1, 2. (a) Ayọmo yẹ ẹmro i Jesu ọ ta rhẹ Matthew 24:12, o sekpahen ukukaro? (b) Marhẹ ọbe i Acts o ru djephia taghene Ilele Kristi ezẹko a lẹrhẹ ẹguọlọ aye seriotọre-e? (Mẹrẹn ifoto rọ ha uvuẹn ọtonrhọ uyono na.)

JESU ọ tare taghene uvuẹn ehion akpọ ọnana, ẹguọlọ ihworho buebun ono seriotọre. (Matt. 24:3, 12) Uvwre ọke inyikọ na, itu i Jew ra ta taghene aye ihworho Osolobrugwẹ, i lẹrhẹ ẹguọlọ aye i vwo kpahen Osolobrugwẹ seriotọre.

² Ọrẹn, Ilele Kristi buebun ọke ọrana i fiomarhọ iruo aghwoghwo iyẹnrẹn esiri kpahen i Kristi, habaye, aye i sẹrorẹ ẹguọlọ aye i vwo kpahen i Jehova, ihworho ri ha uvuẹn ukoko na ọrhẹ ihworho ri vwa ha uvuẹn ukoko na. (Acts 2:44-47; 5:42) Omarana, Ilele Kristi ezẹko uvwre ọke inyikọ na, a lẹrhẹ ẹguọlọ aye seriotọre-e.

3. Me yọ lẹrhẹ ẹguọlọ rẹ Ilele Kristi i vwori ukukaro seriotọre?

³ Ọke i Jesu ọ ha urhebro rẹn Ilele Kristi ri ha uvuẹn ukoko Ephesus uvwre ọke inyikọ na, nọ tare taghene aye i ru sọ uvuẹn erhirhiẹ owu, ra mẹriẹn taghene aye i lẹrhẹ ẹguọlọ rẹ aye i vwori  ukukaro seriotọre. (Rev. 2:4) Mesoriẹ ẹguọlọ aye o seriotọre? Ọnọ sabu rhirhiẹ taghene Ilele Kristi erẹ ọke ọrana i lẹrhẹ akpọ na riẹriẹ aye. (Eph. 2:2, 3) Amwa buebun inyenana, i họhọ amwa Ephesus rọ vuọnren rhẹ irueruo ibiobiomu. Ephesus amwa rọ vuọnren rhẹ efe, ihworho na tẹnrovi eyi ẹsuọ, akpẹriọ, ọrhẹ obọdẹn akpenyerẹn. Ojemẹ ugboma nọ lẹrhẹ ẹguọlọ rẹ aye i vwori ukukaro seriotọre. Habaye, irueruo ọfanrhiẹn ọrhẹ iruemru jodojodo i vuọn ekete ephian ọke ọrana.

4. (a) Izede ego yẹ ẹguọlọ o ru seriotọre inyenana? (b) Izede esa ego yẹ ẹguọlọ ọwan ono ru dẹrughwaroghwu ọdamuni?

⁴ Oborẹ i Jesu ọ tare kpahen ẹguọlọ ro seriotọre o ji sekpahen ọwan inyenana. Inyenana, ẹguọlọ ihworho buebun i vwo kpahen i Jehova o seriotọre. Ihworho buebun i sẹrerhumuji Jehova ne, aye na hẹroso ituakpọ ni ru ekwakwa serhọ. Omarana, ẹguọlọ ihworho buebun ri vwa ga i Jehova no seriotọre. Ọrẹn, jerẹ oborẹ ọ phia rẹn Ilele Kristi uvuẹn Ephesus ọke ahwanren, Ilele Kristi inyenana ina sabu rha hẹroso oma aye, ọrana nẹ ọnọ lẹrhẹ ẹguọlọ aye i vwori seriotọre. Uvuẹn urhomu-ẹmro ọnana, ọwan ine yono kpahen izede esa rẹ ẹguọlọ ọwan ono ru dẹrughwaroghwu ọdamuni: (1) Ẹguọlọ re vwo kpahen i Jehova, (2) ẹguọlọ re vwo kpahen i Baibol na, (3) kugbe ẹguọlọ re vwo kpahen imizu ri ha uvuẹn ukoko na.

