GBE roro taghene wa nya uvuẹn udumu erhẹrhẹ ason. Ogege na, ne wu mẹrẹnvwrurhe taghene ohworho ọ nyaleluo. Wu rha da oghwẹ ji, ọye no ji meviẹ. Wu rha nya kpata, no ji ru omaran. Ne wa zẹ; ne wu zẹ riẹ oghwa ugbehian rọ kẹrẹre. Ọke ugbehian ọnọ o je ighwe na jeghwai dede owẹwẹ rhiẹ uvuẹn oghwa, ne wu kwẹhẹn.

Ọkezẹko, wa ji dẹrughwaroghwu aruo erhirhiẹ ọrana dẹ-ẹ, ọrẹn, ọfiamu erọrọ ina sabu lẹrhẹ ọwan zofẹn. Jerẹ udje, wu vwo ekete we seriotọre wa damoma wian rhọ, ọrẹn, we ji ruẹ sọ? Wa damoma guọlọ owian ọke jijiri ne, ọrẹn wa ji mẹrẹ-ẹn? We brudu kpahen ọke ọho ọrhẹ ọke wu na dẹrughwaroghwu emiamo? Wu vwo ekwakwa erọrọ re kpokpo ẹhẹn ọnọ?

Oma ọ vwọ merhuọn wu rhe vwo ohworho rọ kerhọ ọke wa ta riẹn kpahen ebẹnbẹn wu vwori, rọ nọ ji yọ userhumu ọke wa guọliẹ? Wu vwo aruo ugbehian ọrana? Ee, wu vworie! Jehova yẹ aruo ugbehian ọrana, o rhiẹ omamọ ugbehian rẹn Abraham, jerẹ oborẹ a ya rhẹ Isaiah 41:8-13. Uvuẹn oghwẹmro 10 ọrhẹ 13, Jehova nọ ta rẹn idibo yi: “Wu vwa zofẹ-ẹn, nime mẹmẹ rhẹ owẹwẹ i gba havwiẹ. Wu vwe brudu-u, nime mẹmẹ yẹ Osolobrugwẹ ọnọ. Mi ne ruo gbanhon, ee, Mi na yọ userhumu, mi na ghini mọrọn owẹwẹ rhẹ obọrhe ọvwata mẹ. Nime, mẹmẹ i Jehova Osolobrugwẹ ọnọ, mia mọrọn obọrhe ọnọ, Ohworho rọ ta wẹn, ‘Wu vwa zofe-ẹn. Mi na yọ userhumu.’”

Ẹmro enana a yọ uduẹharhaghwẹ? Gbe fioma rhẹ erhirhiẹ ri Jehova o djeri na. A wa ha ye ta taghene wẹwẹ rhẹ i Jehova mọrọn obọ ra nya kugbe-e, dedevwo ọnana orhiẹ oborẹ orhomurun. Orhianẹ wẹwẹ rhẹ i Jehova mọrọn obọ ra nya kugbe, manẹ obọrhe ọnẹyen nọ mọrọn obohwẹre ọnọ. Ukpomaran, Jehova nọ ‘ha obọrhe ọvwata’ ọnẹyen mọrọn ‘obọrhe ọnọ,’ jerẹ ọke ra lọruọ nẹ erhirhiẹ ọgbogbanhon uvuẹn akpenyerẹn ọnọ. Ro ru ọnana, nọ yọ imwẹro nyoma ọ ta: ‘Wu vwa zofẹ-ẹn. Mi na yọ userhumu.’

Wẹwẹ a mẹrẹn i Jehova taghene ọye Ọsẹ ọrhẹ Ugbehian ro vwo ẹguọlọ, rọ nọ yọ userhumu ọke ukpokpogho? O vwo ọdamẹ kpahen owẹwẹ, o roro kpahen erhirhiẹ wu havwọ, o ji vwo omwemẹ rọ nọ sa erhumu. Wu rha dẹrughwaroghwu erhirhiẹ ọgbogbanhon, Jehova ọ guọlọre ne wu vwo omefuon nime, o vwo ẹguọlọ okokodo kpahen owẹwẹ. Ọye ghini ‘userhumu ra mẹrẹn ọke ukpokpogho.’—Ps. 46:1.

Ihworho buebun e kperi oma aye fọkiẹ irueru aye i ru vrẹn ne, aye ne roro sẹ Osolobrugwẹ ọ harhomu aye ne. Orhianẹ ọrana ọ phia wẹn, roro kpahen ọhworhare owu rọ fuevwan re se i Job, rọ ta kpahen ‘edandan ọke uphuphẹn yen.’ (Job 13:26) Ọbo ijoro David ọ jeghwai dẹrughwaroghwu erhirhiẹ ọnana, nọ rẹ i Jehova: ‘Wu vwa karorhọ ọdandan ọrhẹ orusọ ọke uphuphẹn mẹ-ẹ.’ (Ps. 25:7) Ọwan e rhiẹ ihworho ri wa gba na, ọwan ephian ‘iruedandan, orho jẹ ọwan nyerẹn mwu odidi Osolobrugwẹ-ẹ.’—Rom. 3:23.

