1, 2. Ẹkwaphiẹrhotọre oghẹnrensan ọgo yo no ku ihworho Osolobrugwẹ kugbe uvuẹn ẹgbukpe 2018, mesoriẹ? (Ni ifoto rọ ha uvuẹn ọtonrhọ uyono na.)

UVUẸN owuọwọn i March 31, 2018, ihworho Osolobrugwẹ ọrhẹ awọrọ ri vwo omamerhomẹ kpahen urhomẹmro na, ine koko ru Ẹkarorhọ Uhwu i Jesu, re ruẹ kẹgbukpe kẹgbukpe. Uvuẹn owuọwọn ọrana, iduduru ihworho ine koko ru Ẹkarorhọ Uhwu i Kristi na. Kẹgbukpe kẹgbukpe, irueruo ọnana yẹ ẹkwaphiẹrhotọre oghẹnrensan re ruẹ, ro ku ihworho Osolobrugwẹ kugbe uvuẹn ọsoso akpọ na!

² Itiọrurhomẹmro, ana sabu ha ẹhẹn roro oborẹ i Jehova ọrhẹ Jesu ina ghọghọ te, ọke aye ina mẹrẹn iduduru ihworho uvuẹn owuọwọn ọrana, re ruẹ irueruo oghẹnrensan ọnana nẹ inọke owu riẹ ọrọrọ uvuẹn ọsoso akpọ na. Baibol na ọ tare taghene “otu gbidigbidi rẹ onyakpọ owuorowu [ọnọ jọ] sabu kele, ri nẹ egbamwa ọrhẹ ivwiẹ ọrhẹ ihworho kugbe edjadjẹ ephian rhe,” ina ta rhẹ uvwele gorigori: “Usimirhọ o nẹ obẹ Osolobrugwẹ ame ro siyẹ aga usun na, ọrhẹ Ọmogegede na rhe.” (Rev. 7:​9, 10) Itiọrurhomẹmro,  oma ọ ghini merhen ọwan taghene a sabu brọghọ rhẹ i Jehova ọrhẹ Jesu oma nyoma Ẹkarorhọ Uhwu na.

3. Enọ ego ya na kpahenrhọ uvuẹn urhomu-ẹmro ọnana?

³ Urhomu-ẹmro ọnana, ọnọ kpahenrhọ enọ enana. (1) Marhẹ yẹ owuowọnwan ono ru mwuegbe jeghwai mẹrẹn erere nẹ Ẹkarorhọ Uhwu i Jesu na? (2) Marhẹ yẹ Ẹkarorhọ Uhwu i Jesu na, o ru hobọte onyenrẹnkugbe uvwre ihworho Osolobrugwẹ? (3) Marhẹ yẹ owuowọnwan ono ru toroba okugbe ọrana? (4) Ono vwo Ẹkarorhọ Uhwu i Jesu rọ kẹta? Omarana, ọkiọgo?

4. Mesoriẹ ọ ghanren na damoma riẹ Ẹkarorhọ Uhwu i Jesu na?

⁴ Roro kpahen oborẹ ọsoriẹ ọ ghanren wu ne riẹ Ẹkarorhọ Uhwu i Jesu na. Karorhọ taghene uyono ukoko ọ ha usuẹn ogame ra ha vwe i Jehova. Itiọrurhomẹmro, Jehova ọrhẹ i Jesu a djokarhọ ihworho ra damoma riẹ ẹkwaphiẹrhotọre ọnana rọ mai ghanren re ruẹ kẹgbukpe kẹgbukpe na. O fori na mẹriẹnvwrurhe taghene emru kpregede re vwe fiẹrorhọ rọ phiare, yọ nọ sabu lẹrhẹ ọwan je riẹ Ẹkarorhọ Uhwu i Jesu na. Erhe djephia taghene uyono ẹnya emru kirighwo uvuẹn akpenyerẹn ọwan, na yẹ i Jehova oborẹ ọnọ lẹrhiẹ sẹrorẹ odẹ ọwan rhẹ uvuẹn “ọbe okarorhọ” ọnẹyen, nọyẹ “ọbe arhọ na,” ra ya odẹ ihworho ri ne vwo arhọ i bẹmẹde rhọ na.—Mal. 3:16; Rev. 20:15.

