URHIỌKE owu uvuẹn amwa re se Brookings, rọ ha uvuẹn Dakota, U.S.A., aruọke na nọ fọre omamọ. Ọrana nọ karorhọ mẹ taghene, okwakwa ọ samọ homaphia phẹrẹkpẹ. Ọrẹn, ọnọ sabu gbe owẹwẹ unu taghene ẹdẹ ọrana, ame a phariẹ uvuẹn oghwa ọkokamu owu. Ame i mevi kẹrẹ ekete re koko ame rhọ, ame rọ ha uvuien ọ fọre omamọ! Ji mẹ gbikun kpahen akpenyerẹn mẹ, neneyo wu sabu vwẹruọ oborẹ ọ phiare.

E vwiẹre mẹ uvuẹn March 7, 1936, mẹmẹ yẹ ubrevwiẹ usuẹn emọ ẹne rẹ ọsẹ mẹ ọrhẹ izu mẹ i vwiẹre. Ame i nyerẹnren uvuẹn ikebi ọkokamu rọ ha uvuẹn Dakota. Ame i ha owian ikebi ghanghanren, ọrẹn, orhiẹ owian ikebi na yọ mai ghanren harẹn ame-e. Ọsẹ mẹ ọrhẹ izu mẹ i bromarhame uvuẹn ẹgbukpe 1934. Ra mẹriẹn taghene aye i homakpahontọre rẹn i Jehova ne na, ọhọre Osolobrugwẹ nọ yẹ oborẹ ọ mai ghanren harẹn aye. Clarence ro rhiẹ ọsẹ mẹ ọrhẹ omizie re se Alfred, i gare uvuẹn ẹrhẹ company servant uvuẹn ukoko ame i havwọ uvuẹn amwa re se Conde rọ ha uvuẹn Dakota. Ọke ọrana, company servant ye se ọrọhẹrote ewian ugboma ekpako.

Ọke ephian yẹ mẹmẹ ọrhẹ ekrun mẹ e riẹ uyono jeghwai vwobọrhọ owian aghwoghwo iyẹnrẹn esiri Uvie na. Udje ọsẹ mẹ ọrhẹ izu mẹ kugbe iyono rẹ aye i yonirin ame, i ha userhumu rẹn ame omamọ. Mẹmẹ ọrhẹ omizu mẹ Dorothy i rhiẹ ighwoghwẹmro ọke ame a ha ẹgbukpe erhan. Uvuẹn ẹgbukpe 1943, ni mi vwobọrhọ oghọn uyono ukoko na re se Isukuru Uvie na, ra ha mwu obọ ọke ọrana.

Emẹvwa i ghanranren omamọ harẹn ame. Omizu Grant Suiter, yẹ ọpha rọ tẹmro uvuẹn omẹvwa ẹkwotọre rẹ ame i nyaren uvuẹn ẹgbukpe 1949, uvuẹn amwa re se Sioux Falls, rọ ha uvuẹn Dakota. Mia ji karorhọ ẹmro ọnẹyen rọ tare, “Oba Enyerakpọ Na O Ti Kẹrẹ Ghwẹ Oborẹ E Roririe Rhọ!” Omizu na ọ dabu ta kpahen oborẹ ọsoriẹ o fo nẹ Ilele Kristi ri homakpahontọre rẹn i Jehova ne, i ha  owian aghwoghwo iyẹnrẹn esiri Uvie na ghanghanren uvuẹn akpenyerẹn aye. Ọrana yo mwurun mẹ homakpahontọre rẹn i Jehova. Ọke ame e riẹ omẹvwa okinhariẹ uvuẹn amwa i Brookings, ni mi bromarhame uvuẹn oghwa ọkokamu ọrana ri mi hunute uvuẹn ọtonrhọ ikuegbe na. Ekete re koko ame rhọ mi hunute bi na, ọyẹ ame awan ẹne e bromarhame uvuẹn November 12, 1949.

