Mi ghwanranren uvuẹn Warialda, amwa ọkokamu owu rọ kẹrẹ New South Wales. Warialda ekete re ruẹ ikebi, e ji kruẹ igegede ọrhẹ erhuẹn jeghwai wọ ewawọ sansan uvuien. Ihworho i vwa ghwai gbozighi phan uvuẹn amwa na-a.

Nime mẹmẹ yẹ ọkpako usuẹn emọ awan ikpe uvuẹn oghwa ame, ọke mie te ẹgbukpe 13, ni mi tuẹn owian rhọ ni mi sabu hẹrote ekrun na. Ni mia wian owian ikebi, nime mie riẹ isukuru kodo-o. Ọke mie te ẹgbukpe 15, ni mi vwo owian mi na hẹrote esi re mwurun obọ.

Mia mẹrẹn ebrurhọ ọke mia rha wian uvuẹn ikebi na. Itiọrurhomẹmro, mia riamerhen owian na, mi ji vwo ẹguọlọ kpahen ekete owian mẹ. Ason orho te, ni mie siyẹ kẹrẹ erhanren, ji ni ọren ọrhẹ ibiamo na, jeghwai ha omamọ aphẹrẹ. Ni mie roro taghene Ohworho yọ ma ekwakwa irhorhomu enana. Ọrẹn mi rhe te ekete mia wian, ni mia mẹrẹn ekwakwa ri vwe serhọ. Jerẹ irhonrin edumu ọrhẹ isigẹti ephopho. O jiri-i, isigẹti ephopho ọrhẹ irhonrin edumu, no mo rhiẹ uruemru mẹ.

Ọke mie te ẹgbukpe 18, ni mi kwa riẹ Sydney. Ni mi damoma mi ne rhiẹ isodja, ọrẹn e kwe mẹ-ẹ, nime mie riẹ isukuru kodo-o. Ni mi mẹrẹn iruo uvuẹn Sydney ji rhirhiẹ avwaye te ẹgbukpe owu. Uvwrọke ọrana yi mie tu mẹrẹn Iseri Jehova. Ni mi rhiabọ dede use mi ne riẹ uyono ukoko aye, ogege ni mi mẹrẹnvwrurhe taghene ọnana yẹ ẹga urhomẹmro na.

Ọrẹn ọke oru, ni mi brorhiẹn mi na rharhumu ya wian owian ikebi. Ni mi riẹ amwa ọrọrọ re se Goondiwindi, Queensland. Ni mi mẹrẹn iruo ji rọnmọ, ọrẹn ọrẹ omemwurhọ, ni mi tuẹn inyo ẹda rhọ.

Ame i vwo emọ awanva. Ọke e vwiẹ emọ mẹ ehworhare awanva hin, ni mie roro kpahen oborẹ akpọ mẹ ono rhirhiẹ obaro na. Ni mi karorhọ oborẹ mi rhonrin uvuẹn uyono Iseri Jehova ọke mia ha uvuẹn Sydney, ni mi brorhiẹn mi ne ruẹ emru kpahen erhirhiẹ na.

Ni mi mẹrẹn Oghwa Odẹrẹ ahwanren owu, rọ vwo adrẹsi oghọn ukoko Iseri Jehova ọrẹ Australia. Ni mi nekpẹn userhumu mie aye nyoma ileta. Aye ni dje Oseri Jehova owu ro vwo uruemru esiri ọrhẹ ẹguọlọ bru mẹ rhe. O jiri-i, ni mi tuẹn uyono i Baibol rhọ rhẹ Oseri Jehova na.

Ọke mie yono i Baibol na, ni mi mẹrẹnren taghene o fori ni mi ruẹ ewene ọduado uvuẹn akpenyerẹn mẹ. Ekete i Baibol owu rọ hobọte mẹ omamọ yẹ 2 Corinthians 7:1. Oghwẹmro na ọ ha udu rhẹ ọwan aghwẹ taghene, “ọwan i ru oma ọwan fon nẹ i kemru kemru ri rhiẹ aghwa rẹn ugboma.”

