Onyerẹnkugbe ọnọ rhẹ Ugbehian ọnọ Ọrhọ ha Erhirhiẹ Imwofẹn
Gianni ọrhẹ Maurizio i rhiẹ igbehian te ẹgbukpe 50 ne. Ọrẹn, o vwo ọke owu onyerẹnkugbe aye ọ ha erhirhiẹ imwofẹn. Maurizio nọ tare: “Uvwre ọke owu, mi ru ọdandan ọghwaghwa rọ lẹrhẹ ugbehian ame joma fan.” Gianni nọ ji ta: “Maurizio yẹ ohworho rọ yonirin mẹ i Baibol na. Ọye omamọ udje ha mẹ uvuẹn ukoko na. Omarana, no gberi mẹ unu taghene o ru oborẹ o ruru na. Ni mi mwuomarhọ, nime mi rheri taghene ame i rhe rhiẹ igbehian ghwomara-an. Nọ họhọre taghene mẹmẹ ọvo yi havwiẹ.”
OMAMỌ ugbehian ọ ghanranren omamọ, ọ vwọ jeghwai homaphia kpregede-e. Orhianẹ imwofẹn ọ homaphia uvuẹn onyerẹnkugbe ọwan rhẹ ugbehian ọwan, me ya na sabu ru, na sabu sẹroriẹ? Ọwan ina sabu yono nẹ udje ihworho ra hunute uvuẹn i Baibol na rẹ onyerẹnkugbe aye rhẹ igbehian aye i dẹrughwaroghwu erhirhiẹ imwofẹn, dedevwo aye omamọ ugbehian.
UGBEHIAN ỌNỌ ORHO RU ỌDANDAN
David ro rhiẹ Orodje ọrhẹ osuingegede, o vwo omamọ igbehian. Ọkezẹko, Jonathan yẹ ọwan ina sabu kiki karorhọ taghene ọ ha usuẹn igbehian i David. (1 Sam. 18:1) Ọrẹn, David o vwo igbehian erọrọ, jerẹ ọmẹraro Nathan. Baibol na ọ ta kpahen ọke aye a tuẹn igbehian aye rhọ-ọ. Ọrẹn, Baibol na ọ tare taghene ọke owu i David ọ ta rẹn Nathan kpahen oborẹ ọye ọ guọlọ ruẹ. David ọ guọlọ bọn oghwa ẹga rẹn i Jehova. Orodje David ọ ta riẹn, nime o nirien taghene ọye omamọ ugbehian rọ jeghwai vwo ẹhẹn ọfuanfon i Jehova.
Ọke oru, emru nọ phiare rọ lẹrhẹ imwofẹn rhirhiẹ onyerẹnkugbe aye. Orodje David nọ 2 Sam. 11:
Me yo fori ni Nathan o ru? Ọnọ ha uphẹn rẹn awọrọ nẹ aye i ta rẹn Orodje na kpahen oborẹ o ruru na? Awọrọ i ji rhe kpahen ẹkwaphiẹrhotọre Orodje na o ruru ne kpe Uriah. Omarana, mesoriẹ Nathan ono fi arhọ ye rhẹ erhirhiẹ imwofẹn jeghwai ghwọghọ omamọ onyerẹnkugbe ọnẹyen rhẹ i David? Habaye, Nathan ọrhọ ta rẹn i David kpahen ọdandan na, ọnọ sabu kpe yi hwu jerẹ oborẹ o kpe Uriah ro vwo ru emru owuorowu.
