Ja Osolobrugwẹ ro Fori ne Rhe Kpahen

VWO emru ọghoghanren ro vruẹ uvuẹn akpenyerẹn ọnọ? Orhianẹ wa ghwai rhe kpahen Osolobrugwẹ-ẹ, nọyẹ emru ọghoghanren o ghini vruẹ uvuẹn akpenyerẹn ọnọ. Mesoriẹ? Nime iduduru ihworho buebun i mẹrẹnvwrurhe ne taghene re ne rhe Osolobrugwẹ ro vwo i Baibol na, ọ yẹrẹ aye erere buebun uvuẹn akpenyerẹn aye ne. Erere enana a tuanrhọ ogege wu rhe rhe Osolobrugwẹ, ọnọ ji tọ ya ruẹ obaro na.

Jehova Osolobrugwẹ ro vwo i Baibol na, ọ guọlọre nẹ ọwan i rheyi. Ọgba ijoro na ọrhọ ya: “Jenẹ ihworho i rhe taghene wẹwẹ, rẹ odẹ ye o rhiẹ i Jehova, wẹwẹ ọvo yẹ Ọrọ Mai Rierun ọsoso akpọ na ephian.” Jehova o rheri taghene ono rhiẹ emru erere rẹn ọwan re ne rheyi. Nọ tare, “Mẹmẹ, Jehova, yẹ Osolobrugwẹ are, Ohworho ro yono are nẹ are i mẹrẹn erere harẹn omobọ are.” Marhẹ ene ru mẹrẹn erere erhe rhe i Jehova Osolobrugwẹ rọ Mai Rierun na?—Psalm 83:18; Isaiah 48:17.

Erere ezẹko kirighwo ra mẹrẹn yẹ ọkpọvi re vwo na sabu nyerẹn ghele ebẹnbẹn akpọ, obọdẹn ifiẹrorhọ kpahen obaro na, kugbe ẹhẹn ro totọre. Habaye, arha dabu rhe i Jehova, o mwu ọwan ha ukẹro rọ vẹnẹren nẹ enọ eghoghanren rẹ ihworho a dẹrughwaroghwẹ uvuẹn akpọ na inyenana. Me yẹ enọ eghoghanren enana?

Akpenyerẹn Ọnọ o Vwo Otọre?

Dedevwo ituakpọ i ru riaro omamọ ne uvuẹn itẹknọlọji, ihworho a ji nọ enọ eghoghanren enana inyenana: ‘Mesoriẹ mie nyerẹn? Bọgo mia nya mi rhe hwu? Me yẹ akpenyerẹn o vi sekpahen?’ Ohworho ọrhọ sabu mẹrẹn obọdẹn ẹkpahenrhọ rẹn enọ enana-a, ọ sabu vwo omamerhomẹ-ẹ. Emru omana ọ phia rẹn ihworho buebun ne. Uvuẹn ẹgbukpe 1997 uvuẹn Germany, na nọ ihworho buebun kpahen oborẹ ọsoriẹ e nyerẹn, buebun ni tare taghene akpenyerẹn o vwo otọre-e. Ọkezẹko emru omana ọ ji phia uvuẹn ekete we rhirhiẹ.

Orhianẹ ohworho o roro taghene akpenyerẹn o vwo otọre-e, ọnọ bẹn rọ nọ djiroro kpahen obaro na. Fọkiẹ ọnana, ihworho buebun na hatua akpenyerẹn ọduado ọrhẹ efe. Ọrẹn udabọ ọrana, oma ọ vwọ ji merhen aye-e. Ihworho erhe roro taghene akpenyerẹn aye o vwo otọre-e, nọ lẹrhẹ ofu ze aye ji guọlọ kpe oma aye hwuẹ. Ọrana yẹ oborẹ ọ phia rẹn uphuphẹn ọmase owu ro vwo erhumu, iyẹnrẹn ọrẹ International Herald Tribune, nọ tare taghene e vwiẹ ọmase na “uvuẹn ekrun ri fe dienrhọ ra jeghwai họghọ riẹn.” Dedevwo ekwakwa i serhọ riẹn, ọrẹn ẹhẹn yen o seriotọre no ji roro taghene akpenyerẹn ye o vwo otọre-e. Nọ ha umwu ro fomu ohworho rhẹ omerhẹn, ọrẹn no hwuru obẹta ye. Ọkezẹko wu rhe aruẹ ihworho omana rẹ oma ọ vwọ merhan rẹ aye ọvo i kpe oma aye hwu.

