Mesoriẹ O Fo Ne Wu Homakpahontọre Rẹn i Jehova?
Mesoriẹ O Fo Ne Wu Homakpahontọre Rẹn i Jehova?
“Ason ọnana ọmakashe Osolobrugwẹ ro rhiẹ ọrovwori mẹ ri mia ha ẹga rọ fonron riẹn, no mevi kẹre mẹ.”—ACTS 27:23.
1. Idjaghwẹ ego yẹ ohworho rọ guọlọ bromarhame ọ kpara, enọ ego ya homaphia?
WU GHWẸRIẸ nẹ edandan enọ ne, homakpahontọre rẹn i Jehova, jeghwai rhiabọ dede izede usimi ọnẹyen nyoma i Jesu Kristi?” Ọnana onọ owu usuẹn enọ eva ra nọ ihworho ri ne bromarhame uvuẹn obẹta ẹmro omebrurhame na. Mesoriẹ o fo nẹ Ilele Kristi i homakpahontọre rẹn i Jehova? Erere ego ya mẹrẹn arha homakpahontọre rẹn i Jehova? Mesoriẹ o fo na homakpahontọre vwẹre na ki sabu ga i Jehova fiotọre? Na sabu rhe ẹkpahenrhọ enana, jene kiki ta kpahen oborẹ omẹhakpahontọre o mevirhọ.
2. Me yo mevirhọ rẹ ohworho ọnọ homakpahontọre rẹn i Jehova?
2 Me yo mevirhọ rẹ ohworho ọnọ homakpahontọre rẹn i Jehova? Djokarhọ oborẹ ọnyikọ Paul ọ ta kpahen onyerẹnkugbe ọnẹyen rhẹ Osolobrugwẹ. Uvuẹn udaro ihworho ri ha ọkuna ro so mo rhue na, Paul no se Jehova, ‘Osolobrugwẹ ri mia ha ẹga rọ fonron riẹn.’ (Se Acts 27:22-24.) Ilele Kristi urhomẹmro ephian i ha obọrẹ i Jehova. Itiọrurhomẹmro, ọsoso akpọ na “ọ ha omẹgbanhon ọrẹ ọvwọkon na.” (1 John 5:19) Nẹ ọke Ilele Kristi a homakpahontọre rẹn i Jehova nyoma ẹrhomo, aye ne djephia taghene aye i ha obọrẹ i Jehova. Aruẹ omẹhakpahontọre ọnana, ive omobọ. Orho ru ne djeyi phia nyoma omebrurhame.
3. Me yẹ omebrurhame i Jesu o mevirhọ, marhẹ idibo yi ine ru hẹrokele udje yi?
3 Jesu o dje omamọ udje rhotọre rẹn ọwan, ọke ro brorhiẹn ro no ru ọhọre Osolobrugwẹ. Ra mẹriẹn taghene e vwiẹ i Jesu rhẹ agbamwa Israel ra ha kpahontọre rẹn i Jehova ne, nọyẹ Jesu ọ ji homakpahontọre rẹn i Jehova ne. Ọrẹn, ọke omebrurhame ọnẹyen, Jesu o ruẹ emru ro vrẹn oborẹ Urhi na ọ guọlọre. Baibol na nọ hunute oborẹ i Jesu ọ tare: “Nughe! Mi rhere . . . mi ne ru ọhọre ọnọ O Osolobrugwẹ.” (Heb. 10:7; Luke 3:21) Omarana, omebrurhame i Jesu o djephia taghene ọ homakpahontọre rẹn i Jehova ne, ọ ji guọlọ ru ọhọre Ọsẹ ye. Idibo i Jesu a hẹrokele udje yi nyoma aye e bromarhame. Ọrẹn, omebrurhame aye o ji mevirhọ emru ọrọrọ, omebrurhame uvuẹn afiede o djephia taghene aye i homakpahontọre rẹn i Jehova nyoma ẹrhomo ne.