5. Bọmọke Ẹkarorhọ Uhwu i Jesu na ono te, marhẹ ene ru damẹ oma ọwan ni sẹ a ji ha uvuẹn esegburhomẹmro na?

⁵ Bọmọke Ẹkarorhọ Uhwu i Jesu na ono te, ana sabu kwaphiẹ ọke rhotọre na nẹrhomo jeghwai roro kpahen onyerẹnkugbe ọwan rhẹ i Jehova. (Se 2 Corinthians 13:5.) Marhẹ ene ruẹ ọnana lele? Nyoma ana ‘damẹ oma ọwan ni, sẹ a ji ha uvuẹn esegburhomẹmro na.’ Na sabu ru ọnana, o fori na nọ ọma ọwan: ‘Mi ghini vwo imwẹro taghene mi ha usuẹn ukoko ri Jehova o vwo ekwerhọ kpahen, re ruẹ ọhọre ọnẹyen? Mia damoma ruẹ ekete omẹgbanhon mẹ o teri ni mi sabu ghwoghwo jeghwai yono awọrọ kpahen iyẹnrẹn esiri Uvie na? Mie djephia nyoma irueruo mẹ taghene mi vwo imwẹro kpahen ẹdẹ ri koba na? Mie djephia taghene mi rheri taghene usun Echu ono toba phẹrẹkpẹ? Imwẹro mi vwo kpahen i Jehova ọrhẹ i Jesu ọke mia homakpanhontọre rẹn i Jehova, yi mi ji vwo ọke ọnana?’ (Matt. 24:14; 2 Tim. 3:1; Heb. 3:14) Erhe roro kpahen ẹkpahenrhọ rẹn enọ enana, ọnọ sa ọwan erhumu sabu dje oborẹ ọwan i ghini havwọ phia.

6. (a) Me ye ne ruo na sabu vwo arhọ i bẹmẹdẹ? (b) Marhẹ yẹ ọkpako ukoko owu o ru mwuegbe hẹrhẹ Ẹkarorhọ Uhwu i Jesu na kẹgbukpe kẹgbukpe, marhẹ wu ne ru sabu hẹrokelie?

⁶ Se i Baibol na, ne wu jeghwai roro kodo kpahen eghwẹmro ri tẹmro kpahen oborẹ ọsoriẹ Ẹkarorhọ Uhwu i Jesu na ọ ghanren. (Se John 3:16; 17:3.) Izede ro suẹn riẹ arhọ i bẹmedẹ na o mevirhọ ọrẹ ene “rhe” i Jehova ọrhẹ ọrẹ ene “vwo esegburhomẹmro” kpahen i Jesu, ro rhiẹ Ọmọyen owu ọvo na. Ne wu sabu mwuegbe hẹrhẹ Ẹkarorhọ Uhwu i Jesu na, o fori ne wu yono kpahen irhomu-ẹmro ezẹko ri na ha userhumu wẹn ti kẹrẹ i Jehova ọrhẹ i Jesu rhọ. Roro kpahen oborẹ ọkpako ukoko owu o ruẹ ọke jijiri rhe na. Kẹgbukpe kẹgbukpe, ọkpako na ọ sanọ irhomu-ẹmro ri dabu tẹmro kpahen Ẹkarorhọ Uhwu i Jesu, ọrhẹ ẹguọlọ ri Jehova ọrhẹ i Jesu i vwo kpahen ọwan, ri ha uvuẹn Oghwa Odẹrẹ sansan. Ikprughwre ezẹko bọmọke Ẹkarorhọ Uhwu i Jesu na o ki te, nọ rharhumu se, jeghwai roro kodo kpahen oborẹ Ẹkarorhọ Uhwu i Jesu na ọ ghanren te. Uvwre ọke ezẹko, ọkpako na ọ ha iyẹnrẹn ekpokpọ ri ha uvuẹn Oghwa Odẹrẹ erọrọ ba erẹ ọye o vwori bi. Ọkpako na nọ sabu yono ekwakwa  ekpokpọ kẹgbukpe kẹgbukpe nime ọ rharhumu se jeghwai roro kodo kpahen irhomu-ẹmro sansan, ọrhẹ isese i Baibol ra bọn kpahen Ẹkarorhọ Uhwu i Jesu na. Ọrọ mai ghanren, nọ mẹrẹnvwrurhe taghene ẹguọlọ ro vwo kpahen i Jehova ọrhẹ i Jesu no kodorhọ kẹgbukpe kẹgbukpe. Aruẹ uyono ọnana ọnọ ji sabu lẹrhẹ ẹguọlọ ọrhẹ ọdaremẹro re vwo kpahen i Jehova ọrhẹ i Jesu kodorhọ, nẹ ọnọ ha userhumu wẹn riamerhen Ẹkarorhọ Uhwu i Jesu na vuọnvuọn.

