1. Ifiẹrorhọ ọgo yi Jehova ọ yẹre ọwan ne?

 JEHOVA ọ yẹre ọwan obọdẹn ifiẹrorhọ arhọ i bẹmẹdẹ. Ihworho ezẹko i vwo ifiẹrorhọ aye ine nyerẹn bẹmẹdẹ obẹ odjuwu. (1 Cor. 15:50, 53) Ọrẹn, buebun i vwo ifiẹrorhọ aye ine nyerẹn bẹmẹdẹ uvuẹn otọrakpọ na ọrẹ omọkpokpọ ọrhẹ omamerhomẹ. (Rev. 21:3, 4) Sẹ ọwan ine nyerẹn bẹmẹdẹ obẹ odjuwu yanghene uvuẹn otọrakpọ na, ifiẹrorhọ ọwan ọ ghanranren.

2. Me ọyẹ a bọn ifiẹrorhọ ọwan kpahen, mesoriẹ ana sabu ta omaran?

² Ẹmro na “ifiẹrorhọ” uvuẹn i Baibol na, ọnọ sabu mevirhọ ọrẹ “a hẹrhẹ ọke emru orhorhomu ọnọ phia.” Ifiẹrorhọ re vwo kpahen obaro na, o mwẹro fọkime o nẹ obẹ i Jehova rhe. (Rom. 15:13) E rhe kpahen oborẹ o ve rẹn ọwan ne, e rheri taghene ọ nyamwu ive yi ọke ephian. (Num. 23:19) E vwo imwẹro taghene Jehova o vwo oruru ọrhẹ omẹgbanhon ro no ruẹ kemru kemru rọ tare. Omarana, ifiẹrorhọ ọwan o sekpahen iroro omobọ yanghene oborẹ a guọlọre nọ phia-a; fọkime a bọnriẹn kpahen imwẹro ri na phia.

3. Me ye ne yono uvuẹn urhomu-ẹmro ọnana? (Psalm 27:14)

³ Jehova o vwo ẹguọlọ kpahen ọwan, ọ ji guọlọ na hẹrosuiẹ. (Se Psalm 27:14.) Ọke erhe vwo ifiẹrorhọ ọgbogbanhon kpahen Jehova, na sabu diẹn edamuni ra na dẹrughwaroghwu obaro na rhẹ uduefigbere kugbe aghọghọ. Jene yono oborẹ ifiẹrorhọ o ru sẹrorẹ ọwan. Omarana, jene kiki yono kpahen oborẹ ifiẹrorhọ ọwan o ru họhọ ọtan ọrhẹ erhu ọgbogbanhon. Orho ru, ne ne yono oborẹ ene ru ruie gbanhonrhọ.

4. Marhẹ ifiẹrorhọ o ru họhọ ọtan? (Hebrews 6:19)

⁴ Uvuẹn ileta rẹ ọnyikọ Paul ọ ya vwe itu i Hebrew, nọ ha ifiẹrorhọ ọwan dje ọtan. (Se Hebrews 6:19.) Ọgbọ buebun, ọye ọ nyoma urhie ọduado riẹ ekete sansan, omarana Paul o rheri taghene a sabu ha ọtan sẹrorẹ ọkuna na no jo bo vru. Uvuẹn erhirhiẹ owu, ọye ọ ha uvuẹn ọkuna ọke ogiribo ọgbogbanhon o zu rhe. Uvwre ọke ọrana, nọ mẹrẹn era ghwa ọkuna na re donron ọtan buebun rhẹ uvuẹn urhie na neneyo ogiribo na ọ jọ ha ọkuna na ghwiẹ atita egbogbanhon. (Acts 27:29, 39-41) Jerẹ ọtan, ifiẹrorhọ ọwan o ruẹ ọwan gbanhan neneyo e je beghe nẹ ogame i Jehova ọke arha dẹrughwaroghwu ebẹnbẹn egbogbanhon. Ifiẹrorhọ ọwan rọ gbanhonron, ọ ha userhumu rẹn ọwan sẹrorẹ ẹhẹn ọfọfọ ọke erhe vwo ebẹnbẹn, fọkime e rheri taghene ekwakwa ine rhomurhọ. Karorhọ, Jesu ọ ha orhetio rẹn ọwan taghene ana kparehaso ọwan. (John 15:20) Omarana, erhe roro kodo kpahen ebrurhọ ra na mẹrẹn obaro na, nọ lẹrhẹ ọwan ga i Jehova rhọ.

