WU RHE omizu ọhworhare yanghene ọmase ro riẹ ẹkwotọre ọrọrọ ra mai guọlọ ighwoghwẹmro Uvie na ya ga? Wu nọ oma dẹ ne: ‘Me yo mwu aye ya ga uvuẹn ẹkwotọre ọrọrọ? Marhẹ yẹ aye e ru mwuegbe oma aye hẹrhẹ aruo uphẹn ẹga ọnana? Mi na sabu vwobọrhọ aruo owian ọnana?’ Izede rọ mai rhomu ra na mẹrẹn ẹkpahenrhọ enọ ẹnana, ye ne lele ihworho ri vwobọrhọ ye ne tẹmro kugbe. Omarana, jene rhonmie imizu ezẹko.

Me yọ lẹrherẹ are roro kpahen ẹkwotọre ra mai guọlọ userhumu are ina nya? Amy, rọ ha uvwre ẹgbukpe 35, o nẹ United States rhe. Nọ tare: “Uvwre ẹgbukpe buebun, mie roro taghene mi na ya ga uvuẹn ẹkwotọre ọrọrọ, ọrẹn, nọ họhọre taghene mi sabu ruie-e.” Me yo wene iroro yi? “Uvuẹn ẹgbukpe 2004, Esa ọrhẹ ane ra ga uvuẹn ẹkwotọre Belize ni seri mẹ ne mi me lele aye ruiruo ọkobaro ibiamo owu. Ni mi ghini ru omaran, oma ọ merhenren mẹ omamọ! Ẹgbukpe owu ọ vrẹn, ni mi riẹ Ghana ya ga uvuẹn ẹrhẹ ọkobaro.”

Ẹgbukpe ezẹko re vrẹnren, Stephanie, rọ joma te ẹgbukpe 30, rọ jeghwai nẹ United States rhe, ọ dabu ni erhirhiẹ rọ havwọ, no rorori: ‘Oma mẹ ọ sasare, mia jeghwai vwo ekrun mia hẹrote-e. Itiọrurhomẹmro, mi na sabu ru harẹn i Jehova ghwẹ omana.’ Fọkiẹ iroro ọrana, nọ kwa riẹ Ghana ye kerabọ owian aghwoghwo na. Filip ọrhẹ Ida, ri rhiẹ ekobaro ri rọnmọ ne, i nẹ Denmark rhe. Aye i vwo omwemẹ rẹ aye ina ya ga ekete ra mai guọlọ userhumu. Aye i guọlọ izede buebun rẹ aye ina sabu ru ọnana. Filip nọ tare: “Ọke uphẹn na o rhiefirhọ, nọ họhọre taghene i Jehova nọ ta rẹn ame: ‘Are i ya wian!’” Uvuẹn ẹgbukpe 2008 aye ni ya ga uvuẹn Ghana ẹgbukpe ri vrẹn esa.

Hans ọrhẹ Brook, ri rhiẹ ekobaro ri rọnmọ ne, i ha uvwre ẹgbukpe 30, a ga uvuẹn United States. Uvuẹn ẹgbukpe 2005, aye i ha userhumu phia ọke aphẹrẹ ọgbogbanhon ọwu re se Hurricane Katrina ọ  ghwọghọ ekete buebun. Ọke ro ru, aye ni ya ileta nẹ aye i sabu hobọtua owian ebanbọn akpọ ephian, ọrẹn, e se aye-e. Hans nọ karorhọ: “Ame ni me rhon ẹmro owu uvuẹn omẹvwa rọ tare taghene Orodje David o kweri ọke ra ta riẹn taghene rhẹ ọye yọ nọ bọn oghwa ẹga na-a, omarana, no wene ẹkẹ ye. Ihwẹmro ọrana ọ ghini lẹrhẹ ame mẹrẹnvwrurhe taghene ana sabu wene ẹkẹ ọwan uvuẹn ogame i Jehova.” (1 Chron. 17:1-4, 11, 12; 22:5-11) Brook nọ ji ta, “Jehova ọ guọlọre nẹ ame i ha obọ fomu ighwe ọrọrọ.”