Ọrẹn wu rhon kpahen ihworho ra ta taghene itu isayẹnsi ina sabu ta rẹn ọwan kpahen akpenyerẹn dẹ ne? Ọbe i Germany owu re se Die Woche re fomẹ phia kọkprughwre kọkprughwre nọ tare: “Dedevwo ẹmro isayẹnsi ọnọ sabu rhiẹ urhomẹmro, aye i sabu kpahanrhọ enọ kpahen ekwakwa erẹ ẹhẹ-ẹn. Iyono ekwakwa ri varhe yanghene iyono isayẹnsi erọrọ i sabu yẹ ọwan urhebro ọrhẹ omefuon ra guọlọre-e.” Itu isayẹnsi i sabu lẹrhẹ ọwan yono ekwakwa buebun kpahen arhọ ne, ọrhẹ ekwakwa ra sẹrorẹ arhọ. Ọrẹn, isayẹnsi ọ sabu ta rẹn ọwan kpahen obaro na ọrhẹ oborẹ ọsoriẹ a ma ọwa-an. Ọwan i rha hẹroso isayẹnsi ọvo, a sabu mẹrẹn ẹkpahenrhọ rẹn enọ ri sekpahen akpenyerẹ-ẹn. Itiọrurhomẹmro, ọbe iyẹnrẹn ọrẹ Germany re se Süddeutsche Zeitung ọ tare taghene, “ituakpọ i guọlọ ọkpọvi ghwẹ ọke bi.”

Erhe ti Ọmemama na nie, ọrọmo yọ nọ ghini sabu yẹ ọwan ọkpọvi ra guọlọre? Ọye yọ maren ọwan, omarana ono vi rhe oborẹ ọsoriẹ e nyerẹn uvuẹn otọrakpọ na. Baibol na o djephia taghene Jehova ọ ma ituakpọ nẹ aye vwiẹ vuọn otọrakpọ na jeghwai hẹrote ye. Jehova ọ guọlọre nẹ ituakpọ i dje iruemru enẹyen phia uvuẹn irueruo aye ephian, uruemru jerẹ orhienbro ọsoso, ẹghwanren, ọrhẹ ẹguọlọ. Ọwan i rhe vwẹruọ oborẹ ọsoriẹ i Jehova ọ ma ọwan, na na sabu rhe oborẹ ọsoriẹ e nyerẹn.—Genesis 1:26-28.

Me wu na Sabu ru?

Orhianẹ wa ji mẹrẹn ẹkpahenrhọ rẹn enọ enana bi vwo-o? Jerẹ: ‘Mesoriẹ mie nyerẹn? Bọgo mia nya mi rhe hwu? Me yẹ akpenyerẹn o vi sekpahen?’ Baibol na o jiririe wẹn ne wu dabu rhe i Jehova rhọ. Itiọrurhomẹmro, Jesu ọrhọ ta: “Ọnana o mevirhọ arhọ i bẹmẹdẹ ọrẹ aye ine rhe owẹwẹ Osolobrugwẹ urhomẹmro owu ọvo na, ọrhẹ ọrẹ wu dje rhe, Jesu Kristi.” Baibol na o ji jirie ne wu vwo iruemru ọ ga Osolobrugwẹ, maido nẹ ẹguọlọ, ne wu ji djephia taghene wu guọlọ nyerẹn uvuẹn otọre usuon Uvie Osolobrugwẹ. Ọke ọrana ne wu ne vwo akpenyerẹn ro vwo otọre ọrhẹ omamerhomẹ, kugbe obọdẹn ifiẹrorhọ kpahen obaro na. Habaye, ne wu na ji mẹrẹn ẹkpahenrhọ rẹn enọ eghoghanren ri sekpahen akpenyerẹn ra lẹrhuọ brudu.—John 17:3; Ecclesiastes 12:13.