Ẹmro re ha uvuẹn Isaiah urhomu-ẹmro 41, o kiki sekpahen ihworho Osolobrugwẹ ọke ahwanren. Aye i ru sọ omamọ te erhirhiẹ ri Jehova o brorhiẹn rọ nọ ha aye guẹnzọn nyoma ọnọ ha aye riẹ evrẹn uvuẹn Babylon. (Isa. 39:6, 7) Udabọ orana, Osolobrugwẹ o roro kpahen obaro na, oborẹ ono ru simi ihworho ri na ghwẹriẹ, jeghwai rharhumu brie! (Isa. 41:8, 9; 49:8) Jehova o dje aruo uruemru ọrana inyenana rẹn ihworho ri ghwẹriẹ nẹ ẹhẹn rhe.—Ps. 51:1.

Roro kpahen oborẹ ọ phia rẹn Takuya, * rọ damoma ro no tiobọnu irueru ri vwa fon ọrẹ e nẹ ifoto yanghene ughe ihworho ri banfirhọ ọrhẹ uruemru ra lẹrhẹ ugboma vwo oruru ehware. Ọgbọ buebun, ọ rharhumu se rhẹ ufi ọrana. Marhẹ yẹ oma o rurie? “Ni me nẹ oma mẹ taghene mie fiemru-u, ọrẹn, ọke mia nẹrhomo vwe i Jehova nọ harhomu mẹ, nọ kpare mẹ nẹ erhirhiẹ me seriotọre na.” Marhẹ yi Jehova o ru ọrana? Ekpako uvuẹn ukoko i Takuya i ta riẹn no se aye orhianẹ ọ rharhumu se rhẹ ufi na. Nọ tare: “Ọ phẹrẹ mẹ mi ne se aye-e, ọrẹn, ọke mie se aye, aye ni ruru mẹ gbanhon.” Ekpako na ni ta rẹn oniruo okinhariẹ nọ kọn bru Takuya nya. Oniruo okinhariẹ na nọ ta riẹn: “Mie ghemeghe rhiẹ ara-an. Ekpako ukoko na i guọlọre ne mi rhiẹ aran. Aye i guọlọre ne mi ha userhumu wẹn.” Takuya nọ tare: “Mẹmẹ yi ru ọdandan, ọrẹn, Jehova, nyoma ekpako na nọ yẹre mẹ userhumu.” Takuya no ru ewene te erhirhiẹ ro rhiẹ ọkobaro ọke ephian, ọ jeghwai ga uvuẹn oghọn ukoko ne. Jerẹ oborẹ ọ phia rẹn omizu ọhworhare ọnana, Osolobrugwẹ ọnọ kparuọ nẹ erhirhiẹ we seriotọre.

Erhe vwo iruo-o, ọnọ sabu rhua ọfiamu vwe ihworho buebun. Iruo ihworho ezẹko i va rẹ aye obọ, nẹ aye i sabu mẹrẹn iruo ọrọrọ nọ bẹn. Gbe roro oborẹ ono ruo oma lele orhianẹ ihworho ra yẹ ihworho iruo i vwe kwe yọ iruo-o. Uvuẹn aruo erhirhiẹ ọrana, ẹhẹn ihworho ezẹko ne seriotọre. Marhẹ i Jehova ono ru sa erhumu? Ọkezẹko, ọ vwọ yọ iruo ogege-e, ọrẹn, ọnọ sabu lẹrhuọ karorhọ ẹmro Orodje David ọ tare: ‘Mẹmẹ uphuphẹn vẹrhẹ, mi jeghwai ho ne, ọrẹn mia ji mẹrẹn ohworho ọvwata ra nyajo vwo-o, yanghene emọyen na rẹ emaren ria-a.’ (Ps. 37:25) Itiọrurhomẹmro, Jehova o ni owẹwẹ ghanghanren, ‘obọrhe ọvwata ọnẹyen,’ ọnọ sa ọwẹwẹ erhumu vwo oborẹ wu guọlọre ne wu sabu rha ga ye.

