1, 2. Me yo fori nẹ owuowọnwan o vwo imwẹro kpahen? (Mẹrẹn ifoto rọ ha uvuẹn ọtonrhọ uyono na.)

JERẸ oborẹ ọwan i yono kpahen uvuẹn uyono ọrẹ ọ vrẹnren na, Dẹbolo ọ tare taghene Jehova o sun ituakpọ izede ro vwo serhọ, ọ ji ta taghene ituakpọ ọvo ina sabu sun oma aye. Oborẹ Echu ọ tare na ọgbare? Gba ha ẹhẹn roro taghene ituakpọ ọvo ina sabu sun omayen jeghwai nyerẹn bẹmẹdẹ. Ọma ọnọ merhen aye orhianẹ orhiẹ Osolobrugwẹ yo sun aye-e? Oma ọnọ merhuọn, orhianẹ wẹwẹ ọvo ina sabu sun oma ọnọ jeghwai nyerẹn bẹmẹdẹ?

² Wẹwẹ ọvo yi na sabu kpahenrhọ enọ erana. O fori nẹ owuowọnwan o roro kpahen ẹmro ọrana. Erhe ru omaran, ana mẹrẹnvwrurhe taghene usun Osolobrugwẹ ọgbare. Usun ọnẹyen yọ mai rhomu. O fori na hobọtua usun na nẹ ẹhẹn rhe. Baibol na ọ ta rẹn ọwan oborẹ ọsoriẹ o fo ne vwo imwẹro ọrana. Jerẹ udje, jene yono kpahen oborẹ i Baibol na ọ ta kpahen oborẹ ọsoriẹ i Jehova o fo ohworho ro no sun.

3. Mesoriẹ i Jehova o fo ohworho ro no sun otọrakpọ na ọrhẹ idjuwu na?

³ Jehova yo fo ohworho ro no sun otọrakpọ na ọrhẹ idjuwu  na, nime ọye yẹ Osolobrugwẹ rọ mai vwo omẹgbanhon, rọ ji ma ekwakwa ephian. (1 Chron. 29:11; Acts 4:24) Revelation 4:11 ọ tare taghene awan 144,000 ri ne lele i Jesu sun na, a ta taghene: “Wu mwuovwan, Jehova Osolobrugwẹ ame, wu na ha odidi, ọghọ, kugbe omẹgbanhon na, nime wẹwẹ yi ma ekwakwa ephian, ji fọkiẹ ọhọre ọnọ yẹ aye e nyerẹn ọyẹ a jeghwai ma aye.” Itiọrurhomẹmro, nime i Jehova yọ ma ekwakwa ephian, ọye yo fo ohworho ro no sun ituakpọ ọrhẹ emakashe ephian.

4. Mesoriẹ orhiẹ oborẹ o vwo serhọ ra na kparehaso usun Osolobrugwẹ fọkiẹ ugbomọphẹ re vwori?

⁴ Echu ọ ma emru owuorowu-u. Omarana, o mwuovwan ro no su-un. Omẹkpare yọ lẹrhẹ Echu, Adam ọrhẹ Eve kparehaso usun i Jehova. (Jer. 10:23) Itiọrurhomẹmro, Adam ọrhẹ Eve i vwo ugbomọphẹ rẹ aye ine brorhiẹn taghene aye ọvo ine sun oma aye. Ọrẹn, ọrana ọ yẹ aye omẹgbanhon aye ina kparehaso usun Osolobrugwẹ-ẹ. Ugbomọphẹ ọ yẹ ohworho omẹgbanhon rọ nọ djẹ odjẹ. Ọrẹn, ọrana ọ yẹ ituakpọ omẹgbanhon rẹ aye ina kparehaso Osolobrugwẹ rọ maren aye jeghwai yẹ aye arhọ-ọ. O fiotọre taghene arha kparehaso i Jehova, ọwan i vwa ha ugbomọphẹ ọwan ruiruo izede ro serhọ-ọ. Omarana, Jehova ọvo yo fo ohworho ro no sun ituakpọ.