Marhẹ ẹkpahenrhọ rẹn enọ eghoghanren enana ine ru ha userhumu wẹn? Jenẹ a mẹrẹn oborẹ o ru ha userhumu rẹn ọhworhare owu re se i Hans. * Ikpe ezẹko ri vrẹnren na, Hans o vwo imwẹro kpahen Osolobrugwẹ ọrẹn imwẹro ọrana ọ ghanren riẹ-ẹn. Hans nọ ha imwu egbogbanhon, nọ kpare emẹse sansan, no gbozighi, o ji vwo ẹguọlọ kpahen imotosaikoro ẹghwa. Ọrẹn nọ tare, “Akpenyerẹn mẹ ofefe, mie ji vwo omamerhomẹ-ẹ.” Ọke i Hans ọ joma te ẹgbukpe 25 ne, no brorhiẹn ro no rhe Osolobrugwẹ rhọ nyoma rọ dabu se i Baibol na. Ọke i Hans ọ dabu rhe i Jehova ne ji vwẹruọ oborẹ akpenyerẹn o sekpahen ne, no wene aruẹ akpọ ro nyerẹn jeghwai bromarhame rhiẹ owuọwan usuẹn Iseri Jehova. Hans ọ wian owian aghwoghwo na vuọnvuọn emru ẹgbukpe ikpe ri vrẹnren na. Hans nọ tare: “Ra ga i Jehova yẹ akpenyerẹn rọ mai rhomu kparobọ. O vwo oborẹ ana ha dje yi-i. Ri mie rhe i Jehova ne na, ọ lẹrhẹ akpenyerẹn mẹ vwo otọre ne.”

Itiọrurhomẹmro, rhẹ enọ kpahen akpenyerẹn ọvo yẹ enọ re kpokpo ihworho buebun ẹhẹ-ẹn. Rẹ erhirhiẹ akpọ na o biomẹrhọ biomẹrhọ na, ihworho buebun ne brudu kpahen onọ ọghoghanren ọrọrọ.

Mesoriẹ Ekwakwa Ibiobiomu a Phia?

Ikpokpogho i rha homaphia, ono owu rọ kọn rhẹ ẹhẹn ihworho buebun yẹ: Mesoriẹ ọ phia? Na sabu nyerẹnghele omiamiamo rẹ ikpokpogho a sua, ana vi guọlọ ẹkpahenrhọ rẹn onọ ọrana. Arha mẹrẹn obọdẹn ẹkpahenrhọ-ọ, omiamiamo na ono rhirhiẹ avwaye jeghwai lẹrhẹ ọwan mwuomarhọ. Jerẹ udje, roro kpahen oborẹ i Bruni o rhiẹromẹrẹn.

Bruni nọ tare, “Ẹgbukpe ezẹko ri vrẹnren na, ọmọ mẹ ọgbọtọ no hwuru. Nime mi vwo imwẹro kpahen Osolobrugwẹ, ni mi bru orherẹn owu rọ ha amwa ame nọ yẹ mẹ urhebro. Nọ ta mẹ taghene Osolobrugwẹ ọ ha i Susanne riẹ odjuwu no rhiẹ ọmakashe. Ẹhẹn mẹ no seriotọre omamọ, ni mi vwo utuoma kpahen Osolobrugwẹ fọkime o kpe ọmọ me.” Bruni o mwuomarhọ ji mẹrẹn omiamiamo ẹgbukpe buebun. “Ọke oru, Oseri Jehova owu no dje ha mẹ nẹ uvuẹn i Baibol na rhe taghene o fo mi vwo utuoma kpahen Osolobrugwẹ-ẹ. Jehova ọ ha i Susanne riẹ odjuwu-u, ọye ji rhẹ ọmakashe-e. Ijẹgba yọ suẹ emiamo ọnẹyen. Susanne o ronmoma vwana hẹrhẹ ọke Osolobrugwẹ ọnọ rhọmiẹ nuhwu. Ni mi ma mẹrẹnvwrurhe taghene Osolobrugwẹ ọ ma ituakpọ nẹ aye i rhirhiẹ otọrakpọ na uvuẹn paradais bẹmẹdẹ, phẹrẹkpẹ ive ọnana ono rugba. Ogege mie vwẹruọ aruẹ ohworho i Jehova ọ ghini havwọ, ni mi me tikẹriẹ rhọ, omiamiamo mẹ no riotọre.—Psalm 37:29; Acts 24:15; Romans 5:12.