7. (a) Me yi Jesu ọ nẹrhomo kpahen ọke rọ ha Ẹkarorhọ Uhwu ọnẹyen mwu? (b) Me yo djerie phia taghene i Jehova ọ kpahenrhọ ẹrhomo ri Jesu ọ nẹren na?

⁷ Uvuẹn ason ri Jesu ọ ha Ẹkarorhọ Uhwu ọnẹyen mwu, nọ nẹrhomo taghene idibo yi ephian i rhirhiẹ ye ọrẹ okugbe, jeghwai rhiẹromẹrẹn aruẹ onyerẹnkugbe rẹ ọye ọrhẹ Ọsẹ ye i vwori. (Se John 17:20, 21.) Itiọrurhomẹmro, Jehova ọ ghini kpahenrhọ ẹrhomo ọghoghanren rẹ ọmọyen ọ nẹren na, vwarana, iduduru ihworho i sabu vwo esegburhomẹmro taghene Jehova yo dje ọmọyen rhe. Ẹkarorhọ Uhwu i Jesu na ọ vẹnẹ uyono ukoko erọrọ rẹ ihworho Osolobrugwẹ e ruẹ, nime o ghini djephia taghene Iseri Jehova e nyerẹn ọrẹ okugbe. Ihworho sansan na sabu kwomakugbe uvuẹn ẹdẹ ọrana ruẹ ogame uvuẹn ekete sansan. Uvuẹn ẹkwotọre ezẹko, ihworho ri nẹ edjadjẹ ọrhẹ ẹkwotọre sansan rhe, i rhe koko ha ẹga phia uvuẹn ekete owu, awọrọ e nie sakamu. Ọrẹn, aruẹ okugbe ọrana o serhọ uvuẹn ukẹro i Jehova ọrhẹ i Jesu!

8. Urhomu ọgo sekpahen okugbe yi Jehova o dje ọmẹraro Ezekiel?

⁸ Re ọwan e rhiẹ ihworho i Jehova na, okugbe ọnana o vwo rho gbe ọwan unu-u. Itiọrurhomẹmro, Jehova ọ vi ta ye rhotọre bi. Roro kpahen urhomu ro dje ọmẹraro Ezekiel taghene ọ gba erhan eva kugbe, orhan “harẹn Judah” ọrhẹ orhan “harẹn Joseph.” (Se Ezekiel 37:15-17.) “Enọ Rẹ Otu Re Se Ẹbe Ọwan I Nọren” rọ ha uvuẹn Oghwa Odẹrẹ ọrẹ July 2016 nọ tare: “Jehova ọ yẹ Ezekiel iyẹnrẹn ifiẹrorhọ, taghene agbamwa Israel ono vwo okugbe, ogege aye a rharhumu te Otọre Ive na. Iyẹnrẹn ọrana ọ jeghwai ta kpahen okugbe ọrẹ ihworho Osolobrugwẹ rọ homaphia uvuẹn ọke oba na.”