Ọrẹn, Nathan ọmẹraro Osolobrugwẹ. Ọye o rheri taghene ọye orho kudu, onyerẹnkugbe ọnẹyen ọrhẹ i David ọrhọ gbanhan ghwomara-an, ẹhẹn obrorhiẹn ọnẹyen ono ji kpokpie. Ugbehian yen ro rhiẹ i David o ru ọdandan obaro i Jehova. Orodje David ọ guọlọ ohworho rọ nọ ha userhumu riẹn, nọ sabu ru onyerẹnkugbe yi ọrhẹ i Jehova gbanhon. Itiọrurhomẹmro, David ọ guọlọ obọdẹn ugbehian. Nathan yẹ ugbehian ọrana. Omarana, Nathan nọ ha izede ona dje udje kpahen igegede rẹn i David, neneyo ọ sabu te ẹhẹn i David ro rhiẹ osuingegede bi. Nathan nọ ta rẹn i David kpahen urhomu Osolobrugwẹ o djerie, ọrẹn o rurie izede i David ono rhe oborẹ ọdandan yen ọghwa te, nọ jeghwai ghwẹriẹ.
Me wu ne ruo, orhianẹ wu vwo ugbehian ro ruẹ ọdandan ọghwaghwa? Ọkezẹko, wu na sabu roro taghene wu rha ta riẹn kpahen ọdandan na, onyerẹnkugbe ọnọ rhẹ ọnẹyen ọrhọ gbanhan ghwomara-an. Habaye, wu na ji sabu roro taghene ugbehian ọnọ, ono nie taghene wu phiẹ riẹ rhọ, wu rha ta rẹn ekpako ukoko ri na sabu ha userhumu riẹn ghwẹriẹ nẹ ọdandan na. Me yo fori ne wu ru?
Gianni, ra hunute oberun na, nọ tare: “Ni mi mẹrẹnvwrurhe taghene emru ọ phia. Maurizio ọ vwọ rhọ tẹmro mẹ jerẹ oborẹ ọ tẹmro mẹ bi-i. Ni mi brorhiẹn mi ne brie nya, dedevwo ọ bẹnren omamọ. Ni mie roro: ‘Me mi na sabu ta riẹn, rẹ ọye o vwo ji rhe? Ọnọ sabu tuekwẹre!’ Ọrẹn, ọke mia karorhọ oborẹ ame i yono kugbe nẹ i Baibol na rhe, ọnana nọ lẹrhere mẹ brorhiẹn mi na tẹmro riẹn. Omaran i Maurizio ọ ji ha userhumu mẹ ọke mia guọliẹ. Mia guọlọ nẹ ugbehian ame ọ fa-an, mi ji guọlọ ha userhumu riẹn, nime mi vwo ẹguọlọ kpahiẹn.”
Maurizio nọ ji ta: “Oborẹ Gianni ọ ta mẹ ọ gbare. Mi rheri taghene oborẹ o nẹ erhumu orhienbro mẹ rhe, orhiẹ Gianni yanghene i Jehova yi soriẹ-ẹ. Omarana, ni mi rhiabọ dede ọghwọghwu na, ọke oru, onyerẹnkugbe mẹ rhẹ i Jehova nọ rharhumu gbanhon rhọ.
UGBEHIAN ỌNỌ ỌRHỌ HA UKPOKPOGHO
David o vwo igbehian erọrọ ri mevi kẹriẹ ọke rọ ha ukpokpogho. Owuọwan usuẹn aye yẹ Hushai, Baibol na o serie ugbehian i David. (2 Sam. 16:16; 1 Chron. 27:33) Hushai ọnọ sabu rhiẹ usuẹn ihworho ra wian rẹn David, rọ jeghwai rhiẹ ugbehian yen, ọkezẹko ọ tobọ nya urhomu odjahen rẹn Orodje na.
