Baibol Na O Wene Akpenyerẹn

MESORIẸ ọmase owu rọ vrẹn ẹgbukpe 60 ne ọ dobọ omẹgọ ji? Me yo mwu orherẹn i Shinto owu nyajẹ owian orherẹn yen vwo, ji rhiẹ oghwoghwẹmro? Marhẹ ọmase owu rẹ ekrun ọrọrọ ọ mọrọn ghwanren, o ru nyerẹnghele iroro ohworho ro vwo vwo ọsẹ ọrhẹ izu? Jenẹ a mẹrẹn oborẹ ihworho enana i tare.

Mẹmẹ rhẹ ọvrẹn harẹn ema ghwomara-an.”—ABA DANSOU

ẸGBUKPE RE VWIẸ YE: 1938

ẸKWOTỌRE RO NURHE: BENIN

IKUEGBE YI: ỌGEHỌ

AKPENYERẸN MẸ BI: Mi ghwanranren uvuẹn amwa i So-Tchahoué, amwa na o vwo ame omamọ, ọ ji kẹrẹ usurhẹn. Ihworho amwa na e kpe irhenrin, aye e ji kruẹn erhuẹn, ẹvwe, igegede, iti, ọrhẹ efen. Izede ọ ha amwa na-a, omarana owọ yẹ ihworho na a ha ruiruo. Dedevwo eghwa iblọku i havwiẹ, ọrẹn eghwa ra ha erhan ọrhẹ odin bọn yi mai bun uvuẹn amwa na. Ihworho re rhirhiẹ amwa na ivwiegbere omamọ. Udabọ ọrana, ozighi egbe ọ ha uvuẹn amwa na jerẹ emwa ri rhieri-i.

Ọke mia kamu, ọsẹ mẹ no djeri mẹ ọrhẹ omizu mẹ ye yono oborẹ e kporẹbo, omaran yẹ ame i nya fiomarhọ omẹgọ. Ọke mia ghwanren ne ni mi ha i Dudua yanghene Oduduwa, ro rhiẹ osolobrugwẹ itu i Yoruba ruẹ osolobrugwẹ mẹ. Ni mi bọn oghwa rẹn osolobrugwẹ ọnana, jeghwai ze izobo riẹn ọke ephian rhẹ elẹ, ọfugbo, eragha, irilele, irurẹ ọrhẹ aruẹ eranmo erọrọ. Rhọmọrhiẹ igho mia ghwọghọ rhẹ izobo enana-a, aye a joma ha ọsoso igho mẹ.

OBORẸ I BAIBOL NA O WENE AKPENYERẸN MẸ LELE: Ọke mia tuẹn uyono i Baibol na rhọ, ni mi mẹrẹnvwrurhe taghene Jehova ọvo yẹ Osolobrugwẹ urhomẹmro na. Mi ji yono taghene o vwo ekwerhọ kpahen emẹgọ-ọ. (Exodus 20:4, 5; 1 Corinthians 10:14) Ni mi me rhe oborẹ o fori mi ru. Omarana, ni mi donron ọsoso ema mẹ fughwẹ, ni mi ruẹ oghwa mẹ fon ji tiẹ kemru kemru ri sekpahen emẹgọ nie. Ni mi dobọ ẹbo ekporo ji, mi vwe rhe ji vwobọrhọ izobo ọrhẹ irueruo rẹ ihworho e ruẹ rẹn orinmi-i.

Ra mẹriẹn taghene mi vrẹn ẹgbukpe 60 ne na, ọ lọhọ ha mẹ mi ne ruẹ ewene enana-a. Igbehian mẹ, ihworho ekrun mẹ, ọrhẹ ere rhirhiẹ keri mẹ i kparehaso mẹ, aye i ji ha mẹ djechẹẹ. Ọrẹn, ni mi nẹrhomo vwe i Jehova nọ yẹ mẹ omẹgbanhon mi ne ruẹ oborẹ ọgbare. Mi mẹrẹn urhebro nẹ ẹmro ri ha uvuẹn Proverbs 18:10, rọ tare: “Odẹ i Jehova ọkpoghwa ọgbogbanhon. Uvuien yẹ evwata a zẹrua, aye ne vwo usimi.”

