1. Onyerẹnkugbe ọgo yẹ ituakpọ ri fuevwan ina sabu vwo rhẹ i Jehova?

JEHOVA o vwo ekrun ra ga ye, Jesu ro rhiẹ “ọmọ ọkpako emama ephian,” ọrhẹ emakashe buebun. (Col. 1:15; Ps. 103:20) Ọke i Jesu ọ ha otọrakpọ na, no djephia taghene ituakpọ ri fuevwan ina sabu ni Jehova rhiẹ Ọsẹ aye. Ọke rọ tẹmro rẹn idibo yi, Jesu no se i Jehova, ‘Ọsẹ mẹ ro rhiẹ Ọsẹ are.’ (John 20:17) Ọke arha homakpahontọre rẹn Jehova ji bromarhame, ne rhiẹ usuẹn ekrun imizu uvuẹn ukoko na ri vwo ẹguọlọ.—Mark 10:29, 30.

2. Me ye ne yono kpahen uvuẹn urhomu-ẹmro ọnana?

² Ọ bẹn ihworho ezẹko ine ni Jehova rhiẹ Ọsẹ ro vwo ẹguọlọ. Awọrọ e rhe oborẹ e dje ẹguọlọ phia rẹn imizu ukoko na-a. Uvuẹn urhomu-ẹmro ọnana, ene yono oborẹ i Jesu o ru ha userhumu rẹn ọwan ni Jehova rhiẹ Ọsẹ ro vwo ẹguọlọ ra na sabu tikẹrẹ. Ene ji yono kpahen izede ene ru hẹrokele i Jehova nyoma oborẹ e ruẹ imizu ukoko na lele.

3. Marhẹ ẹrhomo i Jesu o yonirin ọwan o ru ti ọwan kẹrẹ i Jehova rhọ?

³ Jehova, Ọsẹ ro vwo ẹguọlọ. Jesu ọ guọlọre ne ni Jehova jerẹ oborẹ ọye o nie—ọmiọmọ ro vwo ẹguọlọ, ra sabu tẹmro riẹn, orhiẹ ohworho ro jurhi ọvo-o. A mẹrẹn ọnana vwrurhe ọke i Jesu o yono idibo yi oborẹ a nẹrhomo lele. Nọ tuẹn ẹrhomo na rhọ rhẹ ẹmro enana: “Ọsẹ ame.” (Matt. 6:9) Manẹ i Jesu ọ sabu ta rẹn ọwan ne se i Jehova “Ọrọmaigbanhon na,” “Ọmemama,” yanghene “Orodje i bẹmẹdẹ”—enana ephian edevan ri serhọ, ri ji ha i Baibol na. (Gen. 49:25; Isa. 40:28; 1 Tim. 1:17) Ukpomaran, Jesu ọ ta rẹn ọwan ne se Jehova “Ọsẹ.”

4. Marhẹ e ru rhe taghene Jehova ọ guọlọ tikẹrẹ ọwan?

⁴ Ọ bẹn wu ne ni Jehova rhiẹ Ọsẹ ro vwo ẹguọlọ? Ọ bẹn rẹn ọwan ezẹko. Ọnọ sabu bẹn re ne roro kpahen Ọsẹ ro  vwo ẹguọlọ orhianẹ e ruru ọwan gbalogbalo ọke ra ghwanran. Ọrẹn, ọ merhen oma re rhe taghene Jehova o vwẹruọ erhirhiẹ ọwan! Ọ guọlọ tikẹrẹ ọwan. Ọrana yọ soriẹ i Baibol na ọ ta rẹn ọwan: “Are i tikẹrẹ Osolobrugwẹ, ọye no no tikẹrẹ are.” (Jas. 4:8) Jehova o vwo ẹguọlọ kpahen ọwan, ọ ji guọlọ rhiẹ Ọsẹ rọ mai rhomu kparobọ ra na sabu vwo.