Ni mi brorhiẹn mi na dobọ isigẹti ephopho ji, ọrhẹ inyo ẹda bun phan. Ra mẹriẹn taghene iruemru enana i ruẹ oma mẹ siyẹ ne na, ọ lọhọ mi na nyaji aye vwo-o. Ọrẹn, ni mia damoma mi ne ru oborẹ ọnọ merhen Osolobrugwẹ oma. Oborẹ ọ mia ha userhumu mẹ yẹ uruemru-urhi Baibol rọ ha uvuẹn Romans 12:2, rọ tare: “Are i vwe jenẹ enyerakpọ ọnana ọ ma are-e, ọrẹn, are i gbe ruẹ ewene nyoma are ine wene iroro are.” Ni mi mẹrẹnvwrurhe taghene ne mi sabu wene uruemru mẹ, o fori ne mi wene iroro mẹ, ji ha ukẹro rẹ Osolobrugwẹ ọ ha ni emru ha nie. Nyoma userhumu Osolobrugwẹ mi sabu tiobọnẹ isigẹti ephopho ọrhẹ inyo ẹda vrẹn oma.

Oborẹ ọ mai bẹn ha mẹ, yẹ ọrẹ mi na dobọ irhonrin edumu ji. Mi rhe oborẹ ọ ha uvuẹn at Ephesians 4:29: rọ tare, “Are i vwe jenẹ orharhere ẹmro o nẹ unu are rhe-e.” Udabọ ọrana, mie kiki dobọ irhonrin edumu ji-i. Ọrẹn ni mi roro kpahen ẹmro rọ ha uvuẹn Isaiah 40:26. Sekpahen ikereti ri ha idjuwu na, oghwẹmro na no seri: “Kpare ughwaro ọnọ rierun ne wu ni odjuwu na. Ọrọmo yọ ma ekwakwa enana? Ọye yọ ma ikereti buebun na; Ọye ọ jeghwai mwu odẹ harẹn aye ephian. Fọkiẹ omẹgbanhon rode ọnẹyen ọrhẹ irueruo igbevwunu enẹyen, o vwo owuorowu ro vrẹ-ẹ.” Ni mi rorori taghene orhianẹ Osolobrugwẹ o vwo omẹgbanhon rọ ma idjuwu na, ri mie nẹ ọke ephian, nọyẹ ọnọ ha userhumu mẹ ruẹ ewene ji ru oborẹ ọnọ merhiẹn oma. Nyoma ẹrhomo mia nẹ ọrhẹ omẹdamu mẹ, ni mia sabu suẹn oborẹ mia ta ọke ephian.

Ri mie rhiẹ ohworho rọ hẹrote eranmo na, mi vwe rhe vwo uphẹn mie lele ihworho buebun tẹmro kugbe-e, nime ibiẹ ihworho ọvo yi ha ekete mia wian. Ọrẹn, nyoma iyono sansan ra haphia uvuẹn ukoko i Jehova, ọ ha userhumu mẹ sabu lele ihworho tẹmro ne. Iyono na i ji ha userhumu mẹ sabu tẹmro rẹn awọrọ kpahen iyẹnrẹn esiri Uvie Osolobrugwẹ.—Matthew 6:9, 10; 24:14.

Oma ọ dabu merhen mẹ omamọ mie rhiẹ ọkpako ukoko ẹgbukpe buebun rhe na. Ọnana uphẹn ọduado ha mẹ ri mi na sabu ha userhumu rẹn imizu mẹ erọrọ. Ebrurhọ rọ maido mi mẹrẹn ne, yẹ ọrẹ omẹmẹ ọrhẹ ane mẹ, kugbe emọ ame, a ga Jehova kuẹgbe.

Mi kpẹmẹ i Jehova omamọ rọ ha uphẹn mẹ ne mi sabu ga ye, dedevwo mie riẹ isukuru kodo-o. (Isaiah 54:13) Mi dabu kwerhọ ẹmro rọ ha Proverbs 10:22, rọ tare: “Ebrurhọ i Jehova yọ lẹrhẹ ohworho fe.” Mẹmẹ ọrhẹ ekrun mẹ a tẹnroviẹ oborẹ ame ine ru yono kpahen i Jehova jeghwai ga ye bẹmẹdẹ.