5. Marhẹ ifiẹrorhọ ri Jesu o vwori o rurie gbanhon lele ọke rọ dẹrughwaroghwu erhirhiẹ uhwu?

⁵ Roro kpahen oborẹ ifiẹrorhọ o ru ruẹ i Jesu gbanhon udabọ uhwu gbalogbalo rọ hẹrhiẹ. Uvuẹn Pentecost 33 C.E., ọnyikọ Peter no se aruẹmẹrẹn owu rọ ha ọbe Psalms, rọ dabu dje oborẹ i Jesu ọ sẹrorẹ ẹhẹn ọfọfọ lele: “Mi ne rhirhiẹ ye ọrẹ ifiẹrorhọ; fọkime wu nyaji mẹ vwo uvuẹn Usin na-a, yanghene wu ha uphẹn rẹn ohworho ro vwo atamwu kpahuọn nọ mẹrẹn oborẹ o biomuru-un. . . . Wu na lẹrhe mẹ vwo aghọghọ ọduado obaruọ.” (Acts 2:25-28; Ps. 16:8-11) Dedevwo Jesu o rheri taghene ono hwuo, o vwo imwẹro ọgbogbanhon taghene Jehova ọnọ rhọmiẹ nuhwu, habaye ono ji vwo aghọghọ rọ nọ rharhumu kwomakugbe Ọsẹ ye obẹ odjuwu.​—Heb. 12:2, 3.

6. Me yẹ omizu ọhworhare owu ọ ta kpahen ifiẹrorhọ?

⁶ Ifiẹrorhọ ọgbogbanhon ọ ha userhumu rẹn imizu ukoko na buebun vwo edirin ne. Roro kpahen udje Leonard Chinn, omizu ọhworhare ro rhirhiẹ England. Uvwre ọke Uvweri Akpọ Ephian Ọrukaro, ne mwurien rhẹ ekanron fọkime o kwe vwobọrhọ owian isodja-a. Uvwre ibiamo eva ne firie rhẹ ekanron ọnẹyen san, na ji yẹ ye owian ọgbogbanhon. Ọke oru nọ yare: “Oborẹ mi rhiẹromẹrẹn, ọ lẹrhere mẹ rhe oborẹ ifiẹrorhọ ọghanren te na sabu vwo edirin. E vwo udje i Jesu, inyikọ na, emẹraro na ọrhẹ ive eghoghanren ri ha Baibol na. Enana ephian a yẹ ọwan ifiẹrorhọ ọduado kpahen obaro na, ji ruẹ ọwan gbanhan ne vwo edirin.” Ifiẹrorhọ ọ họhọ ọtan harẹn Leonard, ono ji rhiẹ ọtan rẹn ọwan.

7. Marhẹ edamuni ine ru ruẹ ifiẹrorhọ ọwan gbanhon? (Romans 5:3-5; James 1:12)

⁷ Ifiẹrorhọ ọwan ọ gbanhanrhọ ọke erhe diẹn ebẹnbẹn hin, ji mẹrẹn userhumu ọrhẹ ekwerhọ i Jehova. (Se Romans 5:3-5; James 1:12.) Omarana, ne vwo ifiẹrorhọ rọ gbanhonrhọ ghwẹ ọke re tu rhiabọ ha urhomẹmro na. Echu ọ guọlọre nẹ edamuni i lẹrhẹ ẹhẹn ọwan seriotọre, ọrẹn, nyoma userhumu i Jehova ana sabu diẹn aye ephian.

