ỌFIAMU ọnọ sabu họhọ ohwan ọghwaghwa uvuẹn ọmudu ọwan. (Prov. 12:25) Wu rioja omiamiamo ọfiamu uvuẹn akpenyerẹn ọnọ dẹ ne? We roro taghene wu rha sabu dien ghwomara-an? Orhiomaran, awọrọ e ji roro omaran. Ọkezẹko, buebun ọwan ya hẹrote ihworho ekrun ọwan ri kpako ne yanghene re kpomẹ, ihworho re vwo ẹguọlọ kpahen i hwu ne, e rhiẹromẹrẹn oghwọghọ kpregede yanghene erhirhiẹ erọrọ ri lẹrhẹ ẹhẹn ọwan seriotọre omamọ. Ọrẹn, me yọ nọ sabu ha userhumu rẹn ọwan nyerẹn ghele ọfiamu? *

Ana sabu yono ekwakwa buebun kpahen oborẹ ene ru nyerẹn ghele ọfiamu ọke erhe roro kpahen udje Orodje David. O rhiẹromẹrẹn erhirhiẹ egbogbanhon buebun uvuẹn akpenyerẹn yen. (1 Sam. 17:34, 35; 18:10, 11) Me yọ ha userhumu rẹn i David nyerẹn ghele erhirhiẹ ọfiamu na? Marhẹ ene ru hẹrokele udje yi?

David ọ dẹrughwaroghwu ebẹnbẹn buebun ukwọgbọ. Roro kpahen erhirhiẹ owu rọ homaphia ọke rọ zẹ nẹ abọ Orodje Saul rọ guọlọ kpe yi. Ọke i David ọrhẹ isodja ye, a ghwẹrioma nẹ uvweri rhe, o gberi aye unu taghene evwreghrẹn aye i so ekwakwa aye, torhẹ eghwa, jeghwai mwu ekrun aye. Marhẹ i David o ru lele? “David ọrhẹ isodja ye ni viẹre gbangbanhon te erhirhiẹ aye i vwe rhe vwo omẹgbanhon aye ina viẹ ghwomaran.” Haba omiamiamo i David, isodja ye rọ hẹroso na “ta taghene aye ine fie kpe.” (1 Sam. 30:1-6) David ọ dẹrughwaroghwu ebẹnbẹn egbogbanhon esa ukwọgbọ: Ekruien i ha erhirhiẹ imwofẹn, ofẹn o mwuien taghene isodja ye ine kpe yi hwu, habaye Orodje Saul ọ ji hatua ye. Ha ẹhẹn roro aruẹ ọfiamu i David ọ dẹrughwaroghwu!

Ni me yi David o ruru? Ogege no “ruẹ omayen gbanhon nyoma i Jehova ro rhiẹ Osolobrugwẹ ye.” Marhẹ i David o rurie lele? Ọwan i rheri taghene David ọ nẹrhomo vwe i Jehova nọ ha userhumu riẹn, no ji roro kpahen oborẹ i Jehova ọ ha userhumu riẹn vrẹn ne. (1 Sam. 17:37; Ps. 18:2, 6) David nọ mẹrẹnvwrurhe taghene o fori nọ nekpẹn ọkpọvi mie Jehova, omarana nọ nọ mie i Jehova kpahen oborẹ ono ruo. Ọke i Jehova ọ yẹ David ọkpọvi hin, nọ kpare idjaghwẹ ogege. Omarana, ọye ọrhẹ isodja ye ni mẹrẹn ebrurhọ i Jehova, aye ni ji sabu simi ekrun ọrhẹ ekwakwa aye. (1 Sam. 30:7-9, 18, 19) Wu djokarhọ idjaghwẹ esa ri David ọ kparare? Ọ nẹrhomo vwe i Jehova nọ ha userhumu riẹn, no roro kpahen ekwakwa ri Jehova o ru riẹn vrẹn ne, nọ kpare idjaghwẹ kpahen ọkpọvi Jehova. Marhẹ ene ru hẹrokele i David? Roro kpahen izede esa.

