Uvuẹn aruẹ erhirhiẹ ọrana, ukoko ine ni orọnmo ahwanren na taghene o vwoba ne ọke ọhworhare na ọ rharhumu rọnmọ, ji ni orọnmo ọkpokpọ na taghene oborẹ urhi o kwerhọ. Na sabu vwẹruọ oborẹ ọsoriẹ e vwo ekwerhọ ọrana, jene yono kpahen oborẹ i Jesu ọ ta kpahen orọnmo ẹfan ọrhẹ ọrẹ ana rharhumu rọnmọ.

Jerẹ oborẹ a ya rhẹ Matthew 19:9, Jesu o dje kpahen oborẹ ọnọ sabu fonrọnmo uvuẹn i Baibol na. Ọrhọ ta: “kohworho kohworho rọ fonrọnmo rhẹ ane ọnẹyen jokpanẹ fọkiẹ uruemru ọfanrhiẹn, ya rọnmọ ọwọrọ ọ ghwọwe.” Nẹ uvuẹn ẹmro i Jesu na, e yonorin (1) taghene uruemru ọfanrhiẹn yẹ oborẹ i Baibol na o kwerhọ taghene ọnọ sabu fonrọnmo, (2) taghene ọhworhare rọ fonrọnmo rhẹ aniẹ vabọ oborẹ i Baibol na o kwerhọ, ji ya rọnmọ ọwọrọ, ọ ghwọwe. *

Ẹmro i Jesu i mevirhọ taghene ọhworhare rọ ghwọwe ji fonrọnmo rhẹ aniẹ, ọnọ sabu ya rọnmọ ọwọrọ? Ẹjo. Ọke esa ọrhọ ghwọwe uvuẹn orọnmo, aniẹ yo no brorhiẹn sẹ ọnọ harhomu esa ye gbinẹ ọ harhomie-e. Ọrhọ harhomie-e, aye i rha ji fonrọnmo na, aye awanva ina sabu rharhumu rọnmọ ọwọrọ, ọke re ruẹ irueruo orọnmo ẹfan na hin.

Ọrẹn, ane na ọnọ sabu ta taghene ọye ọ guọlọ fonrọnmo na-a, ji vwo ẹhẹn rọ nọ harhomu esa ye. Ọrẹn, orhianẹ esa ye rọ ghwọwe na nọ tenren taghene ọye ọ guọlọ nẹ aniẹ ọ harhomie vwo-o, ọye ọvo no ji brorhiẹn taghene aye i fonrọnmo na? Fọkime ane na o mwuegbe rọ nọ harhomie, orọnmo na ọ ji havwiẹ, ọ sabu rharhumu rọnmọ ọwọrọ-ọ. Esa na ọrhọ yọ rọnmọ ọwọrọ, dedevwo o vwo ugbomọphẹ rọ nọ rharhumu rọnmọ lele oborẹ i Baibol na ọ tare-e, nọyẹ ọ rharhumu ghwọwe. Ọke ọrana ekpako ukoko na ni na rharhumu ha umẹ re guẹnzọn mwu riẹn fọkiẹ ọdandan yen.—1 Cor. 5:1, 2; 6:9, 10.

Ọke ọhworhare ro vwo vwo ugbomọphẹ rọ na rharhumu rọnmọ, ọrhọ rọnmọ, ukẹro ọgo yẹ ukoko na ọ ha ni orọnmo ahwanren ọrhẹ orọnmo ọkpokpọ na? Lele oborẹ i Baibol na ọ tare, orọnmo ahwanren na ọ ji havwiẹ? Ane na ọnọ sabu brorhiẹn sẹ ọnọ harhomu esa ye bi, gbinẹ ọ harhomie-e? Ukoko na i ne ni orọnmo ọkpokpọ na rhiẹ orọnmo ọfanrhiẹn?