5. Mesoriẹ ene vwo imwẹro taghene orhienbro Osolobrugwẹ ephian egbare?

⁵ O vwo iroro ọrọrọ rọ soriẹ i Jehova o fo ohworho ro no sun. Jehova ọ ha omẹgbanhon ọnẹyen ruiruo izede ro serhọ. Jehova nọ tare: “Mẹmẹ yi Jehova, Ohworho ro dje ẹguọlọ atamwu phia, ọro brorhiẹn ọsoso, ro ji ru irueruo ọvwata uvuẹn otọrakpọ na, fọkime ekwakwa enana a merhen mẹ oma.” (Jer. 9:24) Jehova ọ vwọ bọn orhienbro yi kpahen irhi rẹ ituakpọ i jeri-i. Ọye yẹ esiri orhienbro ọsoso, omarana ọye yo jurhi rẹn ihworho ephian. Baibol na ọ tare taghene “irueruo ọvwata ọrhẹ orhienbro ọsoso yẹ usimo aga usun” i Jehova, omarana, ana sabu vwo imwẹro taghene irhi, iruemru-urhi ọrhẹ orhienbro enẹyen ephian egbare. (Ps. 89:14; 119:128) Dedevwo Echu ọ tare taghene i Jehova o mwuovwan ro no su-un, ọrẹn ọye ọ ji sabu sun ihworho nẹ irueruo evwata i rhirhiẹ akpọ na-a.

6. Mesoriẹ i Jehova o fo ohworho ro no sun akpọ na ephian?

⁶ Habaye, Jehova o fo ohworho ro no sun nime, ọye o vwo irherhe ọrhẹ ẹghwanren ro no sun akpọ na ọrhẹ idjuwu na ephian. A mẹrẹn ọnana vwrurhe nyoma Osolobrugwẹ ọ yẹ i Jesu omẹgbanhon ro simi aruo emiamo ephian rẹ idọkita i vwa sabu simi. (Matt. 4:23, 24; Mark 5:25-29) Ọrana o rhiẹ emru igbevwunu rẹn i Jehova-a. Fọkime, o rhe oborẹ ono ru sabu ruie, ọ jeghwai vwo omẹgbanhon rọ nọ kwaphiẹ kemru kemru rhọ. Ọ jeghwai vwo omẹgbanhon rọ nọ rhọmọ ihworho ri hwuru jeghwai dobọ oghwọghọ kpregede ji.

7. Izede ọgo yẹ ẹghwanren i Jehova o ru ghwẹ ẹghwanren kohworho kohworho rọ ha uvuẹn akpọ Echu o suẹn?

⁷ Usun Echu ọ ji sabu kwaphiẹ ẹghwọ ri ha uvwre ẹkwotọre ọrhẹ emwa rhọ-ọ. Jehova ọvo yo vwo ẹghwanren rọ nọ lẹrhẹ ufuoma rhiẹ akpọ na. (Isa. 2:3, 4; 54:13) Re yono kpahen ẹghwanren ọrhẹ irherhe ri Jehova o vwori na, ọnọ lẹrhẹ ọwan vwo aruo ẹhẹn ri Paul o vwori, ọke rọ ya: “O, efe ọrhẹ ẹghwanren kugbe irherhe Osolobrugwẹ i kodori omamọ! A vwa sabu vwẹruọ orhienbro ọrhẹ izede enẹyen ephian hiẹ-ẹn!”—Rom. 11:33.

8. Me yọ merhen ruọn oma kpahen oborẹ i Jehova o sun ihworho yi lele?

⁸ Baibol na ọ tare taghene i Jehova yo fo osun. O ji dje oborẹ ọsoriẹ usun i Jehova o ru rhomu ghwẹ usun ituakpọ ọrhẹ Echu. Jehova o sun ihworho yi izede ẹguọlọ. Itiọrurhomẹmro, oma ọ merhen ọwan kpahen oborẹ i Jehova o sun ọwan lele. Jehova Osolobrugwẹ “arodọmẹ ọrhẹ aruẹdọn, ọ vwọ kiki tuekwẹre-e, ọ vuọnren rhẹ ẹguọlọ atamwu ọrhẹ urhomẹmro.” (Ex. 34:6) Jehova o brọghọ rhẹ idibo yi oma. Ọye ọ hẹrote ọwan ghwẹ oborẹ ọwan a hẹrote oma ọwan. Jehova o tiobọnu ekwakwa irhorhomu rẹn ihworho ra fuevwan ga ye, ọnana no dje Echu rhiẹ ọmọrenfian. Jehova ọ tobọ tiobọnu ọmọ ọghoghanren ọnẹyen neneyo a sabu nyerẹn bẹmẹdẹ!—Se Psalm 84:11; Romans 8:32.