1. Nẹrhomo. Ọke erhe vwo ọfiamu, ana sabu nẹrhomo vwe i Jehova nọ yẹ ọwan userhumu ọrhẹ ẹghwanren. Ene vwo ẹhẹn ro te otọre ọke arha ta ọsoso edamẹ ọrhẹ ọfiamu ọwan rẹn Jehova uvuẹn ẹrhomo. Yanghene ana sabu nẹrhomo kpeke uvuẹn ọmudu ọwan, orhianẹ ọrana yẹ oborẹ erhirhiẹ na ọ sabu ha uphẹn rẹn ọwan ru. Kọke kọke arha nekpẹn userhumu mie i Jehova, ọwan na hẹrokele i David rọ tare: “Jehova yẹ atita mẹ ọrhẹ ekete ọgbogbanhon mia tanbọmwuẹn,  Ohworho ro simi mẹ. Osolobrugwẹ mẹ yẹ atita mẹ, ekete mia zẹrua.” (Ps. 18:2) Ẹrhomo ọ ghini wian? Omizu ọmase owu ro rhiẹ ọkobaro re se Kahlia, ọrhọ ta: “Mi rha nẹrhomo hin, ni mie vwo omefuon. Ẹrhomo ọ ha userhumu mẹ roro jerẹ i Jehova, ji vwo ẹruẹhaso ọgbogbanhon kpahiẹn.” Itiọrurhomẹmro, ẹrhomo ẹghẹlẹ ọghoghanren ri Jehova o tiobọnu nọ ha userhumu rẹn ọwan nyerẹn ghele ọfiamu.

2. Roro. Ọke we roro kpahen ekwakwa ri phia vrẹn ne, wu na sabu roro kpahen ebẹnbẹn wu vwo edirien fọkiẹ userhumu i Jehova? Ọke re roro kpahen oborẹ i Jehova ọ ha userhumu rẹn ọwan ọrhẹ awọrọ vrẹn ne, ne vwo omefuon ji hẹrosuiẹ rhọ. (Ps. 18:17-19) Ọkpako owu re se Joshua ọrhọ ta: “Mia karorhọ ẹrhomo ri Jehova ọ kpahenrhọ mẹ ne. Ọnana nọ ha userhumu mẹ karorhọ ọke mia nekpẹn emru kirighwo mie i Jehova, ọrhẹ oborẹ o ru yẹ mẹ oborẹ mi guọlọre.” Itiọrurhomẹmro, ọke erhe roro kodo kpahen oborẹ i Jehova o ru rẹn ọwan vrẹn ne, ana sabu vwo omẹgbanhon re ne nyerẹn ghele ọfiamu.

3. Kpare idjaghwẹ. Bọmọke ene ki brorhiẹn oborẹ ene ruo uvuẹn erhirhiẹ ezẹko, ana sabu guọlọ obọdẹn ọkpọvi nẹ i Baibol na. (Ps. 19:7, 11) Ihworho buebun i mẹrẹnvwrurhe ne taghene aye i rha guọlọ riarorhọ kpahen oghwẹmro i Baibol owu, aye na sabu vwẹruọ oborẹ oghwẹmro na o ru sekpahen akpenyerẹn aye. Ọkpako owu re se Jarrod, ọrhọ ta: “Mia rha guọlọ riarorhọ, ni mia mẹrẹn ọsoso eghọn oghwẹmro na, ji vwẹruọ oborẹ i Jehova ọ ta mẹ. Ọnana nọ lẹrhẹ mẹ vwo imwẹro kpahiẹn, ji nyalele ọkpọvi na.” Ọke arha guọlọ ọkpọvi mie i Jehova nẹ uvuẹn i Baibol na, ji ru lelie, ana sabu nyerẹn ghele ọfiamu.

David o vwẹruọ ye taghene nọ sabu nyerẹn ghele ọfiamu, ọye ọ guọlọ userhumu i Jehova. O vwo ọdaremẹro kpahen obẹhatua i Jehova omamọ, te erhirhiẹ rọ ta: “Mi na sabu pho ugbomoghwa vrẹn nyoma omẹgbanhon Osolobrugwẹ. Osolobrugwẹ urhomẹmro na yọ rọ yẹ mẹ omẹgbanhon.” (Ps. 18:29, 32) Ana sabu roro taghene ebẹnbẹn ọwan i doro omamọ jerẹ ugbomoghwa ra na ja sabu pho vrẹn. Ọren, nyoma userhumu i Jehova, ana sabu pho ebẹnbẹn ri họhọ ugbomoghwa vrẹn! Arha nẹrhomo vwe i Jehova, roro kodo kpahen ọsoso ekwakwa ro ru rẹn ọwan vrẹn ne, ji kpare idjaghwẹ nyalele ọkpọvi ro tiobọnẹ, ana sabu fiudugbere taghene ọnọ yẹ ọwan omẹgbanhon ọrhẹ ẹghwanren ra guọlọre na sabu nyerẹn ghele ọsoso ọfiamu ọwan!