Erere ra Mẹrẹn Arha Homakpahontọre
4. Me yẹ onyerẹnkugbe i David ọrhẹ Jonathan o yonirin ọwan kpahen uruemru re dje atamwu phia?
4 Omẹhakpahontọre ọwan rẹn i Jehova oborẹ ọ ghanranren omamọ. Ọ ghanren ghwẹ ive erọrọ re veri. Ọrẹn, erere ego ya mẹrẹn arha homakpahontọre? Jene roro kpahen erere ra mẹrẹn erhe vwo obọdẹn onyerẹnkugbe rhẹ awọrọ. Udje owu yẹ omamọ ugbehian re mwuẹ. Ne wu sabu vwo omamọ ugbehian, wu ne rhiẹ obọdẹn ugbehian. Ọnana o mevirhọ taghene are ine vwo atamwu ọgbogbanhon kpahen owuowọnwan, ji rha hẹrote edamẹ owuowọnwan. Omamọ udje owu ri Baibol na ọ nẹ iyẹnrẹn kpahen yi David ọrhẹ Jonathan. Fọkiẹ obọdẹn ugbehian rẹ aye i havwọ, aye ni riẹ ọphọ kugbe. (Se 1 Samuel 17:57; 18:1, 3.) Dedevwo o bẹn ra sabu mẹrẹn aruẹ obọdẹn ugbehian ọnana, ọrẹn ana sabu mẹriẹn orhianẹ awanva na i vwo omeriotọre.—Prov. 17:17; 18:24.
5. Marhẹ ọvrẹn ono ru mẹrẹn erere mie oninie ọsoso akpọ ye?
5 Urhi rẹ Osolobrugwẹ ọ yẹ emọ Israel, o dje kpahen erere ra mẹrẹn erhe vwo obọdẹn onyerẹnkugbe rhẹ awọrọ. Orhianẹ ọvrẹn ọ guọlọ ha ọsoso akpọ ye ga oninie, ọnọ sabu lele oninie na riẹ ọphọ kugbe. Urhi na nọ tare: “Ọrẹn, ọvrẹn na ọrhọ ta taghene, ‘Mi vwo ẹguọlọ kpahen onini mẹ, ane mẹ, ọrhẹ emọ mẹ; mia guọlọ ugbomọphẹ-ẹ,’ oninie nọ nọ vi haye rhiẹ obaro Osolobrugwẹ urhomẹmro na. Omarana, nọ nọ kpariẹ riẹ ekete ighwe na yanghene anurẹsẹ na, oninie nọ nọ ha emru ọpiọpiọrọ rharhẹ ophiọ rhẹ orhọ ye, no no rhiẹ ọvrẹn oninie ọsoso akpọ ye.”—Ex. 21:5, 6.
6, 7. (a)Marhẹ ihworho re dje uruemru atamwu phia e ru mẹrẹn erere? (b) Marhẹ ọrana o ru hobọte onyerẹnkugbe ọwan rhẹ i Jehova?
6 Orọnmo onyerẹnkugbe rọ guọlọ ọke buebun. Ọnana rhẹ ọke ra na ghwọghọ rhẹ iruo ọwa-an, ọrẹn ọke ra na ghwọghọ rhẹ ohworho ra rọnmọ. Ọhworhare ọrhẹ ọmase re rhirhiẹ kugbe ọrẹn aye a ji rọnmọ-ọ, i sabu mẹrẹn obọdẹn ufuoma-a; omaran ji te emọ aye. Ọrẹn, ọhworhare ọrhẹ ọmase na i rhe ruẹ irueruo orọnmo aye, ji nyalele ẹmro ri ha uvuẹn Baibol na, aye ina damoma kwaphiẹ ebẹnbẹn ri homaphia rhọ, fọkiẹ obọdẹn ẹguọlọ rẹ aye i vwori.—Matt. 19:5, 6; 1 Cor. 13:7, 8; Heb. 13:4.