8. Marhẹ ifiẹrorhọ o ru họhọ erhu ọgbogbanhon? (1 Thessalonians 5:8)

⁸ Baibol na ọ ha ifiẹrorhọ ọwan dje erhu ọgbogbanhon. (Se 1 Thessalonians 5:8.)  Isodja o ku erhu ọgbogbanhon rhọ, nọ sẹrorẹ urhomie nẹ ẹkuọn ọvwreghrẹn yen. Uvuẹn uvweri re fiẹ haso Echu, ofori na sẹrorẹ iroro ọwan nẹ ẹkparehaso Echu. Ọye ọ ha ena ọrhẹ iroro sansan ri ne biomu ẹhẹn ọwan damu ọwan nẹ. Jerẹ oborẹ erhu ọgbogbanhon ọ sẹrorẹ urhomu isodja na, ifiẹrorhọ ọwan ọ sẹrorẹ iroro ọwan neneyo a sabu vwo atamwu kpahen Jehova.

9. Me yo nerhumie sa orhianẹ ihworho e vwo ifiẹrorhọ-ọ?

⁹ Ifiẹrorhọ re ne vwo arhọ i bẹmẹdẹ ọ ha userhumu rẹn ọwan brorhiẹn ẹghwanren, ji ha ọmẹrẹnvwrurhe ruiruo. Ọrẹn, ifiẹrorhọ ọwan ọrhọ vwiẹlẹ, na ha uphẹn rẹn iroro esọsọ nẹ aye i sun ọwan, rọ nọ sabu lẹrhẹ ive arhọ i bẹmẹdẹ na sẹrẹ ọwan ẹro. Roro kpahen erhirhiẹ Ilele Kristi ezẹko re rhirhiẹ Corinth ọke ahwanren. Aye erhe vwo esegburhomẹmro kpahen ive ọghoghanren i Jehova owu-u, nọyẹ ifiẹrorhọ ẹrhọmọnuhwu na. (1 Cor. 15:12) Paul nọ tare taghene ihworho ri vwe vwo ifiẹrorhọ ye nyerẹn harẹn inyenana ọvo. (1 Cor. 15:32) Inyenana, ihworho buebun ri vwe vwo ifiẹrorhọ kpahen ive Osolobrugwẹ, e nyerẹn harẹn ọrẹ wanana ọvo, ji ruẹ kemru kemru rọ nọ yẹ aye omamerhomẹ ogege. Ọrẹn, ọwan i hẹroso ive Osolobrugwẹ kpahen obaro na. Ifiẹrorhọ ọwan ọ họhọ erhu ọgbogbanhon rọ sẹrorẹ iroro ọwan, ji simi ọwan ne je nyerẹn aruẹ akpọ ro no biomu onyerẹnkugbe ọwan rhẹ Jehova.​—1 Cor. 15:33, 34.

10. Marhẹ ifiẹrorhọ ono ru simi ọwan nẹ iroro esọsọ?

¹⁰ Ifiẹrorhọ ọwan ọnọ ji sabu simi ọwan nẹ iroro na taghene o vwo oborẹ ọsoriẹ ana damoma ruẹ ọhọre i Jehova-a. Jerẹ udje, ihworho ezẹko ina sabu roro: ‘Mi sabu rhirhiẹ usuẹn ihworho ri ne nyerien bẹmẹdẹ-ẹ. Mie mwuovwan te-e. Mi sabu nyalele irhi egbagba i Jehova-a.’ Karorhọ taghene obrurhe efian i Job re se Eliphaz, ọ ji ha aruẹ iroro ọrana ruiruo ọke rọ tẹmro rẹn Job. Eliphaz ọrhọ ta: “Ọrọmo yẹ ọmọ onyakpọ ro no rhiẹ ọrọ fonron?” Riobarorhọ, nọ ta kpahen Jehova: “Nughe! O fiẹ ẹhẹn rhọ ihworho efuanfon enẹye-en, idjuwu na dede a fon uvuẹn ukẹruiẹ-ẹ.” (Job 15:14, 15) Ọrana ofian! Karorhọ, Echu yọ ha oberhumu aruẹ iroro erana. E rheri taghene erhe roro kpahen ekwakwa erana phan, ifiẹrorhọ ọwan ono seriotọre. Omarana, tiẹn aruẹ efian erana, ji tẹnrovi ive i Jehova. Vwo imwẹro taghene ọ guọlọre ne wu nyerien bẹmẹdẹ, ọnọ ji ha userhumu wẹn nyamwu ẹkẹ ọrana.​—1 Tim. 2:3, 4.