Emru ọrọrọ rọ ji sa mẹ erhumu yẹ iyono Iseri Jehova mia nya. Mi mẹrẹn ẹguọlọ Ilele Kristi avwaye, oma ọ ji merhen mẹ omamọ nime aye a damoma nyalele evwan efuanfon ri ha uvuẹn i Baibol na. Oborẹ mi mẹrẹnren avwaye, ọ yẹre mẹ imwẹro taghene Iseri Jehova yẹ ẹga urhomẹmro na.

 ERERE MI MẸRẸN NE: Iruemru-urhi Baibol ri mia ha ruiruo i ha userhumu mẹ vwo omamọ onyerẹnkugbe rhẹ emọ mẹ. Nọ họhọre taghene a kpare ọkpẹ ohwan nẹ urhomu mẹ. Vẹrhẹ bi, mia ghwọghọ igho mẹ rhẹ ema re vwe nyerẹn, ra vwa yẹ mẹ erere owuorowu. Vwana, mia ga i Jehova ne, ro rhiẹ ohworho rọ nọ sabu ha ebẹnbẹn ọwan ephian toba. (Revelation 21:3, 4) Oma ọmerhenren mẹ omamọ taghene mẹmẹ rhẹ ọvrẹn harẹn ema ghwomara-an, ukpomaran, mẹmẹ ọvrẹn harẹn i Jehova! Mi mẹrẹn ẹruete ọrhẹ omefuon nyoma i Jehova.

Mi havwọ ẹguọlọ Osolobrugwẹ nẹ ọke ọmọvwerhe mẹ rhe.”—SHINJI SATO

ẸGBUKPE RE VWIẸ YE: 1951

ẸKWOTỌRE RO NURHE: JAPAN

IKUEGBE YI: ORHERẸN I SHINTO

AKPENYERẸN MẸ BI: Uvuẹn uvwrotọre i Fukuoka yi mia ghwanren. Eri vwẹre mẹ i vwo ẹguọlọ kpahen ẹga omamọ; aye i yonirin mẹ nẹ ọke ọmọvwerhe mẹ ne mi ga isolobrugwẹ i Shinto. Ri mie rhiẹ uphuphẹn na, mie roro kpahen obaro akpọ mẹ, mi ji vwo omwemẹ ọgbogbanhon mi na ha userhumu rẹn ihworho ra rioja. Mi karorhọ ọke owu mia ha isukuru, oyono ame nọ nọren ame oborẹ ame ine ruo ame i rha ghwanren ne. Emọ iklasi mẹ i vwo obọdẹn odjẹ, ezẹko i guọlọ rhiẹ egba irherhe isayẹnsi. Ni mi tare taghene odjẹ mẹ ọrẹ mi na ga Osolobrugwẹ. Aye ephian na chẹẹ mẹ.

Ọke mia ruotọre nẹ isukuru, ni mi ruẹ isukuru mi ne rhiẹ oyono uvuẹn ẹga. Uvuẹn isukuru na, ni mi mẹrẹn orherẹn i Shinto owu rọ ha uphẹn ro vwori ephian se ọbe owu ro vwo ugbuko obiebi. Ẹdẹ owu nọ nọren mẹ, “Sato, wu rhe ọbe ọnana?” Nime mi mẹrẹn ugbuko ọbe na ne, ni mi tare “Baibol.” Nọ tare, “Kohworho kohworho rọ guọlọ rhiẹ orherẹn i Shinto ono vi se ọbe ọnana.”

Ọke oru, ni mi ya dẹ i Baibol. Ni mi sẹrorẹ i Baibol na rhẹ ekete mie fi ẹbe rhọ, jeghwai dabu hẹrote yi. Ọrẹn, mie fiẹ ọke rhotọre seyi-i, nime ewian i vuọn abọ uvuẹn isukuru na. Ọke mia ruotọre nẹ isukuru na, ni mai ga ẹrhẹ orherẹn uvuẹn oghwa ẹga i Shinto. Vwana, mi nyamwu ẹkẹ mi bru te oma ne ọke mai kamu.

