1, 2. Ọke i Jesu ọ ghwẹrioma riẹ odjuwu hin, me yẹ inyikọ na ina sabu rhe roro?

INYIKỌ i Jesu i mevi oberun ugbenu i Olive, rẹ aye e ni ivwrevwrede na. Aye e ni Jesu ro rhiẹ onini aye, rọ ghwẹrioma riẹ odjuwu, avwre na ọ vwọ lẹrhẹ aye mẹriẹn ghwomara-an. (Acts 1:9, 10) Uvwre ẹgbukpe eva ri vrẹnren na, Jesu o yonirin aye, bọn aye gbanhon jeghwai sun aye. Vwana, ọ ghwẹrioma riẹ odjuwu ne. Ni me yẹ aye ine ruo?

² Jesu ọ yẹ idibo yi owian, ọke rọ ta: “Are ni ne rhiẹ iseri mẹ uvuẹn i Jerusalem, uvuẹn ọsoso i Judea ọrhẹ Samaria, kugbe ekete ri mai seri uvuẹn akpọ na.” (Acts 1:8) Marhẹ yẹ aye ine ru sabu wian owian ọrana? Itiọrurhomẹmro, Jesu ọ yẹrẹ aye imwẹro taghene ẹhẹn ọfuanfon na ọnọ sa aye erhumu. (Acts 1:5) Ọrẹn, na sabu wian owian ọnana ro no kerabọ lele akpọ na ephian, ọ guọlọ ọkpọvi ọrhẹ ẹkwaphiẹrhotọre. Jehova ọ ha ituakpọ sun ihworho yi ọke ahwanren. Ọrẹn, inyikọ na ina sabu rhe roro, ‘Jehova ọnọ rharhumu ha Osun ọkpokpọ e mwu?’

3. (a) Ọke i Jesu ọ ghwẹrioma riẹ odjuwu hin, orhiẹn ọghoghanren ọgo yẹ inyikọ na i bruru? (b) Me ye ne yono kpahen uvuẹn urhomu-ẹmro ọnana?

 ³ Ikprughwre eva a vrẹn, idibo i Jesu ni dabu ni eyaya ọfuanfon na so, nekpẹn ọkpọvi mie i Jehova, aye ni jeghwai djẹ i Matthias nọ ha ẹrhẹ i Judas Iscariot. (Acts 1:15-26) Mesoriẹ odjẹ ọnana ọ ghanren rẹn aye ọrhẹ i Jehova? Matthias ọ lẹrhẹ ẹkwaphiẹrhotọre na gba. * Jesu ọ djẹ idibo yi nẹ aye i lele wian uvuẹn owian aghwoghwo na ọvo-o; ọrẹn ọ ji yẹ aye owian ọghoghanren. Me yẹ owian ọrana, marhẹ yi Jehova o ru nyoma i Jesu mwuegbe aye nẹ aye i sabu wian owian na? Ẹkwaphiẹrhotọre ọgo rọ họhọ omaran yọ havwiẹ uvwre ihworho i Jehova inyenana? Marhẹ ọwan ine ru sabu karorhọ “era kobaro usuẹn” ọwan, maido eri rhiẹ “ọvrẹn ra hẹrosua ro ji vwo ẹghwanren na”?—Heb. 13:7; Matt. 24:45.

4. Owian ọgo yẹ Ugboma Usuon rọ ha uvuẹn i Jerusalem ọ wianren uvwre ọke Ilele Kristi erẹ ẹgbukpe uzusiorin ọrukaro na?

⁴ Inyikọ na nọ ya kobaro uvwre Ilele Kristi, nẹ Pentecost 33 C.E. nyarhẹn. Ọke ọrana, Peter ọrhẹ inyikọ ikperọvo na, ni ghwoghwo iyẹnrẹn esiri na rẹn itu i Jew ọrhẹ egehọ ri ghwẹriẹre. (Acts 2:14, 15) Ihworho buebun ni me rhiẹ Ilele Kristi. Ọke oru, ihworho ri ghwẹriẹ rhe obọ na, ni dabu gbomarhọ uyono rẹ inyikọ na a haphia. (Acts 2:42) Inyikọ na, nọ ya hẹrote edamẹ ukoko na ri sekpahen igho. (Acts 4:34, 35) Aye i ji hẹrote edamẹ aye ri sekpahen ogame rẹ aye a ha vwe i Jehova, aye ni tare: “Ame ine fioma rhẹ ẹrhomo ẹnẹ ọrhẹ iruo Uvie ọrẹ Ẹmro na.” (Acts 6:4) Aye na ha userhumu rẹn ihworho ri tẹn ona uvuẹn ukoko na, nẹ aye i ru riaro uvuẹn ẹmro eghwoghwo na. (Acts 8:14, 15) Ọke oru, Ilele Kristi erọrọ ra djẹha ni homaba inyikọ na hẹrote ikoko na. Rẹ aye e rhiẹ Ugboma Usuon na, aye na ha ọkpọvi vwe ikoko na ephian.—Acts 15:2.