7 Uvuẹn ọke ahwanren ihworho a mẹrẹn erere aye i rha sueyi, yanghene wian rẹn ohworho. (Matt. 20:1, 2, 8) Omaran ọ ji havwọ inyenana. Jerẹ udje, bọmọke e ki lele ohworho sueyi yanghene wian rẹn ohworho, ne fiobọrhọ ọbe na sabu mẹrẹn erere nie rhẹ. Ọrẹn, orhianẹ uruemru re dje atamwu phia ọ rhua erere vwe igbehian, eri rọnmọ ne, ọrhẹ uvuẹn ekete iruo ọwan, nọyẹ omẹhakpahontọre ọwan rẹn i Jehova ọnọ ji rhua erere vwe ọwan! Jene roro kpahen oborẹ ihworho ọke ahwanren i ru mẹrẹn erere nyoma aye a homakpahontọre rẹn i Jehova Osolobrugwẹ, ọrhẹ oborẹ o mevirhọ rẹn ọwan.
Erere Emọ Israel i Mẹrẹnren Nime Aye i Homakpahontọre rẹn Osolobrugwẹ
8. Me yo mevirhọ rẹ emọ Israel ina homakpahontọre rẹn Osolobrugwẹ?
8 Ọsoso agbamwa Israel i homakpahontọre rẹn i Jehova ọke aye e ve ive riẹn. Jehova no serẹ aye koko uvuẹn Ugbenu i Sinai, nọ tare: “Are i rha jomarhotọre huvwele mẹ jeghwai mọrẹn ọphọ mẹ, are ni ne rhiẹ emru rọ havwọ san mẹ usuẹn ihworho ephian.” Ihworho na ephian ni tare: “Oborẹ i Jehova ọ tare ephian, ame i vwo omwemẹ rẹ ame ine ru aye.” (Ex. 19:4-8) Ra na homakpahontọre ọ ghanren rẹn emọ Israel omamọ, ghwẹ ọrẹ aye ine ve ive taghene aye ine ruẹ emru. Ọnana no mevirhọ taghene aye i ha obọrẹ i Jehova, Jehova ọ nirin aye jerẹ “emru rọ havwọ san.”
9. Erere ego yẹ emọ Israel i mẹrẹnren nime aye i homakpahontọre rẹn Osolobrugwẹ?
9 Emọ Israel i mẹrẹn erere nẹ onyerẹnkugbe aye rhẹ i Jehova. Jehova o dje uruemru atamwu phia, ji hẹrote aye jerẹ oborẹ ọmiọmọ ọ hẹrote ọmọyen. Osolobrugwẹ nọ ta rẹn emọ Israel: “Ọmọ ro nyenye ọnọ sabu sẹrẹ izie ẹro, yanghene izu ọnọ sabu sianro rẹn ọmọ ro vwiẹre? Ọrhọ tobọ sẹrẹ emẹse enana ẹro, are i sẹri mẹ ẹro dẹ-ẹ.” (Isa. 49:15) Jehova ọ yẹre aye Urhi ro no sun aye, urhebro emẹraro, ọrhẹ ẹruete emakashe na. Ọbo ijoro owu nọ tare: “Ọ tẹmro ọnẹyen rẹn i Jacob, ekpọvi ọrhẹ ẹzenguon ọnẹyen rẹn Israel. O ji ruẹ omaran rẹn agbamwa ọrọrọ dẹ-ẹ.” (Ps. 147:19, 20; se Psalm 34:7, 19; 48:14.) Jerẹ oborẹ i Jehova ọ hẹrote agbamwa Israel ọke ahwanren, omaran ọnọ ji hẹrote ihworho ri homakpahontọre riẹn inyenana.
Oborẹ Ọsoriẹ Ana Homakpahontọre Rẹn Osolobrugwẹ
10, 11. E vwiẹre ọwan rhiẹ usuẹn ekrun Osolobrugwẹ? Dje yi fiotọre.