Iduduru ihworho i rhiẹromẹrẹn ikpokpogho ne izede sansan: jerẹ ikpokpogho omobọ, uvweri, orhọmo, yanghene oghwọghọ kpregede. Ẹhẹn i Bruni nọ mọ gbanhon ọke rọ mẹrẹnvwrurhe uvuẹn i Baibol na taghene rhẹ i Jehova ye ne kperi fọkiẹ ojẹriọ ọwa-an, o rhiẹ ọhọre Osolobrugwẹ nẹ ituakpọ i rioja-a, Jehova ono ji fioba rhẹ irueruo ọkon phẹrẹkpẹ. Ra mẹriẹn taghene irueruo ọkon o buẹnrhọ na, ọnana o djephia taghene ọwan e nyerẹn uvuẹn “ẹdẹ ri koba” ọrẹ enyerẹn ọnana ne. Ekwakwa irhorhomu rẹ ọwan e fiẹrorhọ, o te ọke aye ine rugba ne.—2 Timothy 3:1-5; Matthew 24:7, 8.

Re Rhe Osolobrugwẹ

Hans ọrhẹ Bruni i vwo imwẹro kpahen Osolobrugwẹ. Ọrẹn udabọ ọrana, aye a dabu rheyi fiotọre-e. Ọke aye e fiẹ ọke rhotọre nẹ aye i dabu rhe Osolobrugwẹ, aye ni mẹrẹn erere nẹ uvuien rhe. Aye i mẹrẹn ẹkpahenrhọ rẹn enọ eghoghanren rẹ ihworho a nọ inyenana. Ọnana nọ lẹrhẹ ẹhẹn aye totọre, ji yẹ aye obọdẹn ifiẹrorhọ kpahen obaro na. Iduduru idibo i Jehova i ji rhiẹromẹrẹn aruẹ erhirhiẹ ọnana dẹ ne.

Re ne rhe i Jehova ọ tuanrhọ nyoma ra dabu se i Baibol na, rọ ta rẹn ọwan kpahiẹn ọrhẹ oborẹ ọ guọlọ mie ọwan. Ọnana ye oborẹ ihworho ezẹko i ruru ọke Ilele Kristi erukaro na. Luke ro rhiẹ idọkitọ ọrhẹ ọrọ ya ikuegbe, nọ tare taghene otu i Jew ri ha ukoko i rọ ha i Beroea, Greece, “i dede ẹmro na ha [mie Paul ọrhẹ Silas] rhẹ oruru ọgbogbanhon, rẹ aye a ji dabu ni Eyaya ọfuanfon na sua kẹdẹkẹdẹ nẹ aye i rhe sẹ omaran ekwakwa enana i ghini havwọ.”—Acts 17:10, 11.

Ilele Kristi erukaro na i ji vwoma kugbe uvuẹn uyono ukoko. (Acts 2:41, 42, 46; 1 Corinthians 1:1, 2; Galatians 1:1, 2; 2 Thessalonians 1:1) Omaran ọ ji havwọ inyenana. Iseri Jehova a ji vwoma kugbe ruẹ uyono ukoko ra kwaphiẹrhotọre, nọ sabu ha userhumu rẹn aye tikẹrẹ i Jehova jeghwai vwo aghọghọ ọke aye arha ga ye. Wu rhe kwomakugbe Iseri Jehova ruẹ uyono, wu na mẹrẹn erere nẹ uvuien rhe. Ra mẹriẹn taghene ituakpọ i họhọ Osolobrugwẹ rẹ aye a ga na, Iseri Jehova e dje iruemru i Jehova phia te ekete omẹgbanhon aye o teri. Omarana, re kwomakugbe Iseri Jehova uvuẹn uyono aye, ọnọ ha userhumu rẹn ọwan rhe i Jehova rhọ.—Hebrews 10:24, 25.

