Wu dabu se irhomu-ẹmro ri ha uvuẹn Oghwa Odẹrẹ re nyavrẹn na? Nie sẹ wu na sabu kpahenrhọ enọ enana:

Aruo edandan ego yi Jesu ọ ta kpahen uvuẹn urhebro rọ ha uvuẹn Matthew 18:​15-17?

Ọnana ọdandan rẹ awanva na ina sabu kwaphiẹrhọ omoma aye, ọrẹn jeghwai ọdandan ro te oborẹ ana fọkiẹ le ohworho nẹ ukoko orhianẹ ọ kwaphiẹ ẹghwọ na rhọ-ọ. Edandan enana ena sabu rhiẹ ọghware yanghene uruemru ra rhaphiẹ ohworho.​—w16.05, p. 7.

Me wu na sabu ru ne wu mẹrẹn erere vuọnvuọn nẹ isese i Baibol rhe?

Wu na sabu ru enana: Rhiẹ ẹhẹn firhọ se yi, guọlọ iyono wu na sabu ha ruiruo; nọ oma enọ enana ‘Marhẹ mi ne ru sabu ha ye sa awọrọ erhumu?’; jeghwai ha ekwakwa re tiobọnu rẹn ọwan ruiruo.​—w16.05, pp. 24-26.

Ọsọre rẹ Olele Kristi ro vwo ifiẹrorhọ kpahen ẹrhọmọnuhwu ọnọ viẹ ohworho yi ro hwuru?

Rẹ ọwan e vwo imwẹro kpahen ẹrhọmonuhwu na, ọ vwọ lẹrhẹ ọwan je mwuomarhọ ọke ohworho ọwan orho hwu-u. Abraham ọ viẹre jeghwai mwuomarhọ ọke ri Sarah o hwu. (Gen. 23:⁠2) Orho ru, ẹhẹn yen nẹ ono zien.​—wp16.3-E, p. 4.

Ọrọmo yẹ ọhworhare ro vwo ugbẹn ọyẹbe ra hunute uvuẹn Ezekiel urhomu-ẹmro 9 na, ọrhẹ ehworhare awan erhan ri vwo oborẹ a ha ghwọghọ emru na i mevirhọ?

Aye i mevirhọ emakashe ri ha obẹ odjuwu ri vwobọrhọ ẹghwọghọ ọrẹ i Jerusalem, ri na jeghwai vwobọrhọ ẹghwọghọ enyerakpọ ọkon ọrẹ Echu ọke Armageddon. Orugba aruẹmẹrẹn ọnana uvuẹn ọke ọwan na, ọhworhare ro vwo ugbẹn ọyẹbe na o mevirhọ i Jesu Kristi, ọye yẹ ohworho rọ kokarhọ ihworho ri ne vwo usimirhọ na.​—w16.06, pp. 16-17.

Aruo imwofẹn ego yi Baibol na ọ dẹrughwaroghwu?

Ọ dẹrughwaroghwu (1) imwofẹn rọ nọ ghwọghọ fọkiẹ ekwakwa ra ghwọghọ ra yariẹ rhọ, jerẹ papyrus ọrhẹ parchment; (2) otu re suẹn ọrhẹ ilori ẹga ri damoma rẹ aye ina ghwọghiẹ; ọrhẹ (3) ihworho ezẹko ri damoma rẹ aye ine wene iyẹnrẹn rọ havwiẹ.​—wp16.4-E, pp. 4-7.

Marhẹ yẹ Olele Kristi ono ru sabu ru akpenyerẹn yen lọhọ?

Rhe ekwakwa ri rhiẹ edamẹ ha wẹn, gbobọhiẹn ekwakwa wu vwa guọlọ. Roro kpahen uchiunu igho wu na ghwọghọ ha dẹ ekwakwa. Dorẹn ekwakwa wu vwa guọlọ fughwẹ, kwosa ekwakwa wu riosa ye. Ti nẹ ọke wa ghwọghọ rhẹ iruo, mwuegbe oborẹ wu ne ru sabu kerabọ iruo Uvie na.​—w16.07, p. 10.

Me yi Baibol na ọ tare taghene ọ ghanren ghwẹ oro ọrhẹ idọlọ efuanfon?

Job 28:​12, 15, o djephia taghene ẹghwanren ro nẹ obẹ Osolobrugwẹ rhe, ọ ghanren ghwẹ oro ọrhẹ idọlọ efuanfon. Wa rha guọliẹ, damoma ne wu vwo uruemru omeriotọre jeghwai ru esegburhomẹmro ọnọ gbanhon.​—w16.08, pp. 18-19.

O fori nẹ ehworhare i nyaje ẹtuẹngban vwo?

Uvuẹn ẹkwotọre ezẹko, ẹtuẹngban ra vwa hwanren totọre yẹ oborẹ o serhọ, ọ vwọ samọ ji lẹrhẹ ihworho tuekwẹre kpahen iyẹnrẹn esiri na-a. Udabọ ọrana, imizu buebun a ji hwanren ẹtuẹngban aye totọre. (1 Cor. 8:⁠9) Uvuẹn ẹkwotọre erọrọ, ẹtuẹngban ra nya jo vwo, orhiẹ oborẹ o fori harẹn Ilele Kristi-i.​—w16.09, p. 21.

Mesoriẹ ọwan ine kwerhọ iyẹnrẹn David ọrhẹ Goliath?

Iyẹnrẹn o djerie phia taghene Goliath o rhi ghwẹ ohworho rọ mai rhi inyenana. David o nyerẹnren, jerẹ oborẹ eyaya ahwanren rọ hunute oghwa i David o djephia, ọrhẹ oborẹ i Jesu ọ tare. Ekete aye i rhirhiẹre ra hunute na, ekete ihworho buebun i rhe kpahen.​—wp16.5-E, p. 13.

Marhẹ yẹ irherhe, ọmẹrẹnvwrurhe ọrhẹ ẹghwanren i ru vẹnẹ?

Ohworho ro vwo irherhe o rhe ekwakwa buebun. Ohworho ro vwo ọmẹrẹnvwrurhe o vwẹruọ oborẹ emru ọ havwọ. Ọrẹn ohworho ro vwo ẹghwanren ọ ha irherhe ọrhẹ ọmẹrẹnvwrurhe ruiruo izede ro serhọ.​—⁠w16.10, p. 18.