5, 6. (a) Marhẹ Ugboma Usuon na o ru mẹrẹn userhumu ẹhẹn ọfuanfon na? (Mẹrẹn ifoto rọ ha uvuẹn ọtonrhọ uyono na.) (b) Marhẹ Ugboma Usuon na i ru mẹrẹn userhumu emakashe? (c) Marhẹ Ugboma Usuon na i ru mẹrẹn ọkpọvi nẹ Ẹmro Osolobrugwẹ rhe?

⁵ Ilele Kristi erẹ ẹgbukpe uzusiorin ọrukaro na, i mẹrẹnvwrurhe taghene i Jehova yọ ha i Jesu suẹn Ugboma Usuon na. Marhẹ ọnana o ru mwu aye ẹro? Ukukaro, ẹhẹn ọfuanfon na, o ru ihworho ri ha uvuẹn Ugboma Usuon na gbanhon. (John 16:13) Ẹhẹn ọfuanfon na yọ ha userhumu rẹn inyikọ na ọrhẹ ekpako erọrọ ri ha uvuẹn i Jerusalem, nẹ aye i sabu wian owian aye vuọnvuọn, dedevwo Osolobrugwẹ ọ yẹ Ilele Kristi ephian ri ne riẹ odjuwu ẹhẹn ọfuanfon na. Jerẹ udje, uvuẹn ẹgbukpe 49 C.E., ẹhẹn ọfuanfon na yọ yẹ Ugboma Usuon na ọkpọvi brorhiẹn ro sekpahen osamo. Ikoko na i nyalele ọkpọvi aye, “aye ne ru esegburhomẹmro ihworho ri ha uvuẹn ikoko na gbanhan, ikoko na ne buẹnrhọ kẹdẹkẹdẹ.” (Acts 16:4, 5) Ileta rẹ aye i ya kpahen orhienbro ọrana, o djephia taghene ihworho ri ha uvuẹn Ugboma Usuon na i vwo iruemru ẹhẹn ọfuanfon na jerẹ ẹguọlọ ọrhẹ esegburhomẹmro.—Acts 15:11, 25-29; Gal. 5:22, 23.

⁶ Ọreva, emakashe i ha userhumu rẹn Ugboma Usuon na. Bọmọke i Cornelius ro  rhiẹ ọgehọ o ki bromarhame, ọmakashe nọ ta riẹn taghene ọ ha use rẹn ọnyikọ Peter. Ọke ri Peter o ghwoghwo rẹn Cornelius ọrhẹ ekrun ọnẹyen hin, ẹhẹn ọfuanfon na nọ djẹ rẹ aye ha, dedevwo aye a je samo-o. Ọnana nọ lẹrhẹ inyikọ na ọrhẹ imizu erọrọ nyalele ọkpọvi Osolobrugwẹ jeghwai rhiabọ dede egehọ re vwa je samo rhiẹ ukoko na. (Acts 11:13-18) Habaye, emakashe i toroba eru riaro owian aghwoghwo na rẹ Ugboma Usuon na ọ hẹrote. (Acts 5:19, 20) Ọresa, Ẹmro Osolobrugwẹ ọ ha userhumu rẹn Ugboma Usuon na. Ihworho ri ha uvuẹn Ugboma Usuon na, a nyoma i Baibol na yẹ ọwan ọkpọvi kpahen oborẹ ene ru lele uvuẹn ukoko na, aye a jeghwai bọn iyono aye kpahen i Baibol na.—Acts 1:20-22; 15:15-20.

