SYLVIANA rọ ha ẹgbukpe 27, ro ji rhiẹ ọkobaro nọ tare: “Ọke mia kerhọ igbehian mẹ ra ga uvuẹn ekete ra mai guọlọ ekobaro, re gbikun kpahen oborẹ aye i rhiẹromẹrẹn ne, ni mi vwo ẹhẹn mi na ji wian uvuẹn ekete enana.” Sylviana nọ habaye, “Ọrẹn, ofẹn no mwu mẹ fọkime mie vwo omẹgbanhon mi na sabu ruie-e.”

Wu ji vwo aruẹ iroro rẹ Sylviana o vwori na? Wu vwo omamerhomẹ wu na ga uvuẹn ekete ra mai guọlọ ighwoghwẹmro Uvie na, ọrẹn, ofẹn o mwuo wu na sabu nyamwu ẹkẹ wu bruru na? Omarana, wu vwe fiobọrhotọre-e! Nime, Jehova ọ yẹ imizu ehworhare ọrhẹ emẹse buebun userhumu fi ebẹnbẹn ọnana kparobọ ne, jeghwai kerabọ owian aghwoghwo na. Neneyo a sabu mẹrẹn oborẹ i Jehova ọ ha userhumu rẹn ihworho ezẹko ne, jene ni iyẹnrẹn ro nẹ Madagascar rhe, ọnana yẹ ẹkwotọre ọrẹ ẹne rọ maido usuẹn ẹkwotọre rẹ ame o kinhariẹ uvuẹn akpọ na.

Uvwre ẹgbukpe ikpe re vrẹnren na, ekobaro ọrhẹ ighwoghwẹmro ri te 70, yi nẹ ẹkwotọre 11 * rhe ma ga uvuẹn Madagascar rọ ha uvuẹn Africa, ekete rẹ ihworho buebun e vwo ẹguọlọ kpahen i Baibol na. Habaye, ighwoghwẹmro ri ha uvuẹn ẹkwotọre na, i jeghwai vwo ẹhẹn rẹ aye ine kerabọ owian aghwoghwo na lele ẹkwotọre ọnana. Jene rhonmie ezẹko usuẹn aye.

Louis ọrhẹ aniẹ re se Perrine ri vrẹn ẹgbukpe 30 ne, i kwa nẹ France riẹ Madagascar. Uvwre ẹgbukpe buebun, aye e roro kpahen oborẹ aye ine ru kerabọ owian aghwoghwo na uvuẹn ẹkwotọre ọrọrọ, ọrẹn, ofẹn o mwu i Perrine rọ nọ kwa. Perrine nọ tare: “Ofẹn mi ne riẹ ekete mi vwe rhe, o mwu mẹ. Mia guọlọ nyajẹ ekrun mẹ, ukoko mẹ, oghwa mẹ, ẹkwotọre mẹ ọrhẹ irueruo mi ru notọre rhe vwo-o. Itiọrurhomẹmro, obẹnbẹn rọ mai gbanhon mi dẹrughwaroghwu yẹ ọfiamu.” Ọrẹn, uvuẹn ẹgbukpe 2012, Perrine no fiẹ ofẹn na kparobọ, ọye ọrhẹ i Louis, ni ya ga uvuẹn ekete ra mai guọlọ userhumu. Me yi Perrine o roro kpahen orhienbro na? Perrine nọ tare: “Ekwakwa enana ri phiare na, i bọn esegburhomẹmro mẹ kpahen i Jehovah  gbanhon, nime mi mẹrẹn oborẹ i Jehova ọ ha userhumu rẹn ame lele.” Louis nọ habaye, “Ọrọ mai merhen ame oma, yẹ ihworho awan ikpe rẹ ame a ha i Baibol yono uvuẹn i Madagascar ri rhiẹ ẹkarorhọ uhwu i Jesu!”

Mẹ yọ yẹrẹ aye omẹgbanhon sabu daji ẹkwotọre aye a ga na, ọke aye a dẹrughwaroghwu ebẹnbẹn? Aye i rẹ i Jehova uvuẹn ẹrhomo nọ yẹ aye omẹgbanhon sabu vwo edirin. (Phil. 4:13) Louis nọ tare: “Ame i mẹrẹnvwrurhe taghene i Jehova o ghini kpahenrhọ ẹrhomo ame, ọ jeghwai yẹ ame ‘ufuoma ọrẹ Osolobrugwẹ.’ Ọrana nọ lẹrherẹ ame sabu tẹnrovi aghọghọ rẹ owian na ọ yẹ ame. Habaye, imizu ri ha ẹkwotọre ame i nurhe, i ji dje urhomu vwe ame nyoma i fonu ọrhẹ ileta taghene ame i vwe fiobọrhotọre-e.”—Phil. 4:6, 7; 2 Cor. 4:7.

