ỌKE George Young ọ ha uvuẹn okuna uvuẹn urhie ọduado re se Atlantic ro riẹ Europe, nọ karorhọ erere rọ mẹrẹnren uvuẹn owian Uvie na uvuẹn Brazil. * Ọrẹn, ọke ugbo onya aye o riaro rhọ, Omizu Young no roro kpahen ekete ekpokpọ erọrọ rọ nya ro rhiẹ ẹkwotọre i Spain ọrhẹ Portugal. O fiẹrorhọ taghene orho te avwaye, ọye ono ruẹ ẹkwaphiẹrhotọre neneyo Omizu J. F. Rutherford ọ sabu ha ẹmro otu phia, nọ jeghwai ha itrati ri te 300,000 phia!

Ọke Omizu Young o te i Lisbon uvuẹn ẹgbukpe 1925, nọ mẹrẹn oseghe uvuẹn avwaye. Ihworho ri kparehaso uvuẹn ẹgbukpe 1910 ni fiobarhọ usun rọ havwiẹ bi, ọnana nọ lẹrhẹ omẹgbanhon ishọshi Catholic seriotọre. Ihworho ni me vwo ugbomọphẹ ọrẹn, ozighi egbe ọ ji vuọn ekete ephian.

Uvwre ọke Omizu Young o ruẹ ẹkwaphiẹrhotọre ẹmro otu rẹ Omizu Rutherford ọnọ ta na, igọmẹti ẹkwotọre na ni ha usun isodja mwu fọkiẹ ihworho ri kparehaso usun. Ọyẹbe rẹn i British ọrhẹ Foreign Bible Society nọ ha orhetio rẹn Omizu Young taghene ọnọ mẹrẹn ẹkparehaso. Udabọ ọrana, Omizu Young nọ tare taghene e kwenu riẹn nọ ha oghwa ra sasoma uvuẹn Camões Secondary School ruiruo, ne kwenu riẹn!

May 13 no mo te, ro rhiẹ ẹdẹ rẹ Omizu Rutherford ọnọ ha ẹmro ọnẹyen phia. Ihworho e fiẹrorhọ ẹmro na! Ophanphan ra ha tamwu igbomoghwa ọrhẹ ẹbe iyẹnrẹn sansan yi ghwoghwo ẹmro otu ra samọ haphia na rọ tare, “How to Live on the Earth Forever.” Ilori ẹga na ni brokpakpa fomu iyẹnrẹn phia taghene ihworho i kẹnoma rẹn “emẹraro efian” ekpokpọ ri homaphia. Ihworho ra kparahaso imizu na, ni mevi anurẹsẹ isukuru na, aye na ha ẹbe ri kparehaso ẹmro Omizu Rutherford rẹn ihworho.

Udabọ enana, ihworho ri te 2,000 yi ji koko fọkiẹ ẹmro na, ọrẹn, ihworho erọrọ ri te 2,000 a sabu ruẹ uvuie-en, nime okeke phan. Ihworho ezẹko ri guọlọ rhon ẹmro na, ne rhenrhen riẹ ekete ri rierun; awọrọ ni mevi oberun ekwakwa ra ha sasoma ri ha ekete na.

Rhẹ ekwakwa ephian yi nyalele ẹkwaphiẹrhotọre-e. Ihworho ra kparahasua na, ne bunu jeghwai ghwọghọ ega. Ọrẹn, Omizu Rutherford ọ dabu rhẹ omayen rhua, no rhenrẹn oberun imẹdjẹ neneyo ihworho i rhon oborẹ ọ ta. Ọke rọ tẹmro hin emrẹ erhẹrhẹ ason, ihworho ri te 1,200 ni ya odẹ rhotọre taghene aye i guọlọre na ha ẹbe ukoko na vwe aye. Ẹdẹ ọreva ye, ọbe iyẹnrẹn re se O Século nọ kpare iyẹnrẹn kpahen ẹmro Omizu Rutherford.

Uvuẹn i September 1925 ne fomu i Watch Tower ra rhian rhẹ edjadjẹ i Portugal phia uvuẹn  Portugal. (Vẹrhẹ bi, e fomu Watch Tower ra rhian rhẹ edjadjẹ i Portugal uvuẹn Brazil.) Uvwre ọke ọrana, Virgílio Ferguson ro yono i Baibol na obẹ i Brazil no ruẹ ẹkwaphiẹrhotọre ro no riẹ Portugal nọ sabu ya ha userhumu phia. Ọye o kiki lele Omizu Young wian vrẹn ne uvuẹn Oghọn Ukoko ọkokamu ọrẹ Emọ Uyono i Baibol na rọ ha obẹ i Brazil. Ọke oru, Virgílio ọrhẹ aniẹ re se Lizzie ni ye kwomakugbe Omizu Young. Omizu Ferguson ọ dabu rhe rhẹ ọke nime o jiri-i, Omizu Young no riẹ ekete erọrọ ye ghwoghwo, ji te Soviet Union.

