O VWO emru orhorhomu rẹ ẹrhomo o ruẹ rẹn ọwan? Baibol na o djephia taghene ẹkpahenrhọ na ee, ẹrhomo idibo i Jehova ri fuevwan a ghini ha userhumu rẹn ọwan. (Luke 22:40; James 5:13) Itiọrurhomẹmro, o vwo ekwakwa irhorhomu buebun rẹn ẹrhomo ọnọ sabu ru rẹn ọwan izede ọrẹ ẹhẹn, ọrẹ iroro, ọrhẹ ọrẹ ugboma. Izede ọgo?

Jerẹ udje, gba haye taghene a yẹ ọmọ ẹghẹlẹ. Wu ta riẹn no dje ekpẹmẹ phia? Mesoriẹ ọrana ọ ghanren? Fọkime erhe dje ekpẹmẹ phia, ọdaremẹro ọwan nọ gbanhanrhọ. Rhe omaran ọ ji havwọ ọke ra nẹrhomo vwe Osolobrugwẹ? Ee! Roro kpahen idje ezẹko.

Ẹrhomo ekpẹmẹ. Ọwan i rha kpẹmẹ Ọsẹ ọwan fọkiẹ emamọ ekwakwa ro ru rẹn ọwan, nọyẹ a tẹnroviẹ ebrurhọ ọwan. Omarana, ọdaremẹro ọwan no no kodorhọ, oma nọ nọ merhen ọwan rhọ, ne ne ji vwo omamọ uruemru.—Philippians 4:6.

Udje: Jesu o dje ekpẹmẹ phia fọkiẹ oborẹ Ọsẹ ye ọ kerhọ ji kpahanrhọ ẹrhomo ọnẹyen lele.—John 11:41.

Ẹrhomo Ẹharhomu. Ọwan i rha nẹrhomo nẹ Osolobrugwẹ ọ harhomu ọwan, ẹhẹn obrorhiẹn ọwan nọ fuanrhọ, na ghwẹriẹ nẹ ẹhẹn sa, jeghwai kẹnoma rẹn ọdandan. Ẹhẹn obrorhiẹn ọwan ọrhọ ha ọwan guẹnzọ-ọn.

Udje: David o djephia uvuẹn ẹrhomo ọnẹyen taghene ọ ghwẹriẹ nẹ ẹhẹn rhẹ, oborẹ o ruru na ọ ji da ye omamọ.—Psalm 51.

Ẹrhomo fọkiẹ ọkpọvi ọrhẹ ẹghwanren. Arha nẹrhomo vwe i Jehova nọ kpọ ọwan vi ji yẹ ọwan ẹghwanren re ne brorhiẹn ro serhọ, ọnọ sabu ha userhumu rẹn ọwan vwo omeriotọre. Ọnọ karorhọ ọwan ekete omẹgbanhon ọwan o teri, jeghwai lẹrhẹ ọwan hẹrosuẹ Ọsẹ ọwan rọ ha obẹ odjuwu.—Proverbs 3:5, 6.

Udje: Solomon ọ homariotọre nekpẹn ọkpọvi ọrhẹ ẹghwanren ro no sun agbamwa Israel.—1 Kings 3:5-12.

Ẹrhomo ra nẹ uvuẹn ọke ebẹnbẹn. Ọwan i rhe rhiẹ ọmudu ọwan firhọ rẹn Osolobrugwẹ ọke ẹhẹn ọwan orho seriotọre, ọmudu ọwan nọ nọ gbanhon, ọwan ni na hẹroso i Jehova ukperẹ ono rhiẹ oma ọwan.—Psalm 62:8.

Udje: Orodje Asa ọ nẹrhomo ọke rọ dẹrughwaroghwẹ evwreghrẹn re mwuofẹn.—2 Chronicles 14:11.

Ẹrhomo ra nẹ fọkiẹ awọrọ ri ha ọkanronmẹ. Aruẹ ẹrhomo ọnana ọ ha userhumu rẹn ọwan wọnrọn hasuẹ uruemru ọdamẹ omobọ, ji lẹrhẹ ọwan vwo aruẹdọn ọrhẹ uruemru re roro rẹn awọrọ.

Udje: Jesu ọ nẹrhomo fọkiẹ idibo yi.—John 17:9-17.

Ẹrhomo ujiri. Ọwan i rhe jiri Jehova fọkiẹ ewian igbevwunu ọrhẹ iruemru enẹyen, ọghọ ọrhẹ ọdaremẹro re vwo kpahiẹn no no kodorhọ. Aruẹ ẹrhomo ọnana ọnọ ha userhumu rẹn ọwan tikẹrẹ Osolobrugwẹ ro rhiẹ Ọsẹ ọwan rhọ.

Udje: David ọ dabu jiri Osolobrugwẹ fọkiẹ emama enẹyen.—Psalm 8.

Ebrurhọ ọrọrọ re vwo nyoma ẹrhomo yẹ “ufuoma ọrẹ Osolobrugwẹ rọ ghwẹ ọmẹrẹnvwrurhe ephian.” (Philippians 4:7) Ọ bẹn ra na sabu vwo ẹhẹn ro totọre uvuẹn akpọ ọnana rọ vuọnren rhẹ ebẹnbẹn. Ẹrhomo o vwo erere izede ọrẹ ugboma. (Proverbs 14:30) Ọrẹn, a mẹrẹn erere na fọkiẹ omẹdamu ọwan ọvo? Gbinẹ o ji vwo emru ọghoghanren ọrọrọ ro sekpahiẹn?