ỌSẸ mẹ ọrhẹ izu mẹ re se James ọrhẹ Jessie Sinclair ni kwa riẹ amwa owu re se Bronx uvuẹn New York, uvwre ẹgbukpe 1935. Willie Sneddon owuọwan usuẹn igbehian aye ro ji nẹ i Scotland rhe. Ọke aye a mẹroma, aye awansa na tẹmro kpahen ekrun aye. Ọrana ọ phiare omẹ ẹgbukpe ezẹko e ki vwiẹ mẹ.

Izu mẹ nọ ta rẹn i Willie taghene bọmọke e ki fiuvweri ọrẹ akpọ ephian ọrukaro, ọsẹ ye kugbe omizie ọkpako i hwuru uvuẹn owọ ro rhueri uvuẹn urhie ọduado. Willie nọ tare: “Ọsẹ ọnọ ọ ha uvuẹn hell!” Willie owuọwan usuẹn Iseri Jehova, ẹmro ọnana yọ lẹrhẹ izu mẹ tuẹn uyono i Baibol rhọ.

Oborẹ i Willie ọ tare nọ lẹrhẹ izu mẹ mwuomarhọ, fọkime o rheri taghene ọsẹ ye omamọ ohworho. Willie nọ habaye, “Wu guọlọre ni mi dje yi wẹn taghene i Jesu o riẹ i hell?” Izu mẹ nọ karorhọ ẹrhomo owu rẹ aye a nẹ uvuẹn ishọshi taghene i Jesu o riẹ i hell, ẹdọke ọresa ye, na rhọmeriẹn. Omarana, no roro, ‘Orhianẹ hell amwa erhanren rẹ evwọkon a nya, aye i rhe hwu, mesoriẹ i Jesu o riẹ avwaye?’ Ọrana nọ lẹrhẹ izu mẹ vwo omamerhomẹ kpahen urhomẹmro na. Omarana, nọ tuẹn uyono ẹnya rhọ rhẹ ukoko i Bronx, nọ jeghwai bromarhame uvuẹn ẹgbukpe 1940.

Ọke ọrana, a vwa ha udu rhẹ emiemọ aghwẹ nẹ aye i lele emọ aye yono i Baibol na-a. Ọke mia kamu, ọsẹ mẹ yọ hẹrote mẹ ọke izu mẹ o riẹ uyono ọrhẹ owian aghwoghwo na uvuẹn obẹta ọkpughwre na. Ẹgbukpe ezẹko a vrẹn, mẹmẹ ọrhẹ ọsẹ mẹ ne kwomakugbe izu mẹ riẹ uyono. Izu mẹ o vwo oruru omamọ kpahen aghwoghwo iyẹnrẹn esiri na, nọ jeghwai lele ihworho buebun ri vwo omamerhomẹ kpahen i Baibol na yono kugbe. Nime ihworho ro lele yono e rhirhiẹ kẹrẹ oma, no ruẹ uyono aye kugbe. Mie lelie riẹ aghwoghwo ọke ame a ha họlide. Izede ọrana, ni mi yono ekwakwa buebun kpahen i Baibol na, ọrhẹ oborẹ ene yono ihworho lele.

Ọ dare mẹ omamọ taghene ọke mia kamu, mia dabu vwo ọdaremẹro kpahen urhomẹmro na-a. Mie nie fiemru-u. Ọrẹn, ọke mia te ẹgbukpe 12, ni mi rhiẹ oghwoghwẹmro, nẹ ọke ọrana nyarhẹn ni mie vwobọrhọ owian aghwoghwo na ọke  ephian. Ọke mie te ẹgbukpe 16, ni mi homakpahontọre rẹn i Jehova jeghwai bromarhame uvuẹn July 24, 1954, uvuẹn omẹvwa re ruru uvuẹn Toronto, Canada.

