Enọ rẹ Otu re se Ẹbe Ọwan i Nọren

Ayọmo yẹ “ihworho ra vwa ga Osolobrugwẹ” ri Paul ọ hunute uvuẹn 2 Corinthians 6:14?

2 Corinthians 6:14, ọrhọ ta: “Are i vwe kwomakugbe ihworho ra vwa ga Osolobrugwẹ-ẹ.” Uvuẹn oghwẹmro i Baibol ọnana, o fiotọre taghene Paul ọ rionbọrhọ ihworho ri vwa ha usuẹn ukoko Ilele Kristi na. E rhe ọnana fọkiẹ oborẹ i Paul ọ ha ẹmro na ruiruo lele uvuẹn eghwẹmro i Baibol erọrọ.

Jerẹ udje, Paul ọ ghwọghwu Ilele Kristi re se imizu aye ẹzọn uvuẹn ẹghware, obaro “ihworho ra vwa ga Osolobrugwẹ.” (1 Corinthians 6:6) Ihworho enana yẹ iguẹnzọn ri ha uvuẹn oghwa ẹghware i Corinth. Uvuẹn ileta ọreva ri Paul ọ yare, nọ tare taghene Echu “o tuẹ ikẹro ọmudu ihworho re vwa ga Osolobrugwẹ.” Omarana, ihworho enana i vwa rha sabu mẹrẹn erere nẹ iyẹnrẹn esiri na-a. Aye i vwa ji damoma aye ina ga i Jehova-a, nime Paul ọ ji ta vrẹn ne taghene: “Ohworho ọrhọ ghwẹriẹ bru i Jehova, ne tiẹ oborẹ a ha rhurhu ọmudu na nie.”—2 Corinthians 3:16; 4:4.

Ihworho ezẹko ra vwa ga i Jehova e vwobọrhọ emẹgọ yanghene irhi egbeghwu. (2 Corinthians 6:15, 16) Ọrẹn, rhẹ aye ephian ya kparahasuẹ idibo i Jehova-a. Ezẹko i vwo ọdamẹ kpahen urhomẹmro na. Awọrọ i vwo esa yanghene ane ri rhiẹ Ilele Kristi re lele aye rhirhiẹ kugbe. (1 Corinthians 7:12-14; 10:27; 14:22-25; 1 Peter 3:1, 2) Ọrẹn jerẹ oborẹ a ta vrẹn ne, Paul ọ ha ẹmro na “ihworho ra vwa ga Osolobrugwẹ,” dje ihworho ri vwa ha usuẹn ukoko Ilele Kristi na.—Acts 2:41; 5:14; 8:12, 13.

Uremru-urhi rọ ha uvuẹn 2 Corinthians 6:14 ọ ghanranren omamọ rẹn Ilele Kristi ephian, ọnọ ji sabu rhiẹ emru urhebro rẹn Ilele Kristi ra guọlọ ohworho aye ina rọnmọ. (Matthew 19:4-6) O fo nẹ Olele Kristi rọ homakpahontọre ji bromarhame ne, nọ rọnmọ ohworho rọ vwọ ga Osolobrugwẹ-ẹ, nime irhi re suẹn ohworho rọ ga Osolobrugwẹ, ẹkẹ ye, ọrhẹ imwẹro yi, ọ vẹnẹ ohworho rọ vwọ ga Osolobrugwẹ.

Ọrẹn, nẹ ihworho re yono i Baibol na ji homaba ukoko Ilele Kristi na vwo? Ighwoghwẹmro ri vwe ji bromarhame vwo? Aye jẹ usuẹn ihworho ra vwa ga Osolobrugwẹ? Ẹjo. Ihworho ri rhiabọ dede urhomẹmro na ne, re ji ruẹ riaro nẹ aye i sabu bromarhame, a ha usuẹn aye-e. (Romans 10:10; 2 Corinthians 4:13) Cornelius o ki bromarhame, e serie “ọhworhare ro vwo atamwu rọ zofẹn Osolobrugwẹ.”—Acts 10:2.

Dedevwo urhebro i Paul rọ ha uvuẹn 2 Corinthians 6:14 ọ vwọ rionbọrhọ Ilele Kristi ri vwe ji bromarhame-e, ọrẹn, ọ sọre nẹ Olele Kristi ro bromarhame ne nọ san ohworho ro vwo ji bromarhame rhotọre ọrẹ orọnmo, ọrhọ tobọ rhianẹ ọravwọ oghwoghwẹmro ro vwo ji bromarhame? Ee. Mesoriẹ? Fọkiẹ urhebro ri Paul ọ yẹ Ilele Kristi rẹ esa aye i hwu ne. Paul nọ yare: “Ọnọ sabu rọnmọ ohworho ro jerie, uvuẹn Ọrovwori na ọvo.” (1 Corinthians 7:39) Fọkiẹ ọnana, na ha urhebro rẹn Ilele Kristi ri bromarhame ne, nẹ aye i rọnmọ ohworho ro jerẹ aye takpu ọravwọ o bromarhame ne.

