IYẸNRẸN rọ ha uvuẹn Genesis 22:6, ọ tare taghene ọke Abraham ọ guọlọ ye ze izobo uvuẹn ekete oseseri, “nọ kpare erhan rọ nọ ha ze izobo ẹtorhẹ na rhua ọmọyen Isaac. Ọye nọ ha aphia na jeghwai kpare erhanren na, aye awanva ni nya usun nyarhẹn.”

Uvuẹn i Baibol na, a hunute oborẹ e ru ha erhanren tuẹ ọke ahwanre-en. Sekpahen ikuegbe Abraham ọnana, ohworho owu ọ tare taghene erhanren “ọ sabu rha bara ọsoso ọke aye a nya onya na-a.” Omarana, ọnọ sabu rhiẹ oborẹ ọ ha erhanren phia ya hunute uvuẹn iyẹnrẹn na.

Ihworho erọrọ a ta taghene ọ ghwai lọhọ ra na ha erhanren tu ọke ahwanre-en. Ọ phẹrẹ rẹn ihworho ọke ọrana rẹ aye ina ya ghwa ighumu erhanren miẹ ohworho ro rhirhiẹ kẹrẹ aye, ukperẹ aye ina ha ọrẹ aye tu. Egba irherhe buebun ni kwerhọ ye taghene eriẹ ọyẹ Abraham ọ kparare, ọkezẹko ọnọ sabu rhiẹ eriẹ ro vwo ejọrọ rẹ aye i ghwa ighumu erhanren rẹ aye i kokori uvuẹn ason rhọ. (Isa. 30:14) A kpare ighumu erhanren na neneyo ọ phẹrẹ harẹn aye, nẹ aye i sabu ha erhanren tu uvwre ọke aye a nya onya na.