Imizu ezẹko uvuẹn ukoko ame i gare uvuẹn oghọn ukoko dẹ ne, awọrọ a ji ga oboran. Aye i hobọte akpenyerẹn mẹ omamọ. Mi vwo omamerhomẹ kpahen ena rẹ imizu na a ha dje urhomẹmro ri ha uvuẹn i Baibol na fiotọre. Dedevwo ihworho re yoni mẹ uvuẹn isukuru i guọlọre ne mi riẹ isukuru ọduado, ọrẹn, mi bru ẹkẹ te oma mi ne riẹ obẹ oghọn ukoko ya ga. Omarana, ni mi ya ileta vwe oghọn ukoko ọke mie riẹ omẹvwa re ruru uvuẹn Toronto na. Ni mi rharhumu ya ileta ọrọrọ uvuẹn ẹgbukpe 1955 uvuẹn omẹvwa re ruru uvuẹn Yankee Stadium, New York City. O jiri-i, ọke mia ha ẹgbukpe 17, ne seri mẹ ni mi ya ga uvuẹn oghọn ukoko rọ ha uvuẹn Brooklyn uvuẹn September 19, 1955. Ẹdọke ọreva ye, ọke mie te oghọn ukoko na, ni mi tuẹn owian rhọ uvuẹn ekete re fomu ẹbe rọ ha uvuẹn 117 Adams Street. Ọke oru, ni mia ha imashini owu ro fomu aruọbe 32 phia ruiruo, neneyo imashini ọrọrọ ọ sabu ko ẹbe na kugbe.

Ọke mia wian te ubiamo owu uvuẹn ekete re fomu ẹbe na, na ta mẹ taghene mi ya wian uvuẹn awuiruo imagazini nime mi rhe oborẹ a taipi. Ọke ọrana, imizu na a taipi adrẹsi ihworho ekpokpọ re durhie rhẹ Watchtower ọrhẹ Awake! na. Ibiamo ezẹko a vrẹn hin, ni mia wian uvuẹn awuiruo ra kpare ẹbe riẹ ikoko sansan. Omizu re se Klaus Jensen ro rhiẹ oniruo awuiruo ọrana, nọ nọren mẹ sẹ mi guọlọ wian kugbe rhẹ omizu rọ ha imoto kpare ikatọni ẹbe riẹ ikoko sansan na. O ji vwo esiso imagazini rẹ ame a kpara riẹ ekete rẹ ikoko sansan ri ha uvuẹn United States a nya ya kpare ẹbe aye. Omizu ọhworhare re se Jensen ọ tare taghene owian na ono rhomu mẹ. Ọke ọrana, mie  vwo ọhiẹ-ẹn, mi ji djabọ omamọ. Owian ọrana, o ghini ru mẹ gbanhon. Omizu Jensen o ghini rhe taghene owian ọrana ono rhomu mẹ.

Awuiruo imagazini na ọ ji ha userhumu rẹn ikoko sansan durhie rhẹ imagazini. Omarana, ni mi me rhe kpahen edjadjẹ sansan re fomu imagazini na rhọ uvuẹn Brooklyn ọrhẹ ekete erọrọ. Mie ji rhon kpahen edjadjẹ erana bi-i, ọrẹn, oma ọ merhenren mẹ ri mie rhe taghene imagazini ri te uriusionrin buebun ya kpara vwe imizu uvuẹn ekete sansan. Dedevwo mie rhe bi taghene mi ne te ekete erana ọke ọrana-a, ọrẹn, ọke oru, ni mi vwo uphẹn mie kin ekete erana.

Uvuẹn ẹgbukpe 1961, na ta mẹ taghene mi ya wian uvuẹn awuiruo ra hẹrote igho, Omizu re se Grant Suiter yọ hẹrote awuiruo ọrana. Ọke mia wian te ẹgbukpe ezẹko avwaye, ne seri mẹ riẹ ọfisi Omizu Nathan Knorr, ro rhiẹ ohworho rọ hẹrote ewian ukoko na ephian ọke ọrana. Ọye nọ ta mẹ taghene omizu owu ro lelie wian, ọ guọlọ riẹ Kingdom Ministry School te ubiamo owu, ọrhọ rhe, nẹ ọnọ wian uvuẹn Awuiruo rọ hẹrote owian aghwoghwo na. Omarana, na ta mẹ taghene mi ha ẹrhẹ omizu ọrana, ni mi lele Don Adams wian kugbe. Ọke oru, ni mi mẹrẹnvwrurhe taghene omizu Don Adams yọ ha ileta mi kiki ya vwe oghọn ukoko uvuẹn omẹvwa re ruru uvuẹn ẹgbukpe 1955 na. Imizu ehworhare awanva erọrọ ra wian uvuẹn ọfisi ọrana yẹ Robert Wallen ọrhẹ Charles Molohan. Ame awan ẹnẹ i wian kugbe vrẹn ẹgbukpe 50. Oma ọ merhenren mẹ omamọ mie lele imizu erana ri vwo ẹguọlọ kpahen i Jehova, wian kugbe!​—⁠Ps. 133:⁠1.