Ọrẹn o jiri-i, ni mi ma mẹrẹnvwrurhe taghene rhẹ oborẹ mie ni orherẹn i Shinto rhọ bi, yọ havwọ-ọ. Irherẹn na buebun e vwo ẹguọlọ ọrhẹ ọdamẹ kpahen awọrọ-ọ. Buebun e vwo esegburhomẹmro-o. Owu usuẹn irherẹn eduado na no hinmi ta mẹ taghene: “Mi rha guọlọ fikparobọ, irherhe akpọ na ọvo ye mi na ta kpahen. Mi vwa ta kpahen esegburhomẹmro ekete ara-an.”

Aruẹ ẹmro erana i lẹrhẹ ẹga i Shinto bẹn mẹ. Dedevwo mia ji wian uvuẹn oghwa ẹga na, ọrẹn mia ji damẹ ẹga erọrọ. Ọrẹn, mia mẹrẹn emru orhorhomu owuorowu uvuẹn aye-e. Ẹhẹn mẹ no seriotọre ọgbọ buebun fọkiẹ ẹga mia guọlọ. Ni mie roro taghene o vwo ẹga urhomẹmro owuorowu-u.

OBORẸ I BAIBOL NA O WENE AKPENYERẸN MẸ LELE: Uvuẹn ẹgbukpe 1988, ni mi mẹrẹn onyẹ i Buddha owu rọ ha urhebro mẹ mi se i Baibol na. Ni mi karorhọ orherẹn i Shinto na rọ ji ta mẹ taghene mi se i Baibol na ikpe ezẹko ri vrẹnren. Ni mi nyalele urhebro na. Ọke mia tuẹn i Baibol na ese rhọ, nọ ghini ruẹ oma mẹ siyẹ. Ọkezẹko, mie seyi ọsoso ason na ye te urhiọke.

Oborẹ mi mẹrẹnren ọke mie se i Baibol na, no mwurun mẹ nẹrhomo vwe Osolobrugwẹ ro vwo i Baibol na. Ni mi tonrhọ rhẹ ẹrhomo ri Jesu o yono idibo yi rọ ha uvuẹn Matthew 6:9-13. Kunọke eva kunọke eva yi mia vwanriẹn ẹrhomo ọnana, mia tobọ nẹ yen ọke mia wian uvuẹn oghwa ẹga i Shinto.

Mi vwo enọ buebun kpahen oborẹ mie se uvuẹn i Baibol na. Uvwrọke ọnana mi rọnmọ ne, mi ji rhe taghene Iseri Jehova e yono ihworho kpahen i Baibol na nime aye i kọn bru ane mẹ uvwrọke owu. Ni mi guọlọ Oseri Jehova owu jeghwai nọ yen enọ buebun. O gberi mẹ unu ọke rọ ha i Baibol na kpahenrhọ ọsoso enọ mẹ ephian. No ruẹ ẹkwaphiẹrhotọre nẹ Iseri Jehova i leli mẹ yono.

O jiri-i, ni mi tuẹn uyono Iseri Jehova ẹnya rhọ. Ọke ọrana, mie rhe taghene mẹmẹ rhẹ Iseri Jehova ezẹko mi ru gbalogbalo vrẹn ne ye rie uyono kugbe-e. Udabọ ọrana, aye i dabu mroma mẹ ghwologhwolo ji rhiabọ dedi mẹ.

Uvuẹn iyono erana, mi yonorin taghene Osolobrugwẹ ọ guọlọre nẹ esa i dje ẹguọlọ ọrhẹ ọghọ rẹn ekrun aye. Vẹrhẹ bi, mie fiomarhọ owian orherẹn mẹ omamọ nọ lẹrhe mẹ sẹrerhumuji ane mẹ ọrhẹ emọ ame awanva. Ni mi mẹrẹnvwrurhe taghene mia dabu kerhọ ihworho ra ma ga ogame uvuẹn oghwa ẹga na, ọrẹn mia ji kerhọ oborẹ ane mẹ ọ ta dẹ-ẹ.

