E VWIẸRE mẹ uvuẹn ubiamo December 10, 1936, uvuẹn amwa re se Wichita, Kansas, U.S.A., mẹmẹ yẹ ọkpako usuẹn imizu mẹ awan ẹne. Ọsẹ mẹ ọrhẹ izu mẹ, William ọrhẹ Jean Iseri Jehova. Ọsẹ mẹ yẹ company servant, omaran ye se ohworho rọ hẹrote ewian ugboma ekpako ọke ọrana. Izu mẹ ọduado re se Emma Wagner yo yono izu mẹ urhomẹmro na. Izu mẹ ọduado o yono ihworho buebun urhomẹmro na, ihworho jerẹ Gertrude Steele rọ gare ẹrhẹ imishọnari ẹgbukpe buebun uvuẹn Puerto Rico. * Omarana, ni mi vwo omamọ idje buebun mi na hẹrokele.

Owuọnwọn i satọde owu ọke mia ha ẹgbukpe isiorin, mẹmẹ ọrhẹ ọsẹ mẹ na yẹ ihworho ra nyavrẹn Watchtower ọrhẹ Consolation (re se Awake! vwana). Ọke ọrana, uvweri akpọ ọreva ọ tonrhọ ne. Idọkitọ owu rẹ enyo e mwẹ, no phien ọsẹ mẹ nime o kwe vwobọrhọ uvweri-i. Nọ tare taghene ọsẹ mẹ ọ zofẹn ọ jeghwai guọlọ fiuvweri-i. Idọkitọ na nọ dẹrughwaroghwu ọsẹ mẹ nọ tare, “Mesoriẹ wu vwa ghwiẹ mẹ, ọvwofẹn na!” Ofẹn o mwurun mẹ omamọ, ọrẹn ọsẹ mẹ o fiudugbere. Ọsẹ mẹ nọ ji ha ẹbe rẹn ihworho ri kokori. Isodja owu nọ rhere, idọkitọ na nọ tare, “Ru emru kpahen ọvwofẹn ọnana!” Isodja na o rheri taghene idọkitọ na ọdinyo, nọ ta riẹn, “Riẹ oghwa ya merhẹn, nẹ enyo na o nẹ ukẹruọ!” Aye awanva ni nyarhẹn. Mi vwo ọdaremẹro kpahen uduefigbere i Jehova ọ yẹ ọsẹ mẹ. Ọsẹ mẹ o vwo ekete eva ra da ẹton ihworho uvuẹn Wichita, idọkitọ na ọ ha usuẹn ihworho re riẹ avwaye ya da ẹton!

Ọke mia ha ẹgbukpe ẹrẹnren, ọsẹ mẹ ọrhẹ izu mẹ ni rhẹ oghwa aye ọrhẹ oghwa eyi aye, aye ni bọn oghwa ọkokamo, aye ni ya ga uvuẹn ekete ra mai guọlọ userhumu uvuẹn Colorado. Ame i rhirhiẹ kẹrẹ amwa re se Grand Junction, avwaye yẹ ọsẹ  mẹ ọrhẹ izu mẹ a wian owian ọkobaro jeghwai ru ibiẹ ikebi rẹ aye a hẹrote eramo. Nyoma userhumu i Jehova ọrhẹ owian aye i wianren rhẹ oruru, na sabu ha ukoko owu mwu. Uvuẹn June 20, 1948, mẹmẹ ọrhẹ awọrọ ri rhiabọ dede urhomẹmro na ni bromarhamẹ uvuẹn ẹtẹrhe ame owu, Billie Nichols ọrhẹ aniẹ i ha usuẹn aye. Ọke oru, Billie Nichols ọrhẹ aniẹ ni gare ẹrhẹ oniruo okinhariẹ, omaran ji te ọmọ aye ọrhẹ aniẹ.

Ame i kwomakugbe ihworho ri dabu fioma rhọ owian aghwoghwo Uvie na, maido ekrun Steele—Don ọrhẹ Earlene, Dave ọrhẹ Julia, kugbe Si ọrhẹ Martha—ihworho enana i ghini hobọte akpenyerẹn mẹ omamọ. Aye i djephia mẹ taghene arha ha Uvie na karo, ọ lẹrhẹ ohworho nyerẹn omamọ akpọ.

