Urhomu-ẹmro na o djephia taghene ọnyikọ Paul ọ rionbọrhọ ọhọre Osolobrugwẹ rẹ ọwan e se uvuẹn i Baibol na.

Arha hunute Hebrews 4:12 uvuẹn ẹbe ukoko na, o djephia taghene i Baibol na o vwo omẹgbanhon ro no wene akpenyerẹn, o serhọ erhe vwẹruọ ye izede ọrana. Ọrẹn, o fori na dabu roro kpahen oborẹ Hebrews 4:12 ọ tare uvuẹn izede ọrọrọ. Paul ọ ha urhebro rẹn Ilele Kristi ra djẹ i Hebrew, nẹ aye i ru ọhọre Osolobrugwẹ. Buebun enana i ha uvuẹn eyaya ọfuanfon na. Paul ọ ha emọ Israel re simi nẹ Egypt dje udje. Aye i vwo ifiẹrorhọ rẹ aye ina ha ‘otọre rọ zẹ rhẹ imiki ọrhẹ amiahon’ na riuku, ọnana ekete aye ine vwo obọdẹn omeromo.—Ex. 3:8; Deut. 12:9, 10.

Ọrana yẹ ọhọre Osolobrugwẹ. Ọrẹn, ọke oru, emọ Israel ni rhiẹ eludu, aye erhe dje esegburhomẹmro phia-a, buebun aye arha ha ọtọre ive na riuku-u. (Num. 14:30; Josh. 14:6-10) Ọrẹn, Paul nọ tare taghene o ji vwo ‘ive rẹ ọwan ina ro omeromo’ [Osolobrugwẹ]. (Heb. 3:16-19; 4:1) ‘Ive’ ọrana ọ ha usuẹn ọhọre Osolobrugwe. Jerẹ oborẹ Ilele Kristi ra djẹ i Hebrew na i ruru, ọwan ina ji sabu se jeghwai ru ọhọre Osolobrugwẹ. No djephia taghene ive ọrana o nẹ i Baibol na rhe, Paul nọ rionbọrhọ Genesis 2:2 ọrhẹ Psalm 95:11.

Ọrẹ imwẹro, o fori nẹ oma ọ merhen ọwan taghene ‘o ji vwo ive rẹ ọwan ina ro omeromo’ [Osolobrugwẹ]. Ọwan i vwo imwẹro taghene ifiẹrorhọ rẹ ọwan ina ro omeromo Osolobrugwẹ ọnọ ghini phia, ọwan i jeghwai kpare idjaghwẹ ra na ruiẹ ne. Ọwan i vwa kpare idjaghwẹ ọnana nyoma ẹnyalele urhi Moses yanghene ru ekwakwa erọrọ-ọ. Ukpomaran, nyoma esegburhomẹmro, ọwan a sabu ru ọhọre Osolobrugwẹ ọke ephian rhẹ omamerhomẹ. Jerẹ oborẹ a hunute oberun na, oduduru ihworho buebun uvuẹn ekete akpọ na o keri te, e yono i Baibol na, jeghwai yono kpahen ọhọre Osolobrugwẹ. Buebun aye ni wene akpenyerẹn aye, dje esegburhomẹmro phia, jeghwai rhiẹ Iseri Jehova. Izede rẹ aye a sabu wene akpenyerẹn aye o djephia taghene ‘ẹmro Osolobrugwẹ o nyerẹn, ọ jeghwai vwo omẹgbanhon.’ Ọhọre Osolobrugwẹ ra hunute uvuẹn i Baibol na, ọ hobọte akpenyerẹn ọwan ne, ọnọ jeghwai rha hobọte yi ọke ephian.