5. Lele oborẹ ọ ha Luke 10:22, marhẹ i Jesu o ru ha userhumu rẹn ọwan tikẹrẹ i Jehova rhọ?

⁵ Jesu ọnọ sabu ha userhumu rẹn ọwan tikẹrẹ i Jehova rhọ. Jesu ọ dabu rhe i Jehova, ji hẹrokele iruemru Enẹyen gbagba, nọ tare: “Kohworho kohworho rọ mẹren mẹ ne, ọ ji mẹrẹn Ọsẹ na ne.” (John 14:9) Jerẹ omizu ọwan ọkpako, Jesu o yono ọwan oborẹ ene ru họghọ ji huvwele i Jehova, oborẹ ene ru kẹnoma rẹn ekwakwa ro vwo utuoma kpahen ọrhẹ oborẹ ene ru vwo ekwerhọ Ọnẹyen. Akpenyerẹn i Jesu uvuẹn otọrakpọ na o djephia taghene Jehova o vwo ẹguọlọ. (Se Luke 10:22.) Jene yono kpahen idje ezẹko.

6. Dje idje oborẹ i Jehova o ru kerhọ i Jesu.

⁶ Jehova ọ kerhọ emọyen. Roro kpahen izede i Jehova ọ kerhọ Ọmọyen ọkpako lele. Jehova o ghini rhon ẹrhomo buebun ri Jesu ọ nẹren ọke rọ ha otọrakpọ na. (Luke 5:16) O rhonrin ọke i Jesu ọ nẹrhomo kpahen orhienbro eghoghanren rọ guọlọ bruie, jerẹ ọke rọ djẹ inyikọ 12 na. (Luke 6:12, 13) Jehova o ji rhon i Jesu rọ nẹrhomo ọke rọ ha obẹnbẹn. Bọmọke a ki rhẹ i Jesu, ọ nẹrhomo gbangbanhon vwe i Jehova kpahen ọdamuni rọ guọlọ dẹrughwaroghwẹ na. Jehova o rhon ẹrhomo i Jesu jeghwai dje ọmakashe vwe yi no ruie gbanhon.—Luke 22:41-44.

7. Marhẹ oma o ruẹ ọwan ọke re rhe taghene Jehova ọ kerhọ ẹrhomo ọwan?

⁷ Inyenana, Jehova ọ ji kerhọ ẹrhomo idibo yi, ọye ọ kerhọ aye uvuẹn ọke ọrhẹ izede ro serhọ. (Ps. 116:1, 2) Roro kpahen oborẹ i Jehova o ru rhon ẹrhomo omizu ọmase owu obẹ India. Ọye o vwo obẹnbẹn ro brudu omamọ, omarana nọ nẹrhomo vwe i Jehova kpahiẹn. Nọ yare:  “Ẹkwaphiẹrhotọre i JW Broadcasting^® ọrẹ May 2019, rọ ta kpahen oborẹ ene ru nyerẹn ghele uduebro ọrhẹ ọfiamu ọgbogbanhon, ghwai oborẹ mi ghini guọlọ. Ọyẹ ẹkpahenrhọ rẹn ẹrhomo mẹ.”

8. Izede ego yi Jehova o ru dje ẹguọlọ phia rẹn Jesu?

⁸ Jehova o vwo ẹguọlọ ọrhẹ ọdamẹ kpahen ọwan, jerẹ oborẹ o vwo ẹguọlọ kpahen Jesu, jeghwai hẹrote yi uvwre ọsoso akpenyerẹn yen uvuẹn otọrakpọ na. (John 5:20) Jehova ọ ha userhumu rẹn Jesu sẹrorẹ esegburhomẹmro ọgbogbanhon, ọ ha urhebro riẹn ọke ẹhẹn yen ọ tagha, ọ ji hẹrote edamẹ ugboma yen. Jehova o tirierhumu ro no dje ẹguọlọ ọrhẹ ekwerhọ ọnẹyen phia rẹn Jesu-u. (Matt. 3:16, 17) Fọkime o rheri taghene ọnọ sabu hẹroso i Jehova, Jesu orho roro taghene ọye ọvo yọ havwiẹ-ẹ.—John 8:16.

9. Marhẹ e ru rhe taghene Jehova o vwo ẹguọlọ kpahen ọwan?

⁹ Jerẹ i Jesu, ọwan ephian i rhiẹromẹrẹn ẹguọlọ i Jehova nyoma izede buebun ne. Gbe rorie: Jehova o tiri ọwan kẹrẹ omayen, ji yẹ ọwan imizu ukoko na ri vwo ẹguọlọ ọrhẹ okugbe, ra lẹrhe ọwan vwo omamerhomẹ, ra ji yẹ ọwan urhebro ọke ebẹnbẹn. (John 6:44) Jehova ọ yẹre ọwan i kemru kemru rọ nọ lẹrhẹ ọwan sẹrorẹ esegburhomẹmro ọgbogbanhon. Habaye, ọ hẹrote edamẹ ugboma ọwan kẹdẹkẹdẹ. (Matt. 6:31, 32) Ọke re roro kpahen ẹguọlọ i Jehova rẹn ọwan, ẹguọlọ ro vwo kpahiẹn no kodorhọ.

