Mẹrẹn Erere nẹ Ọkpọvi Jehova Inyenana
ORHIENBRO ẸGHWANREN UVUẸN POLAND
“Ọke mia ha ẹgbukpe 15 yi mie bromarhame, ibiamo erhan a vrẹn, ni mi fi obọ rhọ owian ọkobaro ibiọke. Ẹgbukpe owu ọ vrẹn, ni mi jeghwai fi obọ rhọ owian ọkobaro ọke ephian. Ọke mia ruotọre nẹ isukuru, ni mi tare taghene mi na ya ga ekete a mai guọlọ ighwoghwẹmro Uvie na. Mi guọlọ kwa nẹ ekete mi havwọ bi jeghwai kwa nẹ oghwa izu mẹ ọduado ro vwo rhiẹ Oseri Jehova mie lele rhirhiẹ. Ọke oniruo okinhariẹ ame ọ ta mẹ taghene ẹkwotọre mi ne ghwoghwo yẹ amwa e vwiẹ mẹ, oma ọrhọ merhen mẹ-ẹ! Mi damoma nọ jọ rhọ mẹrẹn oborẹ evwan i biomurun mẹ te. Ẹhẹn mẹ no seriotọre, ni mi nẹ avwaye ye roro kpahen oborẹ oniruo okinhariẹ na ọ tare na. Ni mi ta rẹn igbehian mẹ: ‘Nọ họhọre taghene mie ruẹ jerẹ Jonah. Ọrẹn ọke oru, Jonah no riẹ Nineveh. Omarana, mi ne ji riẹ ekete a ta mẹ taghene mi nya na.’
“Mi gare uvuẹn ẹrhẹ ọkobaro uvuẹn amwa mẹ te ẹgbukpe ẹne ne, mi jeghwai mẹrẹn ẹghwanren rọ havwiẹ ra na nyalele ọkpọvi. Iroro esọsọ yẹ ebẹnbẹn mi vwori bi. Mia mẹrẹn omamerhomẹ ne. Uvuẹn ubiamo owu, mi vwo uyono i Baibol ri te 24. Jehova ọ ha userhumu mẹ tobọ tuẹn uyono rhọ rhẹ izu mẹ ọduado rọ kparehaso mẹ bi.”
ERERE OMAMERHOMẸ UVUẸN FIJI
Ọmọ uyono i Baibol owu uvuẹn Fiji o roro sẹ ono riẹ ọmẹvwa ẹkwotọre gbinẹ ono lele esa ye riẹ orẹ uvwiẹ omizu aye. Esa ye ọ ta riẹn taghene ọnọ sabu riẹ omẹvwa na. Nọ ta rẹn esa ye taghene orho ru, ọnọ homaba ye uvuẹn orẹ na. Ọrẹn, ọke o nẹ omẹvwa na rhe, nọ mẹrẹnvwrurhe taghene o fo no fioma yen rhẹ erhirhiẹ imwofẹ-ẹn, omarana ọrhọ nya-a.
Ọke esa ye ọ ta rẹn imizie taghene aniẹ o riẹ “omẹvwa Iseri Jehova,” taghene orho ru nẹ ono kwomakugbe aye, imizie ni tare, “Ọ vwọ samọ rhe-e; Iseri Jehova i vwa riorẹ uvwiẹ-ẹ!” *
Fọkiẹ ọrana, oma nọ merhen esa ye taghene aniẹ o mevi kẹrẹ oborẹ o vwo esegburhomẹmro kpahen ọrhẹ ẹhẹn obrorhiẹn yen. Fọkiẹ orhiẹnbro ọmase na, nọ mọ mẹrẹn uphẹn ro no ghwoghwo rẹn esa ye ọrhẹ awọrọ. Me yo nẹ erhumie rhe? Esa ye nọ tuẹn uyono i Baibol rhọ, nọ jeghwai lele aniẹ riẹ uyono.
^ Udjoghwẹmro 7 Se “Questions From Readers” uvuẹn Watchtower ọrẹ December 15, 2001.