10 Re ọwan e roro kpahen omẹhakpahontọre ọwan rẹn Osolobrugwẹ ọrhẹ omebrurhame ọwan, ihworho ezẹko ine rhe roro, ‘Mesoriẹ mi na homakpahontọre rẹn Osolobrugwẹ vwẹre mi na ki sabu ga ye?’ Iroro na ọnọ dabu fiotọre, erhe roro kpahen aruẹ onyerẹnkugbe re vwori rhẹ Osolobrugwẹ vwana. Karorhọ taghene nime a ha ọdandan riuku mie Adam, nọ ben re ne vwo obọdẹn onyerẹnkugbe rhẹ Osolobrugwẹ. (Rom. 3:23; 5:12) Omarana, na ki sabu rhiẹ usuẹn ekrun Osolobrugwẹ, ana vi homakpahontọre riẹn vwẹre. Jena mẹrẹn oborẹ ọsoriẹ.
11 Nime Adam ọrhẹ Eve jẹ iruedandan, aye arha sabu yẹ ọwan arhọ ọgbagba-an. (1 Tim. 6:19) Fọkime Adam ọrhẹ Eve iruedandan, ọwan ri rhiẹ emọ aye arha ha usuẹn ekrun i Jehova ro rhiẹ Ọsẹ ọwa-an. (Haye vwanvwọn Deuteronomy 32:5.) Nẹ ọke ọrana rhe, ohworho ọnọ homakpahontọre rẹn Osolobrugwẹ vwẹre bọmọke ono ki vwo omamọ onyerẹnkugbe rhọye.
12. (a) Marhẹ ituakpọ ri vwa gba ine ru sabu rhiẹ usuẹn ekrun Osolobrugwẹ? (b) Idjaghwẹ ego ya na kpare ne ki bromarhame?
12 Ọrẹn, o vwo oborẹ ene ruo nẹ Osolobrugwẹ ọ sabu rhiabọ dede ọwan. * Ọrana ime? Ọnyikọ Paul nọ yare: “Ọke rẹ ọwan e rhiẹ evwreghrẹn yen, Osolobrugwẹ no lele ọwan kwaphiẹrhọ nyoma uhwu Ọmọyen.” (Rom. 5:10) Ọke ọwan e bromarhame, ọwan a ta rẹn Osolobrugwẹ nọ yẹ ọwan ẹhẹn obrorhiẹn rọ fonron, na sabu vwo ekwerhọ ye. (1 Pet. 3:21) Bọmọke ene ki bromarhame, o vwo idjaghwẹ ezẹko ra na vi kpare. Ene yono kpahen Osolobrugwẹ, hẹrosuiẹ, ghwẹriẹ nẹ edandan ọwan, ji wene akpenyerẹn ọwan. (John 17:3; Acts 3:19; Heb. 11:6) Ọrẹn, o ji vwo emru ọrọrọ re ne ruo na ki sabu rhiẹ idibo Osolobrugwẹ. Me ye ne ruo?
13. Mesoriẹ o fo nẹ ohworho ọ homakpahontọre rẹn Osolobrugwẹ vwẹre nọ ki sabu rhiẹ odibo yi?
13 Bọmọke ohworho ọnọ ki sabu rhiẹ odibo i Jehova, ono vive ọghoghanren owu riẹn. Jerẹ udje, roro kpahen ọsẹ owu ro vwo ọdamẹ kpahen uphuphẹn owu ro vwo vwo ọsẹ ọrhẹ izu, no brorhiẹn rọ nọ ha ọmọ na ba usuẹn ekrun ọnẹyen. E rhe ọsẹ na rhẹ omamọ ọhworhare. Ọrẹn, bọmọke ọnọ ki ha ọmọ na rhiẹ oghwa ye, ọhworhare na ọ guọlọre nẹ ọmọ na o vive owu riẹn vwẹre. Omarana ọhworhare na nọ tare, “Bọmọke mi na ki ha jerẹ ọmọ mẹ, o fori ne wu vwo ẹguọlọ ji ha ọghọ mẹ jerẹ ọsẹ ọnọ.” Ọmọ na orho kwerhọ ye, ọsẹ na nọ nọ haye rhiẹ oghwa no rhiẹ ọmọyen. Ọnana oborẹ o serhọ. Omarana, ihworho ri homakpahontọre rẹn Jehova ọvo yo rhiabọ dede nẹ aye i rhiẹ usuẹn ekrun ọnẹyen. Baibol na nọ tare: “Are i ha oma are kpahontọre riẹn: jerẹ izobo ro nyerẹn, ra ha kpahontọre ro ji vwo ekwerhọ kpahen.”—Rom. 12:1, The New English Bible.
