ỌNANA use okpakpa ro ji fiotọre: “Ighwoghwẹmro ri ha Uvuẹn i Britain—Are i Vẹnrẹn!!” (Informant, * December 1937, ọrẹ i London) Ẹrhuẹmro ọrọrọ nọ habaye: “O vwo Eru Riaro omẹ Ẹgbukpe Ikpe-e.” Iyẹnrẹn uvwre ẹgbukpe ikpe, 1928 ye fiẹ 1937, ye fi rhọ obaro ọbe na, no dje ihwẹmro na phia.

Me yọ lẹrhẹ owian aghwoghwo na seriotọre uvuẹn i Britain? Ihworho ri ha uvuẹn ukoko na i vwe ruẹ riaro-o. Habaye, oghọn ukoko rọ ha uvuẹn i Britain o brorhiẹn taghene ekobaro ri te 200 ọvo, yi na wian ẹkwotọre na, ekobaro na, na wian ekete ri havwọ kologho, ukperẹ aye ine lele ukoko na wian. Omarana, oghọn ukoko na nọ ta rẹn ihworho ri guọlọ rhiẹ ekobaro taghene orho vwo ekete rẹ aye ina wian uvuẹn i Britaini-i, aye ni ha urhebro rẹn ihworho na nẹ aye i riẹ amwa ri ha uvuẹn Europe. Fọkiẹ ọrana, buebun ekobaro ni nẹ i Britain riẹ amwa jerẹ France, dedevwo aye a dabu rhe edjadjẹ na-a.

Informant ọrẹ 1937 nọ ha ẹkẹ ọduado rẹn ihworho kpahen 1938: Aye ina wian inọke ri te oduduru owu! Aye ina sabu nyamwu ẹkẹ ọnana orhianẹ ighwoghwẹmro i wian te inọke 15, ekobaro ina wian te inọke 110. A ji ha urhebro phia taghene ẹko ihworho ina sabu wian inọke isiorin ẹdẹ owuowu, aye ina ji tẹnrovi ẹrharhumu bru rẹ aye ine vwo, maido uvuẹn owuọnwọn erhẹrhẹ ọkprughwre na.

Owian aghwoghwo ra kanrunumwu na, nọ lẹrhẹ oma merhen ihworho buebun. Hilda Padgett * nọ tare: “Ọnana use ro nẹ obẹ esiri ukoko rhe, buebun ame a hẹrhẹ bi ne, ọnana ọ jeghwai rhua erere vwe ame.” Omizu ọmase re se E. F. Wallis nọ tare: “Ẹkwaphiẹrhotọre ra na wian inọke isiorin ẹdẹ owuowu na, ọ merhen oma omamọ! Orhiẹ emru omamerhomẹ omamọ ra na ha ọsoso ẹdẹ ọwan wian owian harẹn Ọrovwori na. . . . Ọkezẹko, oma ọ ghwọghọ ame, ọrẹn oma ọ merhen ame ghele!” Ibiẹ idama owu re se Stephen Miller ọ mẹrẹnvwrurhe taghene owian aghwoghwo na emru okpakpa, no ji vwobọrhọ ye. Ọ guọlọ vwobọrhọ ye ọke ro vwo uphẹn na! Ọ karorhọ ihworho ra ghwa idjighere riẹ aghwoghwo, aye a ha ọsoso ẹdẹ aye ghwoghwo jeghwai kporo ẹmro re firhọ ọsete harẹn ihworho. Aye a kpare ephanphan iyẹnrẹn nyalele ọsoso amwa na, aye na jeghwai ha imagazini rẹn ihworho uvuẹn udumu na.

Ọbe Informant na, nọ ji tẹmro ọnana: “A guọlọ ekobaro ri bun te 1,000.” Ona ọnana nọ lẹrhẹ ekobaro na lele ukoko na wian kugbe, ha userhumu rẹn aye, jeghwai bọn aye gbanhan. Joyce Ellis (Barber) nọ tare: “Imizu buebun i mẹrẹnvwrurhe taghene o fori nẹ aye i vwobọrhọ owian ọkobaro na, dedevwo ẹgbukpe 13 mi havwọ ọke ọrana, mi ji guọlọ vwobọrhọ owian ọkobaro na.” Omarana, nọ nyamwu ẹkẹ ye uvuẹn July 1940, ọke rọ ha ẹgbukpe 15. Peter rọ rọnmọ i Joyce ra hunute na, o ji rhon use  na, ọnana nọ lẹrheriẹ “roro kpahen owian ọkobaro na.” Uvuẹn June 1940, ọke rọ ha ẹgbukpe 17, nọ ghwa idjighere riẹ amwa re se Scarborough ro seri te iroko 65, nọ sabu tuẹn owian ọkobaro na rhọ.