7. Mesoriẹ ọwan ina ta taghene i Jesu yo sun Ilele Kristi erẹ ẹgbukpe uzusiorin ọrukaro na?

⁷ Dedevwo ihworho ri ha uvuẹn Ugboma Usuon na i vwo omẹgbanhon uvuẹn ukoko na, ọrẹn aye i mẹrẹnvwrurhe taghene i Jesu yo sun aye. Paul ọ yare taghene Jesu Kristi o se ezẹko inyikọ. Omarana, “jenẹ a nyoma ẹguọlọ ru riaro ọrẹ i kemru kemru harẹn ohworho ro rhiẹ urhomu, nọyẹ i Kristi.” (Eph. 4:11, 15) Ukperẹ idibo na ine ni oma aye gegerege fọkiẹ ẹrhẹ rẹ aye i havwọ, aye ni nyoma ọkpọvi ro nẹ i Baibol na rhe mẹrẹnvwrurhe taghene aye Ilele Kristi. (Acts 11:26) Itiọrurhomẹmro, Paul ọ mẹrẹn ọghanromẹ ra na nyalele ọkpọvi ri ha uvuẹn i Baibol na, rẹ ihworho ri ha uvuẹn Ugboma Usuon na, a haphia. Nọ ji habaye: “Ọrẹn, mi guọlọre nẹ are i rhe taghene urhomu harẹn kọhworhare kọhworhare [ọrhẹ Ugboma Usuon na] yẹ i Kristi; . . . habaye, urhomu harẹn i Kristi yẹ Osolobrugwẹ.” (1 Cor. 11:2, 3) Itiọrurhomẹmro, Jehova ọ nyoma i Jesu ro rhiẹ orodje Uvie yi sun ukoko na.

8, 9. Me yẹ Omizu Russell o ruru uvuẹn ẹgbukpe 1870?

⁸ Uvuẹn ẹgbukpe 1870, Charles Taze Russell ọrhẹ emọ uyono i Baibol erọrọ ni damoma rẹ aye ina rharhumu ha ẹga urhomẹmro mwu. Neneyo aye i sabu yono ihworho urhomẹmro na uvuẹn edjadjẹ sansan, aye ni ha Zion’s Watch Tower Tract Society mwu uvuẹn ẹgbukpe 1884, aye ni ha Omizu Russell mwu ẹrhẹ osiyaga. * Omizu Russell ọ dabu yono i Baibol na, jeghwai ghwolo iyono efian jerẹ uyono isolobrugwẹ esa ri tankugbe, uyono erhi ro vwo hwuẹ rẹ ẹga efian e yono. Nọ mẹrẹnvwrurhe taghene ọwan i vwa samọ ha ikẹro ọwan mẹrẹn Kristi ọke ọnọ rhiọ-ọ, nọ jeghwai mẹrẹnvwrurhe taghene “ọke ra yẹ egbamwa na” ine toba uvuẹn ẹgbukpe 1914. (Luke 21:24) Omizu Russell, ọ ghwọghọ ọke, omẹgbanhon ọrhẹ igho ọnẹyen neneyo ọ sabu yono awọrọ urhomẹmro na. O fiotọre taghene uvwre ọke ọrana, Jehova ọrhẹ i Jesu i nyoma Omizu Russell hẹrote ukoko na.

⁹ Omizu Russell ọ guọlọ odidi mie ituakpọ-ọ. Uvuẹn ẹgbukpe 1896, nọ yare: “Ame a guọlọ ọghọ yanghene odidi fọkiẹ ẹbe rẹ ame a ya-a; ame a ji guọlọ ne se ame Ilori ẹga yanghene Iyono-o. Ame a ji guọlọ nẹ ihworho i ha odẹ ame e se oma aye-e.” Nọ ji habaye: “Ọnana orhiẹ owian onyakpọ-ọ.”

10. (a) Ọke ọgo yi Jesu ọ ha “ọvrẹn ra hẹrosua ro ji vwo ẹghwanren” na mwu? (b) Dje kpahen ovẹnẹ rọ ha uvwre Ugboma Usuon na ọrhẹ Watch Tower Society.