Nẹ ẹgbukpe 1970, na yẹrẹ mẹ owian mi na ha ikprughwre ezẹko kin oghọn ukoko sansan kẹgbukpe kẹgbukpe yanghene ẹgbukpe eva. Ọnana owian re kin ihworho ra ga  uvuẹn oghọn ukoko ọrhẹ imishọnari ri ha ekete sansan, mia ha urhebro rẹn aye jeghwai ni oborẹ aye i wian te uvuẹn oghọn ukoko na ne. O rhiẹ emru omamerhomẹ ri mia mẹrẹn ihworho ri ruotọre nẹ isukuru i Gilead ra ji ga uvuẹn ekete re dje rẹ aye nya! O ghini rhiẹ uphẹn ọduado ọrhẹ emru omamerhomẹ mie kin ẹkwotọre ri vrẹn 90 fọkiẹ owian ọnana.

Uvuẹn ikoko ri ha uvuẹn New York City yẹ ọsoso ihworho ri ha uvuẹn oghọn ukoko na e riẹ uyono. Ukoko rọ ha obẹ i Bronx ya ta mẹ taghene mi nya. Ihworho ri ha uvuẹn ukoko ọrana, i bunrun omamọ te erhirhiẹ a rharhumu ha ukoko ọrọrọ mwu. Ne se ukoko rọ havwiẹ bi na, Upper Bronx, ro rhiẹ ukoko ri mi havwọ.

Uvwre ẹgbukpe 1965, ekrun owu ri nẹ ẹkwotọre i Latvia rhe, ri mẹrẹn urhomẹmro na vwrurhe uvuẹn Bronx, ni kwa rhiẹ ekete ukoko ame ọ havwọ. Livija ro rhiẹ ọmọ ọgbọtọ ọkpako aye no rhiẹ ọkobaro ọke ephian ogege rọ ruẹ otọre nẹ isukuru ọduado. Ikprughwre ezẹko a vrẹn hin, Livija nọ kwa riẹ Massachusetts, ya ga ekete a mai guọlọ userhumu ighwoghwẹmro Uvie na. Ni mia ya ileta vwe yi kpahen oborẹ ukoko ame ọ havwọ, ọye nọ ji ya ileta vwe mẹ kpahen efikparobọ rọ mẹrẹn uvuẹn aghwoghwo na obẹ Boston.

Ẹgbukpe ezẹko a vrẹn hin, Livija no rhiẹ ọkobaro oghẹnrensan. Ọ guọlọ ru ekete omẹgbanhon ọnẹyen o teri uvuẹn ogame i Jehova, omarana, nọ ya ileta riẹ oghọn ukoko, ne se rie riẹ oghọn ukoko uvuẹn ẹgbukpe 1971. Ọ họhọre taghene i Jehova yọ lẹrhẹ ọnana phia. Uvuẹn October 27, 1973, ame ni rọnmọren, Omizu Knorr yọ tẹmro orọnmo ame. Proverbs 18:​22, nọ tare: “Ohworho rọ rọnmọ omamọ ane ọ mẹrẹn omamọ emru ne, ọ ji mẹrẹn ebrurhọ nẹ obẹ i Jehova.” Mẹmẹ ọrhẹ i Livija i ga kugbe vrẹn ẹgbukpe 40 uvuẹn oghọn ukoko. Ame a ji hobọtua ukoko owu rọ ha uvuẹn Bronx.