9. Marhẹ Ẹkarorhọ Uhwu i Jesu re ruẹ kẹgbukpe kẹgbukpe o ru djephia taghene aruẹmẹrẹn Ezekiel o ghini ruẹgba?

⁹ Nẹ ẹgbukpe 1919 rhe, ọyẹ i Jehova ọ kwaphiẹ ihworho ra djẹha na rhọ, jeghwai rharhumu koko aye kugbe, enana yẹ orhan “harẹn Judah” na. Ọrẹn, ọke ihworho ri ne rhirhiẹ otọrakpọ na, ra ha dje orhan “harẹn Joseph” na e kwomakugbe eri ne riẹ odjuwu na, ẹko ihworho awanva na ni me rhiẹ “ẹko igegede owu.” (John 10:16; Zech. 8:23) Jehova o vive taghene ọnọ gba erhan eva na kugbe, aye ni ne rhiẹ owu uvuẹn abọ ye. (Ezek. 37:19) Vwarana, ẹko eva na a ga ọrẹ okugbe obotọre Orodje ọwan ro rhiẹ i Jesu Kristi, ra mẹraro kpahen taghene ọye yẹ odibo Osolobrugwẹ re se David. (Ezek. 37:24, 25) Itiọrurhomẹmro, a mẹrẹn obọdẹn okugbe rẹ Ezekiel ọ tẹmro kpahen na, ọke era djẹha na ọrhẹ “igegede ereva” na e kwomakugbe ruẹ Ẹkarorhọ Uhwu i Kristi kẹgbukpe kẹgbukpe! Me yẹ owuowọnwan ọnọ sabu ru no toroba jeghwai sẹrorẹ okugbe rọ ha uvwre ọwan?

10. Marhẹ ene ru toroba okugbe rọ ha uvwre ihworho Osolobrugwẹ?

¹⁰ Izede ọrukaro re ne toroba okugbe uvwre ihworho Osolobrugwẹ, yẹ ọrẹ ene dje uruemru omeriotọre phia. Ọke i Jesu ọ ha otọrakpọ na, ọ ha urhebro rẹn idibo yi nẹ aye i homariotọre. (Matt. 23:12) Erhe vwo uruemru omeriotọre, e kwe nẹ ẹhẹn omẹkpare ọrẹ akpọ na no suẹn ọwa-an. Ukpomaran, ene rhe dje uruemru  omeriotọre phia, nime omeriotọre ọnọ ha userhumu rẹn ọwan sabu huvwele ekpako ukoko na, ọnana no toroba okugbe uvuẹn ukoko na. Ọrọ maido, evwan ọwan nẹ ọnọ merhen i Jehova, fọkime ọ “haso ihworho ra kparoma, ọrẹn, o tiobọnẹ ẹghẹlẹ ọphẹ rẹn ihworho ra homariotọre.”—1 Pet. 5:5.

11. Marhẹ yẹ e roro kpahen oborẹ ibrẹdi ọrhẹ enyo ra ha ruẹ Ẹkarorhọ Uhwu na i mevirhọ, o ru sa ọwan erhumu toroba okugbe?

¹¹ Izede ọreva re ne toroba okugbe, yẹ ọrẹ ene roro kpahen oborẹ ibrẹdi ọrhẹ enyo ra ha ruẹ Ẹkarorhọ Uhwu na i mevirhọ. Dabu roro kodo kpahen oborẹ ibrẹdi ro vwo phie na ọrhẹ enyo ọbobare na i mevirhọ, maido uvuẹn ason Ẹkarorhọ Uhwu na. (1 Cor. 11:23-25) Ibrẹdi na o mevirhọ ugboma i Jesu rọ gbare rọ ha kpahontọre, enyo na o mevirhọ ọbara ye. Ọrẹn, ne rhe oborẹ ibrẹdi ọrhẹ enyo na i mevirhọ ọvo, o te-e. Karorhọ taghene izobo otan i Kristi na o sekpahen ẹguọlọ ri Jehova ọrhẹ i Jesu i vwo kpahen ọwan, nọyẹ, ẹguọlọ ri Jehova o vwori rọ lẹrheriẹ tiobọnu ọmọyen no hwu fọkiẹ ọwan, ọrhẹ ẹguọlọ ri Jesu o vwo kpahen ọwan ro mwurien hwu. Erhe roro kpahen ẹguọlọ aye i djephia, ono mwu ọwan ji vwo ẹguọlọ kpahen aye. Ẹguọlọ rẹ ọwan ọrhẹ imizu ọwan i vwo kpahen i Jehova, ọ họhọ ufi rọ gbarẹ ọwan kugbe, nọ lẹrhẹ okugbe ọwan kpẹnkpẹnrhọ.