Ọke oru, ni mi bru ẹkẹ te oma mi ne rhiẹ ọkobaro ọke ephian. Omarana, ni mi tuẹn iruo ọkobaro rhọ uvuẹn January 1, 1952, ọke mia ha ẹgbukpe 15. Baibol na ọ tare: “Ohworho rọ nyalele ọvwẹghwanrẹn ọnọ ghwanren,” itiọrurhomẹmro, mi vwo ihworho buebun ri rhiẹ evwẹghwanren uvuẹn ekrun mẹ, ri hobọtua orhienbro mẹ mi ne ruiruo ọkobaro na. (Prov. 13:20) Omizu ọsẹ mẹ re se Julius, rọ ha ẹgbukpe 60, yẹ ọreva mẹ uvuẹn owian ọkobaro na. Dedevwo mẹmẹ ọrhẹ ọye e rhiẹ ẹdẹre-e, oma ọ merhen ame rẹ ame a wian kugbe uvuẹn owian aghwoghwo na. Mi dabu yono ẹghwanren mie yi. Ọke oru, Dorothy no ji rhiẹ ọkobaro ọke ephian.

Ọke mia ha uphuphẹn, ọsẹ mẹ ọrhẹ izu mẹ, a ha uphẹn rẹn iniruo okinhariẹ ọrhẹ ane aye nẹ aye i lele ame rhirhiẹ. Oniruo okinhariẹ owu re se Jesse Cantwell ọrhẹ aniẹ re se Lynn Cantwell, i ha userhumu mẹ omamọ. Aye yi ha urhebro mẹ rọ lẹrhere mẹ brorhiẹn mi ne rhiẹ ọkobaro. Ọdamẹ aye i vwo kpahen mẹ, ọ lẹrhere mẹ bru ẹkẹ te oma uvuẹn ogame i Jehova. Aye erhe kin ukoko ri kẹrerẹ ame, aye na ha use mẹ, ne mi me lele aye wian uvuẹn owian aghwoghwo na. Itiọrurhomẹmro, ọrana ọ yẹre mẹ aghọghọ jeghwai ru mẹ gbanhon!

Ọke oru, Omizu Bud Miller ọrhẹ aniẹ re se Joan, ni kin ukoko ame. Ọke ọrana mi ha ẹgbukpe 18, ọke ọrana ya jeghwai ha use mẹ ne mi rhiẹ isodja. Ihworho ra sanọ ihworho ri ne vwobọrhọ uvweri, ni ya odẹ mẹ rhẹ usuẹn ihworho ri ne vwobọrhọ uvweri, ọrẹn mi mẹrẹnvwrurhe taghene ọrana ọ kparehaso ẹmro i Jesu ọ ta rẹn idibo yi taghene aye i kẹnoma rẹn irueruo akpọ na. Habaye, mi ji guọlọ ghwoghwo iyẹnrẹn esiri Uvie na. (John 15:19) Omarana, ni mi ta rẹn ihworho ra sanọ ihworho ri ne vwobọrhọ uvweri na, taghene aye i ya odẹ mẹ rhẹ usuẹn ihworho re ghwoghwo Ẹmro Osolobrugwẹ.

Oma ọ merhenren mẹ omamọ ọke rẹ Omizu Miller, ọ ta mẹ taghene ọye ono lele mẹ bru ihworho ra sanọ ihworho ri ne vwobọrhọ uvweri na. Itiọrurhomẹmro, ọye o vwo uduefigbere, ofẹn o vwo  mwuie-e. Rẹ Omizu Miller o lele mẹ nya na, ọ ghini lẹrhe mẹ vwo uduefigbere, ọrana nọ lẹrherẹ aye ya odẹ mẹ rhẹ usuẹn ihworho re ghwoghwo Ẹmro Osolobrugwẹ uvuẹn ẹgbukpe 1954. Ọrana nọ yẹre mẹ uphẹn mia sabu ya ga uvuẹn oghọn ukoko.