11. Mesoriẹ o fo ne vwo erhionrin ọke ra hẹrhẹ orugba ifiẹrorhọ ọwan?

¹¹ Ọ lọhọ re ne ruẹ ifiẹrorhọ ọwan gbanhon ọke ephia-an. Ofu ọnọ sabu ze ọwan ọke ra hẹrhẹ i Jehova. Ọrẹn, Jehova ọ havwiẹ bẹmẹdẹ, omarana ukẹro rọ ha ni ọke, ọ vẹnẹ ọrẹ ọwan. (2 Pet. 3:8, 9) Ono ruẹ ọhọriẹ gba uvuẹn izede rọ mai serhọ, ọrẹn ọkezẹko o ruie lele oborẹ e fiẹrorhọ-ọ. Me yọ nọ sabu ha userhumu rẹn ọwan sẹrorẹ ifiẹrorhọ ọgbogbanhon, ji vwo erhionrin hẹrhẹ i Jehova no ruẹ ive yi gba?​—Jas. 5:7, 8.

12. Lele oborẹ ọ ha Hebrews 11:1, 6, marhẹ ifiẹrorhọ o ru surhobọmwu esegburhomẹmro?

¹² Ene ruẹ ifiẹrorhọ ọwan gbanhon arha daji kẹrẹ i Jehova, ro rhiẹ ọro no ruẹ ifiẹrorhọ ọwan gba. Itiọrurhomẹmro, na sabu vwo ifiẹrorhọ, ene vi vwo esegburhomẹmro taghene Jehova o nyerẹn, ọye ọ ji “kwosa rẹn ihworho ra guọliẹ nẹ otọre  ẹhẹn sa.” (Se Hebrews 11:1, 6.) Erhe ghini vwo imwẹro kpahen Jehova, ne ne fiudugbere rhọ taghene ono ruẹ ọsoso ekwakwa ro veri. Jene yono kpahen izede ene ru ruẹ onyerẹnkugbe ọwan rhẹ Jehova kodorhọ, ji ruẹ ifiẹrorhọ ọwan gbanhon.

13. Marhẹ ene ru tikẹrẹ i Jehova rhọ?

¹³ Nẹrhomo vwe i Jehova, ji se i Baibol na. Dedevwo a vwa mẹrẹn i Jehova-a, ana sabu tikẹriẹ. Ana sabu tẹmro riẹn nyoma ẹrhomo, rhẹ imwẹro na taghene ọnọ kerhọ ọwan. (Jer. 29:11, 12) Ana sabu kerhọ i Jehova nyoma re ne se i Baibol na, ji roro kodo kpahiẹn. Ọke re se oborẹ i Jehova ọ hẹrote eri vwo atamwu kpahiẹn uvuẹn ọke rọ vrẹnren na, ifiẹrorhọ ọwan nọ nọ gbanhonrhọ. Kemru kemru ri ha i Baibol na, a “yariẹ nọ yẹ ọwan ọkpọvi, neneyo nyoma edirin ọwan ọrhẹ nyoma urhebro ro nẹ Eyaya Ọfuanfon na rhe, ọwan ina sabu vwo ifiẹrorhọ.”​—Rom. 15:4.

14. Mesoriẹ o fo ne roro kpahen oborẹ i Jehova o ru rẹn awọrọ ne?

¹⁴ Roro kodo kpahen oborẹ i Jehova o ruẹ ive yi gba lele. Roro kpahen oborẹ i Jehova o ru rẹn Abraham ọrhẹ Sarah. Aye i vrẹn ẹgbukpe aye ina sabu vwiẹ emọ ne. Ọren, Osolobrugwẹ no ve rẹn aye taghene aye ine vwiẹ ọmọ. (Gen. 18:10) Marhẹ Abraham ọ kpahenrhọ ye lele? Baibol na ọrhọ ta: “O vwo esegburhomẹmro taghene ono rhiẹ ọsẹ rẹn egbamwa buebun.” (Rom. 4:18) Dedevwo Abraham o rhe oborẹ i Jehova ono ruẹ ive yi gba lele-e, ọrẹn o vwo imwẹro taghene Jehova ono ruẹ ive Ọnẹyen gba. Esegburhomẹmro Abraham o sefughwẹ-ẹ. (Rom. 4:19-21) Aruẹ iyẹnrẹn erana e yono ọwan taghene ana sabu hẹroso i Jehova ọke ephian no ruẹ ive yi  gba, o toro oborẹ aye i gbanhon te uvuẹn ukẹro ọwa-an.

