UVUẸN akpọ na ephian, uvuẹn ẹga ọrhẹ irueruo amwa, ihworho a nẹrhomo. Aye a nẹrhomo aye ọvo i rha havwiẹ kologho; yanghene aye a nẹrhomo kugbe ọrẹ otu. Aye a nẹrhomo uvuẹn ishọshi, uvuẹn ọghwan, uvuẹn synagogue, uvuẹn mosque ọrhẹ uvuẹn efi. Ezẹko a ha ere kpa otọre nẹrhomo, omaran ji te itama, ema, ẹbe ẹrhomo, yanghene ẹrhomo ra ya rhẹ ibiẹ ophanphan ra ha dọn ekete.

Ẹrhomo ọ lẹrhẹ ituakpọ vẹnẹ emama erọrọ re nyerẹn uvuẹn otọrakpọ na. Itiọrurhomẹmro, ọwan rhẹ eranmo i vwo ohọhọme. Jerẹ eranmo, ọwan a rie emaren, mwuẹhẹn ji da ame. E ji vwiẹ ọwan, ọwan e nyerẹn, ji hwuẹ jerẹ eranmo. (Ecclesiastes 3:19) Ọrẹn ituakpọ ọvo ya nẹrhomo. Mesoriẹ?

Ọkezẹko, a maren ọwan rhẹ ọdamẹ ọnana. Ẹrhomo izede owu rẹ ihworho a sabu lele Osolobrugwẹ tẹmro, emru rẹ ihworho buebun e nẹ fuanfon. Baibol na o djephia taghene a maren ọwan rhẹ ọdamẹ re ne ruẹ ekwakwa enana. (Ecclesiastes 3:11) Jesu Kristi nọ tare: “Omamerhomẹ ọ havwiẹ harẹn ihworho ri vwo ọdamẹ aye ine yono kpahen Osolobrugwẹ.”—Matthew 5:3.

Ihworho i vwo ọdamẹ aye ina ga Osolobrugwẹ, ọrana yọ soriẹ ẹga buebun a havwiẹ, kugbe ekete ihworho a nya ya nẹrhomo. Itiọrurhomẹmro, ihworho ezẹko e nie taghene aye a guọlọ userhumu Osolobrugwẹ nẹ aye i ki sabu nyamwu ọdamẹ ọrana-a. O mwuruon ẹro taghene ituakpọ i ghini vwo omẹgbanhon ọnana? Ọwan e vwo omẹgbanhon ọrana-a, nime e kiki hwuẹ, e ji rhe kpahen obaro na-a. Ohworho ro vwo ẹghwanren ghwẹ ọwan, omẹgbanhon ephian, ro ji nyerẹn bẹmẹdẹ, yọ nọ sabu yẹ ọwan userhumu ra ghini guọlọ. Me yẹ edamẹ enana re mwu ọwan nẹrhomo dede?

Gbe rorie: Wu nekpẹn ọkpọvi, ẹghwanren, yanghene ẹkpahenrhọ dẹ ne fọkiẹ enọ egbogbanhon rẹ ituakpọ i vwe rhe ẹkpahenrhọ ye? Wu guọlọ obọdẹn urhebro dẹ nẹ fọkiẹ ohworho wu vwo ẹguọlọ kpahen ro hwuru, yanghene ọkpọvi ne wu sabu brorhiẹn ẹghwanren, yanghene wu nekpẹn ẹharhomu dẹ ne fọkiẹ ọdandan wu ruru?

Lele oborẹ i Baibol na ọ tare, enana iroro eghoghanren re mwu ohworho nẹrhomo. Baibol na yẹ ọbe ra na sabu hẹroso arha ta kpahen urhomu-ẹmro ọnana ro sekpahen ẹrhomo, o ji vwo iyẹnrẹn ẹrhomo rẹ emẹse ọrhẹ ehworhare ri fuevwan i nẹren. Aye i nẹrhomo fọkiẹ urhebro, ọkpọvi, ẹharhomu, ọrhẹ ẹkpahenrhọ rẹn enọ ri mai gbanhon rẹ aye i vwori.—Psalm 23:3; 71:21; Daniel 9:4, 5, 19; Habakkuk 1:3.

Dedevwo ẹrhomo enana i vẹnẹren, ọrẹn aye i vwo ohọhọme. Ehworhare ọrhẹ emẹse enana i rhe ekwakwa eghoghanren ri sekpahen ẹrhomo ẹnẹ, rẹ ihworho buebun inyenana i vwe rhe. Aye i rhe ohworho ro fori na nẹrhomo vwe.