DANIEL ỌRHẸ MIRIAM i rọnmọren uvuẹn September 2000, aye ne rhirhiẹ Barcelona, Spain. Daniel nọ tare: “Ame e ruẹ oborẹ ihworho buebun e ruẹ. Iruo ame ọ lẹrhẹ ame sabu riẹ emaren uvuẹn ihọtẹli, riẹ ẹkwotọre erọrọ, jeghwai sẹ omamọ osẹme. Habaye, ame e ji vwobọrhọ owian Uvie na.” Ọrẹn, ewene owu nọ homaphia.

Ẹmro owu ra tare uvuẹn omẹvwa ọduado owu uvuẹn ẹgbukpe 2006, nọ te i Daniel ẹhẹn, ẹmro na ọ nọ onọ ọnana: “Ọwan e ru oborẹ ọwan ina sabu ru, na sabu ha userhumu rẹn ihworho nẹ aye i nya uvuẹn izede ro suẹn riẹ arhọ i bẹmẹdẹ?” (Prov. 24:11) Ẹmro na ọ dabu karunumwu owian re ne ghwoghwo iyẹnrẹn esiri na. (Acts 20:26, 27) Daniel nọ tare: “Ni mie nie taghene mẹmẹ yi Jehova ọ tẹmro na riẹn.” Ẹmro na ọ ji ta taghene erhe kerabọ owian aghwoghwo na ọ rhua erere buebun sa. Daniel o rheri taghene ọrana urhomẹmro. Miriam ro rhiẹ aniẹ, ọ tuẹn owian ọkobaro rhọ ne, ọ jeghwai mẹrẹn ebrurhọ buebun nie sa.

Daniel nọ tare: “Ni mi tare taghene o te ọke mi ne vwobọrhọ iruo Uvie na vuọnvuọn ne.” Omaran nọ yo ghini ru. Daniel no ti nẹ ọke rọ ghwọghọ rhẹ owian yen, nọ tuẹn owian ọkobaro rhọ, nọ jeghwai roro kpahen aghọghọ rẹ ọye ọrhẹ aniẹ ina mẹrẹn, orhianẹ aye i riẹ ekete ra mai guọlọ ighwoghwẹmro Uvie na.

Uvuẹn May 2007, Daniel ọrhẹ Miriam ni tiobọnu owian aye, aye ni kwa riẹ Panama ro rhiẹ ẹkwotọre aye i te bi ne. Ẹkwotọre ọnana, o vwo emwa ekokamo buebun ri kẹrẹ urhie ọduado, buebun ihworho re rhirhiẹ avwaye yi ihworho ra djẹ Guaymi. Daniel ọrhẹ Miriam ni rorori taghene igho aye i kokori ọnọ sa aye erhumu sabu rhirhiẹ Panama te ibiamo ẹrẹnren.

Aye a ha owọ ọrhẹ idjighere riẹ amwa ekokamu na. Aye i dabu karorhọ ekete ukukaro rẹ aye i ha idjighere nya ro seri te iroko 20, ekete na o vwo igbenu, habaye uvo na ọgbogbanhon uvuẹn ẹkwotọre na. Daniel ọ joma dophie fọkiẹ onya na. Ọrẹn, ọke aye a nya uvuẹn izede na, ihworho ra djẹ Guaymi na, ne rhiabọ dede aye ruẹ oghwa, maido ọke Daniel ọrhẹ Miriam e yono edjadjẹ na ibiesuọn ne. O jiri-i, aye ni vwo ihworho aye a ha i Baibol yono ri te 23.

Ọke igho aye o hin, oma ọrhọ merhen aye-e. Daniel nọ tare: “Amioviẹ o koko ẹro ame, ọke ame e roro taghene ame ina ghwẹrioma riẹ Spain. Ame ne mwuomarhọ, nime ame a guọlọ nyajẹ ihworho ame e lele yono vwo-o.” Ọrẹn, ubiamo owu ọ vrẹn, aye ni rhon iyẹnrẹn omamerhomẹ. Miriam nọ tare: “Na yẹrẹ ame owian ekobaro oghẹnrensan. Oma ọ ghini merhen ame, nime ame ina sabu daji wian owian aghwoghwo na!”

Uvuẹn ẹgbukpe 2015, fọkiẹ ewene ezẹko uvuẹn ukoko na, na ta rẹn Daniel ọrhẹ Miriam taghene aye i rharhumu ya ga ẹrhẹ ọkobaro ọke ephian. Me yẹ aye i ruru? Aye i hẹroso ive i Jehova rọ ha uvuẹn Psalm 37:5, rọ tare: “Ghorien edamẹ enọ vwe i Jehova, ne wu hẹrosuiẹ, ọye nẹ ọnọ kpahenrhọ ha wẹn.” Aye ni guọlọ owian rẹ aye ina wian nẹ aye i sabu hobọtua oma aye uvuẹn owian ọkobaro na, aye a ji ga uvuẹn amwa Veraguas uvuẹn Panama ye te inyenana.

Daniel nọ tare: “Ame i ki nẹ Spain, ame e rhe sẹ ame ina sabu nyerẹn akpọ ọlolọhọ-ọ. Ọrẹn, ame e nyerẹn akpọ ọlolọhọ inyenana, edamẹ ame kirighwo i vwa kanren ame-e.” Me yọ ghini yẹ aye omamerhomẹ? Daniel ọrhẹ Miriam ni kpahenrhọ ye: “Nime ame a ha userhumu rẹn ihworho nẹ aye i sabu rhe i Jehova, ọ yẹ ame obọdẹn omamerhomẹ!”