5. Mesoriẹ o fo ne vi vwo ẹguọlọ kpahen i Jehova?

⁵ Jesu ọ ki tẹmro kpahen ẹguọlọ ro no seriotọre, ọye nọ karunumwu ẹguọlọ rọ mai ghanren kparobọ. Jesu nọ tare: “‘Wu ne vi vwo ẹguọlọ kpahen i Jehova Osolobrugwẹ ọnọ rhẹ ọsoso ẹhẹn ọnọ, ọsoso oma ọnọ ọrhẹ ọsoso ọmudu ọnọ.’ Ọnana yẹ akama ukukaro rọ ji maido.” (Matt. 22:37, 38) Itiọrurhomẹmro, re vwo ẹguọlọ okokodo kpahen i Jehova, ọ lẹrhẹ ọwan sabu nyalele irhi enẹyen, vwo edirin jeghwai vwo utuoma kpahen oborẹ obiomurun. (Se Psalm 97:10.) Ọrẹn, Echu ọrhẹ akpọ ọkon ọnẹyen a damoma rẹ aye ina lẹrhẹ ẹguọlọ rẹ ọwan i vwo kpahen i Jehova seriotọre.

6. Me yo nẹ erhumie rhe fọkiẹ ẹguọlọ ihworho i vwe vwo kpahen Osolobrugwẹ?

⁶ Ihworho buebun inyenana, a ha ukẹro rọ sọre ni ẹguọlọ. Ukperẹ aye ine vwo ẹguọlọ kpahen i Jehova, aye ne vwo ẹguọlọ kpahen oma aye. (2 Tim. 3:2) Akpọ ọnana re Echu o suẹn na, ọ lẹrhẹ ihworho buebun vwo “ojemẹ ọrẹ ugboma ọrhẹ ojemẹ ọrẹ ukẹro kugbe uruemru re dje akpenyerẹn phia.” (1 John 2:16) Ọnyikọ Paul ọ ha orhetio phia kpahen uruemru re vwo ojemẹ ọrẹ ugboma, nyoma ọ ta: “Arha tẹnrovi ugboma na o suẹn riẹ uhwu, ọrẹn arha tẹnrovi ẹhẹn na o suẹn riẹ arhọ ọrhẹ ufuoma; nime ohworho rọ tẹnrovi ugboma na o ruẹ omayen rhiẹ ọvwreghrẹn Osolobrugwẹ.” (Rom. 8:6, 7) Itiọrurhomẹmro, ihworho ra hatua ekwakwa ugboma yanghene ihworho ri vwo uruemru ọfanrhiẹn a dẹrughwaroghwẹ ebẹnbẹn buebun.—1 Cor. 6:18; 1 Tim. 6:9, 10.

7. Imwofẹn ego yẹ Ilele Kristi buebun inyenana a dẹrughwaroghwẹ?

⁷ Uvuẹn ẹkwotọre ezẹko, ihworho ri vwe vwo ekwerhọ kpahen Osolobrugwẹ, ihworho ri vwo ekwerhọ kpahen ekwakwa ri va rhe kugbe eri vwe vwo ekwerhọ kpahen owuorowu, e yono ihworho taghene o fo nẹ aye i vwo imwẹro ọrhẹ ẹguọlọ kpahen Osolobrugwẹ-ẹ. Aye na ta taghene evwidjigbo ọrhẹ ihworho ri vwe vwo ọhọ ye vwo ekwerhọ taghene Osolobrugwẹ ọ havwiẹ. Habaye, ihworho buebun a họghọ rẹn egba irherhe ghwẹ i Jehova. (Rom. 1:25) Ọwan  arha kerhọ aruo iyono erana, ọnọ lẹrhẹ ọwan je ti kẹrẹ i Jehova, ẹguọlọ rẹ ọwan i vwo kpahiẹn nẹ ono ji seriotọre.—Heb. 3:12.

8. (a) Erhirhiẹ ego yẹ idibo i Jehova buebun a dẹrughwaroghwẹ inyenana? (b) Imwẹro ọgo yẹ ọwan i mẹrẹnren uvuẹn Psalm 136?