Ọke mia ha ẹgbukpe 19, Bud Hasty ro rhiẹ ugbehian ame, no seri mẹ ne mi kwomakugbe yi ga uvuẹn United States. Oniruo okinhariẹ ame nọ tare taghene ame ina sabu riẹ Ruston, Louisiana, nime buebun Iseri Jehova ri ha avwaye i havwọ furhiemu. A ta rẹn ame taghene ame i rhe ruẹ uyono ukoko na, o toro uchunu ihworho ri rhere-e. Ame ni mẹrẹn oghwa jeghwai kwaphiẹ ye rhọ hẹrhẹ uyono. Ame i ru uyono ukoko na ephian, ọrẹn uvwre ọkezẹko, mẹmẹ ọrhẹ ugbehian mẹ ọvo ye riẹ uyono na. Ame na ghale ẹmro harẹn omomame, ame na jeghwai kpahanrhọ enọ na. Orhianẹ ẹmro na o vwo udje, ame awanva ne riẹ ibiukpe na, orho vwo ohworho owuorowu rọ kerhọ-ọ! Ẹdẹ owu, omizu ọmase rọ kpako ne nọ tuẹn uyono ẹnya rhọ. Ọke oru, ihworho ame e lele yono, ọrhẹ ihworho erọrọ ri ru furhiemu bi, ni jeghwai tuẹn uyono ẹnya rhọ, ihworho ni me bun uvuẹn ukoko na.

Ẹdẹ owu, mẹmẹ ọrhẹ Bud ni mẹrẹn olori ẹga i Church of Christ, rọ tẹmro kpahen ekete uvuẹn i Baibol na mi vwe rhe kpahen. Ọnana nọ lẹrhere mẹ roro kpahen oborẹ mi ghini vwo ekwerhọ kpahen. Ni mi ha ọsoso ọkprughwre owu yono kpahen enọ rẹ ọhworhare na ọ nọren na. Ọrana ọ ha userhumu mẹ ghini rhe urhomẹmro na, ni mia hẹrhẹ ọke mi na rharhumu vwa olori ẹga ọrọrọ.

Ro jiri ibiesuọn, oniruo okinhariẹ ame nọ tare taghene mi kwa riẹ El Dorado, Arkansas, ya ha userhumu rẹn ukoko owu rọ ha avwaye. Ọke mia ha uvuẹn amwa ọrana, mia ji rharhumu riẹ Colorado. Ọke owu, mẹmẹ ọrhẹ ekobaro erọrọ ni ro imoto mẹ, ọrẹn ame ni vwo asidẹnti uvuẹn amwa Texas, imoto mẹ no biomurun. Ame ni se omizu ọhworhare  owu nọ kpare ame rie, nẹ ame i sabu riẹ uyono. Uvuẹn uyono na, ne ghwoghwori taghene imoto ame o biomurun, aye ni toro igho harẹn ame. Omizu na nọ jeghwai rhẹ imoto mẹ uchunu igho ro te 25 dollar.

Ame ni sabu te Wichita, ame ni mẹrẹn ugbehian ame re se McCartney ro rhiẹ ọkobaro. Emọyen awanva, Frank ọrhẹ Francais jeghwai igbehian mẹ ye te inyenana. Aye ni rhẹ imoto aye rọ ho ne ha mẹ uchunu igho mi rhẹ ọnẹmẹ bi na. Ọnana yẹ ọke ukaro mia mẹrẹn taghene i Jehova ọ hẹrote mẹ nime mi ha Uvie na karo. Ọke ọrana, ekrun i McCartney ni dje omizu ọmase owu re se Bethel Crane mẹ, ọ jeghwai ha Uvie na karo. Izie re se Ruth ro rhirhiẹ Wellington, Kansas, o vwo oruru kpahen urhomẹmro na, ọ tobọ rhiẹ ọkobaro te ọke rọ vrẹn ẹgbukpe 90 ne. Mẹmẹ ọrhẹ Bethel ni rọnmọren uvuẹn ẹgbukpe 1958, ame ni gare ẹrhẹ ọkobaro uvuẹn El Dorado.