15. Mesoriẹ o fo ne roro kpahen oborẹ i Jehova o ru rẹn ọwan ne?

¹⁵ Roro kpahen oborẹ i Jehova o ru wẹn ne. Roro kpahen erere wu mẹrẹn nẹ orugba ive i Jehova ri ha i Baibol na ne. Jerẹ udje, Jesu o veri taghene Jehova ọnọ yẹ ọwan ekwakwa ra ghini guọlọ ne nyerẹn akpọ. (Matt. 6:32, 33) Jesu ọ ji yọ imwẹro taghene Jehova ọnọ yọ ẹhẹn ọfuanfon ọke wu rha guọliẹ. (Luke 11:13) Jehova o ruẹ ive erana gba ne. Ọkezẹko, wu na ji sabu roro kpahen ive erọrọ ri Jehova o rugba wẹn ne. Jerẹ udje, o veri taghene ọnọ harhomuo, yọ urhebro, ji yonuo ne wu sabu ga ye. (Matt. 6:14; 24:45; 2 Cor. 1:3) We rhe roro kodo kpahen oborẹ Osolobrugwẹ o ru wẹn ne, wu ne ruẹ ifiẹrorhọ ọnọ kpahen oborẹ ono ruo uvuẹn obaro na gbanhon.

16. Mesoriẹ ifiẹrorhọ o rhiẹ ẹghẹlẹ rọ ghanranren?

¹⁶ Ifiẹrorhọ re ne nyerẹn bẹmẹdẹ, ẹghẹlẹ ọghoghanren ro nẹ obẹ i Jehova rhe. Ọwan a hẹrhẹ akpọ obọdẹn uvuẹn obaro na​—re vwo imwẹro kpahen taghene ọnọ rhiọ. Ọ họhọ ọtan rẹn ọwan, ro ruẹ ọwan gbanhan na sabu diẹn edamuni, ẹkparehaso ọrhẹ uhwu dede. Ọ họhọ erhu ọgbogbanhon rẹn ọwan, rọ sẹrorẹ iroro ọwan neneyo a sabu tiẹn oborẹ obiomurun, ji tigban oborẹ orhomurun. Ifiẹrorhọ ọwan ra bọn kpahen i Baibol na, o tiẹ ọwan kẹrẹ Jehova rhọ, ji dje rẹn ọwan oborẹ ẹguọlọ ye o kodo te. Ana mẹrẹn erere buebun erhe ruẹ ifiẹrorhọ ọwan gbanhonrhọ.

17. Mesoriẹ ifiẹrorhọ ọwan o suẹn riẹ aghọghọ?

¹⁷ Ọnyikọ Paul ọ nyoma ileta ha urhebro ọnana rẹn Ilele Kristi ri ha Rome: “Are i ghọghọ fọkiẹ ifiẹrorhọ” na. (Rom. 12:12) Paul ọ sabu ghọghọ fọkime o vwo imwẹro taghene ọrhọ fuevwan toba, ono vwo arhọ i bẹmẹdẹ obẹ odjuwu. Ọwan ina ji sabu ghọghọ fọkiẹ ifiẹrorhọ ọwan, fọkime e vwo imwẹro taghene Jehova ono ruẹ ive yi gba. Ọbo ijoro na ọrhọ ya: “Omamerhomẹ ọ havwiẹ rẹn ohworho . . . ro fiẹrorhọ i Jehova ro rhiẹ Osolobrugwẹ ọnẹyen, . . . Ohworho ro vwo atamwu ọke ephian.”​—Ps. 146:5, 6.