Dedevwo, Ilele Kristi a kpare idjaghwẹ rẹ aye a sẹrorẹ oma aye, ọrẹn, aye a ha uruemru-urhi Baibol na ruiruo. Jerẹ udje, urhebro i Baibol ọ kparehaso uruemru ra ha okpọghọ yanghene ekwakwa uvweri ha chochọn oma ọwan. Jene roro kpahen iruemru-urhi Baibol enana:

Jehova o ni arhọ ghanghanren, maido ọrẹ onyakpọ. David ọ tare taghene i Jehova yẹ “esiri arhọ.” (Ps. 36:9) Omarana, orhianẹ Olele Kristi ọ kpare idjaghwẹ rọ nọ sẹrorẹ omayen yanghene enyerẹn ye, o fori no ruie izede ro no jo kpe ihworho hwu yanghene biomu ọbara.—Deut. 22:8; Ps. 51:14.

Dedevwo ekwakwa buebun e havwiẹ ri na sabu kpe ohworho hwu, ọrẹn, o vwo kpọke okpọghọ o ki kpe ohworho hwuẹ-ẹ. * Habaye, ọvwreghrẹn ọrhọ mẹriẹn vwrurhe taghene wu mọrọn okpọghọ, erhirhiẹ na ono biomu rhọ te erhirhiẹ ọwan ọnọ sa ọwan kpe.

Jesu o ki hwu, ọ ta rẹn idibo yi taghene aye i mọrọn odan ọlọkọ aye, ọrẹn, orhiẹ ọrẹ aye ina chochọn oma aye-e. (Luke 22:36, 38) Ukpomaran, Jesu ọ ha ọdan ọlọkọ na yono aye taghene aye i vwe vwobọrhọ ozighi-i, aye i rha tobọ dẹrughwaroghwu ihworho ri mọrọn ekwakwa uvweri. (Luke  22:52) Ọke i Peter ọ ha odan ọlọkọ ye bru orhọ ọvrẹn rọ wian harẹn orheren ọduado na, Jesu nọ ta rẹn Peter: “Fi odan ọlọkọ ọnọ rhẹ ekete rọ havwọ bi.” Ọke ọrana, Jesu nọ ta kpahen uruemru-urhi owu ro suẹn Ilele Kristi urhomẹmro ephian me te inyenana: ‘Ihworho re ha odan ọlọkọ wọnrọn, aye ine hwu nyoma odan ọlọkọ.’—Matt. 26:51, 52.

Jerẹ oborẹ Micah 4:3 ọ tare, ihworho Osolobrugwẹ e “dumu odan ọlọkọ aye rhiẹ ikwro, jeghwai dumu egiọ aye rhiẹ egbage.” Uruemru Ilele Kristi ọnana o serhọ rhẹ oborẹ ọnyikọ Paul ọ ha urhebro yi rẹn ọwan, ọke rọ ta: “Are i vwe ru ihworho kele-e. . . . Orho rhiẹ oborẹ are ina sabu ru, lele ihworho ephian nyerẹn ọrẹ ufuoma.” (Rom. 12:17, 18) Udabọ ebẹnbẹn buebun ri Paul o rhiẹromẹrẹn, kugbe ihi rọ nya vwa uvuẹn izede, ọ sẹrorẹ ẹmro enẹyen, ọ chochọn omayen gbe uruemru-urhi Baibol ghwu-u. (2 Cor. 11:26) Ukpomaran, ọ hẹroso Osolobrugwẹ ọrhẹ i Baibol na, ro vwo ẹghwanrẹn ro “rhomu ghwẹ ekwakwa uvweri.”—Eccl. 9:18.

Ilele Kristi urhomẹmro i ni arhọ ghanghanren ghwẹ ekwakwa ugboma. Ohworho ọ sabu “simi arhọ ye nyoma ekwakwa i buebun ro vwori na-a.” (Luke 12:15) Omarana, orhianẹ ẹmro wu ta rẹn ozighẹ ọ sabu lẹrhiẹ wene ẹhẹ-ẹn, o fori na nyalele ẹmro ri Jesu ọ tare: “Are i we lele ọvwọkon simi oma-a.” Ọkezẹko, o fori ne tiobọnu oborẹ e vwori uvuẹn erhirhiẹ ọrana. (Matt. 5:39, 40; Luke 6:29) * Ona rọ mai rhomu kparobọ, ọrẹ ene sun oma ọwan. Arha kẹnoma rẹn uruemru “re dje akpenyerẹn phia,” ihworho re rhirhiẹ kẹrẹ ọwan a jeghwai rhe taghene ọwan Iseri Jehova ri rhiẹ ihworho ufuoma, ọnọ sabu lẹrhẹ ihi je kpokpo ọwan.—1 John 2:16; Prov. 18:10.

O fori nẹ Ilele Kristi i họghọ rẹn ẹhẹn obrorhiẹn awọrọ. (Rom. 14:21) Ihworho i rhe rhon kpahiẹn taghene owuọwan usuẹn imizu ri ha uvuẹn ukoko na, o vwo okpọghọ rọ ha chochọn omayen, ọnọ sabu gbe imizu ri ha uvuẹn ukoko na unu, jeghwai rhiẹ ukọ rẹn aye. Ẹguọlọ o mwu ọwan ha edamẹ awọrọ karo rẹn erẹ ọwan, ọrhọ tobọ rhianẹ o fori ne ru omaran.—1 Cor. 10:32, 33; 13:4, 5.

Ilele Kristi a damoma rẹ aye ine dje omamọ udje phia. (2 Cor. 4:2; 1 Pet. 5:2, 3) Orhianẹ Olele Kristi o vwo okpọghọ rọ nọ ha chochọn omayen, ekpako ukoko ina sabu yẹ ye urhebro nẹ i Baibol na rhe, ọrhọ ha urhebro na-a, nọyẹ orho rhiẹ omamọ udje uvuẹn ukoko na-a. Omarana, orho mwuovwan ẹrhẹ owuorowu uvuẹn ukoko na-a. Omaran ọ ji havwọ rẹn ohworho rọ wian owian ra ha okpọghọ ruiruo. O fori nẹ ohworho ọrana ọ guọlọ iruo ọrọrọ! *

Olele Kristi ọvo yọ nọ djẹ odjẹ kpahen oborẹ ono ru chochọn omayen, ekrun ọnẹyen, ọrhẹ enyerẹn oghwa ye. Ọrẹn, ọrhọ djẹ odjẹ erana, o fori nọ bọn aye kpahen uruemru-urhi ri ha uvuẹn i Baibol na. A mẹrẹn ẹghwanren ọrhẹ ẹguọlọ Osolobrugwẹ uvuẹn iruemru-urhi enana. Fọkiẹ iruemru-urhi Baibol enana, Olele Kristi ro te edje ne, nọ kẹnoma rẹn uruemru re vwo okpọghọ ra na ha chochọn oma ọwan nẹ abọ ituakpọ. Ilele Kristi urhomẹmro i rheri taghene ihworho ri hẹroso i Jehova jeghwai nyalele iruemru-urhi Baibol na, ina mẹrẹn ẹruete ọrẹ i Jehova.—Ps. 97:10; Prov. 1:33; 2:6, 7.