Uvwre ọke ọrana, ne se ri mẹ ne mi ya ga uvuẹn oghọn ukoko rọ ha uvuẹn amwa i Staten, New York. Ọke ọrana Watchtower Farm ye se oghọn ukoko (Bethel). Mi vwo uphẹn mia ga avwaye te ẹgbukpe esa. Ọrana nọ lẹrhere mẹ vwo ena buebun, nime mi lele evwẹghwanren buebun wian kugbe.

Oghọn ukoko rọ ha uvuẹn amwa i Staten na, o vwo oborẹ ọ kpare iyẹnrẹn (radio station) re se WBBR. Ukoko na ọ ha ona ọrana ruiruo uvuẹn ẹgbukpe 1924 riẹ 1957. Ihworho ri te 15 yanghene 20 ọvo, ya sanọren ni wian uvuẹn ikebi rọ ha uvuẹn oghọn ukoko na. Buebun ame iphuphẹn, ame e ji vwo ena bu-un. Ọrẹn, Omizu Eldon Woodworth, ro rhiẹ Omizu ra ha ẹhẹn ọfuanfon djẹha rọ jeghwai ho ne, o lelirẹ ame wian. Ọye ghini ọvwẹghwanren. Ọ dabu ha urhebro rẹn ame nẹ ame i sabu mevigbanhon uvuẹn ukoko na. Ọkezẹko ame arha mẹrẹn egbobọse sansan fọkiẹ ijẹgba awọrọ, Omizu Woodworth nọ ta rẹn ame, “Oborẹ i Jehova ọ ha idibo yi wian lele, dedevwo aye a gba-a, ghini emru igbevwunu.”

Oma ọ ghini merhen ame, ọke ame e lele Omizu Frederick W. Franz wian kugbe. Ẹghwanren ọnẹyen ọrhẹ irherhe ro vwori kpahen i Baibol na, kugbe ọdamẹ ro vwo kpahen ame owuowọnwan, ọ ha userhumu rẹn ame ephian. Odẹ Omizu ro sere emaren rẹn ame yẹ Papargyropoulos Harry Peterson; ọrẹn ame a ghwai se yi Harry Peterson ọvo, nime ọrana yọ mai lọhọ rẹn ame. Ọye owuọwan usuẹn ihworho ra ha ẹhẹn ọfuanfon djẹha, ro vwo oruru kpahen iruo Uvie na. Omizu Peterson ọ wian owian yen ephian uvuẹn oghọn ukoko na, ọrẹn o ji vwobọrhọ owian aghwoghwo Uvie na. Ọye o fi imagazini buebun rhẹ ada kibiamo kibiamo. Ọye ọ dabu rhe i Baibol na omamọ, ọnana nọ sa ye erhumu kpahanrhọ enọ ame ephian.

Ewawọ ame i vun nẹ ikebi na rhe, ame na ha imashini lọ aye. Ame ne fiẹ aye rhẹ iko neneyo aye i je rhe biomu, ewawọ rẹ ame i lọre na, a sabu vuọn ijẹrikani ilita ri te 42,600. Ni mi vwo uphẹn mia wian rhẹ omizu ọmase re se Ettah Huth uvuẹn ikebi  na. Ọye yọ hẹrote owian re fiẹ oborẹ a lọre na rhẹ iko. Uvwre ọke ame a wian owian na, imizu emẹse ezẹko ne nẹ ikoko sansan sa ma ha userhumu rẹn ame, Omizu Etta nọ ta rẹn aye oborẹ aye ine ru. Dedevwo Omizu Etta ọ wian uvuẹn ẹrhẹ ọrana, ọ homariotọre rẹn imizu ehworhare ra hẹrote ikebi na. Ọye o dje omamọ udje ra homariotọre rẹn ihworho ra kobaro uvuẹn ukoko na.