⁸ Ọwan i rha lẹrhẹ ẹhẹn ọwan seriotọre, ọnọ sabu lẹrhẹ esegburhomẹmro ọrhẹ ẹguọlọ re vwo kpahen i Jehova ji seriotọre. Uvuẹn akpọ ọnana re Echu o suẹn na, ẹhẹn ọwan o seriotọre ọkezẹko. (1 John 5:19) Ọkezẹko, ọwan a dẹrughwaroghwu ebẹnbẹn ezẹko vwarana, yanghene ebẹnbẹn ọho, emiamo, yanghene erhirhiẹ ogbere. Yanghene ọwan ina sabu rhe ni oma ọwan sakamu, nime oborẹ ọwan i fiẹrorhọ a ji mẹriẹ-ẹn, yanghene ọwan i vwa damoma te uvuẹn ukẹro ọwa-an. Ọrẹn, o fo nẹ erhirhiẹ erana i lẹrhẹ ọwan roro taghene i Jehova ọ nyajẹ ọwan vwo ne-e. Ukpomaran, o fori nẹ ọwan i dabu roro kpahen ẹguọlọ okokodo ri Jehova o vwo kpahen ọwan. Aruo imwẹro ọrana ọ ha uvuẹn Psalm 136:23, rọ tare: “Ọ karorhọ ọwan ọke ẹhẹn ọwan o seriotọre, fọkime ẹguọlọ atamwu ọnẹyen ọ havwiẹ bẹmẹdẹ.” Itiọrurhomẹmro, ẹguọlọ atamwu ri Jehova o vwo kpahen ọwan o vwo se fughwẹ-ẹ. Omarana, ana sabu vwo imwẹro taghene ọye ọnọ kpahenrhọ ẹrhomo ra nẹ vwe yi.—Ps. 116:1; 136:24-26.

9. Me yọ yẹ i Paul omẹgbanhon rọ sabu sẹrorẹ ẹguọlọ ro vwo kpahen Osolobrugwẹ?

⁹ Jerẹ ọbo ijoro na, Paul ọ mẹrẹn omẹgbanhon nyoma o roro kpahen obẹhatua ri Jehova ọ yẹ ye ọke ephian. Paul nọ yare: “Jehova yọ sa mẹ erhumu, mi vwa zofẹ-ẹn. Me yẹ onyakpọ ọnọ sabu ru mẹ?” (Heb. 13:6) Imwẹro ọrana ri Paul o vwo kpahen i Jehova, ọ lẹrheriẹ sabu dẹrughwaroghwu ẹbẹnbẹn sansan. Paul ọ lẹrhẹ ẹhẹn yen seriotọre fọkiẹ erhirhiẹ egbogbanhon rọ dẹrughwaroghwu-u. Ọke i Paul ọ tobọ ha uvuẹn ekanron, ọ ji ya ileta sansan ri vwo ẹmro urhebro. (Eph. 4:1; Phil. 1:​7; Philem. 1) Ọke oma ọ tobọ ghwọghiẹ, ọ ji sẹrorẹ ẹguọlọ ro vwori kpahen Osolobrugwẹ. Me yọ yẹriẹ omẹgbanhon rọ sabu ruie? Paul ọ hẹroso “Osolobrugwẹ urhebro ephian, rọ ha urhebro rẹn ọwan uvuẹn edamuni ọwan ephian.” (2 Cor. 1:​3, 4) Marhẹ ọwan ine ru sabu hẹrokele i Paul jeghwai sẹrorẹ ẹguọlọ ọwan i vwo kpahen i Jehova?

10. Marhẹ ọwan ine ru sabu ru ẹguọlọ re vwo kpahen i Jehova kodo rhọ?

¹⁰ Paul ọ hunute izede owu ọwan ine ru sabu ru ẹguọlọ re vwo kpahen i Jehova kodo rhọ. Paul nọ ya vwe Ilele Kristi na taghene aye i “nẹrhomo ọke ephian.” Ọke oru, Paul nọ ji ya: “Are i fioma rhọ ẹrhomo ẹnẹ.” (1 Thess. 5:17; Rom. 12:12) Ẹrhomo ẹnẹ, izede ọghoghanren owu ọwan ina sabu vwo omamọ onyerẹnkugbe rhẹ i Jehova. (Ps. 86:3) Ọwan i rha nẹrhomo nẹ ẹhẹn rhe vwe i Jehova jeghwai ta riẹn kpahen edamẹ ọwan, ọnọ lẹrhẹ ọwan ti kẹrẹ i Jehova “ro rhon ẹrhomo.” (Ps. 65:2) Habaye, ọwan i rha mẹrẹnvwrurhe taghene i Jehova ọ kpahenrhọ ẹrhomo ọwan, ọrana nọ lẹrhẹ ẹguọlọ re vwo kpahiẹn kodo rhọ. Ọwan ne ji rhe taghene i “Jehova ọ kẹrẹ ọsoso ihworho re se yi.” (Ps. 145:18) Erhe vwo imwẹro taghene i Jehova ọnọ hobọtua ọwan, ọnọ ha userhumu rẹn ọwan fi edamuni kparobọ.

11, 12. Marhẹ yẹ ọwan ine ru sabu ru ẹguọlọ re vwo kpahen i Baibol na kodo rhọ?