Ọke uyono mẹ o ruẹ riaro, ni mi yono ekwakwa buebun kpahen i Jehova ri tiri mẹ kẹriẹ. Ekete i Baibol jerẹ Romans 10:13 ọ hobọte mẹ omamọ, rọ tare: “Kohworho kohworho ro se odẹ ọrẹ i Jehova ono simirhọ.” Mi havwọ ẹguọlọ Osolobrugwẹ nẹ ọke ọmọvwerhe mẹ rhe, ọrẹn vwana mi mẹrenriẹn ne!

Bibiesuọn bibiesuọn, ni mi nyajẹ owian orherẹn mẹ vwo uvuẹn oghwa ẹga na. Ọke ukaro, udu o bruru mẹ kpahen oborẹ ihworho ina ta mi rha nyajẹ ẹga i Shinto vwo. Ọrẹn mi ghwanriẹn brorhiẹn ne taghene mi rha mẹrẹn Osolobrugwẹ urhomẹmro na vwrurhe uvuẹn ekete ọrọrọ, mi na dobọ ẹga na ji. Omarana, uvuẹn ẹgbukpe 1989, ne mi ru lele orhienbro mẹ. Ni mi nyajẹ owian orherẹn na vwo jeghwai homakpahontọre rẹn i Jehova.

Ọ lọhọ mi ne nẹ oghwa ẹga na-a. Irherẹn eduado na i ghwọghwu mẹ, ji damoma neneyo mi sabu daji. Ọrọ mai bẹn yẹ oborẹ mi ne ru ta rẹn eri vwiẹre mẹ. Ọke mia ha izede mie bru aye nya, udu no bru mẹ gbangbanhon, te erhirhiẹ aghwẹ mẹ e kpogho! Mi vwẹriẹ okokọ ọgbọ buebun uvuẹn izede nẹrhomo vwe i Jehova nọ yẹ mẹ omẹgbanhon.

Ọke mi te oghwa eri vwiẹre mẹ, ofẹn o kiki mwu mẹ mi na ta rẹn aye kpahen ẹmro na. Inọke ezẹko i vrẹnren dede. Obẹtaye, ọke mia nẹrhomo hin ọgbọ buebun, ni mi dje ekwakwa ephian fiotọre rẹn ọsẹ mẹ. Ni mi ta riẹn taghene mi mẹrẹn Osolobrugwẹ urhomẹmro na ne, mia guọlọ nyajẹ ẹga i Shinto vwo ne mi sabu ga Osolobrugwẹ. O gbe ọsẹ mẹ unu, oma ọ ji merhiẹ-ẹn. Awọrọ uvuẹn ekrun ame ni rhiẹ oghwa ame, ji damoma aye ine wene ẹhẹn mẹ. Mia guọlọ lẹrhẹ ekrun mẹ mwuomarhọ-ọ, ọrẹn ọke owu ọvo na, mi rheri taghene mi na ga i Jehova yẹ oborẹ ọgbare. Ọke oru, ihworho ekrun mẹ ni kwerhọ orhienbro mẹ.

Mi ne nẹ oghwa ẹga na, ọrana emru owu; ọrẹn ne mi sabu tie nẹ iroro mẹ, ọrana emru ọrọrọ. Owian orherẹn na ọ ruẹ oma mẹ siyẹ ne. Mi damoma ni na kpariroro vrẹn ye, ọrẹn kemru kemru mia mẹrẹn ọ lẹrhe mẹ karorhọ akpenyerẹn mẹ bi.

Ekwakwa eva yi ha userhumu mẹ tiẹ iroro enana nẹ ẹhẹn mẹ. Ọrukaro, ni mi guọlọ ekwakwa ephian ri surhobọmwu ogame mẹ bi ri ha uvuẹn oghwa mẹ. Ni mi torhẹ aye ephian, te ẹbe, ifoto, ọrhẹ ekwakwa eghoghanren erọrọ. Ọreva, mi ha uphẹn ephian mi vwori kwomakugbe Iseri Jehova. Omẹkprakpra aye kugbe obẹhatua aye ọ ha userhumu mẹ omamọ. Bibiesuọn bibiesuọn, akpenyerẹn mẹ bi nọ sẹremẹrọ.

