẹn erere nẹ ẹkwaphiẹrhotọre enana, ọrẹn The Golden Age ọrẹ December 21, 1921, no ghwoghwori taghene ana dobọ ẹkwaphiẹrhotọre na ji. Mesoriẹ e ruẹ ewene na?

Imizu ra kobaro uvuẹn ukoko na, i mẹrẹnvwrurhe taghene o fori nẹ ihworho ra ha i Baibol yono, i yono irhomẹmro Baibol na izede ona. Omarana, ne fomu ọbe re se The Harp of God phia uvuẹn November 1921. Ihworho ri vwo omamerhomẹ kpahen ọbe na, ni ji vwobọrhọ ẹkwaphiẹrhotọre uyono omobọ ra bọn kpahen ọbe na. Ẹkwaphiẹrhotọre uyono omobọ ọrana ọ ha userhumu rẹn ihworho re se ọbe na rhe kpahen “egbemwuo Osolobrugwẹ rọ nọ ha ebrurhọ rẹn ituakpọ vwo arhọ i bẹmẹdẹ.” Marhẹ ọnana ọ wian lele?

Ohworho orho rhiabọ dede ọbe na owu, na yẹ ye ibiẹ ikadi kpahen ekete ro no se uvuien. Ọkprughwre rọ ha kpahiẹn, na yẹ ye ikadi ọrọrọ ro vwo enọ kpahen ekete ro seri na. Ikadi na o vwo ekete ro no se uvuẹn ọkprughwre rọ ha kpahiẹn.

Kọkprughwre kọkprughwre uvwre ikprughwre 12, ukoko na nọ ha ikadi ọkpokpọ rẹn ohworho na. Ọgbọ buebun, ihworho ri rhiẹ imirẹghwa yanghene ere kpomẹ uvuẹn ukoko na ya ha ikadi na nyarhẹn. Jerẹ udje, Anna K. Gardner, ro nẹ Millvale, Pennsylvania, U.S.A. rhe, nọ tare: “Ọke re tiobọnu The Harp of God na, nọ yẹ omizu mẹ re se Thayle, rọ vwọ sabu nya, owian rọ nọ sabu ru, nyoma rọ nọ ha ikadi ro vwo enọ vwe ihworho kọkprughwre kọkprughwre.” Ọke ẹkwaphiẹrhotọre na orho hin ne, na kọn bru ohworho na, na ha userhumu riẹn yono i Baibol na rhọ.

Uvuẹn obẹta ẹgbukpe na, Omizu J.F. Rutherford no dje ileta vwe ukoko na ephian. Nọ ya rhẹ ileta na taghene a “dabu se oseri uvuẹn ẹgbukpe ọnana ghwẹ ẹgbukpe buebun ri vrẹnren na uvuẹn owian orhọ na.” Ro roro kpahen owian rọ ha obaro na, nọ habaye: “Owian buebun ọ ji havwiẹ ra na wian. Jirie rẹn awọrọ nẹ aye i homaba owian aghwoghwo na.” Emọ Uyono i Baibol na i dabu ha urhebro ọnana ruiruo. Uvuẹn ẹgbukpe 1922, Emọ Uyono i Baibol na ni dabu fiudugbere ghwoghwo Uvie na ghwẹ ẹgbukpe ri vrẹnren.