 Sara, ro rhirhiẹ Colombia, o rhiẹromẹrẹn omẹgbanhon i Jehova. O vwo omamọ owian ra kwa omamọ osa riẹn uvuẹn ikọmpini ro titiri omamọ. Ọrẹn, ọ guọlọ ru riaro uvuẹn ẹga i Jehova, omarana, no tiobọnu owian yen, nọ tuẹn owian ọkobaro rhọ. Ọrẹn, ọ phẹrẹ nọ mẹrẹn owian ibiọke-e. Nọ tuẹn eyi ice-cream rhọ, ọrẹn, igho no hinrin, eyi na no seri. Sara nọ tare: “Ẹgbukpe esa i nyavrẹn, ọrẹn, fọkiẹ userhumu i Jehova, ni mi sabu din.” Sara no yono oborẹ ono ru sabu fiẹ ovẹnẹ rhẹ ekwakwa ri rhiẹ ọdamẹ ọrhẹ ojemẹ, ọrhẹ oborẹ ono jo brudu kpahen odẹ ọrẹ ọ sa. (Matt. 6:33, 34) Ọke ro ru, ikọmpini rọ wian bi, nọ rharhumu se yi nọ mọ wian uvuẹn ẹrhẹ rọ havwọ bi. Nọ tare taghene ọye ọnọ ha owian uphrophro ọke ọvo, orhianẹ a yẹriẹ ọke nọ sabu ga Osolobrugwẹ. Dedevwo Sara ọ vwọ mẹrẹn igho te oborẹ ọ mẹrẹn te bi-i, ọye nọ sabu ru owian ọkobaro na. Uvwre enana ephian, nọ tare: “Mi mẹrẹn obọ ẹguọlọ i Jehova.”

Emru ọrọrọ ro kpokpo ẹhẹn ihworho yẹ ọho. Ihworho buebun ri tiobọnu owian aye ọke ọho, ne roro sẹ aye ine vwo igho rẹ aye ina sabu nyerẹn omamọ akpọ ọke ọho aye. Aye e ji brudu kpahen erhirhiẹ emiamio aye ina dẹrughwaroghwu ọke ọho. Ọkezẹko, David yọ rẹ i Jehova: ‘Wu vwa kpare iroro vrẹn mẹ ọke ọho mẹ-ẹ; wu vwe gbobọhiẹn mẹ ọke rẹ omẹgbanhon mẹ o riotọre ne-e.’—Ps. 71:9, 18.

Marhẹ yẹ idibo i Jehova ine ru sabu vwo omefuon ọke ọho aye? O fori nẹ aye vwo esegburhomẹmro kpahen Osolobrugwẹ ọke ephian, jeghwai hẹrosuiẹ taghene ọnọ hẹrote aye. Itiọrurhomẹmro, orhianẹ aye a riakpọ bi, o fori nẹ aye i ru akpenyerẹn aye lọhọ jeghwai vwo uruemru otemẹ. Aye ina sabu mẹrẹnvwrurhe taghene ra riẹ ‘emaren ẹbe’ orhomu ghwẹ ra riẹ ‘erhuẹn ọduado,’ ọnọ ji sabu yẹ aye oma ọkpokpọ! (Prov. 15:17) Wu rha lẹrhẹ oma merhen i Jehova ọke ephian, ọye ọnọ hẹrote owẹwẹ ọke ọho.

Gbe roro kpahen udje José ọrhẹ Rose, ri ga i Jehova vuọnvuọn uvuẹn ẹgbukpe ri vrẹn 65 ne. Uvwre ẹgbukpe erana, aye i hẹrote ọsẹ Rose rọ guọlọ ẹruete ọke ephian. José ọ jeghwai din ọke re simi i kansa ro vwori. Jehova o rionbọ userhumu ọnẹyen rẹn esa ọrhẹ ane ọnana? Ee, marhẹ yo rurie lele? Nyoma Tony ọrhẹ Wendy ri rhiẹ esa ọrhẹ ane uvuẹn ukoko aye, ri mwuegbe ekete aye ine rhirhiẹ harẹn aye. Tony ọrhẹ Wendy i guọlọ tiobọnu oghwa na ọphẹ harẹn ekobaro ọke ephian. Ẹgbukpe ri vrẹnren na, Tony ọ mẹrẹn José ọrhẹ Rose re riẹ aghwoghwo ọke ephian. O vwo ẹguọlọ kpahen aye fọkiẹ oruru aye, ọnana nọ hobọte yi omamọ. Rẹ aye a mẹriẹn taghene esa ọrhẹ ane ọnana ri kpako ne na, i fioma aye ephian rhẹ ẹga i Jehova, nọ lẹrhẹ Tony ọrhẹ Wendy tiobọnu oghwa ọphẹ harẹn aye. Uvwre ẹgbukpe 15 rhe na, aye a ha userhumu rẹn José ọrhẹ Rose ri te ẹgbukpe 80 ne. Esa ọrhẹ ane ọnana ri kpako ne na, e nẹ userhumu ihworho enana taghene ẹghẹle ro nẹ obọ i Jehova rhe.

Osolobrugwẹ ọ ji riẹn ‘obọrhe ọvwata ọnẹyen’ wẹn. Wu na mọrọn obọ Ohworho ro veri taghene: ‘Wu vwa zofẹ-ẹn. Mi na yọ userhumu’?