Omizu ọmase owu ro rhiẹ uphuphẹn rẹ odẹ ye o rhiẹ Angela Romano, nọ jeghwai rhe mọ ha userhumu phia uvuẹn ikebi na. Omizu Etta Huth yọ ha userhumu riẹn ọke rọ mẹrẹn urhomẹmro na vwrurhe obọ. Omarana, ni mi rharhumu mẹrẹn omizu ọmase ọrọrọ ro vwo ẹghwanren. Mẹmẹ ọrhẹ Angela (Angie) ni rọnmọren uvuẹn April 1958, ame i ga kugbe ẹgbukpe buebun ne. Oma ọ merhen mẹ ọrhẹ ane mẹ rẹ ame a wian kugbe ẹgbukpe 58 ne. Atamwu ọgbogbanhon rẹ Angie o vwo kpahen i Jehova uvwre ẹgbukpe buebun rhe na, ọ bọn orọnmo ame gbanhon. Mi hẹrosuiẹ, o toro ebẹnbẹn rẹ ame i dẹrughwaroghwu-u.

Ọke ra rhẹ radio station rọ ha uvuẹn amwa i Staten uvuẹn ẹgbukpe 1957, ni mi gare uvuẹn oghọn ukoko rọ ha uvuẹn Brooklyn ibiọke. Ọke mia rọnmọ, ni mi nẹ oghọn ukoko na, mẹmẹ ọrhẹ ane mẹ ni gare ẹrhẹ ọkobaro uvwre ẹgbukpe esa uvuẹn amwa i Staten. Mi tobọ ji wian rẹn ihworho ri dẹ radio station na, aye ni wene odẹ radio station na nẹ WBBR riẹ WPOW.

Mẹmẹ ọrhẹ Angie i vwo omwemẹ rẹ ame ine ru akpọ ame lọhọ, nẹ ame i sabu ya ga ekete ra guọlọ userhumu ame. Omarana, uvuẹn ẹgbukpe 1961, na yẹrẹ ame owian ame ina ga ẹrhẹ ọkobaro oghẹnrensan uvuẹn Nebraska. Ọke ame a riẹnriẹn oma ame rhẹ owian ọkpokpọ ọnana, ne serẹ ame riẹ Isukuru Ekpako Ukoko ọrhẹ Idibo Owian uvuẹn amwa re se Lansing, New York, ọke ọrana ibiamo owu ọyẹ a ha ruie. (Ọke ọrana, ane ọkobaro oghẹnrensan orho ji rhiẹ ọkobaro oghẹnrensan, ọnọ ji sabu riẹ isukuru na.) Ame i riẹ amerhen uyono na, ame i ji vwo omwemẹ rẹ ame ina haye ruiruo uvuẹn Nebraska. No gberẹ ame unu omamọ, ọke ra ta rẹn ame taghene ame i vwo owian ọkpokpọ rẹ ame ina ya ga ẹrhẹ imishọnari uvuẹn Cambodia! Amwa ọnana ọ ha uvuẹn ẹkwotọre Asia, o vwo ekete ri rhomurun omamọ, omamọ ijoro ọrhẹ omamọ emaren ri vẹnẹ erẹ ame i rheri bi. Ame i ghini guọlọ ghwoghwo iyẹnrẹn esiri Uvie na avwaye.

Ọrẹn, erhirhiẹ usuon amwa na no wenerin, ame ni kwa riẹ ẹkwotọre i Vietnam. Ọrẹn, ọke ame a ha avwaye te ẹgbukpe eva, ni mi kpomurun, na ta rẹn ame nẹ ame i ghwẹrioma rie. O fori nẹ omamẹ ọ dabu serhọ mi ki ghwẹrioma riẹ owian na, ọrẹn ogege omamẹ o serhọ, ni mi rharhumu tuẹn owian ọkobaro rhọ.

