1. Mesoriẹ ene vwo imwẹro taghene Ẹmro Osolobrugwẹ o vwo omẹgbanhon? (Mẹrẹn ifoto rọ ha uvuẹn ọtonrhọ uyono na.)

IDIBO i Jehova i vwo imwẹro taghene Ẹmro Osolobrugwẹ, “o nyerẹn ọ jeghwai vwo omẹgbanhon.” (Heb. 4:12) Buebun ọwan i mẹrẹn ọnana vwrurhe uvuẹn akpenyerẹn ọwan ne taghene i Baibol na o vwo omẹgbanhon ro wene akpenyerẹn ohworho. Vẹrhẹ bi, buebun ọwan i fioma rhọ uhi eso, uruemru ọfanrhiẹn ọrhẹ imwu egbogbanhon ẹha, e ki me rhiẹ Iseri Jehova. Awọrọ i feri omamọ, ọrẹn, aye e ji nie taghene emru ọ kanrenrẹn aye. (Eccl. 2:​3-11) Ọgbọ buebun, ihworho ri vwe vwo ifiẹrorhọ bi, i mẹrẹn ọkpọvi ọrhẹ aruefirhọ nyoma omẹgbanhon i Baibol na rọ sabu wene ohworho. Ọkezẹkọ, wu se ikuegbe re rhiẹromẹrẹn ra homaphia uvuẹn Watchtower ri vwo urhomu-ẹmro na “The Bible Changes Lives.” Ọwan i ji mẹrẹnvwrurhe taghene arha tobọ rhiẹ Oseri Jehova ne, o ji fo ne rhe ruẹ riaro nyoma userhumu i Baibol na.

2. Marhẹ Ẹmro Osolobrugwẹ o ru wian uvuẹn oma Ilele Kristi ọke inyikọ na?

² O fori no gbe ọwan unu taghene ihworho buebun inyenana i ru ewene nime aye e yono Ẹmro Osolobrugwẹ? Ẹjo! Aruo iyẹnrẹn erana a karorhọ ọwan kpahen ihworho ri ne lele i Jesu sun, ri nyerẹnren ọke inyikọ na. (Se 1 Corinthians 6:​9-11.)  Ọke ọnyikọ Paul ọ hunute aruo ihworho ri na ja ruẹ Uvie Osolobrugwẹ hin, nọ tare: “Omaran ihworho ezẹko usuẹn are i havwọ bi.” Ọrẹn, aye i wene uruemru aye nyoma userhumu i Baibol na ọrhẹ ẹhẹn ọfuanfon Osolobrugwẹ. Dedevwo aye i mẹrẹn urhomẹmro na vwrurhe ne, ezẹko usuẹn aye i ji ru ọdandan ọghwaghwa rọ hobọte onyerẹnkugbe aye rhẹ i Jehova. Baibol na ọ tare taghene e le Olele Kristi owu ra djẹha nẹ ukoko na; ọrẹn ọke oru na rharhumu se yi. (1 Cor. 5:​1-5; 2 Cor. 2:​5-8) O rhiẹ emru urhebro ra sabu se kpahen ebẹnbẹn rẹ imizu ọwan i dẹrughwaroghwu ọrhẹ oborẹ aye i ru fiekparobọ.

3. Me ye ne yono kpahen uvuẹn urhomu-ẹmro ọnana?

³ Fọkime ọwan i vwo Ẹmro Osolobrugwẹ ro vwo omẹgbanhon na, no fori na dabu haye ruiruo. (2 Tim. 2:15) Uvuẹn urhomu-ẹmro ọnana, ene yono kpahen oborẹ ene ru sabu ha Ẹmro Osolobrugwẹ ruiruo (1) uvuẹn akpenyerẹn ọwan, (2) erhe vwobọrhọ owian aghwoghwo na, ọrhẹ (3) ọke ra ha ẹmro phia. Ekarorhọ enana, ina ha userhumu rẹn ọwan sabu djephia taghene e vwo ẹguọlọ ọrhẹ ọdaremẹro kpahen i Jehova ro yono ọwan.​—⁠Isa. 48:⁠17.

4. (a) Me yo fori ne ru, arha guọlọ nẹ Ẹmro Osolobrugwẹ ọ hobọte akpenyerẹn ọwan? (b) Ọke ọgo wu kwaphiẹ rhọ we se i Baibol na?

