Mi vwo ẹguọlọ kpahen emama avwọke mia ha ọmọvwerhe. Ekrun mẹ e riẹ ogba irhorhomu ọke ephian ya riakpọ, ọrhẹ isurhẹn irhorhomu ri ha uvuẹn amwa ame re se Jyväskylä, uvuẹn Central Finland. Mi ji vwo ẹguọlọ kpahen eranmo. Ọke mia kamu, ilogbo ọrhẹ irimwamwa ephian mi mẹrẹnren yi mie lele ruiruẹn. Ri mia dua sa, ni mie biomevwan fọkiẹ oborẹ ihworho a ha oja riẹ eranmo lele. Ọke oru, ni mi homaba ukoko ra wọnrọn fọkiẹ ugbomọphẹ eranmo, avwaye mia mẹrẹn ihworho ri ji vwo aruẹ iroro mẹ.

Ame na ta kpahen ugbomọphẹ eranmo. Ame ne fomu iyẹnrẹn phia, jeghwai ludje hasuẹ ihworho ra rhẹ ophianron eranmo, ọrhẹ era ha eranmo damu imwu. Ame ni tobọ ha ukoko ọkpokpọ rọ sẹrorẹ eranmo mwu. Nime ame e lele ihworho wọnrọn ọke ame e ludje, ame rhẹ elọkpa ne vwo ẹmro ọgbọ buebun. E mwurun mẹ rhẹ ekanron jeghwai kpare mẹ riẹ oghwa ẹghware ọgbọ buebun.

Haba ọdamẹ mi vwo kpahen eranmo, evwan o ji biomi mẹ kpahen ebẹnbẹn erọrọ ri ha uvuẹn akpọ na. Omarana, ni mi homaba ikoko buebun, tobọ te ikoko re se Amnesty International ọrhẹ Greenpeace. Mia ha ọsoso omẹgbanhon mẹ hobọtua ọsoso oborẹ aye e ruẹ. Mia wọnrọn fọkiẹ ivwiegbere, erẹ orhọmo o kpe, ọrhẹ awọrọ ri vwe vwo userhumu.

Ọrẹn bibiesuọn bibiesuọn, ni mi mẹrẹnvwrurhe taghene mi sabu wene akpọ na-a. Dedevwo ikoko enana mi homaba na i damoma kwaphiẹ ebẹnbẹn ezẹko rhọ, ọrẹn ebẹnbẹn eduado na ne biomẹrhọ biomẹrhọ. Nọ họhọre taghene ẹhẹn ọkon o mwu akpọ na rọ ne, o vwo ọrọ damerhọ emru owuorowu-u. Ẹhẹn mẹ no seriotọre.

Ni mie mwuomarhọ nime mia sabu ha userhumu phia-a, ni mie roro kpahen Osolobrugwẹ ọrhẹ Baibol na. Mi kiki lele Iseri Jehova yono i Baibol na vrẹn ne. Dedevwo mi vwo ọdaremẹro kpahen uruemru esiri ọrhẹ ọdamẹ aye i dje ha mẹ, ọrẹn mie ji mwuegbe mi ne wene akpenyerẹn mẹ ọke ọrana-a. Vwana, ekwakwa i wẹnẹ ne.

Ni mi kpare i Baibol mẹ, ji tuẹn isese yi rhọ. Ọ họhọ umwu ro simi ora mẹ. Mi djokarhọ ekete buebun uvuẹn Baibol na ri yonirin ọwan taghene a dabu hẹrote eranmo. Jerẹ udje, Proverbs 12:10 ọ tare taghene “emamọ ihworho a hẹrote eranmo aye.” (Good News Translation) Mi ji mẹrẹnvwrurhe taghene rhẹ Osolobrugwẹ yọ suẹ ebẹnbẹn akpọ na-a. Ukpomaran, ebẹnbẹn ọwan e biomẹrhọ fọkime ihworho i vwa nyalele ọkpọvi enẹye-en. Oma ọ merhenren mẹ omamọ ọke mie yono kpahen ẹguọlọ i Jehova ọrhẹ erhionrin ọnẹyen.—Psalm 103:8-14.