Ọke ọmọ i David re se Absalom ọ guọlọ ha ẹrhẹ usuon i David, emọ Israel buebun ni hobọtua Absalom, ọrẹn Hushai ọ hobọtua ye-e. Ọke ri David ọ zẹ fọkiẹ ọmọyen, Hushai no lelirie. Ọ miamo i David oma omamọ ro rhe taghene ọmọyen rẹ ọye ọ hẹroso ọrhẹ awọrọ, i phiẹ riẹ rhọ. Ọrẹn, Hushai ọ sẹrorẹ atamwu ro vwo kpahen i David, ọ jeghwai vwo omwemẹ ro no fi arhọ ye rhẹ erhirhiẹ imwofẹn neneyo ọ sabu fi ọyanghan rhẹ iroro aye i djẹre. Orhiẹ fọkiẹ owian rẹ Hushai ọ wian rẹn Orodje na, yọ lẹrheriẹ fi arhọ ye rhẹ erhirhiẹ imwofẹ-ẹn. Ọye o djerie phia taghene o ghini vwo atamwu kpahen i David.
Omamerhomẹ ọ havwiẹ ra mẹrẹn imizu uvuẹn ukoko na re ruẹ kugbe nẹ ẹhẹn sa. Aye a ta nyoma uruemru aye taghene, “Mẹmẹ ugbehian ọnọ, a gba mẹ ruie-e, ọrẹn mie ruie nime mi vwo ẹguọlọ kpahuọn.”
Ọnana oborẹ omizu ọhworhare owu re se Federico o rhiẹromẹrẹn. Nyoma ugbehian yen re se Antonio, nọ sabu fi erhirhiẹ ọgbogbanhon rẹ ọye ọ dẹrughwaroghwu uvuẹn akpenyerẹn yen kparobọ. Federico nọ tare: “Ọke Antonio ọ rhiẹ ukoko ame, ame ni rhiẹ igbehian. Ame awanva idibo owian, oma ọ merhen ame ọke ame a ji wian kugbe. Ọrẹn, o jiri-i, na ha Antonio mwu ẹrhẹ ọkpako ukoko. Dedevwo ame awanva igbehian, Antonio ji omamọ udje ha mẹ uvuẹn ukoko na.” Ọke oru, Federico nọ kpare idjaghwẹ rọ sọre. Ogege, no bru ekpako nya na ha userhumu riẹn, ọrẹn orho mwuovwan rọ nọ ga ẹrhẹ ọkobaro ọke ephian ọrhẹ odibo owia-an. Me yi Antonio o ruru?
Ọke Federico ọ dẹrughwaroghwu ukpokpogho, ugbehian yen Antonio ọ kerhọ ye jeghwai yẹ ye urhebro
Federico nọ tare: “Mi mẹrenriẹn taghene Antonio o mwuomarhọ fọkiẹ oborẹ ọ phia mẹ na. Ọ damoma ọgbọ buebun nọ sabu ha urhebro mẹ. Ọ guọlọre nẹ onyerẹnkugbe ọnẹmẹ rhẹ i Jehova ọ gbanhon, ọ jeghwai sẹrerhumuji mẹ-ẹ. Ọ ha urhebro mẹ ne mi sabu vwo omamọ onyerẹnkugbe rhẹ i Jehova.” Antonio nọ tare: “Mie lele Federico ghwọghọ ọke kugbe. Mi guọlọre nọ ta mẹ kpahen kemru kemru rọ ha ẹhẹn yen ọrhẹ oborẹ o kpokpie uvuẹn ẹhẹn.” Ọrẹ omamerhomẹ, Federico nọ rharhumu vwo omamọ onyerẹnkugbe rhẹ i Jehova, nọ rharhumu ga ẹrhẹ ọkobaro ọke ephian jeghwai rhiẹ odibo owian. Antonio nọ tare: “Dedevwo ame a ga uvuẹn ukoko sansan vwarana, ugbehian ame nọ mọ kpẹnkpẹn rhọ.”
WU NE RORO TAGHENE A PHIẸ RUỌ RHỌ?
Me wu ne ruo, orhianẹ ugbehian wu vwo ẹguọlọ kpahen omamọ ọ sẹrerhumji owẹwẹ ọke wa guọlọ userhumu ọnẹyen? Ọnọ miamuọ oma omamọ. Wu na sabu harhomie? Onyerẹnkugbe are ọnọ ji sabu gbanhon jerẹ oborẹ ọ havwọ bi?