⁴ Arha guọlọ nẹ Ẹmro Osolobrugwẹ ọ hobọte akpenyerẹn ọwan, o fori ne se yi ọke ephian yanghene kẹdẹkẹdẹ. (Josh. 1:⁠8) E rheri taghene ọwan i vwo ekwakwa buebun ra ha ọke ọwan. Udabọ ọrana, o fo na lẹrhẹ ewian ọwan jaghwẹrhọ ẹkwaphiẹrhotọre re ne se i Baibol na kẹdẹkẹdẹ-ẹ. (Se Ephesians 5:​15, 16.) Iseri Jehova buebun i kwaphiẹ ọke aye rhọ, nẹ aye i sabu se i Baibol na kẹdẹkẹdẹ, orhianẹ urhiọke, erhẹrhuvo yanghene owuọwọn. Aye i vwo aruo iroro ọrẹ ọbo ijoro na rọ tare: “Marhẹ mi vwo ẹguọlọ kpahen urhi ọnọ te! Mia dabu roro kpahiẹn kẹdẹkẹdẹ.”​—⁠Ps. 119:⁠97.

5, 6. (a) Mesoriẹ eroro kodo ọ ghanren? (b) Marhẹ ene ru sabu roro kodo izede ro mwidjẹn? (c) Erere ego ye wu mẹrẹn nẹ Isese i Baibol na ọrhẹ e roro kodo kpahiẹn?

⁵ O rhiẹ oborẹ ọ ghanranren ne se i Baibol na jeghwai roro kodo kpahen oborẹ ọwan e se. (Ps. 1:​1-3) Erhe ru omaran, ọnọ lẹrhẹ ọwan sabu ha ẹghwanren rọ ha uvuien ruiruo. Sẹ uvuẹn ifonu yẹ ọwan e se i Baibol na yanghene uvuẹn ọbe, o fori nẹ ọwan i lẹrhẹ Ẹmro Osolobrugwẹ hobọte ọmudu ọwan.

⁶ Marhẹ ọwan ine ru sabu rhe roro kodo kpahen oborẹ e seri? Ihworho buebun a mẹrẹn erere, aye i rha dobọji ibiesuọn ọke aye se ekete ezẹko uvuẹn i Baibol na jeghwai roro kpahen enọ jerẹ: ‘Me yẹ ọnana ọ ta mẹ kpahen i Jehova? Marhẹ mia ha uruemru-urhi rọ ha uvuẹn ekete i Baibol ọnana ruiruo  lele? Ekete ego ye mi na wian kpahen?’ Ọwan i rhe roro kodo kpahen Ẹmro Osolobrugwẹ jeghwai nẹrhomo kpahiẹn, ọwan ine vwo omwemẹ ra na ha uruemru-urhi na ruiruo vuọnvuọn uvuẹn akpenyerẹn ọwan. Ọke ọrana, ọwan ni ne rhiẹromẹrẹn omẹgbanhon rọ ha uvuẹn i Baibol na rọ wian uvuẹn akpenyerẹn ọwan.​—⁠2 Cor. 10:​4, 5.

7. Marhẹ wu ne ru ha Ẹmro Osolobrugwẹ ruiruo uvuẹn owian aghwoghwo na?

⁷ Me yọ nọ ha userhumu rẹn ọwan sabu ha Ẹmro Osolobrugwẹ ruiruo uvuẹn owian aghwoghwo na? Idjaghwẹ ọrukaro ya na haye ruiruo ọke ephian, erhe ghwoghwo yanghene erhe yono awọrọ. Omizu owu no dje udje yi izede omana, “Orhianẹ wẹwẹ ọrhẹ i Jehova e riẹ aghwoghwo ọrẹ i nẹ oghwa riẹ oghwa, wẹwẹ ọvo yi na rha tẹmro, gbinẹ wu na ha uphẹn rẹn i Jehova nọ tẹmro?” Oborẹ ọ haye ta yẹ: Wu rhe se ekete nẹ i Baibol na rẹn ohworho uvuẹn owian aghwoghwo na, wa ha uphẹn rẹn i Jehova nọ tẹmro rẹn ọrovwoghwa na. Ekete i Baibol rọ dabu serhọ o te ẹhẹn ihworho ghwẹ ẹmro rẹ ọwan i ta rẹn aye. (1 Thess. 2:13) Gba nọ oma, ‘Mia guọlọ uphẹn mi ne se ekete i Baibol rẹn ihworho mie ghwoghwo riẹn?’