Omẹhakpahontọre o Dje Ẹguọlọ Ọrhẹ Esegburhomẹmro Ọwan Phia
14. Izede ọgo yẹ omẹhakpahontọre o ru dje ẹguọlọ phia?
14 Arha homakpahontọre rẹn Osolobrugwẹ, ne dje ẹguọlọ re vwo kpahiẹn phia. Ana sabu haye dje ive orọnmo. O vwo oborẹ erhirhiẹ na ọ gbanhon te-e, Olele Kristi rọ rọnmọren ọ nyalele ive orọnmo na nyoma ro dje atamwu phia rẹn ohworho rọ rọnmọren na. Ọnana ọ ghwẹ ive kpekpa we ve rẹn ohworho, we vive ọnana nime wu vwo ẹguọlọ kpahen ohworho wa guọlọ rọnmọ na. Neneyo Olele Kristi ọ sabu riamerhen orọnmo ọnẹyen, ono vive orọnmo na vwẹre. Omarana, na sabu mẹrẹn erere uvuẹn ogame i Jehova, ana vi homakpahontọre rẹn i Jehova vwẹre. Nime a guọlọ rhiẹ idibo Osolobrugwẹ udabọ ijẹgba ọwan, ọwan na homakpahontọre riẹn ji dje atamwu phia, o vwo oborẹ ekwakwa i gbanhon te-e.—Matt. 22:37.
15. Marhẹ omẹhakpahontọre o ru dje esegburhomẹmro phia?
15 Arha homakpahontọre rẹn i Jehova, ne djephia taghene e vwo esegburhomẹmro kpahiẹn. Mesoriẹ o rhiẹ omaran? Esegburhomẹmro kpahen i Jehova, ọ lẹrhẹ ọwan vwo imwẹro taghene re ne tikẹrẹ i Jehova yọ mia rhomu rẹn ọwan. (Ps. 73:28) Ọwan i rheri taghene ọ lọhọ re ne jiri Jehova uvuẹn akpọ ọkon ọnana ‘rọ vwiare ro ji biomu na-a,’ ọrẹn ọwan i hẹroso ive Osolobrugwẹ taghene ọnọ hobọtua ọwan. (Phil. 2:15; 4:13) Dedevwo ọwan ihworho ri vwa gba, ọrẹn e vwo imwẹro na taghene i Jehova ono dje arodọmẹ rẹn ọwan erhe ru sọ. (Se Psalm 103:13, 14; Romans 7:21-25.) Ọwan i vwo imwẹro taghene Jehova ọnọ kwosa rẹn ọwan, arha sẹrorẹ emevigbanhon ọwan.—Job 27:5.
Omẹhakpahontọre Rẹn Osolobrugwẹ ọ Rhua Omamerhomẹ sa
16, 17. Mesoriẹ omẹhakpahontọre rẹn i Jehova ọ rhua omamerhomẹ sa?
16 Omamerhomẹ o rhirhiẹ ye arha homakpahontọre rẹn i Jehova, nime o mevirhọ ọrẹ ana homakpahontọre riẹn. Jesu nọ tare omana: “Omamerhomẹ ọ havwiẹ harẹn ọro tiobọnẹ ghwẹ ọra yẹre.” (Acts 20:35) Ọke i Jesu ọ ha otọrakpọ na, ọ mẹrẹn omamerhomẹ ro nerhumie sa erhe tiobọnu. Ọkezẹko, o vwo ronmoma, riẹ emaren, yanghene mẹrẹn omẹrhuọnrhuọn vwẹre o ki riẹ aghwoghwo-o. (John 4:34) Oma ọ merhen i Jesu ro ruẹ ọmudu Ọsẹ ye ghọghọ. Jesu nọ tare: “Mie ruẹ ekwakwa ra merhiẹn oma ọke ephian.”—John 8:29; Prov. 27:11.