¹¹ Ilele Kristi urhomẹmro, i vwo ẹguọlọ kpahen urhomẹmro na. Baibol na yẹ esiri urhomẹmro. Uvuẹn ẹrhomo i Jesu ọ nẹ vwe i Jehova, ọrhọ ta: “Ẹmro ọnọ urhomẹmro.” (John 17:17) Omarana, ẹguọlọ ọwan i vwo kpahen urhomẹmro na ọ tuanrhọ nyoma ọwan ine vwo irherhe rọ gbare kpahen i Baibol na. (Col. 1:10) Ọrẹn, ne vwo irherhe, o sekpahen ekwakwa buebun.  Djokarhọ oborẹ ohworho rọ ya ọbe Psalms 119, ọ ha userhumu rẹn ọwan vwẹruọ oborẹ o mevirhọ re ne vwo ẹguọlọ kpahen i Baibol na. (Se Psalm 119:97-100.) Ọwan e se i Baibol na jeghwai roro kodo kpahiẹn kẹdẹkẹdẹ? Erhe roro kodo kpahen erere ọwan i mẹrẹnren ọke a ha i Baibol na ruiruo uvuẹn akpenyerẹn ọwan, ọnọ lẹrhẹ ọwan vwo ọdaremẹro kpahen i Baibol na.

¹² Ọbo ijoro na nọ ji ta: “Ẹmro enọ i merhenren uvuẹn ẹrẹmo mẹ, aye i merhen ghwẹ amiahon uvuẹn ugbunu mẹ!” (Ps. 119:103) Omarana, o fori nẹ ọwan i se ẹbe ukoko na o tiobọnẹ. O fori nẹ ọwan i roro kodo kpahen oborẹ ọwan e se uvuẹn i Baibol na, jeghwai haye yono awọrọ.—Eccl. 12:10.

13. Me yọ ha userhumu rẹn i Jeremiah vwo ẹguọlọ kpahen Eyaya Ọfuanfon na, marhẹ ọ hobọte yi lele?

¹³ Ọmẹraro Jeremiah o vwo ẹguọlọ kpahen Eyaya Ọfuanfon na. Djokarhọ oborẹ Ẹmro Osolobrugwẹ ọ hobọte ọmudu ọnẹyen lele. Baibol na nọ tare: “A mẹrẹn ẹmro enọ, ni mi rerẹ aye; ẹmro enọ ne ru mẹ gbanhan jeghwai lẹrhẹ ọmudu mẹ ghọghọ, nime a ha odẹ ọnọ ha se mẹ, O Jehova ro sun emakashe na.” (Jer. 15:16) Jeremiah o se Eyaya Ọfuanfon na, ọ jeghwai roro kokodo kpahiẹn. Nyoma ọrana, Jeremiah no dje ọdaremẹro phia fọkiẹ odẹ Osolobrugwẹ ra ha se yi. Omarana, o fori nẹ ẹguọlọ ọwan i vwo kpahen i Baibol na, o mwu ọwan dje ọdaremẹro phia fọkiẹ odẹ Osolobrugwẹ ra ha se ọwan ọrhẹ uphẹn re ghwoghwo iyẹnrẹn esiri na uvuẹn ọke oba na.

14. Me yẹ emru ọrọrọ rọ nọ sa ọwan erhumu ru ẹguọlọ re vwo kpahen i Baibol na kodo rhọ?

¹⁴ Me yẹ emru ọrọrọ rọ nọ sa ọwan erhumu ru ẹguọlọ re vwo kpahen i Baibol na kodo rhọ? Ọwan ina sabu ru ọnana nyoma ọwan ine riẹ uyono ukoko ọke ephian. Re yono i Baibol na kọkprughwre kọkprughwre nyoma uyono Oghwa Odẹrẹ na yẹ izede owu kirighwo ri Jehova ọ ha yono ọwan. Na sabu vwẹruọ oborẹ ọwan e yono, o fori na dabu mwuegbe Oghwa Odẹrẹ rẹ ọwan e yono kọkprughwre kọkprughwre. Izede owu ra na sabu ru ọnana, yẹ ọwan ine se ekete i Baibol ra hunute uvuẹn Oghwa Odẹrẹ na. Vwarana, ana sabu danlodu Oghwa Odẹrẹ na nẹ jw.org yanghene  JW Library app uvuẹn edjadjẹ sansan. E rurie neneyo wu sabu se ekete i Baibol ra hunute uvuẹn Oghwa Odẹrẹ na uvuẹn ifonu ọnọ. Kona kona ra ha ruiruo, ọwan i rhe se ekete i Baibol erana jeghwai roro kpahen aye, ọnọ lẹrhẹ ẹguọlọ re vwo kpahen i Baibol na kodo rhọ.—Se Psalm 1:2.