Ọke ame e roro kpahen omamọ idje rẹ ame i mẹrẹnren, ame ni brorhiẹn rẹ ame ina ga ekete i Jehova o dje rẹ ame nya ephian. Ame ni vwo uphẹn rẹ ame ina ga ẹrhẹ ọkobaro oghẹnrensan uvuẹn Walnut Ridge, Arkansas. Uvuẹn ẹgbukpe 1962, ne serẹ ame riẹ isukuru Gilead, iklasi ọrẹ 37. Oma ọ merhenrẹn ame omamọ ọke ame a mẹrẹn Don Steele oboran. Isukuru na o hin, ne djeri mẹ ọrhẹ i Bethel riẹ Nairobi, Kenya. Amioviẹ o koko ukẹro ame ọke ame e nẹ New York, ọrẹn oma nọ merhenrẹn ame ọke imizu na e rhiabọ dede ame obẹ Nairobi!

Kenya no mo je ame omamọ, ame ni jeghwai vwo omamerhomẹ kpahen owian aghwoghwo na avwaye. Ihworho ame i kiki yono yẹ Chris ọrhẹ Mary Kanaiya. Aye a ji ga uvuẹn ẹrhẹ ọkobaro obẹ Kenya. Ẹgbukpe rọ ha kpahiẹn, ne dje rẹ ame riẹ Kampala, Uganda, ame yẹ imishọnari ri tu riẹ ẹkwotọre ọrana. Ọrana ọke omamerhomẹ, nime ihworho buebun ri ha uvuẹn ẹkwotọre na i vwo omwemẹ rẹ aye ine yono i Baibol na, aye ni me rhiẹ Iseri Jehova. Ọrẹn, ame a ga ẹgbukpe esa gbẹ uphrophro uvuẹn Africa, ame ni ghwẹrioma riẹ United States, ame ni vwiẹ emọ ame oboran. Ẹdẹ ame e nẹ Africa, amioviẹ ro koko ẹro ame o bun ghwẹ ọke ame e nẹ New York. Ame i me vwo ẹguọlọ kpahen ihworho ri ha uvuẹn Africa, ame ni fiẹrorhọ taghene ame ina ghwẹrioma ẹdẹ owu.

Ame i kwa riẹ amwa owu uvuẹn Colorado, avwaye yẹ ọsẹ mẹ ọrhẹ izu me i ji havwọ. Ọke e vwiẹ ọmọ ọgbọtọ ame Kimberly hin, ibiamo 17 ọ vrẹn, ane mẹ no vwiẹ ọgbọtọ ọreva ye Stephany. Ame i ha owian ọkpokpọ rẹ ame e rhiẹ emiọmọ na ghanghanren, ame ni brorhiẹn rẹ ame ine yono emọ na urhomẹmro na. Ame i guọlọ hẹrokele omamọ udje re dje harẹn ame. Dedevwo emiọmọ a damoma dje omamọ udje harẹn emọ aye nẹ aye i sabu ga i Jehova, orhiẹ emru omemwurhọ taghene emọ na ezẹko i vwa daji urhomẹmro na-a. Jerẹ udje, omizu mẹ ọhworhare ọrhẹ omizu mẹ ọmase i nẹ ukoko i Jehova. Ame i fiẹrorhọ taghene aye ina karorhọ jeghwai hẹrokele omamọ udje re dje harẹn aye.

Ọma ọ merhenrẹn ame ọke ame e yono emọ ame, ame ni ji damoma lele aye ru ekwakwa kugbe. Ra mẹriẹn taghene ame e rhirhiẹ kẹrẹ Aspen, Colorado, ame ephian ne ruiruẹn oberun igbenu. Ọke  ame e ruiruẹn na, nọ yẹrẹ ame uphẹn rẹ ame e lele emọ ame tẹmro kugbe. Ame e ji lele aye riẹ ọko sansan, ame ne siyẹ okokọ erhanren gbikun kugbe ason orho te. Dedevwo aye iphuphẹn, aye na nọ enọ jerẹ, “Me mi ne ru mi rha do?” ọrhẹ “Aruo ohworho ọgo mi guọlọ rọnmọ?” Ame i damoma wọ urhomẹmro na rhẹ uvuẹn ẹhẹn ọrhẹ ọmudu emọ ame. Ame ne jirie harẹn aye, nẹ aye i fioma rhọ iruo Uvie na vuọnvuọn, nẹ aye i jeghwai rọnmọ ohworho ro vwo ẹhẹn ọrana. Ame i damoma lẹrhẹ aye mẹrẹnvwrurhe taghene o fo nẹ aye i brokpakpa rọnmọ-ọ. Ame ni ha ẹmro ọnana phia “Are i vwo edirin ye te ẹgbukpe 23 are i ki rọnmọ.”