Jehova o ghini yẹ Louis ọrhẹ Perrine ebrurhọ fọkiẹ edirin aye. Louis nọ tare: “Uvuẹn October 2014, ame ni riẹ Bible School for Christian Couples * obẹ France. Isukuru ọnana ghini ẹghẹlẹ ro nẹ obẹ i Jehova rhe, rọ nọ jọ sẹrẹ ame ẹro.” Ọke aye a ruotọre nẹ isukuru na, oma ọ merhenrẹn aye ọke a rharhumu dje aye ya ga uvuẹn i Madagascar.

Ọke i Didier ọrhẹ aniẹ re se Nadine re rhirhiẹ i France e riẹ Madagascar uvuẹn ẹgbukpe 2010, aye i vrẹn ẹgbukpe 50 ne. Didier nọ tare: “Ame i rhiẹ ekobaro vwẹrẹ ame i ki vwiẹ emọ awansa. Ọke emọ na e te imirẹghwa, ame ne roro kpahen userhumu ẹhaphia uvuẹn ẹkwotọre ra mai guọlọ ighwoghwẹmro Uvie na.” Nadine nọ tare: “Orhiẹ oborẹ ọ bẹnren rẹ ame ina nyaji emọ na vwo, ọrẹn, emọ na ni ta rẹn ame: ‘Are i rha ya ha userhumu phia uvuẹn ẹkwotọre ra mai guọlọ ighwoghwẹmro Uvie na, evwan are ọnọ merhen ame!’ Ẹmro aye yo mwurun ame kpare idjaghwẹ. Dedevwo, ekete ame e rhirhiẹ ọ kẹrẹ emọ ame-e, ọrẹn, oma ọ merhen ame taghene ame a sabu lele aye tẹmro kugbe ọke ephian.”

Orhiẹ oborẹ ọ bẹnren ri Didier ọrhẹ Nadine ine yono edjadjẹ itu i Madagascar. Nadine nọ tare rhẹ ughwaro sasasa: “Ame e rhiẹ emọvwerhe ghwomara-an.” Ọrẹn, marhẹ aye i ru fikparobọ? Ukukaro, aye ni kiki kwomakugbe ukoko rọ djẹ edjadjẹ i French. Ọke oru, aye ni kwomakugbe ukoko rọ djẹ edjadjẹ i Malagasy neneyo aye i sabu yono edjadjẹ na. Nadine nọ tare: “Ihworho buebun ame a mẹrẹn uvuẹn aghwoghwo na, i vwo omamerhomẹ kpahen uyono i Baibol na. Aye a kpẹmẹ ame ọke ephian, ame i rhe lele aye yono hin. Ukukaro, mie roro taghene mia menemena. Owian ọkobaro ọ merhen mẹ oma uvuẹn ẹkwotọre ọnana. Mi rha rhọmọ urhiọke, ni mia ta rẹn oma mẹ, ‘Orhiẹ emru omamerhomẹ taghene mi ne riẹ aghwoghwo inyenana!’ ”

Didier nọ chẹẹre ibiesuọn ọke rọ karorhọ ọke ro yono edjadjẹ i Malagasy. “Ọke owu uvuẹn uyono ukoko, mẹmẹ ya ha uyono na phia, ọrẹn, mi vwe vwẹruọ ẹkpahenrhọ rẹ imizu na a ha phia-a. ‘Wẹ nobiruo’ ọvo yi mia sabu ta. O vwo ọke owu mia kpẹmẹ omizu ọmase ọwu rọ ha ẹkpahenrhọ phia, ihworho ri siyẹ oberhumie ne kpogho abọ mẹ taghene ẹkpahenrhọ  na ọ gba-a. Ogege, ni mi se omizu ọhworhare ọrọrọ, omizu ọrana nọ yọ ha ẹkpahenrhọ mi rorori taghene ọ gbare phia.”

Uvuẹn omẹvwa re ruru uvuẹn ẹgbukpe 2005, Thierry ọrhẹ aniẹ re se Nadia, ni nẹ iruẹn udje na “Pursue Goals That Honor God.” Iruẹn udje na ro sekpahen i Timothy o te ọmudu aye omamọ, nọ jeghwai lẹrhẹ omwemẹ rẹ aye ina ya ga ekete ra mai guọlọ userhumu gbanhonrhọ. Thierry nọ tare: “Ọke iruẹn udje na o hin, rẹ ame a ghwiẹ abọ, ni mi ti kẹrẹ ane mẹ, ni mi nọ riẹn ‘Bọgo ya na nya?’ Ane mẹ nọ tare taghene ọye o ji roro kpahen onọ ọrana bi.” O jiri-i, aye ni kpare idjaghwẹ nẹ aye i sabu nyamwu ẹkẹ aye i bruru na. Nadia nọ tare, “Bibiesuọn bibiesuọn ame ne tiobọnẹ enyerẹn oghwa ame, jokpanẹ ekwakwa rẹ ame ina kpare lele oma ọvo!”