¹⁰ Omizu Russell o hwuru uvuẹn ẹgbukpe 1916. Jesu nọ ha “ọvrẹn ra hẹrosua ro ji vwo ẹghwanren” mwu uvuẹn ẹgbukpe 1919. Mesoriẹ ọ ha aye mwu? Nọ yẹ idibo  yi emaren “ọke ro fori.” (Matt. 24:45) Uvwre ẹgbukpe ezẹko rhe na, ibiẹ ẹko ihworho ra ha ẹhẹn ọfuanfon djẹha na, ra ga obẹ esiri ukoko rọ ha obẹ Brooklyn, New York, ne mwuegbe emaren ọrẹ ẹhẹn jeghwai ha ọkpọvi phia rẹn idibo i Jesu. Odẹ na “Ugboma Usuon” ọ homaphia uvuẹn ẹbe ukoko na uvwre ẹgbukpe 1940, ro surhobọmwu i Watch Tower Bible and Tract Society. Ọrẹn, uvuẹn ẹgbukpe 1971, ne me rhe ovẹnẹ rọ ha uvwre Ugboma Usuon na ọrhẹ Watch Tower Society rọ hẹrote ẹmro ri sekpahen urhi. Nẹ ọke ọrana rhe, imizu ezẹko ra djẹha na, na sabu rhiẹ usuẹn Ugboma Usuon na, ọrẹn aye a ha usuẹn umẹ rọ hẹrote ẹmro ri sekpahen urhi na-a. Ẹgbukpe ezẹko ri vrẹnren na, imizu ezẹko ri ha usuẹn igegede ereva na, i ha usuẹn ihworho ra hẹrote Watch Tower Society na ọrhẹ ekwakwa erọrọ rẹ ukoko na ọ ha ruiruo, ọnana nọ ha uphẹn rẹn ihworho ri ha uvuẹn Ugboma Usuon nẹ aye i sabu tiobọnu ọkpọvi ro nẹ Ẹmro Osolobrugwẹ rhe. (John 10:16; Acts 6:4) Urhomu-ẹmro i Watchtower ọrẹ July 15, 2013, o djerie fiotọre taghene “ọvrẹn ra hẹrosua ro ji vwo ẹghwanren” na, ọyẹ ẹko imizu ra ha ẹhẹn ọfuanfon djẹha ri rhiẹ Ugboma Usuon na.

11. Marhẹ Ugboma Usuon na ọ wian lele?

¹¹ Imizu ri rhiẹ Ugboma Usuon na e kwomakugbe brorhiẹn. Marhẹ aye e ruie lele? Aye a vwoma kọkprughwre kọkprughwre djiroro kugbe ọrẹ ufuoma. (Prov. 20:18) Ra mẹriẹn taghene o vwo ọrọ maido usuẹn aye na-a, kẹgbukpe kẹgbukpe, aye ne wene ẹrhẹ osiyaga uvuẹn esiyẹ aye. (1 Pet. 5:1) Omaran umẹ erhan rẹ Ugboma Usuon na ọ ha wian na, e ji wene ẹrhẹ osiyaga uvuẹn esiyẹ aye. Ọsoso imizu ri rhiẹ Ugboma Usuon na, i vwe ni omayen taghene aye ye suẹn imizu na-a, ọrẹn aye e ni oma aye taghene aye i ha usuẹn ihworho ra mẹrẹn erere nẹ ọkpọvi ọrhẹ iyono rẹ aye e tiobọnẹ na.

12. Ra mẹriẹn taghene imizu ri rhiẹ Ugboma Usuon na a gba na-a, onọ ọgo nọ yọ homaphia?

¹² Imizu ri rhiẹ Ugboma Usuon na, ihworho ri vwa gba. Orhiomarana, aye ina sabu ru sọ sekpahen ọkpọvi ezẹko rẹ aye a haphia uvuẹn ukoko na ọrhẹ ọke aye erhe dje uyono i Baibol fiotọre. Jerẹ udje, nẹ ẹgbukpe 1870 rhe, Watch Tower Publications Index o vwo irhomu-ẹmro ri ta kpahen ọmẹrẹnvwrurhe ekpokpọ. Omarana, ni marhẹ ye ne ru kpahenrhọ onọ i Jesu na: “Ọrọmo yẹ ọvrẹn ra hẹrosua ro ji vwo ẹghwanren na?” (Matt. 24:45) Me yo djerie phia taghene imizu ri rhiẹ Ugboma Usuon na a wian owian yen vuọnvuọn? Jene roro kpahen ada esa ri ha userhumu rẹn imizu ri rhiẹ Ugboma Usuon erẹ ẹgbukpe uzusiorin ọrukaro na.

