O fo ne roro taghene idibo awan 70 na, i sẹrerhumuji Jesu ne yanghene ọ tuekwẹre kpahen aye, fọkime aye a havwiẹ ọke rọ ha Emaren Owuọwọn Ọrovwori na mwu-u. Jesu yo ruẹ ẹkwaphiẹrhotọre na neneyo ọye ọrhẹ inyikọ na ọvo, i rhirhiẹ ye ọke ọrana.

Jesu o vwo omamerhomẹ kpahen awan 12 na, omaran ji te awan 70 na. Ehworhare awan 12 yi Jesu ọ kiki djẹ, no seri aye inyikọ ye. (Luke 6:​12-16) Ọ ha uvuẹn i Galilee “ọke ro se awan Ikpereva na,” ji dje “aye ye ghwoghwo Uvie Osolobrugwẹ ji simi ere kpomẹ.” (Luke 9:​1-6) Ọke oru uvuẹn Judea, Jesu “nọ djẹ awan 70 erọrọ ji dje aye nyarhẹn eveva.” (Luke 9:51; 10:1) Itiọrurhomẹmro, Jesu o vwo idibo uvuẹn ekete sansan re ghwoghwo iyẹnrẹn esiri na.

Itu i Jew ri rhiẹ idibo i Jesu ina ji riorẹ Ọnyavrẹn na kẹgbukpe kẹgbukpe, ọkezẹko aye rhẹ ekrun aye yi na riorẹ na. (Ex. 12:​6-11,17-20) Bọmọke e ki kpe i Jesu, ọye rhẹ inyikọ ye ni riẹ Jerusalem. Ọrẹn, orhiẹ idibo yi ephian ri ha uvuẹn Judea, Galilee, ọrhẹ Perea, yi Jesu o seri ni me lelie riorẹ Ọnyavrẹn na-a. O fiotọre taghene Jesu ọ guọlọre nẹ ọye ọrhẹ inyikọ na ọvo, i rhirhiẹ ye ọke ọrana. Nọ ta rẹn aye: “Mi ghini guọlọ riorẹ Ọnyavrẹn ọnana rhẹ are bọmọke mi na ki rioja.”—Luke 22:15.

O vwo oborẹ ọsoriẹ i Jesu o ruie omaran. Phẹrẹkpẹ, Jesu ro rhiẹ “Ọmogegede Osolobrugwẹ ro no tiẹ ọdandan akpọ na nie,” ono hwuo. (John 1:29) Uvuẹn Jerusalem yo no hwu, ro rhiẹ ekete ra ha zẹ izobo rẹn Osolobrugwẹ awodẹrhe. Uhwu i Jesu ọnọ lẹrhẹ ọwan vwo ugbomọphẹ rọ do ghwẹ ọrẹ emọ Israel, ọke aye a riẹ ọmogegede re kperi uvuẹn ason aye e nẹ Egypt. (1 Cor. 5:​7, 8) Nyoma izobo i Jesu, inyikọ awan Ikpereva na ni ne rhiẹ esiri harẹn ukoko Ilele Kristi. (Eph. 2:​20-22) Ọrẹ omamerhomẹ, Jerusalem ro rhiẹ amwa ọfuanfon na o vwo “usimo 12,” ra ya odẹ “inyikọ awan 12 ọrẹ Ọmogegede na” rhọ. (Rev. 21:​10-14) Itiọrurhomẹmro, inyikọ enana i vwo owian ọduado sekpahen orugba ọhọre Osolobrugwẹ. Ọnana yọ soriẹ i Jesu ọ ha aye ba oma ọke rọ riorẹ Ọnyavrẹn rọ kẹta, nọ sabu mwuegbe aye hẹrhẹ oborẹ ọ ha obaro—nọyẹ, Emaren Owuọwọn Ọrovwori na.

Idibo awan 70 na ọrhẹ erọrọ a homaba i Jesu riorẹ na-a. Udabọ ọrana, idibo yi ephian ri fuevwan kpahiẹn, ina mẹrẹn erere nẹ irueruo ọnana ri Jesu ọ ha mwu—nọyẹ, Emaren Owuọwọn Ọrovwori na. Ilele Kristi ra djẹha ọke oru, ine lelie riẹ ọphọ ọrẹ uvie kugbe, ri Jesu ọ ta kpahen rẹn inyikọ na uvuẹn ason ọrana.—Luke 22:​29, 30.