8. Mesoriẹ ene ru vrẹn ọrẹ ana ghwai se ekete i Baibol rẹn ohworho re ghwoghwo riẹn?

⁸ Itiọrurhomẹmro, o fori ne ru vrẹn ọrẹ ana ghwai se ekete i Baibol rẹn ihworho re ghwoghwo riẹn. Mesoriẹ? Nime ihworho buebun a dabu vwẹruọ i Baibol na fiotọre-e. Omaran ọ ji havwọ ọke inyikọ na, tobọ te inyenana. (Rom. 10:⁠2) Omarana, o fo nẹ ọwan i roro taghene ohworho ono vwẹruọ ekete i Baibol re se riẹ-ẹn. O fori na djokarhọ eghwẹmro eghoghanren uvuẹn ekete re se rẹn ohworho na uvuẹn i Baibol na, ọkezẹko ana sabu rharhumu se ẹmro ra guọlọ karunumwu na jeghwai dje yi fiotọre. Erhe ru omaran, ọnọ ha userhumu rẹn ọwan ha Ẹmro Osolobrugwẹ te ọmudu  ihworho rẹ ọwan e ghwoghwo riẹn.​—⁠Se Luke 24:⁠32.

9. Marhẹ ene ru ha userhumu rẹn ihworho nẹ aye i họghọ rẹn i Baibol na ọke a guọlọ se yi rẹn aye? Dje udje yi.

⁹ Ẹmro rẹ ọwan a ta e ki se ekete i Baibol, o djephia taghene a họghọ rẹn i Baibol na. Jerẹ udje, ana sabu ta, “Jenẹ a mẹrẹn oborẹ ọmemama ọwan ọ ta kpahen oghwẹmro ọnana.” Erhe ghwoghwo rẹn ohworho ro vwo riẹ ishọshi, ana sabu ta, “Djokarhọ oborẹ Eyaya Ọfuanfon na ọ ta rẹn ọwan.” Yanghene erhe ghwoghwo rẹn ohworho ro vwo vwo omamerhomẹ kpahen ẹga, wu na sabu nọ, “Wu rhon kpahen isẹ ọnana dẹ ne?” Itiọrurhomẹmro, o fori ne wene ena ra ha ghwoghwo rẹn ihworho sekpahen aruo ihworho re ghwoghwo riẹn.​—⁠1 Cor. 9:​22, 23.

10. (a) Ta kpahen oborẹ omizu ọhworhare owu o rhiẹromẹrẹn. (b) Marhẹ wu ru rhiẹromẹrẹn oborẹ Ẹmro Osolobrugwẹ ọ hobọte ihworho lele uvuẹn owian aghwoghwo na?

¹⁰ Ihworho buebun i mẹrẹnvwrurhe ne taghene arha ha i Baibol na ruiruo uvuẹn owian aghwoghwo na ọ hobọte ihworho re ghwoghwo riẹn. Roro kpahen udje ọnana. Omizu owu ọ rharhumu bru ọhworhare owu ro se ẹbe ukoko na uvwre ẹgbukpe buebun ne. Ukperẹ ọnọ ghwai yẹ ye i Watchtower ọkpokpọ rọ homaphia, omizu na no se ekete i Baibol rọ ha uvuẹn Watchtower na riẹn. Omizu na o se 2 Corinthians 1:​3, 4 riẹn, rọ tare: ‘Ọsẹ arodọmẹ ọrhẹ Osolobrugwẹ urhebro ephian ọ ha urhebro rẹn ọwan uvuẹn edamuni ọwan ephian.’ Ẹmro na ọ te ọhworhare na ẹhẹn omamọ, te erhirhiẹ rọ ta rẹn omizu na nọ rharhumu se ekete na riẹn. Ọhworhare na nọ tare taghene ọye ọrhẹ aniẹ i guọlọ urhebro omamọ, omarana, no mo vwo omamerhomẹ kpahen i Baibol na. We kwerhọ ye taghene Ẹmro Osolobrugwẹ o ghini vwo omẹgbanhon arha haye ruiruo uvuẹn owian aghwoghwo na?​—⁠Acts 19:⁠20.

11. Ohwan ọgo yẹ imizu ra ha ẹmro phia i vwori?

¹¹ Ọwan ephian a riẹ amerhen uyono ẹnya ọrhẹ omẹvwa ekokamu ọrhẹ eduado. Iroro owu kirighwo rọ lẹrhẹ ọwan kwomakugbe, yẹ ọrẹ ọwan ina ha ẹga rẹn i Jehova. Ọwan a ji mẹrẹn erere nẹ ọkpọvi ra mẹrẹn nẹ yono erana sa. Imizu ra ha ẹmro phia uvuẹn Aghwẹlẹ Uvie i vwo uphẹn ọduado. Ọrẹn, o fori nẹ aye i mẹrẹnvwrurhe taghene aye i ji vwo ohwan ọduado. (Jas. 3:⁠1) O fori nẹ aye i bọn ẹmro aye kpahen Ẹmro Osolobrugwẹ. Orhianẹ wu vwo ẹmro wu na ha phia, marhẹ wu ne ru lẹrhẹ Ẹmro Osolobrugwẹ ro vwo omẹgbanhon no te ọmudu ihworho ri ha uvuẹn esiyẹ na?

