ILELE KRISTI ọke inyikọ na, i damoma nẹ aye i sabu ghwoghwo “iyẹnrẹn esiri ọrẹ Uvie na” rẹn ihworho buebun. (Matt. 24:14) Ezẹko i riẹ ẹkwotọre erọrọ. Jerẹ udje, ọnyikọ Paul o riẹ ẹkwotọre re me rhe rhẹ Turkey inyenana, nọ jeghwai kerabọ owian aghwoghwo na avwaye. * Uvwre ẹgbukpe 2,000 a vrẹn hin, ne ru ẹkwaphiẹrhotọre owian aghwoghwo oghẹnrensan uvuẹn Turkey, uvuẹn ẹgbukpe 2014. Mesoriẹ e ru ẹkwaphiẹrhotọre aghwoghwo ọrana? Ayọmo yi wian owian aghwoghwo na?

Turkey o vwo ihworho ri te iduduru 79, ọrẹn, ighwoghwẹmro ri havwiẹ i vrẹn 2,800. Ọnana no mevirhọ taghene oghwoghwẹmro owu ono ghwoghwo rẹn ihworho ri joma 28,000. Nọyẹ, ibiẹ ihworho uvuẹn ẹkwotọre na ye ghwoghwo ẹmro na riẹn ne. Omarana, ne ru ẹkwaphiẹrhotọre owian aghwoghwo oghẹnrensan ọnana neneyo a sabu ghwoghwo ẹmro na rẹn ihworho buebun. Imizu ra djẹ edjadjẹ i Turkey ri te 550 ri nẹ ẹkwotọre erọrọ rhe, yi kwomakugbe ighwoghwẹmro re rhirhiẹ Turkey e ru owian aghwoghwo oghẹnrensan ọrana. Me yo nẹ erhumie rhe?

Aye i kerabọ iyẹnrẹn esiri na. Ukoko owu rọ ha obẹ Istanbul, nọ yare: “Ọke ihworho a mẹrẹn ame, aye na nọ: ‘O vwo omẹvwa oghẹnrensan uvuẹn ẹkwotọre na? Iseri Jehova i ha ekete ephian!’” Ukoko owu rọ ha obẹ Izmir nọ yare: “Ọhworhare owu rọ wian ekete e gbo imoto rhọ, no bru ọkpako ukoko owu, nọ nọriẹn, ‘Me yọ phia? Owian are o bunrhọ ne?’” Itiọrurhomẹmro, ihworho i djokarhọ owian aghwoghwo oghẹnrensan na.

Imizu ri nẹ ẹkwotọre erọrọ rhe na, i ghini mẹrẹn omamerhomẹ uvuẹn owian aghwoghwo na. Steffen, ro nẹ ẹkwotọre i Denmark rhe, nọ tare: “Kẹdẹkẹdẹ, mie ghwoghwo rẹn ihworho ri vwe ji rhon kpahen i Jehova dẹ. Oma ọ merhenren mẹ taghene mie dje odẹ i Jehova phia.” Jean-David ro nẹ ẹkwotọre France rhe, nọ tare: “Ame a ha inọke buebun ghwoghwo uvuẹn udumu owu ọvo. Ọ merhenrẹn ame oma omamọ! Nime ihworho buebun e rhe Iseri Jehova-a. Joma uvuẹn oghwa owuowu, ame a sabu ghwoghwo rẹn ihworho, dje ividio rẹn aye, jeghwai tiobọnu ẹbe ukoko na rẹn aye.”

Imizu ri te 550 na, i tiobọnu ẹbe ri te 60,000 rẹn ihworho uvuẹn ikprughwre eva ọvo! Itiọrurhomẹmro,  ẹkwaphiẹrhotọre ọnana ọ ghini lẹrhẹ aye sabu kerabọ iyẹnrẹn esiri na.

Oruru aye i vwo kpahen owian aghwoghwo na, nọ gbanhon rhọ. Ẹkwaphiẹrhotọre ọnana ọ hobọte imizu re ha uvuẹn i Turkey. Ẹkwaphiẹrhotọre ọnana ọ lẹrhẹ imizu fiomarhọ iruo aghwoghwo Uvie na vuọnvuọn. Itiọrurhomẹmro, awan 82 ni me rhiẹ ekobaro uvuẹn Turkey uvwre ẹgbukpe owu ọke aye e ru aghwoghwo oghẹnrensan na hin.