Ọke a ha usun isodja mwu uvuẹn ẹkwotọre i Portugal, ẹkparehaso nọ mọ gbanhonrhọ. Omizu Ferguson nọ dabu mevigbanhon jeghwai sẹrorẹ emọ uyono i Baibol ri ha avwaye jeghwai lẹrhẹ aye vwo oruru. Ọye nọ nọ itu igọmẹti na sẹ ana sabu ha oghwa ye ru uyono ukoko. Uvuẹn October 1927 ne kwenu riẹn.

Uvuẹn ẹgbukpe ọrukaro, emrẹ ihworho ri te 450 ye durhierhọ Watch Tower na. Habaye, na sabu ha itrati ọrhẹ ẹbe ekokamo kerabọ iyẹnrẹn esiri te ekete sansan jerẹ Angola, Azores, Cape Verde, East Timor, Goa, Madeira, ọrhẹ Mozambique.

Uvuẹn ẹgbukpe 1929, Manuel da Silva Jordão rọ wian owian ikebi nọ kwa riẹ Lisbon. Ọke ọ ha Brazil o rhon ẹmro owu rẹ Omizu Young ọ haphia. Nọ mẹrẹn urhomẹmro na vwrurhe jeghwai vwo omwemẹ rọ nọ ha userhumu rẹn Omizu Ferguson no kerabọ owian aghwoghwo na. Neneyo Manuel ọ sabu ruẹ ọnana, ọye nọ wian jerẹ i colporteur re se ọkobaro ọke ọnana. Ra mẹriẹn taghene a dabu kwaphiẹ owian re fomu ẹbe na rhọ jeghwai ghalẹ aye, ukoko rọ ha uvuẹn i Lisbon no ruẹ riaro!

Uvuẹn ẹgbukpe 1934, Omizu Ferguson ọrhẹ aniẹ ni ghwẹrioma riẹ Brazil. Ọrẹn, aye i wọ ukẹri urhomẹmro na ne. Udabọ ọyanghan rọ ha Europe uvwre ọke Uvweri Akpọ ephian ọreva ọrhẹ Uvweri rọ homaphia uvuẹn ẹkwotọre i Spain, ihworho ra fuevwan ga i Jehova uvuẹn i Portugal ọke ọrana i ji fikparobọ. Uvwre ọke ezẹko, aye i họhọ ughumu erhanren, ọrẹn, ọke i John Cooke ro rhiẹ omizu ọrukaro ro riẹ isukuru i Gilead ọ rhe uvuẹn 1947, nọ họhọre taghene erhanren na nọ mọ bare phia. Ọke oru, ighwoghwẹmro na ne buẹnrhọ. Ọke igọmẹti a tobọ dobọ owian Iseri Jehova ji uvuẹn ẹgbukpe 1962, ighwoghwẹmro na i ji bunrhọ. Uvuẹn December 1974 ọke igọmẹti o kwe nẹ owian Iseri Jehova ọ rharhumu tonrhọ, ighoghwẹmro na i bun ghwẹ 13,000 ne.

Inyenana, ighwoghwẹmro ri vrẹn 50,000 ye ghwoghwo iyẹnrẹn esiri Uvie na uvuẹn i Portugal ọrhẹ ẹkwotọre erọrọ rẹ ame o kinhariẹ ra djẹ edjadjẹ i Portugal, tobọ te Azores ọrhẹ Madeira. Ezẹko usuẹn ighwoghwẹmro enana ivwremọ rẹn ihworho ri rhon ẹmro Omizu Rutherford kirighwo na uvuẹn ẹgbukpe 1925.

Ọwan i kpẹmẹ i Jehova ọrhẹ imizu enana ri fuevwan jeghwai fiudugbere hẹrote owian na jerẹ idibo rẹn Jesu Kristi uvuẹn ẹgbamwa na.—Rom. 15:15, 16.—O nẹ oghwa iyẹnrẹn ọwan rọ ha uvuẹn i Portugal rhe.