Me yẹ ẹmro na “uvuẹn Ọrovwori na,” ọrhẹ “uvuẹn i Kristi” i mevirhọ? Uvuẹn Romans 16:8-10 ọrhẹ Colossians 4:7, Paul ọ ha ẹmro na “uvuẹn Ọrovwori na,” ọrhẹ “uvuẹn i Kristi” ruiruo. Wu rhe se eghwẹmro erana, wu na mẹrẹnvwrurhe taghene imizu enana ‘ere lele wian,’ ‘ere vwo ekwerhọ kpahen,’ ‘imizu re vwo ẹguọlọ kpahen,’ ‘idibo ri fuevwan,’ ọrhẹ ‘evrẹn jerẹ ọwan.’

Ọkiọgo yẹ ohworho o ru rhiẹ ‘ọvrẹn uvuẹn Ọrovwori na.’ Ọrana ọ phia orhianẹ ohworho o vwo omwemẹ rọ nọ tiẹn omayen, ji ruẹ oborẹ Ọrovwori na ọ guọlọre. Jesu nọ tare: “Kohworho kohworho rọ guọlọ nyaleli mẹ, jenẹ ọ tiẹn omayen nọ kpare orhan oja ọnẹyen no rho leli mẹ.” (Matthew 16:24) Ohworho ọ nyaleli Jesu ji ruẹ ọhọre Osolobrugwẹ ọke ọrhọ homakpahontọre rẹn Osolobrugwẹ ne. Orho ru, no bromarhame, ọke ọrana nọ nọ sabu rhiẹ odibo ri Jehova o vwo ekwerhọ kpahen. * Omarana, nẹ ohworho ọ ‘rọnmọ uvuẹn Ọrovwori na,’ o mevirhọ taghene ọnọ rọnmọ ohworho rọ homakpahontọre rẹn Osolobrugwẹ ne, ro ji rhiẹ ‘ọvrẹn harẹn Osolobrugwẹ ọrhẹ Ọrovwori Jesu Kristi.’—James 1:1.

O fori ne jiri ohworho ro lele Iseri Jehova yono i Baibol na, ro ji ruẹ riaro. Ọrẹn, jenẹ a karorhọ taghene ohworho na ọ ji homakpahontọre rẹn i Jehova, ji brorhiẹn rọ nọ ha ọsoso akpọ ye ga ye-e. Ọ ji damoma ruẹ ewene ri fori. O fori no ru oborẹ oserhọ nọ sabu rhiẹ Olele Kristi rọ homakpahontọre ji bromarhame ne, bọmọke ono ki roro kpahen ohworho rọ nọ rọnmọ uvuẹn ukoko na.

Ọ sọre nẹ Olele Kristi ọ san ohworho ro ruẹ riaro uvuẹn uyono i Baibol ọnẹyen rhotọre, rhẹ ẹhẹn rọ nọ hẹrhẹ te ọke ro no bromarhame vwẹre nẹ aye i ki rọnmọ? Ẹjo. Ọrẹn, o fori na karorhọ taghene ihworho ezẹko ina sabu rhe yono i Baibol na rhẹ ẹhẹn ọsọsọ taghene aye i rhe yono i Baibol na ji bromarhame ne, na na sabu rọnmọ aye.

Bọmọke ohworho ono ki bromarhame, ono rhiẹ oghwoghwẹmro ro vwo ji bromarhame ibiọke. Omarana, urhebro ra na rọnmọ uvuẹn Ọrovwori na ọvo o sekpahen aruẹ erhirhiẹ ọrana-a. Me ya na ta kpahen ohworho ra mọren ghwanren uvuẹn ekrun Ilele Kristi, ro tẹ ẹgbukpe orọnmo ne, ro ruẹ rhomẹ uvuẹn ukoko na, ro ji rhiẹ oghwoghwẹmro ro vwo ji bromarhame? Mesoriẹ ọ vwọ ji homakpahontọre rẹn i Jehova? Mesoriẹ o ruẹ sikẹnsikẹn? O vwo ẹhẹn eveva? Dedevwo ọye rhẹ ohworho ro vwo ji rhe Osolobrugwẹ-ẹ, ọrẹn a sabu ta taghene ọ ha ‘uvuẹn Ọrovwori na-a.’

Urhebro i Paul kpahen orọnmo ọ rhua erere vwe ọwan. (Isaiah 48:17) Awanva ra guọlọ rọnmọ i rha homakpahontọre rẹn i Jehova ne, ive orọnmo aye nọ gbanhan, nime aye i bọnriẹn kpahen ẹmro Osolobrugwẹ. Imwẹro ọrhẹ ẹkẹ aye i vwori no rhiẹ owu. Ọnana ọ lẹrhẹ omamerhomẹ rhirhiẹ orọnmo na. Habaye, arha ‘rọnmọ uvuẹn Ọrovwori na,’ ne djephia taghene e vwo atamwu kpahen i Jehova, ọnana ọ rhua obọdẹn ebrurhọ sa, nime “ohworho ro vwo atamwu [yi Jehova ono] vwo atamwu kpahen.”—Psalm 18:25.

[Ekete Ra Djokarhọ]

[Ifoto]

“Ohworho ro vwo atamwu [yi Jehova ono] vwo atamwu kpahen.”