Ọke aye e rhon omamọ iyẹnrẹn kpahen oborẹ igbehian aye ra ga uvuẹn ẹkwotọre erọrọ i rhiẹromẹrẹn, Hans ọrhẹ Brook ni brorhiẹn rẹ aye ina ya ga uvuẹn ẹkwotọre ọrọrọ. Uvuẹn ẹgbukpe 2012 aye ni riẹ Ghana ya ga ibiamo ẹne, jeghwai ha userhumu rẹn ikoko idienrhọ ri ha avwaye. Dedevwo aye i rharhumu riẹ United States, oborẹ aye i rhiẹromẹrẹn uvuẹn Ghana, ọ lẹrherẹ aye vwo ọdamẹ rẹ aye ina ha Uvie na karo uvuẹn akpenyerẹn aye. Nẹ ọke ọrana rhe, aye i ha userhumu bọn oghọn ukoko rọ ha uvuẹn Micronesia.

Marhẹ yẹ are i ru mwuegbe nẹ are sabu ya ga ekete ra mai guọlọ userhumu? “Mi se urhomu-ẹmro i Watchtower ri sekpahen ihworho ra ga ekete ra mai guọlọ userhumu, mi jeghwai tẹmro rẹn ekpako ukoko na, oniruo okinhariẹ ọrhẹ aniẹ kpahen ọdamẹ mi na ya ga uvuẹn ẹkwotọre ọrọrọ. Ọrọ maido, mia nẹrhomo vwe i Jehova ọke ephian kpahen ẹkẹ mi bru te oma.” Omaran Stephanie * ọ tare. Ọke owu na, Stephanie no ru akpenyerẹn yen lọhọ, ọnana nọ lẹrheriẹ sabu koko igho rọ nọ ha sa omayen erhumu uvuẹn ẹkwotọre ọrọrọ.

Hans nọ tare: “Ame i nẹrhomo vwe i Jehova nọ ha ọkpọvi rẹn ame, nime ame i guọlọ riẹ ekete ro sun run ame nya ephian. Uvuẹn ẹrhomo ame, ame jeghwai hunute ẹdẹ rẹ ame a guọlọ tuẹn owian rhọ.” Esa ọrhẹ ane ọnana, ni ya ileta vwe oghọn ukoko ẹne sansan. Ọke oghọn ukoko rọ ha uvuen i  Ghana o kwenu harẹn aye, aye ni riẹ Ghana, aye i vwo omwemẹ rẹ aye ina ga ibiamo eva ọvo. “Ame riẹ amerhen owian na rhẹ ukoko na omamọ, nọ lẹrherẹ ame rhirhiẹ vrẹn oborẹ ame i tare bi.” Omaran Hans ọ tare.

George ọrhẹ Adria, esa ọrhẹ ane ri joma te ẹgbukpe 40 ne, i nẹ Canada rhe. Aye i rheri taghene i Jehova ọ vwọ ghwai fi ebrurhọ rhẹ omamọ iroro ọvo-o, ọrẹn, ọ jeghwai fi ebrurhọ rhẹ omamọ orhienbro. Omarana, aye ni kpare idjaghwẹ aye ina nya mwu ẹkẹ aye. Aye ni se omizu ọmase rọ ga ekete ra mai guọlọ userhumu uvuẹn Ghana, nẹ aye i nọ riẹn enọ buebun. Aye i jeghwai ya vwe oghọn ukoko rọ ha uvuen Canada ọrhẹ Ghana. Adria nọ tare, “Ame ni gbẹn izede ame ine ru akpenyerẹn ame lọhọ vrẹn oborẹ ame e ruẹ bi.” Orhienbro erana nọ lẹrherẹ aye sabu kwa riẹ Ghana uvuẹn ẹgbukpe 2004.

