EMỌ uyono i Baibol ri vwo omamọ ẹhẹn, i havwọ jerẹ ihworho ra guọlọ oro. O fori nẹ emọ uyono i Baibol na, i yono i Baibol na ọke ephian neneyo aye i sabu mẹrẹn ẹghwanren rọ ghanren omamọ. Me yẹ emọ uyono i Baibol ina sabu yono nẹ izede esa ra guọlọ oro?

Gbe roro taghene wa nya kẹrẹ okokọ urhie, ne wu mẹrẹn emru owu kakamo ro lo uvuẹn uvo na. Ne wu rhuẹn rhọriẹ, oma nọ merhuọn nime wu mẹrẹn oro ọkokamo. Ọ ghwai do pha-an, ọrẹn ọ ghanren ghwẹ diamond ọghoghanren. Itiọrurhomẹmro, wu ne ni oma kinhariẹ sẹ erọrọ i ji havwiẹ.

Omaran ọ ji havwọ, wu na sabu karorhọ ẹdẹ Iseri Jehova e ghwoghwo wẹn kpahen ifiẹrorhọ rọ ha uvuẹn Baibol na. Ọkezẹko wu dabu karorhọ omamerhomẹ wu mẹrẹnren ọke wa mẹrẹn urhomẹmro rọ họhọ oro uvuẹn i Baibol na. Ọrana ọnọ sabu phia ọke wa mẹrẹn odẹ Osolobrugwẹ ro rhiẹ i Jehova uvuẹn Baibol na. (Ps. 83:18) Ọkezẹko wu ji yono taghene wu na sabu rhiẹ ugbehian i Jehova. (Jas. 2:23) Ne wu rheri ogege taghene wu mẹrẹn oborẹ ọ ghanren ghwẹ oro ne! Ọkezẹko wu tobọ vwo omwemẹ wu ne yono riaro rhọ.

Ọkezẹko a mẹrẹn oro ekokamo ri kokori uvuẹn urhie yanghene ẹtẹrhe ame. Ọkezẹko, ihworho ra guọlọ oro a mẹrẹn oro ri te oduduru igho buebun, ọkezẹko oro na ọ ghanran te oduduru i dollar.

Ọke wa tuẹn uyono i Baibol rhọ rhẹ Iseri Jehova, wu na sabu họhọ ohworho rọ guọlọ oro, rọ mẹrẹn oro buebun na. Ọke we roro kpahen oghwẹmro i Baibol owu fiẹ ọrọrọ, nọ lẹrheruọ vwo irherhe kpahen Osolobrugwẹ. Ọke we roro kpahen urhomẹmro wu yonorin uvuẹn i Baibol na, ne wu mẹrẹn oborẹ wu ne ru sabu ti kẹrẹ i Jehova jeghwai fioma rhẹ ẹguọlọ ye, rhẹ arhọ ri bẹmẹdẹ wu tẹnrovi obaro na.—Jas. 4:8; Jude 20, 21.

Jerẹ oborẹ ihworho e fioma rhọ owian ra guọlọ oro, ọkezẹko omaran wu ji fioma rhọ uyono  i Baibol na. Ọke we yono urhomẹmro i Baibol erukaro ri mai ghanren, ọnana nọ yo mwuruon homakpahontọre harẹn i Jehova jeghwai bromarhame.—Matt. 28:19, 20.

Ihworho ra guọlọ oro ina sabu mẹriẹn uvuẹn atita ezẹko. Atita erana ina sabu vwo oro uvuẹn aye, na sabu ti oro na nie, ana ghwọghọ atita na vwẹre. Wu rhe ni atita na ukukaro, wu sabu mẹrẹn oro na-a. Mesoriẹ? Nime, oro ọkokamo yọ ha uvuẹn atita na! Ọrẹn, harẹn ohworho rọ guọlọ oro na, oborẹ ọ mẹrẹnren o mwu owian na.

A ji guọlọ omẹdamo orhianẹ ohworho o yono vrẹn ‘uyono erukaro ri sekpahen Kristi na ne.’ (Heb. 6:1, 2) O fori ne wu damoma ha ihwẹmro ekpokpọ ọrhẹ iyono ri nẹ uyono i Baibol omobọ ruiruo. Omarana, me yi wu na sabu ru, neneyo wu sabu mẹrẹn erere nẹ uyono i Baibol omobọ, ọrhọ tobọ rhianẹ we yono i Baibol na ẹgbukpe buebun ne?

Vwo omwemẹ wu ne yono ọke ephian. Dabu ni iyẹnrẹn na so. Rha damoma, ne wu na mẹrẹn ihwẹmro i Baibol eghoghanren ri vuọnren rhẹ ẹghwanren ọrhẹ ọkpọvi. (Rom. 11:33) Ne wu vwo irherhe i Baibol riaro, dabu ha ẹbe sansan ri ha uvuẹn edjadjẹ ọnọ ruiruo. Vwo edirin ọke wa guọlọ ọkpọvi ọrhẹ ẹkpahenrhọ harẹn enọ ri nẹ i Baibol rhe. Nọ awọrọ kpahen ekete uvuẹn i Baibol na ọrhẹ urhomu-ẹmro ẹbe sansan ri rhiẹ emru userhumu ọrhẹ urhebro harẹn aye. Ta rẹn awọrọ kpahen ihwẹmro eghoghanren wu mẹrẹnren ọke we ru uyono i Baibol omobọ.

Itiọrurhomẹmro, ọdamẹ ọnọ o vwo rhiẹ ọrẹ wu ne vwo irherhe ọvo-o. Ọnyikọ Paul ọ tare taghene, ‘irherhe ọ kparoma.’ (1 Cor. 8:1) Omarana, damoma ne wu vwo uruemru omeriotọre jeghwai ru esegburhomẹmro ọnọ gbanhon. Ogame ekrun ọrhẹ uyono i Baibol omobọ ọke ephian ọnọ sa erhumu nyerẹn mwu irhi Jehova, jeghwai mwuo ha userhumu rẹn awọrọ. Ọrọ maido, ne wu na mẹrẹn aghọghọ nime wu mẹrẹn ekwakwa rọ ghanren ghwẹ oro ne.—Prov. 3:13, 14.