12. Uvuẹn udje rọ ha uvuẹn Matthew 18:23-34, marhẹ yi Jesu o ru djephia taghene Jehova ọ guọlọre na rha harhomu awọrọ?

¹² Izede ọresa re ne toroba okugbe, yẹ ọrẹ ana harhomu awọrọ nẹ ẹhẹn rhe. Arha harhomu ihworho ri ruru ọwan sọ nẹ ẹhẹn rhe, ne djephia taghene izobo otan i Kristi ọ darẹ ọwan ẹro. Se udje owu ri Kristi ọ haphia uvuẹn Matthew 18:23-34. Gba nọ oma: ‘Mia damoma mi na nyalele oborẹ i Jesu o yonorin? Mie lele imizu ukoko na nyerẹn rhẹ erhionrin kugbe ọmẹrẹnvwrurhe? Mi vwo omwemẹ mi na harhomu ihworho ri ruru mẹ sọ?’ Itiọrurhomẹmro, ọdandan ọ ghwẹ ọdandan, omarana, nọ bẹn ra na harhomu orusọ ezẹko. Ọrẹn, udje ọnana ọ lẹrherẹ ọwan rhe oborẹ i Jehova ọ guọlọ mie ọwan. (Se Matthew 18:35.) Jesu ọ dabu djeyi fiotọre taghene arha harhomu imizu ọwa-an, Jehova ọ ji harhomu ọwa-an. O fori na dabu roro kpahiẹn! Arha harhomu awọrọ jerẹ oborẹ i Jesu o yonorin, ana sẹrorẹ okugbe rhẹ imizu ọwan.

13. Marhẹ yẹ uruemru ufuoma re ne vwo o ru toroba okugbe?

 ¹³ Arha harhomu awọrọ, ne djephia taghene ọwan ihworho ufuoma. Roro kpahen urhebro ọnyikọ Paul, rọ tare, “are i rha damoma sẹrorẹ okugbe owu ọrẹ ẹhẹn na, uvuẹn erhirhiẹ ufuoma ro ku are kugbe na.” (Eph. 4:3) Uvwre ọke Ẹkarorhọ Uhwu na, roro kpahen oborẹ we lele awọrọ nyerẹn lele, maido uvuẹn ason Ẹkarorhọ Uhwu na. Nọ oma: “Mie djephia nyoma irueruo mẹ taghene mi vwa sẹrorẹ eghrẹn rhẹ ẹhẹ-ẹn? E rheri mẹ rhẹ ohworho ro toroba ufuoma ọrhẹ okugbe? Enana enọ eghoghanren ro fori taghene e roro kpahen.

14. Marhẹ ene ru djephia taghene a “harhomu owuowọnwan ọrẹ ẹguọlọ”?

¹⁴ Izede ọrẹne re ne toroba okugbe, yẹ ọrẹ ene dje ẹguọlọ phia jerẹ i Jehova ro rhiẹ Osolobrugwẹ ẹguọlọ. (1 John 4:8) O fo na tẹmro ọnana kpahen imizu ọwa-an, “Mi na sabu vwo ẹguọlọ kpahen aye, ọrẹn, aye e je mẹ-ẹ”! Erhe vwo uruemru ọnana, nọyẹ a vwa nyalele urhebro i Paul ra na ‘harhomu owuowọnwan ọrẹ ẹguọlọ-ọ.’ (Eph. 4:2) Djokarhọ ye taghene i Paul ọ ta taghene a “harhomu owuowọnwan” ọvo-o. Ukpomaran, nọ habaye taghene e ru ọnana “ọrẹ ẹguọlọ.” O vwo ovẹnẹ. Uvuẹn ukoko na, aruẹ ihworho sansan yi Jehova ọ ha use riẹn, ni mọ ga ye. (John 6:44) Ra mẹriẹn taghene i Jehova yọ ha use rẹn aye na, nọyẹ, o vwo ẹguọlọ kpahen aye. Omarana, o rho fo ne ni imizu ọwan taghene aye e fo ihworho re ne dje ẹguọlọ riẹ-ẹn. Omarana, no fori ne rhe dje ẹguọlọ rẹn imizu ọwan jerẹ oborẹ i Jehova o jurhie rẹn ọwan!—1 John 4:20, 21.