9. Marhẹ e ru rhe taghene i Jehova o vwo ọdamẹ kpahen owuowọnwan?

⁹ Jehova o vwo ẹguọlọ kpahen idibo yi ephian. Ọrẹn, ọye o ji vwo ọdamẹ kpahen owuowọnwan. Jerẹ udje, ọke ahwanren, Jehova ọ ha iguẹnzọn mwu nẹ aye i yẹ emọ Israel ọkpọvi, jeghwai lẹrhẹ aye fi evwreghrẹn aye kparobọ, ọnana ọ phiare uvwre ẹgbukpe uzusionrin akwasa. Uvwre ọke ọnana, Jehova nọ djokarhọ i Ruth ro vwo rhiẹ onyẹ Israel. Ruth o tiobọnu ekwakwa buebun nọ sabu ga i Jehova. Jehova ọ ha ebrurhọ riẹn nyoma ọ yẹ ye esa ọrhẹ ọmọ ọhworhare. Orhiẹ ọrana ọvo-o. Jehova ọrhọ rhọmọ Ruth nẹ uhwu rhe, Ruth ọnọ mẹrẹnvwrurhe taghene uvwioghwa ọmọyen, yi Messiah na o nurhe. Ọnọ tobọ ghọghọ omamọ, ọke rọ nọ mẹrẹnvwrurhe taghene a ya ikuegbe ọnẹyen rhẹ uvuẹn i Baibol na.—Ruth 4:13; Matt. 1:5, 16.

10. Mesoriẹ i Jehova o vwo sun ihworho izede osehiẹ-ẹn?

¹⁰ Jehova o vwo sun ihworho izede osehiẹ-ẹn. Usun i Jehova ọ yẹ ihworho yi ugbomọphẹ, ọnana no toroba aghọghọ. (2 Cor. 3:17) David nọ ta kpahen i Jehova: “Ọghọ ọrhẹ odidi i ha obaruiẹ; omẹgbanhon ọrhẹ aghọghọ i ha ekete ro rhirhiẹ.” (1 Chron. 16:7, 27) Habaye, ọbo ijoro owu re se Ethan, nọ ji ta: “Omamerhomẹ ọ havwiẹ rẹn ihworho ri rhe ukperi aghọghọ na. O Jehova, aye a nya uvuẹn ukpẹ ro nẹ ughwaruọ sa. Aye a ha ọsoso ẹdẹ na ghọghọ uvuẹn odẹ ọnọ, irueruo ọvwata ọnọ ọ kpare aye rierun.”—Ps. 89:15, 16.

11. Marhẹ ene ru sabu ru imwẹro ọwan gbanhon taghene usun i Jehova yọ mai rhomu?

¹¹ Erhe roro kpahen orhorhomu i Jehova ọke ephian, ọnọ lẹrhẹ imwẹro ọwan gbanhon taghene usun i Jehova yọ mai rhomu. Ọnọ ji lẹrhẹ ọwan vwo aruo ẹhẹn ọbo ijoro na o vwori ọke rọ ta: “Ẹdẹ owu uvuẹn egodo ọnọ o rhomu ghwẹ ẹdẹ uriusionrin uvuẹn ekete ọrọrọ!” (Ps. 84:10) Omaran ọ ghini havwọ. Ra mẹriẹn taghene i Jehova yọ maren ọwan jeghwai yẹ ọwan arhọ na, ọye o rhe oborẹ a vi guọlọ na sabu vwo omamerhomẹ, nọ jeghwai ruie rẹn ọwan. Kemru kemru rọ guọlọ mie ọwan, fọkiẹ erere ọrhẹ omamerhomẹ ọwan. Arha tobọ tiobọnu ekwakwa ezẹko na sabu ru oborẹ ọ guọlọre, oma ọnọ ji merhen ọwan.—Se Isaiah 48:17.

