Ọke re vwiẹ mẹ, eri vwiẹre mẹ i vwo ikebi uvuẹn amwa rọ ha Galicia, uvuẹn obọrẹ o rierun i Spain. Mẹmẹ yi ka ekete ọrẹ ẹne usuẹn emọ ẹrẹnren. Ekrun ame o vwo omamerhomẹ. Uvuẹn Spain ọke ọrana, orhiẹ oborẹ o titiri omamọ nẹ ọmọ owu uvuẹn ekrun na o riẹ isukuru i Catholic yanghene rhiẹ orherẹn. Uvuẹn ekrun ame, ame awansa ni djẹ odjẹ ọrana.

Ọke mia ha ẹgbukpe 13, ni mi homaba omizu mẹ ọgbọtọ ọkpako uvuẹn isukuru irherẹn rọ ha i Madrid. Ekete na o fuoma kakaka-a. Ame i vwa sabu mwu igbehia-an, irhi egbogbanhon ọvo yẹ ame a nyalele kugbe ẹrhomo ẹnẹ ọke ephian. Igidurhiọke, ame ne koko uvuẹn aghwẹlẹ ishọshi na, nẹ ame i sabu roro kodo, ọrẹn mi vwa sabu roro kpahen emru owuorowu-u. Orho ru, ame na so ijoro ji ruẹ i Mass, uvuẹn edjadjẹ i Latin. Mi vwa sabu vwẹruọ emru owuorowu-u, ni mie roro taghene Osolobrugwẹ o tephe ha mẹ. Ni mie mwuomarhọ kẹdẹkẹdẹ. Mẹmẹ ọrhẹ omizu mẹ ọkpako i rha tobọ mẹronma, ame i vwa sabu tẹmro kugbe-e, oborẹ ame a ghwai ta yẹ, “Hail purest Mary.” Ame i rha riẹ emaren hin, iminiti ọgban ọvo yẹ ame i vwori ame ina tẹmro kugbe. Ekete aran ọ vẹnẹ ekrun omamerhomẹ ame! Nọ họhọre taghene mi ha ekete kologho, ni mia viẹ ọke ephian.

Dedevwo mie nie taghene mie tikẹrẹ Osolobrugwẹ-ẹ, mi ji nyamwu ive mẹ ji rhiẹ orherẹn ọmase ẹgbukpe 17. Itiọrurhomẹmro, oborẹ aye i guọlọre yi mi ruru, ọrẹn ọke oru ni mie vwo ẹhẹn eveva sẹ mi ghini vwo use na. Irherẹn emẹse na a ta taghene ihworho ri vwo aruẹ iroro ọrana ine riẹ amwa erhanren! Udabọ ọrana, ẹhẹn eveva na ọ ji havwiẹ. Mi rheri taghene Jesu Kristi ọ daji ekete kologho-o, ukpomaran o yono ihworho ji ha userhumu rẹn aye ọke ephian. (Matthew 4:23-25) Ọke mie te ẹgbukpe 20, odjẹ mi ne rhiẹ orherẹn ọmase no nurun mẹ ọhọ. O gberi mẹ unu ọke ọduado ame usuẹn emẹse na, ọ ta mẹ taghene orhianẹ mie vwo ẹhẹn eveva, mi na sabu nẹ usuẹn aye ogege. Mie roro taghene ofẹn o mwuie mi ja rha riẹriẹ awọrọ. Omarana, ni mi nẹ isukuru irherẹn na.

Ọke mie te oboghwa, eri vwiẹre mẹ i dabu vwẹruọ erhirhiẹ mẹ. Ọrẹn, ra mẹriẹn taghene o vwo ugogo owian uvuẹn amwa ame-e, ni mi kwa riẹ Germany, ro rhiẹ ekete omizu mẹ ọhworhare ọmọvwerhe o rhirhiẹ. Ọye ọ ha usuẹn ẹko ihworho i Spain ra wọnrọn hasuẹ osehiẹn. Oma o funrun mẹ uvwre ihworho ra wọnrọn fọkiẹ ugbomọphẹ era wian ọrhẹ emẹse. Omarana, ni mi homaba aye, jeghwai rọnmọ owuọwan uvuẹn ẹko na. Ni mie roro taghene mie ruẹ oborẹ ọgbare, nime mia ghalẹ ẹbe ame i fomu phia rẹn ihworho, jeghwai ludje.