Nọ họhọre taghene a guọlọ omẹdamu omamọ na ki sabu rhe Osolobrugwẹ. Itiọrurhomẹmro ọ ghini guọlọ omẹdamu. Rhẹ omaran a ji guọlọ omẹdamu orhianẹ a guọlọ vwo ekwakwa ezẹko uvuẹn akpenyerẹn ọwan? Gbe roro kpahen omẹdamu rẹ ohworho rọ zorhẹ o fiẹ rhẹ uyono ọnẹyen. Jerẹ udje, Jean-Claude Killy ro fikparobọ uvuẹn orhẹ ra zẹ uvuẹn imito obẹ i France, nọ ta kpahen oborẹ ohworho ono ru sabu fikparobọ uvuẹn orhẹzẹ: “Wu na tonrhọ omẹ ẹgbukpe 10 vwẹre, mwuegbe hẹrhẹ orhẹ na kẹgbukpe kẹgbukpe jeghwai rhe roro kpahiẹn kẹdẹkẹdẹ . . . Ọnana owian rọ guọlọ omẹgbanhon ọrhẹ iroro ọnọ kẹdẹkẹdẹ uvuẹn ẹgbukpe owuowu.” A ghwọghọ ọsoso ọke ọrhẹ omẹdamu ọnana rhẹ orhẹ rọ na ha emrẹ iminiti ikpe ọvo! Gbe roro kpahen oborẹ ọ ghanren te re ne rhe i Jehova.

Onyerẹnkugbe rọ nọ tọ

Ọrọmo yọ guọlọ kpare uphẹn ọghoghanren fughwẹ uvuẹn akpenyerẹn ọnẹyen? O vwo-o. Omarana, wu rha mẹrẹnvwrurhe taghene akpenyerẹn ọnọ o vwo otọre-e, yanghene wu guọlọ obọdẹn ẹkpahenrhọ rẹn oborẹ ọsoriẹ a rioja, gbe brorhiẹn wu ne rhe i Jehova ro rhiẹ Osolobrugwẹ ro vwo i Baibol na. Wu rhe yono kpahiẹn, wu na sabu nyerẹn obọdẹn akpọ bẹmẹdẹ.

Ene fiobọrhotọre re ne yono kpahen i Jehova? Ihworho ra ga i Jehova ẹgbukpe buebun ne, o gbe aye unu kpahen oborẹ aye i yono kpahiẹn ne, ọrhẹ ekwakwa ekpokpọ aye e yono kpahen i Jehova. Erhe yono kpahen aruẹ ekwakwa enana, ọ yẹ ọwan omamerhomẹ ji lẹrhẹ ọwan tiẹkẹriẹ rhọ. Jenẹ ọwan i vwo aruẹ iroro ọnyikọ Paul rọ yare: “O, efe ọrhẹ ẹghwanren kugbe irherhe Osolobrugwẹ i kodori omamọ! A vwa sabu vwẹruọ orhienbro ọrhẹ izede enẹyen ephian hiẹ-ẹn! Ọrọmo ‘yọ sabu rhe iroro i Jehova ne, yanghene ọrọmo yo rhiẹ obrurhe ọnẹyen ne?’”—Romans 11:33, 34.

[Ekete Ra Djokarhọ]

Individuals still ask the same fundamental questions: ‘Why am I here? Where am I going? What is life all about?’

[Ẹmro Ikpokpoto]

“Ogege mie vwẹruọ aruẹ ohworho i Jehova ọ ghini havwọ, ni mi me tikẹriẹ rhọ”

[Ẹmro Ikpokpoto]

“Ra ga i Jehova yẹ akpenyerẹn rọ mai rhomu kparobọ. O vwo oborẹ ana ha dje yi-i. Ri mie rhe i Jehova ne na, ọ lẹrhẹ akpenyerẹn mẹ vwo otọre ne”