ERERE MI MẸRẸN NE: Vẹrhẹ bi, mi vwa dabu hẹrote ane mẹ ọrhẹ emọ mẹ-ẹ, ọrana nọ lẹrhe mẹ mwuomarhọ. Ọrẹn ọke mie lele aye ghwọghọ ọke kugbe, jerẹ oborẹ i Baibol na o yono esa nẹ aye ru, onyerẹnkugbe ame nọ mọ kpẹnkpẹnrhọ. Ọke oru, ane mẹ nọ homaba mẹ rha ga i Jehova. Ame rhẹ ọmọ ame ọhworhare ọrhẹ ọmọ ame ọgbọtọ kugbe esa ye, a ga i Jehova kuẹgbe vwana.

Ọke mia karorhọ odjẹ mi djẹre mi na ga Osolobrugwẹ ji ha userhumu rẹn awọrọ ọke mia ha ọmọvwerhe, ni mie vwo imwẹro taghene oborẹ mia guọlọ ọrhẹ ekwakwa erọrọ i teri mẹ obọ ne. Mie rhe oborẹ mi na kpẹmẹ i Jehova lele-e.

“Mi rheri taghene emru o vruẹ.”—LYNETTE HOUGHTING

ẸGBUKPE RE VWIẸ YE: 1958

ẸKWOTỌRE RO NURHE: SOUTH AFRICA

IKUEGBE YI: IRORO OHWORHO RO VWO VWO ỌSẸ ỌRHẸ IZU

AKPENYERẸN MẸ BI: E vwiẹre mẹ uvuẹn Germiston, ro rhiẹ amwa rọ vwọ ghwai vwo ozighi egbe omamọ. Ọke eri vwiẹre mẹ a mẹriẹn taghene aye i sabu hẹrote mẹ-ẹ, aye ni kpare mẹ riẹ ekete ra mọrọn emọ ri vwe vwo esẹ rhẹ izu. Mi ha ọmọboban omamọ, nọyẹ ẹdẹ 14 ọvo ọke esa ọrhẹ ane owu a kpare mẹ ha, ni mie roro taghene aye yi vwiẹre mẹ. Ọrẹn ọke mie rhe kpahen ikuegbe mẹ, nọ dare mẹ taghene mie vwo ọsẹ rhẹ izu-u. Ni mie roro taghene eri mọrenren mẹ ghwanren na i sabu rhiẹ ọsẹ ọrhẹ izu mẹ-ẹ, aye e ji vwẹruọ erhirhiẹ mẹ-ẹ.

Ọke mia ha emrẹ ẹgbukpe 16, ni mie riẹ iklọbu ya da inyo, avwaye omẹmẹ ọrhẹ igbehian mẹ e gbigbegbe jeghwai kerhọ ijoro. Ọke mie te ẹgbukpe 17, ni mi tuẹn isigẹti ephopho rhọ. Mi guọlọ djabọ jerẹ ihworho ri ha ifoto ra ha jiri isigẹti. Ọke mie te ẹgbukpe 19, ni mi tuẹn owian rhọ uvuẹn Johannesburg, avwaye mia homaba orharhere okugbe. O jiri-i, ni mia ha erharhere ẹmro ruiruo, phopho isigẹti omamọ, ji da inyo vrẹn oma uvuẹn ehion ọkprughwre na.

Udabọ erana, mi ji sasa ọrẹ ugboma. Ọke ephian mia sasoma ji fa ibọru emẹse. Mie ji fiomarhọ owian mẹ omamọ, na sabu rhe mẹ uvuẹn ikọpini re ruẹ ikọmputa. Fọkiẹ ọnana ni mi me fe, ihworho buebun ne ni mẹ taghene mi vwo ekwakwa ephian mi guọlọre. Ọrẹn, oma ọ vwo merhen mẹ-ẹ, ofu akpọ o ji ze mẹ kpe ne. Mi rheri uvuẹn ẹhẹn mẹ taghene emru o vruẹ.