10. Me ya na sabu yono nẹ oborẹ i Jehova o ruẹ imizu ukoko na?

¹⁰ Jehova o vwo ẹguọlọ kpahen imizu ukoko na. Ọrẹn, ọnọ sabu bẹn re ne dje ẹguọlọ ọwan phia rẹn imizu ukoko na. Itiọrurhomẹmro, ọwan i nẹ ekete sansan rhe, ji vwo erhirhiẹ ri vẹnẹren. Habaye, ọwan e ruẹ oborẹ ọ lẹrhẹ awọrọ tuekwẹre. Ọrẹn, ana sabu ruẹ ẹguọlọ re vwo kpahen imizu ukoko na gbanhonrhọ. Izede ọgo? Nyoma ra na hẹrokele i Jehova dje ẹguọlọ rẹn aye. (Eph. 5:1, 2; 1 John 4:19) Jenẹ a mẹrẹn oborẹ ana sabu yono nẹ udje i Jehova.

11. Marhẹ i Jesu o ru hẹrokele “aruẹdọn okokodo” i Jehova?

¹¹ Jehova o dje “aruẹdọn okokodo” phia. (Luke 1:78) Ohworho ro vwo aruẹdọn, oma ọ vwọ merhiẹn kpahen ojẹriọ awọrọ-ọ; nọ guọlọ izede ono ru ha userhumu ọrhẹ urhebro phia. Nyoma oborẹ o ruẹ awọrọ lele, Jesu nọ hẹrokele aruẹdọn i Jehova o vwo kpahen aye. (John 5:19) Ọke i Jesu ọ mẹrẹn otu ihworho uvuẹn erhirhiẹ owu, “aro aye nọ dọn riẹn, fọkime aye i djabọ jeghwai họhọ igegede ra nya sa nya rie, ri vwe vwo ohworho ro sun aye.” (Matt. 9:36) Aruẹdọn i Jesu ọ vrẹn ọrẹ ono vwo ẹguọlọ ọvo. O simi ere kpomẹ, ji rhuọnrhuọn “ihworho rẹ oma ọ rhọ ọrhẹ ihworho ohwan ọ bẹn.”—Matt. 11:28-30; 14:14.

12. Dje udje oborẹ ene ru dje aruẹdọn phia.

¹² Bọmọke ene ki dje aruẹdọn okokodo rẹn imizu ukoko na, o fori ne rhe aruẹ ebẹnbẹn aye a dẹrughwaroghwẹ. Jerẹ udje, omizu ọmase owu ọnọ sabu vwo emiamo ọgbogbanhon. Ọye o vwo brenu kpahiẹ-ẹn, ọrẹn oma ọnọ merhiẹn orhianẹ a ha userhumu riẹn. Ọye yọ hẹrote edamẹ ugboma ọrẹ ekruien? Ana sabu ha userhumu riẹn sere emaren yanghene hionron oghwa na? Ọkezẹko iruo omizu ọhworhare owu ọ variẹ obọ. Ana sabu yẹ ye igho rọ nọ hẹrote omayen, ọkezẹko a  ta riẹn ohworho rọ yẹriẹ-ẹ, bọmọke ọnọ mẹrẹn iruo ọrọrọ?

13-14. Marhẹ ene ru vwo uruemru ghwologhwolo jerẹ i Jehova?

¹³ Jehova ohworho ghwologhwolo. (Matt. 5:45) A vwa hẹrhẹ ọke imizu ukoko na ina nekpẹn userhumu mie ọwan vwẹre, ne ki dje aruẹdọn rẹn aye-e. Jerẹ i Jehova, ana sabu kpare idjaghwẹ na. Jehova ọ lẹrhẹ ọren na lo mwu ọwan kẹdẹkẹdẹ, ọrẹn a nekpẹn ye-en! Ihworho ephian ya mẹrẹn erere nẹ ọren na, orhiẹ eri dje ekpẹmẹ phia ọvo-o. Ọke i Jehova ọrhọ yẹ ọwan ekwakwa ra guọlọre, no dje ẹguọlọ ye phia rẹn ọwan. Ọwan i vwo ẹguọlọ kpahen Jehova omamọ fọkiẹ uruemru esiri ọrhẹ uruemru ghwologhwolo ro djephia!

