Iyẹnrẹn Kpahen Ere Ghwoghwo Uvie Na

Ọ Mẹrẹn Obọdẹn Omamerhomẹ Uvuẹn Akpenyerẹn Yen

JESU ọ tare taghene ọye o rhe idibo yi. (John 10:14) Ohworho orho vwo omamọ ẹhẹn, ji vwo ẹguọlọ kpahen ufuoma ọrhẹ uruemru ọsoso, ọravwọ ọnọ sabu rhiẹ odibo i Jesu. Aruẹ ohworho ọrana ọnọ mẹrẹn obọdẹn omamerhomẹ uvuẹn akpenyerẹn yen, jerẹ oborẹ ọ phia rẹn ọmase owu uvuẹn Belgium. Ọnana yẹ ikuegbe yi:

“Ọke Iseri Jehova a ha obọ kanren ighwe mẹ, ẹhẹn mẹ o seriotọre omamọ, mie ji roro kpahen oborẹ mi ne ru fiobarhọ akpenyerẹn mẹ. Ọke aye a ta mẹ taghene phẹrẹkpẹ ene ruẹ emru kpahen ebẹnbẹn ri ha akpọ na, oma ọ merhenren mẹ omamọ, ọrẹn, oma ọ merhen mẹ kakaka taghene Osolobrugwẹ yo no ruie-e. Mi dobọ ishọshi ẹnya ji uvwre ẹgbukpe ẹrẹnren ri vrẹnren, nime mi vwo utuoma kpahen irueruo omeru aye e ruẹ. Ọke mia mẹrẹn Iseri Jehova hin, ni mi mẹrẹnvwrurhe taghene ọnọ bẹn omamọ re ne nyerakpọ, ọrẹn e rhe Osolobrugwẹ-ẹ.

“Ọrẹ omemwurhọ, ọke Iseri Jehova na a kọn bru mẹ rhe uvwrọke ezẹko, mia rha mẹrẹn aye ghwomara-an. Ni mi mwuomarhọ. Mie phopho isigẹti ri te ipakẹti eva kẹdẹkẹdẹ, jeghwai ha imwu egbogbanhon. Nime mi guọlọ lele ọsẹ mẹ ọduado ro hwu ne tẹmro, ni mi fiomarhọ irueruo eda. Fọkiẹ ọnana, mẹmẹ ọvo i rha havwiẹ ason, ikpodje ne kpokpi mẹ! Ọnana ọ phiare uvwre ibiamo buebun. Kowuọwọn kowuọwọn, ofẹn no mwu mẹ rẹ omẹmẹ ọvo ine rhirhiẹ ye ason.

“Ọrẹn ẹdẹ owu, ọke mia nya uvuẹn izede ọrọrọ rọ vẹnẹ izede mia nya bi, ni mi te ekete ra wian owian ebanbọn rọ doro omamọ. Ọ gberi mẹ unu omamọ ọke mia mẹrẹn otu buebun avwaye. Ọke mia joma tikẹrẹ aye, ni mi mẹrẹnvwrurhe taghene Iseri Jehova ya bọn Aghwẹlẹ Uvie. Ni mi karorhọ ọke Iseri Jehova a kọn bru mẹ rhe uvuẹn oghwa mẹ, ji roro kpahen oborẹ akpọ na ono rhirhiẹ orhianẹ ihworho ephian a sabu nyerẹn jerẹ ihworho enana.

“Oma ọnọ merhen mẹ Iseri Jehova i rha sabu rharhumu bru mẹ rhe, omarana ni mi tẹmro rẹn owuọwan usuẹn ihworho ra wian owian ebanbọn na. Mi nẹrhomo vwe Osolobrugwẹ, ẹdẹ ikpe a vrẹn, Oseri Jehova ọrukaro ro bru mẹ sa bi, nọ rharhumu bru mẹ rhe. Nọ ta mẹ taghene ọ guọlọre mi rharhumu tuẹn uyono i Baibol rhọ, oma nọ merhenren mẹ, ni mi kweri ogege. Nọ ha use mẹ ne mi rhiẹ uyono ukoko uvuẹn Aghwẹlẹ Uvie. Ni mi rhiabọ dede use na. Oborẹ mi mẹrẹnren o gberi mẹ unu! O jiri ne ri mia guọlọ aruẹ ihworho enana ri vwo ẹguọlọ kpahen omomaye, rẹ oma ọ ji merhan. Ọrẹn vwana, mi mẹrẹnren aye ne!

“Ọke oru, ni mi riẹ iyono ukoko na ephian. Ọke ikprughwre esa a vrẹn hin, ni mi dobọ uruemru isigẹti ephopho ji. Ni mi donron ẹbe ọrhẹ ikpekporo mi vwori, re jiri irueruo ephẹbo fughwẹ, ni mi mẹrẹnvwrurhe taghene ikpodje na i vwe rhe kpokpi mẹ pha-an. Ni mie nyerakpọ mẹ lele iruemru-urhi Jehova ri ha uvuẹn i Baibol na, ọke ibiamo esa a vrẹn hin, ni mi tuẹn aghwoghwo rhọ. Ibiamo erhan a vrẹn hin, ni mi bromarhame. Ẹdọke eva a vrẹn ọke mie bromarhame hin, ni mi tuẹn owian ọkobaro ibiọke rhọ.

“Mi kpẹmẹ i Jehova fọkiẹ ekwakwa irhorhomu ephian ro ru ha mẹ ne. Vwana, mi mẹrẹn obọdẹn omamerhomẹ uvuẹn akpenyerẹn mẹ ne. Itiọrurhomẹmro, odẹ i Jehova ọkponghwa ọgbogbanhon, mi mẹrẹn usimi ọrhẹ ẹruete uvuien. (Proverbs 18:10) Ọnana ọ lẹrhere mẹ roro jerẹ ọbo ijoro rọ ya Psalm 84:​10, ro tare taghene: ‘Ẹdẹ owu uvuẹn egodo ọnọ o rhomu ghwẹ ẹdẹ uriusionrin uvuẹn ekete ọrọrọ! Mi brorhiẹn mi ne mevi anurẹsẹ oghwa Osolobrugwẹ mẹ ukperẹ mi ne rhirhiẹ oghwọgbọ evwọkon na.’”

Ọmase ọnana ọ mẹrẹn obọdẹn omamerhomẹ uvuẹn akpenyerẹn yen. Ọnana ọnọ ji sabu phia rẹn kohworho kohworho rọ guọlọ i Jehova rhẹ omamọ ẹhẹn.