13. Marhẹ ẹhẹn ọfuanfon na o ru ha userhumu rẹn Ugboma Usuon na?

¹³ Userhumu ẹhẹn ọfuanfon na. Ẹhẹn ọfuanfon na ọ ha userhumu rẹn imizu ri rhiẹ Ugboma Usuon na vwẹruọ irhomẹmro ri ha uvuẹn i Baibol na rẹ aye i vwe rhe fiotọre bi. Jerẹ udje, roro kpahen uyono ra dabu vwẹruọ ye ra hunute oberun na. Itiọrurhomẹmro, Osolobrugwẹ yọ ha userhumu rẹn aye e rhe jeghwai dje iyono erana fiotọre, omarana ọye ọvo yo fo ujiri na. (Se 1 Corinthians 2:10.) Paul ọ yare: “Ẹmro enana rẹ ame a ji ta na, orhiẹ ẹmro ẹghwanren rẹ ituakpọ i yonori-in, ọrẹn ọrẹ ẹhẹn ọfuanfon na o yonorin.” Ugboma Usuon na o ji vwo aruo ẹhẹn ọrana. (1 Cor. 2:13) Ra mẹriẹn taghene iyono efian a homaphia ẹgbukpe buebun rhe na, me yọ lẹrhẹ Ugboma Usuon na vwẹruọ urhomẹmro buebun nẹ ẹgbukpe 1919 rhe  na? Ẹhẹn ọfuanfon i Jehova yọ ha userhumu rẹn aye, nẹ aye i sabu vwẹruọ irhomẹmro enana.

14. Sekpahen oborẹ ọ ha uvuẹn Revelation 14:6, 7, marhẹ emakashe e ru ha userhumu rẹn idibo Osolobrugwẹ inyenana?

¹⁴ Userhumu emakashe na. Ugboma Usuon na yọ hẹrote owian aghwoghwo rẹ iduduru ihworho buebun e ruẹ na. Mesoriẹ owian na o vwo efikparobọ? Nime emakashe na a hobọtua owian aghwoghwo iyẹnrẹn esiri na. (Se Revelation 14:6, 7.) Uvuẹn erhirhiẹ ezẹko, ighwoghwẹmro e ghwoghwo harẹn ihworho ra nẹrhomo nẹ aye i mẹrẹn ohworho ro no ghwoghwo rẹn aye! * Eru riaro iruo aghwoghwo na udabọ ẹkparehaso uvuẹn ẹkwotọre ezẹko, o djerie phia taghene emakashe a ghini ha userhumu phia.

15. Ovẹnẹ ọgo yọ ha uvwre Ugboma Usuon na ọrhẹ ilori ẹga? Dje udje yi.

¹⁵ Ọkpọvi ro nẹ Ẹmro Osolobrugwẹ rhe. (Se John 17:17.) Roro kpahen oborẹ ọ phiare uvuẹn ẹgbukpe 1973. Urhomu-ẹmro i Watchtower ọrẹ June 1, nọ ha onọ ọnana phia: “Ihworho ri vwe tiobọnu isigẹti ephopho yanghene itaba ẹha, ena sabu bromarhame?” Ẹkpahenrhọ na yẹ: “Baibol na o djerie fiotiọre taghene aye i sabu bromarhame-e.” Watchtower na nọ ji hunute ekete i Baibol sansan ro dje oborẹ ọsoriẹ o fo ne le ohworho ro phopho isigẹti yanghene ohworho rọ ha itaba rọ vwọ guọlọ ghwẹriẹ nẹ ukoko na.  (1 Cor. 5:7; 2 Cor. 7:1) Watchtower na nọ ji ta: “Ọnana orhiẹ orhienbro omobọ aye ọvo-o. Ọnana oborẹ ene vi ru, fọkime urhi na o nẹ Ẹmro Osolobrugwẹ rhe.”  O vwo ẹga ọrọrọ rọ sabu nyalele Ẹmro Osolobrugwẹ vuọnvuọn, ọrhọ tobọ rhianẹ ono rhiẹ emru egbobọse harẹn ihworho ri ha uvuẹn ẹga na? Ọbe owu ra ya kpahen ẹga owu obẹ United States, nọ tare: “Ilori ẹga e yono ihworho aye oborẹ ọnọ merhen aye oma, neneyo aye i sabu mẹrẹn userhumu mie aye ọrhẹ ihworho ri ha uvwre aye.” Ra mẹriẹn taghene Ugboma Usuon na ọ nyalele Ẹmro Osolobrugwẹ ukperẹ ono rhiẹ ẹmro ituakpọ, ọnana no djephia taghene Osolobrugwẹ yọ nyoma aye sun idibo yi inyenana. Orhianẹ Ugboma Usuon na ọ nyalele ọkpọvi ro nẹ Ẹmro Osolobrugwẹ rhe, ukperẹ ono rhiẹ ọkpọvi ituakpọ, nẹ ọrọmo yo ghini sun ihworho Osolobrugwẹ inyenana?