Imizu ri nẹ ẹkwotọre erọrọ rhe na, i nẹ iyẹnrẹn oborẹ ẹkwaphiẹrhotọre na ọ hobọte owian aghwoghwo aye, ọke rẹ aye a tobọ riẹ ẹkwotọre aye ne. Şirin, ro rhiẹ omizu ọmase ro nẹ Germany rhe, nọ yare: “Imizu ri ha obẹ Turkey e ru aghwoghwo kpregede izede ọlolọhọ. Vẹrhẹ bi, ofa ọ ro mẹ ọke mie ruẹ aghwoghwo kpregede. Ọrẹn, nyoma ẹkwaphiẹrhotọre ọnana, idje imizu ọrhẹ ẹrhomo ẹnẹ, ọ ha userhumu mẹ sabu ru aghwoghwo kpregede, mi vwa sabu ruẹ bi. Mi tobọ ghwoghwo jeghwai tiobọnu ẹbe uvuẹn ekete ihworho buebun a ha aghwẹ nya. Vwarana, mi vwa zofa jerẹ ọke vẹrhẹ-ẹ.”

Johannes ro nẹ Germany rhe, nọ tare: “Mi yono iyono eghoghanren ri mi na sabu ha ruiruo uvuẹn owian aghwoghwo na. Imizu ri ha obẹ Turkey, i ghini guọlọ ghwoghwo iyẹnrẹn esiri na rẹn ihworho buebun. Aye a ha kuphẹn kuphẹn e ghwoghwo iyẹnrẹn esiri na. Mi brorhiẹn mi na hẹrokele aye mi rha ghwẹrioma riẹ Germany. Vwarana, mia sabu ghwoghwo rẹn ihworho buebun ghwẹ ọke i vẹrhẹ.”

Zeynep ro nẹ France rhe, nọ tare: “Ẹkwaphiẹrhotọre na ọ hobọte owian aghwoghwo mẹ omamọ. Ọ ha userhumu mẹ sabu fiudugbere jeghwai hẹroso i Jehova.”

Ighwoghwẹmro na ni ti kẹrẹ owuowọnwan. Ẹguọlọ ọrhẹ okugbe rọ ha erhẹrhẹ imizu na ọ hobọte aye omamọ. Jean-David ra hunute ọtonrhọ na ọ tare taghene: “Imizu ri ha avwaye i rhiabọ dede ame omamọ. Aye i jeghwai rhiabọ dede ame jerẹ igbehian ọrhẹ imizu aye. Aye i dedirẹ ame rhiẹ oghwa aye. Mi rheri bi taghene Iseri Jehova ri ha akpọ na ephian i vwo okugbe; mi se kpahiẹn uvuẹn ẹbe ukoko na buebun ne. Vwarana, mi rhiẹromẹriẹn ne. Oma ọ merhenren  mẹ mie rhiẹ Oseri Jehova, mi jeghwai kpẹmẹ i Jehova kpahen omamọ uphẹn ọnana.”

Claire ro nẹ France rhe, nọ tare: “Ọwan ephian imizu, o toro sẹ Denmark, France, Germany, yanghene Turkey ye nurhe-e. Nọ họhọre taghene Osolobrugwẹ o ru ihworho egbamwa sansan rhiẹ ekrun owu.”

Stéphanie ro nẹ France rhe, nọ tare: “Ẹkwaphiẹrhotọre na o yonirin ame taghene oborẹ o ku ọwan kugbe orhiẹ edjadjẹ yanghene amwa re nurhe-e, ọrẹn, ẹguọlọ rẹ ọwan ephian i vwo kpahen i Jehova.”

Imizu buebun ri nẹ ẹkwotọre erọrọ rhe na, ne vwo ẹhẹn rẹ aye ine riẹ Turkey neneyo aye i sabu ha userhumu phia uvuẹn ẹkwotọre na. Ezẹko i riẹ ẹkwotọre na ne. E vwo ọdaremẹro kpahen imizu enana ri riẹ ekete ra mai guọlọ userhumu na.

Jerẹ udje, o vwo ẹko ighwoghwẹmro ri te 25 uvuẹn ekete owu. Ọkpako ukoko owu ọvo yọ ha usuẹn aye uvwre ẹgbukpe buebun. Ọrẹn, uvuẹn ẹgbukpe 2015, oma nọ merhenren aye ọke ighwoghwẹmro awan erhan e nẹ Germany ọrhẹ Netherlands ya hobọtua aye!