Ọke bi, ukoko na e ni orọnmo ọkpokpọ rhiẹ orọnmo ọfanrhiẹn, orhianẹ ane ra ghwọwe rhurhu na o ji nyerẹn, ọ rọnmọ-ọ, ọ ji riẹ iborhin ọwiẹghwọ-ọ. Ọrẹn, Jesu ọ hunute ọrẹ a ghwọwe rhurhu na, ọke rọ ta kpahen orọnmo ẹfan ọrhẹ ọrẹ ana rharhumu rọnmọ-ọ. Ukpomaran, Jesu ọ ta taghene ọhworhare rọ fonrọnmo rhẹ aniẹ odedede, ji ya rọnmọ ọwọrọ, ọ ghwọwe. Uvuẹn aruẹ erhirhiẹ ọrana, orọnmo ẹfan ọrhẹ ọrẹ a rharhumu rọnmọ, ri Jesu ọ tare taghene ọ  họhọ ọke rọ ghwọwe, o fiobarhọ orọnmo ahwanren na ne.

Ọke esa ọrhọ fonrọnmo ji rharhumu rọnmọ ọmase ọrọrọ, aniẹ bi ọrhọ sabu harhomie yanghene tiẹ-ẹn. Omarana, orho kpokpo omayen brorhiẹn sẹ ọnọ harhomu esa ye bi yanghene ọ harhomie-e. Habaye, o toro sẹ ane na o hwuru, rharhumu rọnmọ, yanghene gbọfanrhiẹ-ẹn, ọnana o wene ukẹro ukoko na ọnọ ha ni orọnmo ọkpokpọ na-a. *

Nyoma udje ra hunute oberun na, esa na ọ ghwọwe, rọ lẹrherẹ aye fonrọnmo. Orhianẹ esa na ọ ghwọwe-e, ọrẹn nọ fonrọnmo na ji ya rọnmọ ọwọrọ vwo? Yanghene, orhianẹ esa na ọ ghwọwe bọmọke ọ ki fonrọnmo na-a, ọrẹn nọ ghwọwe ọke rọ fonrọnmo na hin, ji rharhumu rọnmọ ọwọrọ, dedevwo aniẹ o mwuegbe rọ nọ harhomie? Uvuẹn idje enana ephian, orọnmo ẹfan na ọrhẹ ọrẹ a rharhumu rọnmọ, ra na sabu ni rhiẹ ọwiẹghwọ, o fiobarhọ orọnmo ahwanren na ne. Orọnmo ọkpokpọ na oborẹ urhi o kwerhọ. Jerẹ oborẹ ọ ha Oghwa Odẹrẹ Oyibo ọrẹ November 15, 1979, aruọbe 32, ọrhọ ta: “Vwana, ọ tuẹn orọnmo ọkpokpọ rhọ ne, omarana ọ sabu fiobarhọ ye ji ghwẹrioma bru aniẹ bi-i; orọnmo ahwanren na o vwoba ọke rọ fonrọnmo na, ghwọwe ji rharhumu rọnmọ.”

Ewene ọnana o mevirhọ taghene Ilele Kristi i rha ha ukẹro ọghoghanren ni orọnmo-o, yanghene ọwiẹghwọ rhẹ ọdandan ọghwaghwa ghwomara-an. Ekpako ina ha umẹ ẹzenguon mwu rẹn ọhworhare rọ fonrọnmo rhẹ aniẹ odedede, ji ya rọnmọ ọwọrọ, fọkime ọ ghwọwe. (Orhianẹ omizu ọmase uvuẹn ukoko na yọ rọnmọren, ana ji ha umẹ ẹzenguon mwu rẹn omizu ọmase na, fọkime ọ ghwọwe.) Dedevwo e ni orọnmo ọkpokpọ rhiẹ orọnmo ọfanrhiẹ-ẹn, orhianẹ ihworho i vwe rhe biomevwan fọkiẹ oborẹ o ruru-u, yanghene ihworho a tobọ họghọ riẹn ne, ọhworhare na o ji vwo uphẹn ẹga oghẹnrensan uvuẹn ukoko na uvwre ẹgbukpe buebu-un. Bọmọke ana ki ha uphẹn ẹga owuorowu riẹn, o fori nẹ ekpako i roro kpahen erhirhiẹ aniẹ bi ọrhẹ emọ ye ekokamu rọ nyajovwo na, e havwọ vwana.—Mal. 2:14-16.

Sekpahen oborẹ ọ ghwa te ra na fonrọnmo ji rharhumu rọnmọ, o fori nẹ Ilele Kristi i ha ukẹro ọghoghanren ri Jehova ọ ha ni ẹkwaphiẹrhotọre orọnmo e nie.—Eccl. 5:4, 5; Heb. 13:4.