12. Me yẹ emru owu kirighwo ro mwu ọwan hobọtua usun i Jehova?

¹² Baibol na o djerie phia taghene i Kristi orho sun te ẹgbukpe uriusionrin owu hin, ihworho ezẹko ina kparehaso usun i Jehova. (Rev. 20:7, 8) Me yọ nọ lẹrhẹ aye ru omaran? Ọke ọrana, Dẹbolo ọnọ damoma ro no sun ihworho beghe nyoma ọnọ phiẹ aye rhọ taghene aye ọvo ina sabu sun oma aye. Ọnọ damoma rọ nọ  phiẹ ihworho rhọ taghene aye ina sabu nyerẹn bẹmẹdẹ ọrẹn aye i huvwele i Jehova-a. Itiọrurhomẹmro, ituakpọ ọvo i sabu sun ọma aye-e. Ọrẹn, o fori na nọ oma ọwan sẹ ene kwerhọ aruo ofian ọrana. Erhe vwo ẹguọlọ kpahen i Jehova jeghwai vwo imwẹro taghene ọye omamọ ohworho rọ jeghwai fo osun, ono mwu ọwan tiẹn aruo iroro Echu erana. Ọke ọrana, ọwan ni ne vwo omwemẹ re ne nyerẹn obotọre usun i Jehova, ro sun ihworho izede ẹguọlọ.

13. Marhẹ e ru djephia taghene a hobọtua usun Osolobrugwẹ, arha hẹrokelie?

¹³ Itiọrurhomẹmro, o fori na hobọtua usun i Jehova nẹ ẹhẹn rhe. Sekpahen oborẹ e yono ne, ọye yo mwuovwan ro no sun ọwan, habaye, usun ọnẹyen yọ mai rhomu. Ana sabu hobọtua usun i Jehova nyoma ana sẹrorẹ atamwu re vwo kpahen i Jehova. Izede ọrọrọ ọgo ye ne ru djephia taghene a hobọtua usun i Jehova? Ana sabu ru ọnana nyoma ene ru oborẹ i Jehova ọ guọlọre. Arha ha ukẹro i Jehova o ni emru ha nie, ọwan ne djephia taghene e vwo ẹguọlọ kpahen usun ọnẹyen, a jeghwai hobọtua ye.—Se Ephesians 5:1, 2.

14. Marhẹ ekpako ukoko ọrhẹ urhomu ekrun ine ru hẹrokele i Jehova?

¹⁴ Ọwan i yono nẹ i Baibol na rhe, taghene i Jehova o sun ọwan izede ẹguọlọ. Sekpahen ọnana, o fo nẹ urhomu ekrun yanghene ekpako ukoko i rha ha omẹgbanhon aye sehiẹn ihworho-o. Ukpomaran, o fori nẹ aye i hẹrokele i Jehova. Paul ọ hẹrokele Osolobrugwẹ ọrhẹ i Jesu. (1 Cor. 11:1) Paul ọ gba ihworho ru oborẹ ọye ọ guọlọre-e. Ukpomaran, nọ ha udu rhẹ aye aghwẹ ru oborẹ ọgbare. (Rom. 12:1; Eph. 4:1; Philem. 8-10) Omaran i Jehova ọ ji havwọ. Omaran o fori nẹ kohworho kohworho rọ hobọtua usun i Jehova o ru.

15. Marhẹ e ru djephia taghene a hobọtua usun i Jehova, arha nyalele ọkpọvi rẹ ukoko na ọ haphia?

 ¹⁵ Ọwan a nyalele ọkpọvi ihworho i Jehova ọ ha mwu? Arha nyalele ọkpọvi aye, e djephia taghene a hobọtua usun i Jehova. Ọrhọ tobọ rhianẹ a dabu vwẹruọ yanghene kwerhọ ọkpọvi ezẹko-o, o fori na hobọtua ukoko na. Nime ọrana yẹ uruemru ihworho i Jehova o suẹn, ọrẹn orhiẹ omaran uvuẹn akpọ na-a. (Eph. 5:22, 23; 6:1-3; Heb. 13:17) Ana mẹrẹn erere arha nyalele ọkpọvi nime Jehova ọ vwo ọdamẹ kpahen ọwan.