Jerẹ eri vwiẹrẹ ame, ame na damoma riẹ uyono jeghwai vwobọrhọ owian aghwogho Uvie na kugbe ọke ephian. Ame ne se ihworho ezẹko ri ha uvuẹn owian ọkobaro na rhiẹ oghwa ame. Habaye, ame na tẹmro rhẹ omamerhomẹ kpahen ọke ame e rhiẹ imishọnari. Ame ni ta rẹn aye taghene ame i fiẹrorhọ taghene ẹdẹ owu ame ephian ine riẹ Africa. Emọ ame i ghini guọlọ ọrana.

Ame e ru ogame ekrun ọke ephian, uvwre ọke ọrana ame ne dje udje oborẹ ọnọ sabu phia uvuẹn isukuru. Ame ni na tarẹn emọ ame nẹ aye i dje udje oborẹ Oseri Jehova ọnọ kpahenrhọ enọ uvuẹn isukuru. Oma ọ merhen aye, aye ine yono uvuẹn izede ọnana. Aye a dua nyarhẹn, ọkezẹko aye ne brenu fọkiẹ ogame ekrun. Ẹdẹ owu, ni mi ta rẹn aye ne aye i ya merhẹn, taghene orho vwo uyono-o. No gberẹ aye unu, aye na viẹ taghene aye i guọlọ yono. Ame ni mẹrẹnvwrurhe taghene ame e ghini yono aye nẹ aye i vwo ọdaremẹro kpahen urhomẹmro na. Aye ni me vwo ẹguọlọ kpahen ogame ekrun na, aye na sabu ta oborẹ ọ ha uvuẹn ẹhẹn aye phia. Ọ da ame, ame i rhe rhon taghene aye e kwerhọ uyono ezẹko uvuẹn ukoko na-a. Ọrẹn, ame i me rhe oborẹ ọ ghini ha uvuẹn ọmudu aye ne. Ame i rhe lele aye roro kugbe, aye ni na mẹrẹnvwrurhe oborẹ i Jehova o roro kpahen ẹmro na.

Owian ame ine yono emọ ame nọ mọ phẹrẹ vrẹn oborẹ ame i roririe rhọ bi. Nyoma userhumu ọrhẹ ọkpọvi Jehova, ame ni dabu yono emọ ame. Ọma ọ merhenrẹn ame ọke aye awanva e rhiẹ ekobaro, ọke aye a ruotọre nẹ isukuru hin, aye ni yono owian rọ nọ sabu yẹ aye igho. Aye ni kwa riẹ Cleveland, Tennessee ya homaba imizu emẹse erọrọ ya ga eketa ra mai guọlọ userhumu. Ọ da rẹ ame taghene aye i riẹ ekete oseseri, ọrẹn oma ọ merhen ame taghene aye a ha akpenyerẹn aye ga i Jehova. Mẹmẹ ọrhẹ ane mẹ ni rharhumu tuẹn owian ọkobaro rhọ, ọnana no rhie uphẹn ẹga buebun firhọ harẹn ame. Ame i gare ẹrhẹ oniruo okinhariẹ ibiọke, jeghwai ru owian uvuẹn omẹvwa.

Bọmọke emọ ame i ki riẹ Tennessee, aye ni riẹ London, England, jeghwai riẹ oghọn ukoko rọ ha avwaye. Stephany nọ mẹrẹn Paul Norton avwaye. Ọke ọrọrọ aye a nya, Kimberly nọ mẹrẹn Brian Llewellyn rọ ji ga avwaye. Paul ọrhe Stephany ni rọnmọren ọke Stephany ọ te ẹgbukpe 23 ne, Brian ọrhẹ Kimberly ni rọmọnren ẹgbukpe rọ ha kpahiẹn ọke Kimberly o te ẹgbukpe 25 ne. Aye i ghini vwo edirin ye te ẹgbukpe 23, aye i ki rọnmọ. Ọma ọ merhen ame fọkiẹ ihworho aye i rọnmọren na.