Ebẹnbẹn ego yẹ are i dẹrughwaroghwu ọke are a kwa hin, marhẹ yẹ are i ru fikparobọ? Ebẹnbẹn Amy ọ dẹrughwaroghwu ukukaro, ọrẹ o roro kpahen ihworho oboghwa. “Kemru kemru i vẹnẹ oborẹ mi rheri bi.” Me yọ sa riẹ erhumu? “Ekrun mẹ e se mẹ rhẹ ifonu, jeghwai kpẹme mẹ fọkiẹ owian mi havwọ na, ọnana nọ sa re mẹ erhumu rhe roro kpahen oborẹ ọsoriẹ mie riẹ avwaye. Ọke ro ru, mẹmẹ ọrhẹ ekrun mẹ, na ha ifonu ra mẹrẹn ughwaro ohworho tẹmro kugbe. Nime mia mẹrẹn ughwaro aye, nọ họhọre taghene aye i kẹre mẹ omamọ.” Amy nọ ji ta taghene ọke rọ ha omizu ọmase owu ro te edje uvuẹn ukoko na ru ugbehian yen, nọ sa riẹ erhumu rhe irueru sansan rẹ ihworho na i vwori. Amy nọ tare: “Orhianẹ me vwo ẹruọ oborẹ ọsoriẹ ihworho e ruẹ ekwakwa ezẹko rẹ aye e ruẹ-ẹ, ugbehian mẹ nọ  sa mẹ erhumu. Nyoma userhumu ugbehian mẹ, ni mi yono oborẹ mi ne ru ọrhẹ oborẹ mi na kẹnoma riẹn, ọnana nọ sa re mẹ erhumu mẹrẹn aghọghọ uvuẹn iruo uvie na.”

George ọrhẹ Adria i tare taghene ọke aye e tu riẹ Ghana, nọ họhọre taghene aye i rharhumu ghwẹrioma riẹ ọke ahwanren. Adria nọ tare: “Ukperẹ ame ina ha imashini rọ fọnrhọn iwun fọnrhọn iwun ame, ame na ha ukoroba fọnrhọn iwun ame. Ame i rha guọlọ sere emaren, nọ ha ọke buebun. Ọrẹn, ibiọke ọ vrẹn ne, oborẹ ọ họhọ erhirhiẹ ọgbogbanhon na, no mo rhiẹ ikuegbe harẹn ame.” Brook nọ ji habaye: “Udabọ ebẹnbẹn rẹ ekobaro a dẹrughwaroghwẹ, ame e nyerẹn akpọ obọdẹn. Ame i rhe koko ekwakwa irhorhomu ame i rhiẹrhomẹrẹn, ọnọ họhọ idodo irhorhomu rẹ ame e nẹ ghanghanren.”

Mesoriẹ are e jiri aruo uphẹn ẹga ọnana rẹn awọrọ? Stephanie nọ tare: “Ọwan i rhe ghwoghwo uvuẹn ẹkwotọre rẹ ihworho e vwo omwemẹ aye ine yono urhomẹmro na, ji tobọ yono i Baibol na kẹdẹkẹdẹ, ọ rhua aghọghọ sa. Orhienbro mi na ya ga uvuẹn ẹkwotọre ọrọrọ, yẹ orhienbro rọ mai serhọ!” Uvuẹn ẹgbukpe 2014, Stephanie nọ rọnmọ Aaron, inyenana aye awanva a ga uvuẹn oghọn ukoko rọ ha uvuẹn Ghana.

“Omamọ ekwakwa yẹ ame i rhiẹromẹrẹn,” ọmaran Christine ọ tare, ọye ọkobaro ro nẹ Germany rhe, rọ vrẹn ẹgbukpe 30 ne. Christine ọ gare uvuẹn ẹkwotọre Bolivia o ki riẹ Ghana. Nọ ji ta: “Nime ekrun mẹ a kẹre mẹ-ẹ, ni mia hẹroso i Jehova nọ sa mẹ erhumu ọke ephian. Jehova no rhiẹ ohworho mẹ vrẹn oborẹ ọ havwọ bi. Mi jeghwai mẹrẹn omamọ okugbe ra mẹrẹn uvwre ihworho i Jehova. Ogame ọnana ọ ghini rhua erere rhiẹ akpenyerẹn mẹ.” O vwo ji jiri na Christine nọ rọnmọ Gideon, aye awanva a ga uvuẹn Ghana.