Me yẹ imizu enana ri riẹ Turkey ya ha userhumu phia na i tare kpahen akpenyerẹn aye? Ọkezẹko, o vwo ebẹnbẹn, ọrẹn, erhe riẹ ekete erọrọ ya ga o vwo ebrurhọ buebun. Jene roro kpahen oborẹ imizu ezẹko i tare:

Federico ro nẹ Spain rhe, ro rhiẹ omizu ọhworhare rọ rọnmọ ne, rọ jeghwai vrẹn ẹgbukpe 40 obọ, nọ tare: “Ra mẹriẹn taghene mie vwo ekwakwa ugboma buebun na-a, nọ ha userhumu mẹ vwo ugbomọphẹ, ọ jeghwai ha userhumu mẹ tẹnrovi ekwakwa ri mai ghanren.” Federico o jiri aruo owian ọnana, nyoma ọ ta: “Wu rhe riẹ ẹkwotọre ọrọrọ nime, wa guọlọ ha userhumu rẹn ihworho nẹ aye i rhe i Jehova, ọnana o mevirhọ taghene wu homakpahontọre riẹn. Omarana, ne wa sabu mẹrẹn oborẹ i Jehova o ru hẹrote owẹwẹ.”

Rudy ro nẹ Netherlands rhe, ro rhiẹ omizu ọhworhare rọ rọnmọ ne, rọ joma te ẹgbukpe 60 ne, nọ tare: “Oma ọ merhen ame, ame a ga uvuẹn ekete ra mai  guọlọ userhumu, nọyẹ ọrẹ ene ghwoghwo rẹn ihworho ri vwe ji rhon iyẹnrẹn esiri na bi. Omamerhomẹ re ihworho a mẹrẹn ọke aye e rhiabọ dede urhomẹmro na, ọ ji yẹ ame omamerhomẹ.”

Sascha ro nẹ Germany rhe, ro rhiẹ omizu ọhworhare rọ rọnmọ ne, rọ jeghwai vrẹn ẹgbukpe 40 obọ, nọ tare: “Ọke ephian mie riẹ aghwoghwo yi mia mẹrẹn ihworho re tu rhon iyẹnrẹn esiri na obọ. Omarana, oma ọ merhen mẹ, mie rhe ghwoghwo kpahen i Jehova rẹn ihworho enana.”

Atsuko ro nẹ Japan rhe, ro rhiẹ omizu ọmase rọ rọnmọ ne, rọ ha uvwre ẹgbukpe 35, nọ tare: “Vẹrhẹ bi, mia nẹrhomo nẹ Armageddon ọ kiki rhe. Ọrẹn, ọke mie riẹ Turkey, ni mi kpẹmẹ i Jehova ro vwo edirin te ọke ọnana. Ri mia mẹrẹn oborẹ i Jehova ọ hẹrote owian aghwoghwo na lele akpọ na ephian, nọ lẹrhe mẹ ti kẹriẹ rhọ.”

Alisa ro nẹ Russia rhe, ro rhiẹ omizu ọmase rọ vrẹn ẹgbukpe 30 obọ, nọ tare: “Nime mia ga i Jehova izede ọnana, ọ ha userhumu mẹ mẹrẹn oborẹ i Jehova o rhiẹ omamọ ohworho te.” (Ps. 34:8) Alisa nọ ji habaye: “Jehova Ọsẹ ọrhẹ Ugbehian mẹ kpẹnkpẹnkpẹn, mi ma mẹrẹn ọnana vwrurhe nyoma erhirhiẹ sansan. Mie rhiẹromẹrẹn omamerhomẹ ọrhẹ ebrurhọ buebun uvuẹn akpenyerẹn mẹ!”

Nyoma ẹkwaphiẹrhotọre ọnana re ruru uvuẹn Turkey, ọ lẹrhẹ imizu na sabu ghwoghwo rẹn ihworho buebun. Udabọ ọrana, o ji vwo ekete buebun re vwe ji ghwoghwo te. Kẹdẹkẹdẹ, imizu ra ga uvuẹn Turkey a vwa ihworho ri vwe ji rhon kpahen i Jehova bi. Wu guọlọ ga uvuẹn aruo ẹkwotọre ọrana? Omarana, e jiririe wẹn ne wu ‘kparughwaro rierun, ne wu ni okegbe na, taghene aye i te evuon ne.’ (John 4:35) Wu na sabu riẹ ekete ra guọlọ userhumu neneyo wu ya hobọtua aghwoghwo iyẹnrẹn esiri na? Orho rhiẹ omaran, gba dabu mwuegbe ekete ọke ọ havwọ na, wu na ya ga ekete ra mai guọlọ userhumu. Itiọrurhomẹmro, wu rhe kerabọ owian aghwoghwo Uvie na riẹ “ekete ri mai seri uvuẹn akpọ na,” wu na mẹrẹn ebrurhọ buebun!—Acts 1:8.