12. Marhẹ ọtẹmro ono ru sabu bọn ẹmro ọnẹyen kpahen oborẹ ọ ha uvuẹn i Baibol na?

¹² O fori ne wu bọn ẹmro ọnọ kpahen oborẹ ọ ha uvuẹn i Baibol na. (John 7:16) Me yẹ ọnana o sekpahen? O sekpahen ọrẹ ana jomarhotọre neneyo izede ra ha ẹmro phia lele, ikun yanghene idje ra ha ruiruo, i je rhe beghe ẹmro na nẹ i Baibol ra ruiruo. Jeghwai karorhọ taghene ne se i Baibol na rẹn ihworho o mevirhọ taghene we yono ihworho oborẹ ọ ha uvuẹn i Baibol na-a. Itiọrurhomẹmro, o fo ne se ekete i Baibol buebun ri na sabu lẹrhẹ ẹmro na je te ọmudu ihworho-o. Omarana, gba sanọ ekete i Baibol kirighwo wu guọlọ se, ne wu dabu se yi phia, dje yi fiotọre, dje udje kpahiẹn, ne wu jeghwai dje kpahen oborẹ ana haye ruiruo lele. (Neh. 8:⁠8) Orhianẹ a bọn ẹmro ọnọ kpahen ọbe ẹmro ukoko na, dabu mwuegbe ọbe ẹmro na, ọrhẹ ekete i Baibol ri ha uvuien. Damoma ne wu vwẹruọ ẹmro ri ha uvuẹn ọbe ẹmro na ọrhẹ ekete i Baibol ri ha uvuien. Gba ha ekete i Baibol wu sanọren na, e dje ihwẹnmro ri ha uvuẹn ọbe ẹmro na  fiotọre. (Wu na sabu mẹrẹn idjaghwẹ wu na sabu ha ruiruo uvuẹn uyono 21 riẹ 23 ọrẹ ọbe na, Benefit From Theocratic Ministry School Education.) Ọrọ mai ghanren, nẹrhomo vwe i Jehova nọ ha userhumu wẹn ha ẹmro eghoghanren ri ha uvuẹn ẹmro ọnẹyen phia.​—⁠Se Ezra 7:10; Proverbs 3:​13, 14.

13. (a) Marhẹ ekete i Baibol re seri uvuẹn uyono o ru hobọte omizu ọmase owu? (b) Marhẹ wu ru mẹrẹn erere nẹ ekete i Baibol re seri uvuẹn uyono ukoko na?

¹³ Oborẹ a ha i Baibol na ruiruo lele uvuẹn uyono ukoko na, ọ hobọte omizu ọmase owu obẹ Australia. Dedevwo ekwakwa ibiobiomu i phia riẹn ọke rọ ha ọmọvwerhe, o rhiabọ dede iyẹnrẹn esiri na, nọ homakpahontọre rẹn i Jehova. Udabọ ọrana, no ji roro taghene Osolobrugwẹ o vwo ẹguọlọ kpahiẹ-ẹn. Ọrẹn, ọke oru, no mwurien ẹro taghene i Jehova o vwo ẹguọlọ kpahiẹn. Me yọ sa riẹ erhumu vwo imwẹro ọrana? Ọ sabu vwo imwẹro ọrana, ọke rọ dabu roro kpahen ekete i Baibol re seri uvuẹn uyono, nọ jeghwai ha ekete i Baibol ọrana vwanvwọn ekete i Baibol erọrọ. * Ekete i Baibol re seri uvuẹn uyono ukoko na, emẹvwa ekokamu ọrhẹ eduado, i te ruo ọmudu omaran dẹ ne?​—⁠Neh. 8:⁠12.

14. Marhẹ ene ru dje ọdaremẹro kpahen i Baibol na?

¹⁴ O fo na kpẹmẹ i Jehova fọkiẹ i Baibol na ro tiobọnu rẹn ọwan? Jehova o tiobọnie rẹn ituakpọ, nọ jeghwai nyamwu ive ọnẹyen taghene Ẹmro ọnẹyen ono rhirhiẹ ye bẹmẹde. (1 Pet. 1:​24, 25) Omarana, o fori ne se i Baibol na ọke ephian, haye ruiruo uvuẹn akpenyerẹn ọwan, jeghwai haye sa awọrọ erhumu. Omarana, no fori ne vwo ọdaremẹro kpahen ẹghẹlẹ ọghoghanren ọnana ro rhiẹ i Baibol na ọrhẹ i Jehova Osolobrugwẹ ro vworie.