Filip ọrhẹ Ida i ta oborẹ aye i ru sabu ha userhumu rẹn ihworho aye e lele yono i Baibol na, nẹ aye ru riaro rhọ. Aye i rha ta. “Ame lele ihworho ri te 15 yono i Baibol bi, ọrẹn, ame ni tiẹ isiorin nie, nẹ ame i sabu yono aye izede ro mwidjẹn.” Ihworho aye e yono na, i mẹrẹn erere nẹ ọnana? Filip nọ tare: “Mi lele idama owu re se Michael yono. Ọ sabu yono kẹdẹkẹdẹ, ọ jeghwai dabu mwuegbe, omarana ame ni yono ọbe Bible Teach hin uvuẹn ubiamo owu. Ọrana ọ vrẹn hin, Michael no rhiẹ oghwoghwẹmro. Ẹdẹ ọrukaro ro riẹ aghwogho, nẹ ọ nọ re mẹ, ‘Wu na sabu lele mẹ ha i Baibol yono ihworho mi ghwoghwo riẹn?’ Nọ gberi mẹ unu omamọ. Michael nọ tare taghene ọye ọ ha uyono i Baibol mwu harẹn awansa, ọye ọ guọlọ userhumu nọ sabu yono aye.” Gbe nie, a guọlọ ihworho buebun ri na ha i Baibol yono ihworho, te erhirhiẹ ohworho ra ha i Baibol yono, orhiẹ ohworho rọ ha i Baibol yono ihworho!

Amy nọ ta oborẹ o ru mẹrẹn ọdamẹ rọ havwiẹ vwrurhe: “Ogege mie te Ghana, ame ni ghwoghwori uvuẹn amwa ọkokamo owu, ame ni jeghwai guọlọ idienrhọ ri ha uvuien. Ame ni mẹrẹn idienrhọ ri te erẹrẹn uvuẹn amwa ọrana ọvo!” Ọke ro ru, Amy nọ rọnmọ Eric, aye awanva a ga ẹrhẹ ọkobaro oghẹnrensan. Aye a ha userhumu rẹn ukoko idienrhọ owu. O vwo idiẹnrhọ ri te 300 ri rhiẹ ighwoghwẹmro, ọrhẹ idiẹnrhọ buebun ri vwo omamerhomẹ kpahen urhomẹmro na uvuẹn Ghana. Nime George ọrhe Adria i gare uvuẹn Ghana, nọ lẹrherẹ aye rhiẹromẹrẹn oborẹ o mevirhọ re ne rhiẹ imishiọnari. Omarana, oma nọ merhen rẹn aye omamọ ọke re se aye riẹ isukuru Gilead, iklasi ọrẹ 126! Inyenana, aye imishiọnari uvuẹn Mozambique.

Orhiẹ emru omamerhomẹ ra mẹrẹn imizu buebun re nẹ ẹkwotọre sansan, ya ha userhumu rẹn imizu erọrọ, nẹ ihworho i sabu mẹrẹn urhomẹmro na. (John 4:35) Kọkprughwre kọkprughwre uvuẹn ẹgbukpe na, ihworho ri te 120 ye bromarhame uvuẹn Ghana. Jerẹ oborẹ ẹguọlọ o mwu ihworho 17 ri riẹ Ghana ya ha userhumu phia na, omaran ẹguọlọ kpahen Jehova o ji mwu oduduru ighwoghwẹmro ekete erọrọ homakpanhontọre. Aye a ga ekete ra mai guọlọ ighwoghwẹmro Uvie na. Ihworho enana ri homakpahontọre na, a vi lẹrhẹ ọmudu i Jehova ghọghọ!—Ps. 110:3; Prov. 27:11.