17 Omarana, Jesu no yono idibo yi oborẹ ọnọ sabu yẹ aye omamerhomẹ ọke rọ ta: “Kohworho kohworho rọ guọlọ nyaleli mẹ, jenẹ ọ tiẹn omayen.” (Matt. 16:24) Ọnana ọnọ lẹrhẹ ọwan tikẹrẹ i Jehova rhọ. O vwo ohworho ọrọrọ rọ nọ sabu hẹrote ọwan jerẹ oborẹ i Jehova o ruẹ?
18. Mesoriẹ omamerhomẹ ra mẹrẹn arha homakpahontọre rẹn i Jehova o rhomu ghwẹ ekwakwa erọrọ?
18 Arha homakpahontọre rẹn i Jehova ji brorhiẹn re ne ruẹ ọhọriẹ, ọnana ọnọ yẹ ọwan omamerhomẹ ghwẹ emru ọrọrọ. Jerẹ udje, ihworho buebun a ha ọke aye ephian hatua ekwakwa ugboma yanghene efe, ọrẹn aye i vwa mẹrẹn obọdẹn omamerhomẹ kugbe evwẹnvuọ-ọn. Ọrẹn, ihworho ri homakpahontọre rẹn i Jehova, a mẹrẹn obọdẹn omamerhomẹ ro nọ tọ. (Matt. 6:24) Ọghọ ọrana re rhiẹ ihworho re “lele Osolobrugwẹ wian kugbe” ọ lẹrhẹ oma merhen aye, ọnana yọ soriẹ aye a homakpahontọre rẹn Osolobrugwẹ ukperẹ ono rhiẹ ewian aye. (1 Cor. 3:9) Omarana, oma ọ merhen Osolobrugwẹ kpahen omẹdamu re dje phia. Ọye ọnọ ha omẹgbanhon rẹn idibo yi ri dje atamwu kpahiẹn, neneyo aye i sabu mẹrẹn erere.—Job 33:25; se Hebrews 6:10.
19. Uphẹn ọgo yẹ ihworho ri homakpahontọre rẹn i Jehova i vwori?
19 Ra homakpahontọre rẹn i Jehova, ọ lẹrhẹ onyerẹnkugbe ọnọ rhe i Jehova kpẹnkpẹnrhọ. Baibol na nọ tare: “Are i tikẹrẹ Osolobrugwẹ, ọye no no tikẹrẹ are.” (Jas. 4:8; Ps. 25:14) Uvuẹn urhomẹmro rọ ha kpahen ọnana, ene yono kpahen oborẹ ọsoriẹ omẹhakpahontọre ọwan o rhiẹ orhienbro rọ mai rhomu.
[Ekete Ra Djokarhọ]
^ Udjoghwẹmro 12 Ẹgbukpe uriusionrin na ono toba vwẹre, bọmọke “igegede ereva na” ine ki rhiẹ emọ Osolobrugwẹ. Ọrẹn, ra mẹriẹn taghene aye i homakpahontọre rẹn Osolobrugwẹ ne na, aye ina sabu se Osolobrugwẹ “Ọsẹ,” ene ji rhe aye rhẹ ihworho ra ga Jehova.—John 10:16; Isa. 64:8; Matt. 6:9; Rev. 20:5.
Marhẹ wu na Kpahenrhọ ye Lele?
• Me yo mevirhọ rẹ ohworho ọnọ homakpahontọre rẹn Osolobrugwẹ?
• Erere ego ya mẹrẹn arha homakpahontọre rẹn Osolobrugwẹ?
• Mesoriẹ o fo nẹ Ilele Kristi i homakpahontọre rẹn i Jehova?
[Enọ ri ha Uvuẹn Uyono]
[Ifoto]
Arha nyalele omẹhakpahontọre ọwan, ọ lẹrhẹ ọwan vwo obọdẹn omamerhomẹ