Ọrẹn ọke o jiri bẹn, ẹhẹn mẹ nọ rharhumu seriotọre. Nime ẹko na i vwe rhe ruẹ oborẹ aye a ta-a. Iroro eveva mi vwori nọ mọ gbanhonrhọ uvuẹn ẹgbukpe 1971 ọke idama ezẹko uvuẹn ẹko ame a torhẹ Spanish Consulate rọ ha uvuẹn Frankfurt. Aye i torhẹ ekete na, nime aye e ludje hasuẹ osehiẹn isuensuon i Spain. Ọrẹn, mi rheri taghene ekwẹre aye ọ gbanhon phan.

Ọke mie vwiẹ ọmọ mẹ ọkpako, ni mi ta rẹn esa mẹ taghene mi rha homaba ẹghware ẹko na ghwomara-an. Mẹmẹ ọvo ni havwiẹ kologho, nime o vwo owuọwan usuẹn igbehian mẹ bi ri rhe mọ mẹren mẹ ọrhẹ ọmọ mẹ-ẹ. Ni mie roro kpahen oborẹ ọsoriẹ mie nyerẹn. O ghini rhiẹ oborẹ o fori re ne ruẹ amwa re rhirhiẹ rhomurhọ?

Uvuẹn ẹgbukpe1976, Iseri Jehova awanva ri rhiẹ itu i Spain ni hobọ fomu ighwe ame jeghwai yẹ mẹ ẹbe ra bọn kpahen Baibol na, ni mi ghini ha aye. Ọke aye a ghwẹrioma rhe ọgbọreva ye, ni mia nọ aye enọ buebun kpahen ojẹriọ, uruemru re ni ọwan ruẹ, ọrhẹ osehiẹn. O gberi mẹ unu ọke aye a ha i Baibol na kpahenrhọ enọ mẹ ephian! Ni mi kwerhọ uyono i Baibol ogege.

Ọke ukaro, ọdamẹ mi vwori yẹ ọrẹ mi ne vwo irherhe i Baibol na ọvo. Ọrẹn, ekwakwa ni wenerin ọke mẹmẹ ọrhẹ esa mẹ a tuẹn uyono ẹnya rhọ uvuẹn Aghwẹlẹ Uvie Iseri Jehova. Ọke ọrana, ame i vwiẹ emọ eva na. Imizu na a sa rhe mọ kpare ame, ji lele ame hẹrote emọ ame uvuẹn uyono. Ni mi me vwo ẹguọlọ kpahen Iseri Jehova.

Udabọ ọrana, mi ji vwo ẹhẹn eveva kpahen ẹga. Ọke oru ni mi ya mẹrẹn ekrun mẹ obẹ i Spain. Omizu ọsẹ mẹ ọhworhare ro rhiẹ orherẹn, nọ damoma yanghan ẹhẹn mẹ, mi je rhe yono i Baibol na. Ọrẹn, Iseri Jehova ri ha obonẹ i ha userhumu mẹ omamọ. Aye i kpahenrhọ enọ mẹ ephian nẹ i Baibol na rhe, jerẹ oborẹ Iseri Jehova ri ha obẹ i Germany i ruru. Ni mi brorhiẹn taghene mi na tuẹn uyono i Baibol mẹ rhọ mi rha ghwẹrioma riẹ i Germany. Dedevwo esa mẹ ọ dobọ uyono i Baibol ọnẹyen ji, mi ji mọrọn orhienbro mẹ. Uvuẹn ẹgbukpe 1978, ni mi bromarhame rhiẹ owuọwan usuẹn Iseri Jehova.

Irherhe ọgbagba ọrẹ urhomẹmro ri ha i Baibol na, ọ yẹre mẹ obọdẹn akpenyerẹn ọrhẹ ọkpọvi ne. Jerẹ udje, 1 Peter 3:1-4 ọ ta rẹn ene nẹ aye “homariotọre” rẹn esa aye rhẹ “ọghọ okokodo,” nẹ aye i jeghwai vwo “ẹhẹn dẹndẹn ro rhiẹ emru rọ ghanranren omamọ obaro Osolobrugwẹ.” Aruẹ iruemru-urhi ọrana, i ha userhumu mẹ ruẹ ẹkẹ ro teri mẹ jerẹ ane ọrhẹ izu.

Mi rhiẹ Oseri Jehova ne emrẹ ẹgbukpe 35. Oma ọ merhen mẹ taghene mi ha usuẹn ekrun imizu akpọ ephian ra ga Osolobrugwẹ kuẹgbe, oma ọ ji merhen mẹ taghene usuẹn emọ mẹ awan isionrin, awan ẹne i ha uvuẹn ukoko na.