Ọnana usuẹn ẹmro rẹ evwreghrẹn i Jesu i fọkiẹ brorhiẹn kpe i Jesu ọrhẹ idibo yi. Urhi Moses na o vwo ekama buebun kpahen irueru ẹfuọn ri sekpahen itele re nẹ oma sa, emiamo oti ọrhẹ oborẹ ene ru irimi ihworho ọrhẹ erẹ eramo lele. Ọ jeghwai fi ọkpọvi rhotọre kpahen oborẹ ihworho ri vwa fon ine ru lele. Aye ena sabu ru ọnana nyoma aye ine ze izobo, ghwe oma, yanghene mirin ọbara.—Lev., irhomu-ẹmro 11-15; Num., urhomu-ẹmro. 19.

Otu i Jew re yono irhi na, e guọlọre taghene a mọrọn irhi enana ephian. Iyẹnrẹn owu ọ tare taghene kemru kemru rọ suẹ ijẹfuọn na, ana dabu guọlọ otọrie fiotọre, kpahen oborẹ erhirhiẹ na o ru kerabọ, oborẹ o ru te awọrọ oma, ekwakwa ri na sabu gbe yanghene eri vwe gbe nyoma ijẹfuon na, ọrhẹ oborẹ ene ru na sabu fon.”

Evwreghrẹn i Jesu ne nọ riẹn: ‘Mesoriẹ idibo enọ i vwa guọlọ ruẹ lele irueru ihworho ahwanren, ọrẹn aye a ha abọ rẹ aye i vwe ghwe riẹ emaren?’ (Mark 7:5) Ilori ẹga erana e vwa ta taghene o serhọ na ha obọ re vwe ghwe riẹ emare-en. Fọkiẹ oborẹ aye i ru nẹ otọre rhe, otu i Jew re yono irhi na e guọlọre taghene aye ghwe obọ aye nẹ aye ki riẹ emaren. Iyẹnrẹn ra hunute oberun na, nọ ji habaye: ‘Aye i jeghwai frẹfro kpahen aruo uko ra na ha rhie ame na, aruo ame ro serhọ, owhorho ro no rhie ame na, ọrhẹ ekete ame ono te ọke rẹ aye e ghwe abọ na.’

Ẹkpahenrhọ i Jesu rẹn irhi ituakpọ erana, o fiotọre. Ọ ta rẹn ilori ẹga erẹ ẹgbukpe uriusiorin erukaro na: “Isaiah ọ dabu mẹraro kpahen are, are ra gi mai ruẹ na, jerẹ oborẹ a ya rhotọre, ‘Ihworho enana e mwuọghọ mẹ rhẹ ugbunu aye, ọrẹn ọmudu aye o tephe mẹ [Jehova]. Ẹga aye a ha mẹ ofefe, nime aye e yono irhi ituakpọ rẹ aye i vwo ekwerhọ kpahen.’ Are gbobọhiẹn ekama Osolobrugwẹ, nẹ are tigban irueru ituakpọ.”—Mark 7:6-8.