Cyril ọrhẹ Kitty Johnson, ekobaro ekpokpọ ri homakpanhontọre. Aye ni brorhiẹn rẹ aye ina rhẹ oghwa aye ọrhẹ enyerẹn oghwa aye neneyo aye i sabu fioma rhọ owian ọkobaro na vuọnvuọn. Cyril no tiobọnu owian yen, uvwre ubiamo owu, aye ni tuẹn owian ọkobaro rhọ. Cyril nọ tare: “Oborẹ ame a guọlọ ruẹ na, o mwurun ame ẹro. Ame i rurie nẹ ẹhẹn rhe rhẹ omamerhomẹ.”

Ra mẹriẹn taghene ekobaro na e buẹnrhọ omamọ na, imizu ehworhare ri te edje ne, ni guọlọ izede sansan rẹ aye ina hobọtua ekobaro na. Jim Carr, rọ gare ẹrhẹ zone servant (re rhe rhẹ oniruo okinhariẹ ọke ọnana) uvuẹn ẹgbukpe 1938, nọ nyalele oborẹ a ta riẹn, nọ guọlọ eghwa harẹn ekobaro na uvuẹn amwa eduado na. Na ta rẹn ekobaro ezẹko nẹ aye i rhirhiẹ kugbe jeghwai wian kugbe, ọnana nọ lẹrhẹ igho rẹ aye a ghwọghọ riotọre. Aye ni mẹrẹn oghwa ọduado owu uvuẹn amwa re se Sheffield, omizu ọhworhare owu ro te edje ne, nọ hẹrote oghwa na. Ukoko ri ha uvuẹn amwa na, ni toro igho ọrhẹ enyerẹn oghwa harẹn aye. Jim nọ tare: “Ame ephian i wian kugbe, nẹ ekwakwa i sabu serhọ.” Ekobaro ikpe ri vwo oruru omamọ yi rhirhiẹ oghwa na, aye i damoma nyamwu ẹkwaphiẹrhotọre ukoko na. “Aye e se isese i kẹdẹkẹdẹ na kurhiọke kurhiọke aye a ki re emaren, orho ru, ekobaro na, na ro uvuẹn amwa na ye ghwoghwo.”

Ighwoghwẹmro ọrhẹ ekobaro i kpahenrhọ use na, nime aye i nyamwu ẹkẹ rẹ aye a wian te inọke oduduru owu uvuẹn ẹgbukpe 1938. Itiọrurhomẹmro, iyẹnrẹn o djephia taghene aye i ru riaro uvuẹn owian aghwoghwo na. Uvwre ẹgbukpe isiorin ọvo, ighwoghwẹmro ri ha uvuẹn i Britain ni bunrun omamọ joma te akwasa oborẹ ọ havwọ bi. Fọkiẹ owian aghwoghwo ọnana ra rharhumu tẹnrovi na, ọnana nọ yẹ ihworho i Jehova omẹgbanhon nẹ aye i sabu dẹrughwaroghwu ukpokpogho rọ nọ homaphia ọke uvweri na.

Inyenana, ekobaro ri ha uvuẹn Britain e buẹnrhọ ne, ra mẹriẹn taghene uvweri Osolobrugwẹ re se Armageddon o ti kẹrẹ ne na. Ẹgbukpe ikpe ri vrẹnren na, ekobaro ri ha uvuẹn Britain i bunrun omamọ ne, uvuẹn October 2015, aye i bun te 13,224. Ekobaro enana i djerie phia taghene ne fioma rhọ owian aghwoghwo na vuọnvuọn, yẹ akpenyerẹn rọ mai rhomu kparobọ.