Aye ni kwa riẹ Madagascar uvuẹn ẹgbukpe 2006, aye i jeghwai mẹrẹn aghọghọ nẹ owian aghwoghwo na. Nadia nọ tare: “Ihworho ame e ghwoghwo riẹn, a lẹrhẹ oma merhen ame.”

Ọrẹn, ẹgbukpe erhan a vrẹn hin, aye awanva ni dẹrughwaroghwu obẹnbẹn owu. Izu i Nadia re se Marie-Madeleine, ro rhirhiẹ i France, no seri, no burhun abọ ye jeghwai kon uvuẹn urhomuie. Ọke i Thierry ọrhẹ aniẹ e lele idọkitọ i Marie-Madeleine tẹmro hin, aye ni tare taghene izu aye o mo lele aye rhirhiẹ obẹ i Madagascar. Dedevwo, izu i Nadia ọ ha ẹgbukpe 80, o ji rhiabọ dede use na. Me yo rorori kpahen use ra hariẹn na? Ọye nọ tare: “Ọ bẹn ra na rienrian oma rhẹ ekete ọkpokpọ, ọrẹn, udabọ erhirhiẹ mẹ, o ji vwo ewian mia wian uvuẹn ukoko na. Habaye, oborẹ ọ lẹrhẹ oma merhen mẹ omamọ, yẹ ẹkwaphiẹrhotọre ọnana rọ ha uphẹn rẹn ọmọ mẹ ọrhẹ esa ye wian owian aghwoghwo na vuọnvuọn.”

Riana omizu ọhworhare rọ ha ẹgbukpe 22. Ọ ghwanranren uvuẹn Alaotra Mangoro ro rhiẹ amwa rọ dabu rhomu ewawọ uvuẹn oborẹ ọren ọ va nẹ sa uvuẹn Madagascar. Ọye o vwo irherhe omamọ, nọ guọlọ yono riaro rhọ. Ọrẹn, ọke ro yono i Baibol na, no wene ẹhẹn yen. Nọ tare: “Mi damoma mi ne kiki ruotọre nẹ isukuru secondary, ni mi vive rẹn i Jehova taghene, ‘Mi rha sabu vrẹn ọdamuni mẹ rọ kẹta, mi ne rhiẹ ọkobaro.’” Ọke i Riana ọ ruotọre, nọ ghini nyamwu ive ọnẹyen. Ọye nọ kwa bru omizu ọhworhare owu ro rhiẹ ọkobaro, ọye nọ wian owian ibiọke, nọ tuẹn owian ọkobaro rhọ. Riana ọ tare: “Ọrana yẹ orhienbro rọ mai serhọ mi bru ne.”

Ọrẹn, ekrun i Riana e vwẹruọ oborẹ ọsoriẹ o vwo kwe riẹ isukuru ọduado-o. Ọye nọ tare: “Ọsẹ mẹ, omizu ọsẹ mẹ ọhworhare ọrhẹ omizu izu mẹ ọduado i ha udu rhọ mẹ aghwẹ ne mi riẹ isukuru ọduado. Ọrẹn, mia guọlọ dobọ owian ọkobaro ji-i.” Ọke oru, Riana nọ guọlọ ya ga ekete ra mai guọlọ userhumu. Me yọ lẹrheriẹ vwo ẹhẹn ọrana? Nọ tare: “Ihi i rhiẹ oghwa ame e rhirhiẹ, aye ni so enyerẹn oghwa ame. Uhieso ọrana nọ lẹrhere mẹ roro kpahen ẹmro i Jesu sekpahen ‘efe re ne koko rhẹ obẹ odjuwu.’ Ni mi brorhiẹn mi na wian gbangbanhon ni mi sabu mẹrẹn efe erẹ ẹhẹn buebun.” (Matt. 6:​19, 20) Riana nọ kwa riẹ obọrẹ o riotọre uvuẹn Madagascar ro rhiẹ ekete rẹ okaka ọ homaphia, rọ ji ha iroko 800 seri nẹ ekete ro rhirhiẹ bi. Avwaye yẹ ihworho Antandroy re sun eranmo e rhirhiẹ. Mesoriẹ ọ kwa riẹ oboran?

Ibiamo owu ihi i ki so ekwakwa aye, Riana ọ tuẹn uyono i Baibol rhọ rhẹ ehworhare Antandroy awanva. Ọye no yono ẹmro ezẹko uvuẹn edjadjẹ na, nọ jeghwai roro kpahen ihworho Antandroy buebun ri vwe ji rhon iyẹnrẹn esiri Uvie na. Ọye nọ tare: “Mi nẹrhomo vwe i Jehova nọ ha userhumu mẹ sabu kwa riẹ ekete ra djẹ edjadjẹ itu Antandroy na.”