Uvuẹn March 1965, ame ni vwo uphẹn rẹ ame a tuẹn owian re kin ikoko sansan rhọ. Angie ọrhẹ omẹmẹ i riẹ amerhen owian rẹ ame e kin ikoko ọrhẹ ẹkwotọre sansan uvwre ẹgbukpe 33, ame i ji wian ewian uvuẹn emẹvwa sansan. Oma ọ merhen mẹ, ọke mie riẹ emẹvwa ẹkwotọre erana jeghwai ha userhumu phia uvuẹn emẹvwa na. Uvwre ẹgbukpe ezẹko, ame i gare uvuẹn New York, a jeghwai ru emẹvwa ẹkwotọre buebun uvuẹn afiughe re se Yankee Stadium.

Mẹmẹ ọrhẹ Angie i ji rhiẹromẹrẹn ewene ọrhẹ egbobọse buebun uvuẹn owian ame, jerẹ oborẹ ihworho  buebun ri ha uvuẹn owian Uvie na vuọnvuọn i ji rhiẹromẹrẹn ne. Jerẹ udje, uvuẹn ẹgbukpe 1995, ne djeri mẹ ye yono ihworho ri riẹ Ministerial Training School. Ẹgbukpe esa a vrẹn, ne serẹ ame riẹ oghọn ukoko. Oma ọ ghini merhen ame omamọ, dedevwo ẹgbukpe 40 i vrẹn ne. Mi ji ga uvuẹn Awuiruo rọ hẹrote owian aghwoghwo na jeghwai rhiẹ oyono uvuẹn Isukuru Uvie na sansan. Uvuẹn ẹgbukpe 2007, ugboma usuon na ni ha awuiruo ọkpokpọ mwu nọ hẹrote Isukuru Uvie na ephian, mi vwo uphẹn ọduado mie rhiẹ oniruo awuiruo na uvwre ẹgbukpe ezẹko.

A mẹrẹn ewene buebun uvuẹn Isukuru Uvie na sansan uvwre ẹgbukpe ezẹko rhe na. A ha Isukuru Ekpako Ukoko mwu uvuẹn ẹgbukpe 2008. Uvwre ẹgbukpe eva, e yono ekpako ri te 12,000 uvuẹn oghọn ukoko rọ ha uvuẹn Patterson ọrhẹ ọrẹ ọ ha uvuẹn Brooklyn. A jeghwai ru Isukuru ọnana uvuẹn ekete sansan, iyono ri dabu tẹn ona ya ha uyono na phia. Uvuẹn ẹgbukpe 2010, ne wene odẹ Isukuru re se Ministerial Training School riẹ Bible School for Single Brothers, na jeghwai ha isukuru ọkpokpọ mwu ro rhiẹ Bible School for Christian Couples.

Nẹ ọtonrhọ ẹgbukpe owian ọrẹ 2015, ne ku isukuru eva na kugbe, no mo rhiẹ Isukuru Ighwoghwẹmro Uvie na. Imizu ri vwa je rọnmọ ọrhẹ eri rọnmọ ne ya nya. Oma ọ merhen imizu buebun rẹ aye e rhon taghene a ha isukuru ọnana phia uvuẹn oghọn ukoko sansan. Oma ọ merhen mẹ ri mie rhiẹromẹrẹn Isukuru Uvie enana re kerabọ, mia jeghwai rhonmie imizu buebun re vwobọrhọ ye.

Ọke mie roro kpahen ọke mi vwe ji bromarhame uvuẹn oghwa ọkokamu ọrana ye te ọke ọnana, mia ghini kpẹmẹ i Jehova fọkiẹ evwẹghwanren ri ha userhumu mẹ sabu gbanhon uvuẹn urhomẹmro na. Ihworho ezẹko mi lele wian, e rhiẹ otuẹdẹre mẹ-ẹ, aye i jeghwai nẹ ekete sansan rhe. Aye i mevigbanhon uvuẹn urhomẹmro na. Aye i dje ẹguọlọ rẹ aye i vwo kpahen i Jehova phia nyoma uruemru ọrhẹ irueruo aye. Evwẹghwanren rẹ ọwan ina sabu lele wian, i ha uvuẹn ukoko na. Mi lele evwẹghwanren wian, mi jeghwai mẹrẹn erere nẹ uvuien rhe.