Oma ọ merhenren mẹ mie lele Omizu Knorr wian kugbe. Ọye ọ wianren omamo uvuẹn ukoko na, ọ jeghwai vwo ọdaremẹro kpahen ihworho ra wian owian imishionari uvuẹn akpọ na ephian. Buebun usuẹn aye yẹ Iseri Jehova erukaro uvuẹn ẹkwotọre rẹ aye a ga. Ọ dare mẹ omamọ, ọke Omizu Knorr o kpomu emiamo ikansa uvuẹn ẹgbukpe 1976. Ọke Omizu Knorr ọ ha uvuẹn ihọsipita, nọ ta mẹ taghene mi se ẹbe ezẹko ra guọlọ fomẹ phia riẹn. Nọ ta mẹ taghene mi se Omizu Frederick Franz riẹn, neneyo ọ sabu rhon oborẹ mia guọlọ se na. Ọke oru, ni mi mẹrẹnvwrurhe taghene nime Omizu Franz ọ vwọ mẹrẹn ude fiotọre-e, Omizu Knorr nọ yo se ẹbe riẹn.

Omizu Knorr o hwuru uvuẹn ẹgbukpe 1977, ọrẹn, ihworho ri rhe rie jeghwai vwo ẹguọlọ kpahiẹn i mẹrẹn urhebro, fọkime ọ sẹrorẹ atamwu kpahen i Jehova ye te oba enyerakpọ ye. (Rev. 2:10) Ọke oru, Omizu Franz nọ yọ hẹrote owian na.

 Ọke ọrana, mẹmẹ yẹ ọyẹbe rẹn omizu Milton Henschel, ro lele Omizu Knorr wian kugbe ẹgbukpe buebun ne. Omizu Henschel nọ ta mẹ taghene owian rọ mai ghanren mi na wian uvuẹn oghọn ukoko na yẹ mi na ha userhumu rẹn Omizu Franz ọke rọ guọliẹ. Ọke ephian ni mie se ẹbe na riẹn e ki fomu aye phia. Omizu Franz ọ dabu kerhọ jeghwai vwẹruọ oborẹ mie se riẹn na. Emru omamerhomẹ mia ha userhumu rẹn Omizu Franz izede ọrana, o ki hwu uvuẹn December 1992!

Ọ họhọre taghene ẹgbukpe 61 mia ga uvuẹn oghọn ukoko na, ghwai ibiọke. Ọsẹ mẹ ọrhẹ izu mẹ, i sẹrorẹ atamwu kpahen i Jehova te ọke aye hwu, mi vwo imwẹro taghene mi na mẹrẹn aye uvuẹn akpọ ọkpokpọ rọ sa na. (John 5:​28, 29) O vwo emru owuorowu uvuẹn akpọ ọnana ra na sabu ha vwanvwọn uphẹn re ne lele ihworho ri sẹrorẹ atamwu kpahen i Jehova wian kugbe-e. Jeghwai uphẹn ọduado mia ha userhumu rẹn ihworho Osolobrugwẹ uvuẹn akpọ na ephian. Mẹmẹ ọrhẹ Livija i mẹrẹnvwrurhe taghene uvwre ọsoso ẹgbukpe ame e fioma rhẹ iruo Uvie na vuọnvuọn na, ame i ghini mẹrẹn ebrurhọ i Jehova.—Neh. 8:⁠10.

Owian ihworho ephian uvuẹn ukoko i Jehova ọrhẹ uvuẹn iruo aghwoghwo na ọ ghanranren omamọ. O rhiẹ emru omamerhomẹ mia wian kugbe rhẹ imizu ehworhare ọrhẹ emẹse enana ri vwo omẹgbanhon jeghwai sẹrorẹ atamwu aye. Buebun ihworho ri ne lele i Jesu sun mi lele wian, i hwu ne. Ọrẹn, oma ọ merhenren mẹ taghene mi lele ihworho erana ri vwo ẹguọlọ kpahen Osolobrugwẹ wian kugbe uvuẹn ogame ọnẹyen.