Emọ ame i ta rẹn ame taghene ame kugbe ọsẹ ọrhẹ izu ọduado aye yi ha userhumu rẹn aye sabu huvwele urhi Jesu ra na ‘rha guọlọ Uvie na vwẹre,’ erhirhiẹ na ọrhọ tobọ gbanhon. (Matt. 6:33) Uvuẹn ubiamo April 1998, Paul ọrhẹ Stephany ni riẹ isukuru Gilead iklasi ọrẹ 105, ọke oru ne dje rẹ aye riẹ Malawi, Africa. Uvuẹn ọke owu na, ne sẹ Brian ọrhẹ Kimberly ya wian uvuẹn oghọn ukoko rọ ha uvuẹn London, ọke oru ne dje rẹ aye riẹ oghọn ukoko rọ ha uvuẹn Malawi. Oma nọ merhenrẹn ame omamọ, nime emọ ame a ha akpenyerẹn aye ga i Jehova vuọnvuọn.

Uvuẹn January 2001, ne seri mẹ nyoma ifonu jerẹ oborẹ mi hunute uvuẹn ọtonrhọ na. Omizu Marais ro rhiẹ oniruo ọrẹ Translation Services, nọ ta mẹ taghene imizu ezẹko a guọlọ ru isukuru harẹn ihworho ra rhian erhianrhian uvuẹn akpọ na ephian, na guọlọ yoni mẹ ne mi sabu yono awọrọ dedevwo mi ha ẹgbukpe 64. Mẹmẹ ọrhẹ ane mẹ ni  nẹrhomo jeghwai roro kpahiẹn rhẹ izu ame, nẹ aye i yẹ ame urhebro. Aye ni tare taghene ame ina sabu nyarhẹn, dedevwo aye i guọlọ userhumu ame. Ni mi se omizu na, ni mi ta riẹn taghene ame ine riẹ isukuru na.

Ame ni me rhe taghene izu mẹ o vwo i kansa. Ni mi ta riẹn taghene mi na daji ni mi lele omizu mẹ hẹrote yi. Izu mẹ nọ tare, “O fori ne wu nya, oma ọnọ merhen mẹ wu rha nya.” Omaran omizu mẹ Linda o ji vwo rhẹ ẹhẹn. Ame i ghini vwo ọdaremẹro kpahen uruemru ra homaze, aye i vwori ọrhẹ imizu ukoko na ri sa rẹ aye erhumu! Ọke ame e riẹ Watchtower Educational Center uvuẹn Patterson, Linda no seri mẹ taghene izu mẹ o hwuru. Ọke ọ ha akpọ, ọ ha urhebro harẹn ame taghene ame i fioma rhọ owian ame, ame ni ghini ru omaran.

Ekete e tu dje ame nya yẹ oghọn ukoko rọ ha uvuẹn Malawi, ekete emọ ame i havwọ, oma ọ ghini merhen ame omamọ. Ame ephian ni kwomakugbe! Ọke oru, ame ni riẹ ẹkwotọre erọrọ jerẹ Zimbabwe, ọrhẹ Zambia. Ọke ame a ga ẹgbukpe esa gbẹ uphrophro uvuẹn ẹkwotọre erana hin, ame ni ghwẹrioma riẹ Malawi nẹ ame i sabu nẹ iyẹnrẹn kpahen Iseri Jehova ri rioja uvwre ọke aye e je vwobọrhọ uvweri. *

Ọgbọrọrọ, amioviẹ nọ kokori uvuẹn ukẹro ame, uvuẹn ẹgbukpe 2005 ame ni ghwẹrioma riẹ amwa ame Basalt, Colorado, avwaye mẹmẹ ọrhẹ ane mẹ a ga ẹrhẹ ọkobaro. Uvuẹn ẹgbukpe 2006, Brian ọrhẹ Kimberly ni kwa kẹrẹ ame, nẹ aye i sabu mọrọn emọ aye awanva, Mackenzie ọrhẹ Elizabeth. Paul ọrhẹ Stephany i ji ha uvuẹn oghọn ukoko Malawi, Paul ọ ha usuẹn Umẹ rọ hẹrote oghọn ukoko i Malawi. Mi joma te ẹgbukpe 80 ne, oma ọ merhen mẹ mia mẹrẹn taghene idama mi lele wian ẹgbukpe buebun na kpare ehwan mia kpara bi. Oma ọ merhen ame fọkiẹ omamọ udje re dje harẹn ame, rẹ ame i jeghwai damoma hẹrokele, ọnana ọ rhua erere vwe ame ọrhẹ ivwremọ ame.