¹⁴ Imizu ukoko na buebun a hẹrokele i Jehova, nyoma aye a kpare idjaghwẹ ogege, ji dje uruemru ghwologhwolo phia. Jerẹ udje, uvuẹn ẹgbukpe 2013, ogiribo ọgbogbanhon re se Super Typhoon Haiyan, nọ suẹ oghwọghọ ọgbogbanhon obẹ i Philippines. Eghwa ọrhẹ ekwakwa imizu ukoko na ezẹko ni ghwọghọre. Ọrẹn, imizu ukoko na erọrọ ri ha uvuẹn akpọ na ni ha userhumu rẹn aye ogege. Imizu buebun i toro igho yanghene vwobọrhọ owian ebanbọn na, aye ni kwaphiẹ yanghene rharhumu bọn eghwa ri joma te 750 uvwre ẹgbukpe owu! Uvwre ọke emiamo i COVID-19 na, imizu ukoko na i wian gbanhon nẹ aye i sabu ha userhumu rẹn imizu erọrọ. Ọke arha kiki kpare idjaghwẹ ha userhumu rẹn imizu ukoko na, ne djephia taghene e vwo ẹguọlọ kpahen aye.

15-16. Lele oborẹ ọ ha Luke 6:36, me yẹ izede ọghoghanren owu ene ru hẹrokele i Jehova?

¹⁵ Jehova o vwo arodọmẹ, ọ ji harhomẹ. (Se Luke 6:36.) Ọwan e rhiẹromẹrẹn arodọmẹ i Jehova kẹdẹkẹdẹ. (Ps. 103:10-14) Idibo i Jesu ihworho ri vwa gba; ọrẹn o dje arodọmẹ rẹn aye, jeghwai harhomu aye. Ọ tobọ mwuegbe rọ nọ ha arhọ ye ze izobo, neneyo a sabu harhomu edandan ọwan. (1 John 2:1, 2) We vwo  ẹhẹn wu ne tikẹrẹ i Jehova ọrhẹ Jesu rhọ fọkime aye e dje arodọmẹ phia ji harhomẹ?

¹⁶ Ẹguọlọ re vwo kpahen imizu ukoko na nọ gbanhanrhọ ọke arha “harhomu owuowọnwan nẹ ẹhẹn rhe.” (Eph. 4:32) Itiọrurhomẹmro, ọ bẹn ra na harhomu awọrọ, omarana o fori na wian kpahiẹn. Omizu ọmase owu, ọ mẹrẹnvwrurhe taghene urhomu-ẹmro Oghwa Odẹrẹ na “Forgive One Another Freely” ọ ha userhumu riẹn. * Nọ yare: “Ọke mie yono urhomu-ẹmro ọnana, nọ ha userhumu mẹ vwẹruọ ye taghene mi rha harhomu awọrọ, ni mia mẹrẹn erere. Ọ tare taghene wu rha harhomu awọrọ, o mevirhọ taghene wu kwerhọ orusọ aye-e, yanghene oborẹ aye i ruru ọ da-a. Ọrẹn, wu rha harhomu, wu vwa rha tuekwẹre kpahen aye-e, wẹwẹ ne ji vwo omefuon.” Arha harhomu imizu ukoko na, ne djephia taghene e vwo ẹguọlọ kpahen aye, ọwan a ji hẹrokele i Jehova.

17. Lele oborẹ ọ ha Matthew 5:16, marhẹ ene ru họghọ rẹn Jehova?

¹⁷ Ghini uphẹn ọduado re rhiẹ usuẹn imizu ukoko na ri nẹ ekete sansan rhe re dje ẹguọlọ phia. A guọlọre nẹ ihworho buebun i homaba ọwan ga i Jehova. Fọkiẹ ọnana, o fori na jomarhotọre ne je ruẹ oborẹ ọnọ rhua ephien vwe ihworho i Jehova yanghene odẹ ye. A guọlọ damoma rhe ruẹ dẹndẹn neneyo ọrana o mwu ihworho yono kpahen Jehova jeghwai ga ye.—Se Matthew 5:16.