15. Marhẹ e ru rhe taghene ono vwo Ẹkarorhọ Uhwu i Jesu rọ kẹta?

¹⁵ O vwọ ọke re ne ruẹ Ẹkarorhọ Uhwu i Jesu rọ kẹta. Marhẹ e ru rhe? Uvuẹn ileta ọrukaro ri Paul ọ ya vwẹ Ilele Kristi ra djẹha uvuẹn i Corinth, nọ tare taghene nyoma Ẹkarorhọ Uhwu i Jesu re ruẹ kẹgbukpe kẹgbukpe, aye “ne ghwoghwo uhwu Ọrovwori na, bọmọke ọnọ rhe.” (1 Cor. 11:26) Ẹrhiọ i Jesu ra tẹmro kpahen aran na , yi jẹ “ẹrhiọ” ri Jesu ọ hunute ọke rọ ta kpahen oborẹ ọnọ phia ọke oba na. Sekpahen ukpokpogho rode rọ nọ phia obaro na, Jesu nọ tare: “Oka Ọmọ onyakpọ na nẹ ọnọ homaphia obẹ odjuwu, ọsoso ivwiẹ ri ha uvuẹn akpọ na, ni ne vwerhoma, aye ni na mẹrẹn Ọmọ onyakpọ na rọ sa rhẹ omẹgbanhon ọrhẹ odidi rode uvuẹn ivwrevwrede na. [Jesu] nẹ ono dje emakashe enẹyen urhomu rhẹ edon ukpori gorigori, aye ni ne koko ihworho ra djẹha nẹ igogo ẹnẹ akpọ na, nẹ ọtonrhọ idjuwu na ye te ẹta ye.” (Matt. 24:29-31) Owian re ne “koko ihworho ra djẹha” na, ọ rionbọrhọ ọke ihworho ephian ri ne lele i Jesu sun, ri hẹrhẹre uvuẹn otọrakpọ na, ine riẹ odjuwu. Ọnana ọnọ phia uvwre ọke ọtonrhọ ukpokpogho rode na ọ vrẹn ne, ọrẹn, ono vwoba bọmọke uvweri Armageddon ọnọ tonrhọ. Ọke ọrana awan 144,000 na, ni ne kwomakugbe i Jesu ghwọghọ irodje akpọ na. (Rev. 17:12-14) Ẹkarorhọ Uhwu i Jesu re ne ruo bọmọke ene koko ihworho enana riẹ odjuwu yo no rhiẹ ọrọ kẹta, fọkime ọke ọrana i Jesu ọ ‘rhe’ ne.

16. Mesoriẹ o fo ne wu damoma riẹ Ẹkarorhọ Uhwu i Jesu ọrẹ ẹgbukpe ọnana?

¹⁶ Omarana, jene brorhiẹn ra na mẹrẹn erere nyoma ene riẹ Ẹkarorhọ Uhwu i Jesu uvuẹn March 31, 2018. Habaye, jenẹ a nekpẹn userhumu mie i Jehova na sabu rhe toroba okugbe ihworho yi! (Se Psalm 133:1.) Karorhọ taghene ono vwo Ẹkarorhọ Uhwu i Jesu rọ kẹta. Omarana, jenẹ a damoma riẹ Ẹkarorhọ Uhwu i Jesu na, jeghwai riamerhen okugbe re ne rhiẹromẹrẹn.