Uvwrọke ọnana, ni mi mẹrẹn ọbe owu rọ rionbọrhọ ọbe na What Does the Bible Really Teach? ni mi durhie rhọye. O jiri-i, esa ọrhẹ ane owu ri rhiẹ Iseri Jehova ni rhiẹ oghwa mẹ, ji ha uyono i Baibol mwu mẹ. Ni mi ji tuẹn uyono ukoko ẹnya rhọ uvuẹn Aghwẹlẹ Uvie. Fọkiẹ ọnana, ni mie vwo ẹguọlọ kpahen oborẹ mie yono uvuẹn i Baibol na.

Oma ọ merhenren mẹ taghene mi sabu ruẹ ewene fọkiẹ i Baibol na. Ni mi dobọ isigẹti ephopho ji, ọrhẹ inyo ẹda vrẹn oma. Mi ji ruẹ omamẹ ọrhẹ ẹmro mia ta fon. Ni mi ji wene uruemru mẹ kpahen ihworho re suẹn. (Romans 13:1) Mi ji tiobọnẹ akpọ ọfanrhiẹn mie nyerẹn bi, mi nya kodo vwọye omamọ bi ne.

Ewene rọ mai bẹn ha mẹ yẹ ọrẹ mi na ha ukẹro ro serhọ ovwan ni ikoko mi homaba, ra wọnrọn fọkiẹ ugbomọphẹ eranmo ọrhẹ ihworho. Ọ ghwai lọhọ-ọ. Ọke ukaro, ni mie roro taghene mi rhe tiomanẹ usuẹn ikoko na, mi na djẹ aye fughwẹ. Ọrẹn, ni mi ma mẹrẹnvwrurhe dẹn taghene Uvie Osolobrugwẹ ọvo yọ nọ sabu kwaphiẹ akpọ ọwan na rhọ. Omarana, ni mia ha ọsoso omẹgbanhon mẹ hobọtua Uvie na, jeghwai ha userhumu rẹn awọrọ yono kpahiẹn.—Matthew 6:33.

Ọke mia wọnrọn fọkiẹ ugbomọphẹ, mie kiki brorhiẹn kpe ihworho sẹ aye emamọ ihworho yanghene erharhere ihworho, omarana ni mia wọnrọn hasuẹ ihworho mie nẹ rhẹ erharhere ihworho. Ọrẹn, nyoma userhumu i Baibol na, mi vwe rhe vwo utuoma kpahen awọrọ-ọ. Ukpomaran, ni mia damoma vwo ẹguọlọ kpahen ihworho ephian. (Matthew 5:44) Usuẹn izede owu mie dje ẹguọlọ phia rẹn ihworho, yẹ ọrẹ mie ghwoghwo iyẹnrẹn esiri Uvie Osolobrugwẹ. Oma ọmerhenren mẹ ọke mia mẹrẹn oborẹ owian ọnana o ru yẹ ihworho ufuoma, omamerhomẹ, kugbe obọdẹn ifiẹrorhọ.

Mi vwo omefuon ne, nime mi nyajẹ ekwakwa ephian vwo rhẹ abọ i Jehova ne. Mi vwo imwẹro taghene ri Jehova o rhiẹ Ọmemama na, ọ ha uphẹn rẹn eranmo ọrhẹ ituakpọ nẹ aye i rioja bẹmẹdẹ-ẹ, o ji kwe nẹ otọrakpọ orhorhomu ọnana nọ ghwọghọ-ọ. Ọrẹn, nyoma Uvie ọnẹyen, ọnọ kwaphiẹ ọsoso ebẹnbẹn ituakpọ i so rhẹ uvuẹn akpọ na. (Isaiah 11:1-9) Ọ yẹ mẹ aghọghọ ọduado mia mẹrẹn urhomẹmro na vwrurhe jeghwai ha userhumu rẹn ihworho vwo esegburhomẹmro kpahen urhomẹmro na. Mie rhe vwo ẹhẹn mi ne wene akpọ na ghwomara-an.