Wa rha guọlọ yono i Baibol na, wu na sabu nọ oma, ‘Me mi fiẹrorhọ taghene mi ne yono nie rhe?’ Ọrẹn, o fori na jomarhotọre neneyo oborẹ e fiẹrorhọ mie oma ọwan, nọ jọ rhọ lẹrhẹ ọwan roro taghene a sabu yono emru ọkpokpọ-ọ. Marhẹ ene ru rhie ẹhẹn firhọ yono i Baibol na?

Nẹrhomo na yọ ẹghwanren. Rẹ i Jehova nọ ha userhumu wẹn vwẹruọ oborẹ ọ guọlọre ne wu yono vwana. (Jas. 1:5) Wu vwa hẹroso irherhe wu vwo vrẹn ne-e.—Prov. 3:​5, 6.

Ha uphẹn rẹn i Baibol na no sun akpenyerẹn ọnọ. “Ẹmro Osolobrugwẹ o nyerẹn.” (Heb. 4:12) “Ẹmro” Osolobrugwẹ ọnọ sabu hobọte ọwan uvuẹn izede sansan ọke erhe seyi—ọrẹn, a sabu yono emru owuorowu nẹ uvuien sa-a, jokpanẹ e rhie ẹhẹn firhọ seyi.

Vwo ọdaremẹro kpahen iyono i Jehova ephian. Iyono i Jehova i họhọ “obọdẹn emaren” re mwuegbe rhotọre. (Isa. 25:6) Wu vwa tiẹn “emaren” na ji ha orhọmo kpe oma, fọkime we roro taghene o jẹ ẹriọ-ọ. Wu rha riẹ emaren na, wu na mẹrẹn evwẹnvuọn ọrhẹ erere nẹ oborẹ i Jehova o tiobọnu!