Roro kpahen oborẹ ọ phia rẹn i Jesu ọke ra guọlọ kpe yi. Ọ ghwọghọ ọke kugbe rhẹ inyikọ ye, aye i ji vwo onyerẹnkugbe oghẹnrensan. John 15:15) Ọrẹn, me yọ phiare ọke re mwie? Inyikọ na ni zẹre. Peter ọ tare uvuẹn afiede taghene ọye ọ sẹrerhumuji Ọrovworie-e, ọrẹn ason ẹdẹ ọrana, Peter nọ ten i Jesu, taghene ọye o rhe yi-i!
Jesu o rheri taghene ọye ọvo yọ nọ dẹrughwaroghwu ọdamuni rọ kẹta na uvuẹn enyerakpọ ye. Udabọ ọrana, ọ miameriẹn oma, ọ tobọ ji nie taghene a phiẹ riẹ rhọ. Ọrẹn, ẹmro ro lele idibo yi ta, ọke ra rhọmiẹ nẹ uhwu, o djephia taghene ọye ọ harhomu aye ne, ọ jeghwai kpare iroro vrẹn ọphiẹrhọ na. Jesu ọ sẹrorẹ orusọ idibo yi rhẹ ẹhẹ-ẹn, ọ tobọ sẹrorẹ orusọ rẹ aye i ruru uvuẹn ason re mwie ẹdẹ ọrana rhẹ ẹhẹ-ẹn.
Ọrẹ ovẹnẹ, Jesu nọ yẹ i Peter ọrhẹ inyikọ na imwẹro. Jesu o djephia taghene ọye ọ hẹroso aye nyoma ọ yẹ aye owian ọghoghanren rẹ aye ine yono ihworho. Jesu o vwo ẹguọlọ kpahen inyikọ na ri rhiẹ igbehian yen. Ẹguọlọ ro vwo kpahen aye, o terẹ aye ẹhẹn omamọ. O fori nẹ aye i damoma nẹ aye i ja rha sẹrerhumuji Ọrovwori aye. Itiọrurhomẹmro, idibo na i wian owian ri Jesu ọ yẹrẹ aye na rhẹ efikparobọ.
Omizu ọmase owu re se Elvira nọ karorhọ ọke rẹ ọye ọrhẹ ugbehian yen re se Giuliana e vwo ẹghwọ. Elvira nọ tare: “O teri mẹ ẹhẹn omamọ, ọke rẹ Giuliana ọ ta mẹ taghene evwan o biomirien fọkiẹ oborẹ mi rurie. O fori nọ tuekwẹre. Ọrẹn, o gberi mẹ unu ọke mie rhe taghene Giuliana o vwo ọdamẹ kpahen mẹ ọrhẹ oborẹ ono nẹ erhumu uruemru mẹ rhe. Ọke ephian yi mie vwo ọdaremẹro kpahiẹn, nime ọ tẹnrovi oborẹ mi rurie na-a, ukpomaran ọ guọlọ ha userhumu mẹ ne mi ja rha viẹ oja. Mia kpẹmẹ i Jehova taghene mi vwo ugbehian ro vwo ọdamẹ kpahen mẹ omamọ.”
Omarana, me yẹ omamọ ugbehian ono ru, orhianẹ onyerẹnkugbe ọnẹyen ọrhẹ ugbehian yen ọ ha erhirhiẹ imwofẹn? Omamọ ugbehian ono rhie ẹhẹn firhọ tẹmro esiri harẹn ugbehian yen. Ugbehian ọrana ọnọ họhọ i Nathan ọrhẹ Hushai ri sẹrorẹ atamwu aye i vwo kpahen ugbehian aye uvuẹn ọke ukpokpogho, ọnọ ji họhọ i Jesu ro vwo omwemẹ rọ nọ harhomu inyikọ ye. Wẹwẹ aruo ugbehian ọrana?