18. Me yọ nọ sabu yẹ ọwan uduefigbere ghwoghwo?

¹⁸ Ọkezẹko, ihworho ezẹko e ni ọwan sakamu yanghene kparahaso ọwan, fọkime a huvwele i Jehova. Me ye ne ruo orhianẹ ofẹn o mwu ọwan ra na ta rẹn awọrọ kpahen imwẹro ọwan? Ana sabu hẹroso userhumu i Jehova ọrhẹ Jesu ine tiobọnu rẹn ọwan. Jesu ọ yẹ idibo yi imwẹro taghene aye i vwe brudu kpahen oborẹ aye ina ta, yanghene oborẹ aye ina  ta ye lele-e. Mesoriẹ? Jesu ọrhọ ta: “Fọkime ana yẹ are oborẹ are ina ta uvuẹn unọke ọrana; fọkime orhiẹ are ya tẹmro na-a, ọrẹn ẹhẹn Ọsẹ are yọ tẹmro nyoma are.”—Matt. 10:19, 20.

19. Dje udje ohworho ro fiudugbere ghwoghwo.

¹⁹ Roro kpahen udje i Robert. Uvwre ọkezẹko ri vrẹnren na, ọke ọye o yono i Baibol na obọ, ọ ji dabu rhe kpahen i Baibol na-a, no riẹ oghwa ẹghware rọ ha South Africa ye dje rẹn oguẹnzọn na oborẹ ọsoriẹ ọye ono jo vwobọrhọ owian isodja. No fiudugbere ta rẹn eri ha ẹghware na taghene ọye ọ guọlọ sẹrorẹ emevigbanhon ọnẹyen fọkiẹ ẹguọlọ ro vwo kpahen imizu ukoko na. O vwo ẹguọlọ kpahen owian yen uvuẹn ukoko na! Ogege oguẹnzọn na nọ nọriẹn, “Ayọmo yẹ imizuo?” Robert o fiẹrorhọ onọ ọrana-a, ọrẹn ogege nọ karorhọ isese i kẹdẹkẹdẹ ẹdẹ ọrana. Matthew 12:50: “Kohworho kohworho ro ruẹ ọhọre Ọsẹ mẹ rọ ha odjuwu, ọyẹ omizu mẹ ọhworhare ọrhẹ omizu mẹ ọmase kugbe izu mẹ.” Dedevwo Robert o yono i Baibol na obọ, ẹhẹn ọfuanfon i Jehova ọ ha userhumu riẹn kpahenrhọ onọ ọrana ọrhẹ erọrọ ro vwo fiẹrorhọ. Oma ọ merhen i Jehova kpahen Robert! Oma ọ ji merhen i Jehova kpahen ọwan, ọke arha hẹrosuiẹ fiudugbere ghwoghwo udabọ erhirhiẹ egbogbanhon.

20. Me yo fori ne brorhiẹn yen? (John 17:11, 15)

²⁰ Jenẹ a ha ukẹro ọghoghanren ni ebrurhọ re vwori re rhiẹ usuẹn imizu ukoko na re dje ẹguọlọ phia. Ọwan i vwo Ọsẹ ro mai rhomu kparobọ ọrhẹ imizu ri vwo ẹguọlọ kpahen ọwan. A vwa ha ukẹro sakamu ni ebrurhọ enana-a. Echu ọrhẹ idibo yi re dumu ọkon, a damoma aye ina lẹrhẹ ọwan vwo ẹhẹn eveva kpahen ẹguọlọ i Jehova, ji fiẹ ọgbanrhọ rhẹ okugbe ra riamerhiẹn. Ọrẹn, Jesu ọ nẹrhomo fọkiẹ ọwan ne, nẹ Jehova ọ hẹrote ọwan neneyo a sabu rhirhiẹ ye ọrẹ okugbe. (Se John 17:11, 15.) Jehova ọ kpahanrhọ ẹrhomo ọrana. Jerẹ i Jesu, jenẹ a hẹroso ẹguọlọ ọrhẹ obẹhatua i Jehova. Jene vwo omwemẹ re ne tikẹrẹ i Jehova ọrhẹ imizu ukoko na rhọ.