16. Izede ọgo ye ne ru sabu karorhọ Ugboma Usuon na?

¹⁶ Se Hebrews 13:7. Ẹmro na, “karorhọ” ọnọ ji sabu mevirhọ “hunute.” Omarana, izede owu ra na “karorhọ era kobaro” uvuẹn ukoko na ya na hunute Ugboma Usuon na uvuẹn ẹrhomo ọwan. (Eph. 6:18) Roro kpahen owian rẹ aye e tiobọnẹ ẹbe ukoko, owian rẹ aye a hẹrote owian aghwoghwo na, ọrhẹ oborẹ aye a ha igho re torori ruiruo lele. Itiọrurhomẹmro, o fori nẹ ọwan i nẹrhomo kpahen aye!

17, 18. (a) Marhẹ ọwan e ru hobọtua Ugboma Usuon na? (b) Marhẹ ọwan e ru nyoma owian aghwoghwo na hobọtua Ugboma Usuon na ọrhẹ i Jesu?

¹⁷ Itiọrurhomẹmro, na karorhọ Ugboma Usuon na o ji sekpahen ọrẹ ana nyalele ọkpọvi aye. Ugboma Usuon na a ha ọkpọvi phia uvuẹn ẹbe ukoko na, uvuẹn uyono ọrhẹ emẹvwa. Habaye, aye a ha iniruo okinhariẹ mwuẹ, iniruo okinhariẹ na, na jeghwai ha ekpako ukoko mwuẹ. Iniruo okinhariẹ ọrhẹ ekpako ukoko, a karorhọ Ugboma Usuon na nyoma aye a nyalele ọkpọvi rẹ aye a haphia. Ọwan arha nyalele ọkpọvi ihworho ra kobaro uvuẹn ukoko na, ọwan ne djephia taghene a họghọ rẹn i Jesu ro rhiẹ ọrẹ o sun ọwan.—Heb. 13:17.

¹⁸ Izede ọrọrọ rẹ ọwan ina karorhọ Ugboma Usuon na yẹ ọwan ine fiomarhọ owian aghwoghwo na. Fọkime Paul o jiririe harẹn Ilele Kristi nẹ aye i hẹrokele esegburhomẹmro ihworho ra kobaro usuẹn aye. Ọvrẹn ra hẹrosua ro ji vwo ẹghwanren na, o dje esegburhomẹmro phia nyoma rọ karo uvuẹn owian aghwoghwo iyẹnrẹn esiri Uvie na. Wu ha usuẹn ihworho ra hobọtua Ugboma Usuon na ghwoghwo iyẹnrẹn esiri Uvie na? Marhẹ oma ọnọ merhuọn te ọke rẹ ọro sun ọwan Jesu ọnọ ta taghene: “Fọkime are i rurie rẹn owu usuẹn imizu mẹ, are i rurie ha mẹ.”—Matt. 25:34-40.

19. Mesoriẹ wu na damoma nyalele usuon i Jesu?

¹⁹ Ọke ri Jesu ọ ghwẹrioma riẹ udjuwu, ọ sẹrerhumuji idibo yi-i. (Matt. 28:20) Jesu o rheri taghene ẹhẹn ọfuanfon na, emakashe na, ọrhẹ Ẹmro Osolobrugwẹ yi ha userhumu riẹn sun idibo Osolobrugwẹ. Omarana, Jesu no ji vwo imwẹro taghene i Jehova ọnọ ji ha userhumu rẹn Ugboma Usuon na, nyoma ẹhẹn ọfuanfon na, emakashe na, ọrhẹ i Baibol na. Nime a ha ẹhẹn ọfuanfon djẹ Ugboma Usuon na, aye ne “lele ọmọ ogegede na riẹ ekete rọ nyaren ephian.” (Rev. 14:4) Ọwan arha nyalele ọkpọvi Ugboma Usuon na, nọyẹ ọwan a nyalele usuon i Jesu ne. Phẹrẹkpẹ ono suẹn ọwan riẹ arhọ i bẹmẹdẹ. (Rev. 7:14-17) O vwo onyakpọ owuorowu ro suẹn rọ nọ sabu vive ọrana-a!