16. Marhẹ yẹ ihworho ra hobọtua usun i Jehova e brorhiẹn omobọ lele?

¹⁶ Ana sabu djephia taghene a hobọtua usun i Jehova nyoma orhienbro omobọ ọwan. Jehova o vwo jurhi kpahen kemru kemru rẹ ọwan e ruẹ-ẹ. Ukpomaran, ọye ọ ha userhumu rẹn ọwan rhe iroro yi, ọwan ọvo ne brorhiẹn na. Jerẹ udje, Jehova o jurhi rẹn ọwan kpahen oborẹ ana sẹ osẹme lele-e. Ukpomaran, o djephia uvuẹn i Baibol na taghene o fori na sẹ osẹme ro serhọ, rọ jeghwai fo rẹn Olele Kristi. (1 Tim. 2:9, 10) Ọye ọ ji guọlọ ne rhiẹ ukọ rẹn awọrọ fọkiẹ odjẹ ọwa-an. (1 Cor. 10:31-33) Erhe vwẹruọ oborẹ i Jehova o roro jeghwai nyalelie, ọwan ne djephia taghene a hobọtua usun ọnẹyen.

17, 18. Izede ego yẹ Ilele Kristi ri rọnmọ ne e ru djephia taghene aye a hobọtua usun i Jehova?

¹⁷ Jene roro kpahen oborẹ Ilele Kristi ri rọnmọ ne ine ru djephia taghene aye a hobọtua usun i Jehova. Me wu ne ruo, orhianẹ orọnmo ọnọ o vwo ebẹnbẹn ghwẹ oborẹ wu fiẹrorhọ? Ọkezẹko ẹbẹnbẹn na ina sabu bun omamọ. Ọrẹn, udje oborẹ i Jehova o lele emọ Israel nyerẹnkugbe, ọnọ sabu ha userhumu wẹn. Jehova ọ tare taghene agbamwa Israel ọ họhọ ane ọnẹyen. (Isa. 54:5; 62:4) Ọrẹn, emọ Israel i rurie sọ ọgbọ buebun, nọ họhọ orọnmo ro vwo ebẹnbẹn. Ọrẹn, Jehova ọ kpare iroro vrẹn aye-e. Ukpomaran, no gbe arodọmẹ rẹn emọ Israel ọgbọ buebun, jeghwai nyamwu ive enẹyen. (Se Psalm 106:43-45.) O fori na hẹrokele ẹguọlọ atamwu ri Jehova o vwori na.

¹⁸ Ilele Kristi buebun ri rọnmọ ne ri vwo ẹguọlọ kpahen usun i Jehova a hẹrokelie. Aye i vwa forọnmo nime orọnmo aye o vwo ebẹnbẹ-ẹn. Aye i mẹrẹnvwrurhe taghene i Jehova ọ guọlọre nẹ esa ọrhẹ ane i tigban omoma aye. Ọwiẹghwọ ọvo yọ nọ sabu lẹrhẹ Olele Kristi forọnmo jeghwai rọnmọ ọwọrọ. (Matt. 19:5, 6, 9) Ilele Kristi a hobọtua usun i Jehova nyoma aye a damoma ru orọnmo aye gbanhan udabọ ebẹnbẹn.

19. Me yo fori ne ru, erhe ru sọ?

¹⁹ Fọkiẹ ijẹgba, ọwan ne ru i Jehova sọ ọgbọ buebun. Jehova o rhe ọnana, ọye ọsoriẹ ọ tiobọnu i Jesu no hwu fọkiẹ ọwan. Omarana, erhe ru sọ uvuẹn erhirhiẹ ezẹko, o fori na nẹrhomo vwe i Jehova nọ harhomu ọwan. (1 John 2:1, 2) Ukperẹ ene brorhiẹn kpe oma ọwan ọke ephian, o fori ne yono nẹ orusọ ọwan. Erhe vwo atamwu kpahen i Jehova, ọye ọnọ harhomu ọwan jeghwai ha userhumu rẹn ọwan fi aruo erhirhiẹ erana kparobọ obaro na.—Ps. 103:3.

20. Mesoriẹ o fo na hobọtua usun i Jehova inyenana?

²⁰ Uvuẹn akpọ ọkpokpọ na, Jehova ono sun ihworho ephian jeghwai yono ọwan izede enẹyen. (Isa. 11:9) Ọrẹn, ọwan e ji yono kpahen buebun ekwakwa erana inyenana. Phẹrẹkpẹ, o vwo ohworho rọ nọ kparehaso usun i Jehova ghwomara-an. Omarana, ọnana yẹ ọke ro fori ra na hobọtua usun i Jehova nyoma emevigbanhon ọwan, ogame ọwan, ọrhẹ omẹdamu ọwan ra na hẹrokele i Jehova uvuẹn irueruo ọwan ephian.