OBORẸ I BAIBOL NA O WENE AKPENYERẸN MẸ LELE: Ọke mia tuẹn i Baibol na e yono rhọ, ni mi yonorin taghene Jehova Osolobrugwẹ ẹguọlọ. Mi ji yono taghene o dje ẹguọlọ ọrana phia nyoma ro tiobọnẹ Ẹmro ọnẹyen ro rhiẹ i Baibol na. Nọ họhọre taghene ọ ya ileta vwe ọwan, rọ sa ọwan erhumu kpọ idjaghwẹ ọwan viẹ. (Isaiah 48:17, 18) Ni mi mẹrẹnvwrurhe taghene mi rha guọlọ mẹrẹn erere nẹ ọkpọvi Jehova, o fori mi ruẹ ewene eduado uvuẹn akpenyerẹn mẹ.

Ewene owu ro fori mi ru yẹ ihworho mie kwomakuẹgbe. Ni mi roro kpahen oborẹ ọ ha uvuẹn Proverbs 13:20, rọ tare: “Ohworho rọ nyalele ọvwẹghwanren ọnọ ghwanren, ọrẹn, ohworho ro lele akpa ruẹ kugbe ọnọ rioja.” Uruemru-urhi ọnana no mwurun me nyajẹ igbehian mẹ ahwanren vwo, jeghwai mwu igbehian ekpokpọ uvwre Iseri Jehova.

Ewene rọ mai bẹn ha mẹ yẹ ọrẹ mi na dobọ isigẹti ephopho ji; nime ọ ruẹ oma mẹ siyẹ nẹ. Ọke mia damoma fi obẹnbẹn ọnana kparobọ ne, ni mi mẹrẹn obẹnbẹn ọrọrọ. Isigẹti ephopho mi dobọji, nọ lẹrhere 30 pounds yanghene 13.6 kg haba ọhiẹn mi vwori! Ọnana ọ lẹrhẹ oma merhen mẹ kakaka-a, ọ joma ha mẹ ẹgbukpe ikpe mi ki sabu rharhumu djabọ jerẹ oborẹ mi havwọ bi. Ọrẹn, mi rheri taghene ne mi dobọ isigẹti ephopho ji, yẹ oborẹ ọgbare mi ne ruo. Mia nẹrhomo vwe i Jehova ọke ephian, ọye nọ ji yẹ mẹ omẹgbanhon mie fikparobọ.

ERERE MI MẸRẸN NE: Vwana, mi vwo omọkpokpọ rhọ ne. Mi ji vwo ẹhẹn otemẹ ne, omamerhomẹ mi vwori vwana orho sekpahen owian mẹ, ẹrhẹ mi havwọ, ọrhẹ efe mi vwori-i. Ukpomaran irhomẹmro i Baibol mia ha yono ihworho, yọ yẹ mẹ omamerhomẹ vwana. Fọkiẹ ọnana, emẹse awansa rẹ omẹmẹ rhẹ aye a gba wian ekete owu bi, e leli mẹ ọrhẹ esa mẹ ga i Jehova kugbe ne. Bọmọke esa ọrhẹ ane ri hẹrote mẹ ghwanren na i ki hwu, mi ji vwo uphẹn mia ta rẹn aye kpahen ẹrhọmọnuhwu ri Baibol na o vive kpahen.

Nime mi tikẹrẹ i Jehova ne, nọ lẹrhere mẹ sabu nyerẹnghele iroro ohworho ro vwo vwo ọsẹ ọrhẹ izu. Vwana, mi rheri taghene mi ha usuẹn ekrun akpọ ephian ra ga i Jehova kuẹgbe. Mi ji vwo izu, esẹ, imizu ehworhare, ọrhẹ imizu emẹse buebun uvwre aye ne.—Mark 10:29, 30.

[Picture]

Mi rhiẹromẹrẹn ẹguọlọ Ilele Kristi uvwre Iseri Jehova

[Picture]

Oghwa ẹga i Shinto ri mia ga ogame bi