Ogege i Riana ọ kwa hin, nọ dẹrughwaroghwu obẹnbẹn owu. Ọ sabu mẹrẹn iruo-o. Ọhworhare owu nọ ta riẹn: “Mesoriẹ wa kwa rhiẹ aran? Ihworho ame e nẹ obonẹ ya guọlọ iruo uvuẹn ekete wu nurhe na!” Ikprughwre eva a vrẹn hin, Riana no riẹ omẹvwa ẹkwotọre aye dedevwo o vwo igho-o. Uvuẹn ẹdẹ rọ kẹta uvuẹn omẹvwa na, omizu owu no fiẹ emru rhẹ uvuẹn ipọkẹti Riana. Ọke i Riana o ni uvuẹn ipọkẹtiẹ, nọ mẹrẹn igho uvuien, igho na o te riẹn sabu fa oma rie uvwre akpọ itu i Antandroy na, jeghwai tuẹn ibiẹ eyẹsuọ i yogurt rhọ. Riana nọ tare: “Mi rhiẹromẹrẹn userhumu i Jehova ọke mia guọliẹ. Mi na sabu rha ha userhumu rẹn ihworho ri vwe vwo uphẹn rẹ aye ine yono kpahen i Jehova!” O ji vwo ewian buebun  re ne ruo uvuẹn ukoko na. Riana nọ habaye: “Kọkprughwre kọkprughwre ye mia ha ẹmro otu phia. Jehova o yoni mẹ nyoma ukoko yi.” Inyenana, Riana o ji ghwoghwo iyẹnrẹn esiri Uvie na rẹn ihworho Antandroy buebun, ri guọlọ yono kpahen i Jehova.

Jehova ọ tare taghene “kohworho kohworho rọ guọlọ ebrurhọ rẹn omayen uvuẹn otọrakpọ na, ọnọ mẹrẹn ebrurhọ mie Osolobrugwẹ urhomẹmro na.” (Isa. 65:16) Ene ghini mẹrẹn ebrurhọ i Jehova, orhianẹ e fi ebẹnbẹn rọ sabu lẹrhẹ ọwan je kerabọ owian aghwoghwo na kparobọ. Roro kpahen Sylviana ra tẹmro kpahen uvuẹn ọtonrhọ urhomẹmro ọnana. Ofẹn o mwu rien taghene ọ sabu homakpahontọre wian uvuẹn ekete ra guọlọ userhumu-u. Mesoriẹ o roro omaran? Ọye nọ tare: “Oghwẹ mẹ obohwẹre ọ kpẹtẹ ghwẹ ọrẹ obọrhe mẹ. Omarana, ni mie sele oghwẹ, onya no kiki bẹn mẹ.”

Uvuẹn ẹgbukpe 2014, Sylviana ọrhẹ Sylvie Ann ro rhiẹ ọkobaro uvuẹn ukoko ọnẹyen ni kwa riẹ ọko owu rọ ha iroko 53 seri nẹ ekete aye e rhirhiẹ. Udabọ ebẹnbẹn na, Sylviana ọ sabu nyamwu ẹkẹ ye, nọ jeghwai mẹrẹn ebrurhọ! Sylviana nọ tare: “Ẹgbukpe owu ọ vrẹn hin, Doratine ro rhiẹ ọmiọmọ owu mie lele yono i Baibol na, no bromarhame uvuẹn omẹvwa okinhariẹ.”

Jerẹ oborẹ ihworho enana ri homakpahontọre na i djephia, erhe fi obẹnbẹn re vwori kparobọ na sabu kerabọ owian aghwoghwo na, ene rhiẹromẹrẹn urhomẹmro ive Osolobrugwẹ rẹn idibo yi, rọ tare: “Mi ne ruo gbanhon, ee, mi na yọ userhumu.” (Isa. 41:10) Ọnana nọ lẹrhẹ onyerẹnkugbe ọwan rhẹ i Jehova gbanhanrhọ. Habaye, arha homakpahontọre ya ga uvuẹn ekete ra mai guọlọ userhumu uvuẹn ẹkwotọre ọwan yanghene ọrọrọ, o mwuegbe ọwan hẹrhẹ ewian ra na wian uvuẹn akpọ ọkpokpọ na. Jerẹ oborẹ Didier ra hunute bi ne ọ tare: “arha ga uvuẹn ekete ra mai guọlọ userhumu, ọnana omamọ uyono rọ nọ sa ọwan erhumu obaro na!” Omarana, jenẹ ihworho buebun i homakpahontọre tuẹn owian ọnana rhọ!