15, 16. (a) Me yẹ John 13:34, 35 ọ tare taghene Ilele Kristi ephian i ru? (b) Marhẹ ẹguọlọ re vwo kpahen imizu ri ha uvuẹn ukoko na, o ru surhobọ mwu ẹguọlọ re vwo kpahen Osolobrugwẹ ọrhẹ i Baibol na?

¹⁵ Ason ra guọlọ kpe i Jesu, nọ ta rẹn idibo yi: “Mia yẹ are akama ọkpokpọ, neneyo are i vwo ẹguọlọ kpahen owuowọnwan; jerẹ oborẹ mi vwo ẹguọlọ kpahen are, are i ji vwo ẹguọlọ kpahen owuowọnwan. Nyoma ọnana rhe, ihworho ephian ine rhe taghene are idibo mẹ—are i rhe vwo ẹguọlọ kpahen omoma are.”—John 13:34, 35.

¹⁶ Ẹguọlọ re vwo kpahen imizu ri ha uvuẹn ukoko na o surhobọ mwu ẹguọlọ re vwo kpahen i Jehova. Itiọrurhomẹmro, ọwan i sabu vwo ẹguọlọ kpahen i Jehova ọrẹn ọwan e vwo ẹguọlọ kpahen imizu ri ha uvuẹn ukoko na-a. Ọnyikọ John ọrhọ ya: “Ohworho ro vwo vwo ẹguọlọ kpahen omizu ọnẹyen rọ mẹrẹn ne, ọ sabu vwo ẹguọlọ kpahen Osolobrugwẹ rọ vwọ je mẹrẹ-ẹn.” (1 John 4:20) Habaye, ẹguọlọ re vwo kpahen i Jehova ọrhẹ imizu ri ha uvuẹn ukoko na, o surhobọ mwu ẹguọlọ re vwo kpahen i Baibol na. Mesoriẹ? Ẹguọlọ re vwo kpahen i Baibol na, ọnọ lẹrhẹ ọwan nyalele oborẹ i Baibol na ọ tare taghene e vwo ẹguọlọ kpahen i Jehova ọrhẹ imizu ọwan.—1 Pet. 1:22; 1 John 4:21.

17. Izede ego ye ne ru dje ẹguọlọ phia?

¹⁷ Se 1 Thessalonians 4:9, 10. Izede ego ye ne ru dje ẹguọlọ phia uvuẹn ukoko na? Ọwan ina sabu dje yi phia nyoma ana ha userhumu rẹn imizu ri kpako ne, nẹ aye i sabu riẹ uyono ukoko. Ana ji sabu lele emẹse uku kwaphiẹ oghwa aye. (Jas. 1:27) Ana ji sabu ha userhumu yanghene urhebro rẹn imizu ri dẹrughwaroghwu edamuni yanghene erẹ ẹhẹn aye i seriotọre. (Prov. 12:25; Col. 4:11) O fori na nyoma ẹmro ọrhẹ uruemru ọwan djephia taghene e vwo ẹguọlọ kpahen imizu ri ha uvuẹn ukoko na.—Gal. 6:10.

18. Me yọ nọ ha userhumu rẹn ọwan kwaphiẹ ẹghwọ rhọ rhẹ imizu ri ha uvuẹn ukoko na?

¹⁸ Baibol na ọ tare taghene uvuẹn ẹdẹ ri koba na, ihworho ine vwo ọdamẹ omobọ aye ọrhẹ uruemru ufiuvwele. (2 Tim. 3:1, 2) O fori na damoma ru ẹguọlọ ọwan i vwo kpahen Osolobrugwẹ, Baibol na, ọrhẹ imizu ri ha uvuẹn ukoko na kodo rhọ. Ọkezẹko, ana sabu vwo ibiẹ ẹghwọ rhẹ imizu ri ha uvuẹn ukoko na. Ọrẹn, ebrurhọ ọ havwiẹ, ẹguọlọ orho mwu ọwan lele imizu ri ha uvuẹn ukoko na kwaphiẹrhọ. (Eph. 4:32; Col. 3:14) Omarana, o fo na lẹrhẹ ẹguọlọ ọwan seriotọre-e! Ukpomaran, jene rhe ru ẹguọlọ re vwo kpahen i Jehova, Baibol na ọrhẹ imizu ri ha uvuẹn ukoko na kodo rhọ.